Alofa Mutimutivale FaaKeriso
E alala le tusitala i Niu Ioka, ISA.
O le misiona faaletino a le Faaola, ua tatou maua ai ni faataitaiga o le faatinoga o le auala e mafai ai ona tatou maua le alofa mutimutivale.
Ina ua leiloloa i le Perofeta o Iosefa Samita ma Matini Harisi ia itulau e 116 o le faaliliuga o le Tusi a Mamona, sa la mauaina se aoaiga malosi mai le Alii (tagai i le MF&F 3:6–8, 12–13). Na aveesea mai ia Iosefa le avanoa e faaliliu ai mo se taimi ma sa faanoanoa ai i lona le usitai.1 Ina ua uma ona ia faamaualaloina o ia lava ma aioi atu i le Alii mo le faamagaloga, sa faamautinoa mai e le Faaola ia Iosefa, “Ae ia manatua, ua alofa mutimutivale le Atua; … ma ua filifilia pea oe, ma ua toe valaaulia oe i le galuega” (MF&F 3:10).
Na aoao mai Peresitene Dieter F. Uchtdorf, Fesoasoani Lua i le Au Peresitene Sili, e faapea: “O Keriso o lo tatou faataitaiga. I Ana aoaoga [e uiga i le alofa mutimutivale] e pei ona atagia i Lona soifuaga, sa Ia faaali mai ai le ala ia i tatou. Sa Ia faamagalo i tagata leaga, o e le taupulea, ma i latou na saili e faatiga ma faamanua ia te Ia.”2
Ua faaali mai i tusitusiga paia o le alofa mutimutivale o se tasi lea o uiga paia o le Faaola. Na aoao mai Iesu, “Amuia e alolofa atu” (Mataio 5:7), ma le “Ia mutimutivale lo outou alofa, pei ona alofa mutimutivale o lo outou Tama” (Luka 6:36).3 O le Alofa Mutimutivale o lona uiga o le agalelei ma e aofia ai lagona ma galuega agaalofa, agalelei, faamagaloga, ma le alofa. O lo tatou agavaa mo le alofa mutimutivale e masani ona oo mai pe a tatou nofouta i tulaga e le masani ai ma le faapopoleina o isi. Na faaalia e Iesu Keriso se gafatia e le i’u o le alofa mutimutivale. Sa le “mafai ona [ia] tagai atu i foliga o tagata e aunoa ma le tiga i lo latou le mautonu, lo latou le malamalama, ma lo latou faanoanoa. … Soo se taimi lava na te vaaia ai ni tagata ua matapogia ma tuulafoaiina e pei o mamoe e leai so latou leoleo, na ootia lona finagalo i le alofa ia i latou.”4
”Soo se taimi lava na silasila atu ai [le Faaola] i tagata e matapogia ma tuulafoaia ma faataapeapeina e pei o ni mamoe ua leai le leoleo mamoe, na ootia lona finagalo i le alofa ia i latou.”
The Lost Lamb, saunia e Newell Convers Wyeth, toelolomiina i le faatagaga a le Colby College Museum of Art
O aoaoga faavae nei mai tala o le Feagaiga Fou o loo faaalia ai le auala na faalautele atu ai e le Faaola le alofa mutimutivale ma le auala e mafai ona tatou filifilia e alofa mutimutivale atu ai i isi.
Na faaali atu e Iesu le alofa mutimutivale e ala i le le tuuaia o isi.
I le Talisuaga Mulimuli, i itula ao lei oo i le faalataina, na talisua faatasi ai Iuta Isakara i le Paseka ma isi au soo. Ina ua fetalai atu Iesu, “E faalataina ai e so outou,” na tuufesili le au soo, na aofia ai ma Iuta, ia te Ia, “O au ea?” (Mataio 26:21–22). Na tali atu Iesu ia Iuta, “O le mea e te faia, ia vave ia ona fai” (Ioane 13:27). Ma i le faitotoa o le Faatoaga o Ketesemane, na toe feiloai ai Iesu ma Iuta. Na faapea mai Iuta, “Rapi e, si ou alofa” ma faafeiloai i le Faaola i se sogi (Mataio 26:49), lea na fesili ai Iesu,” E te faalataina ea le Atalii o le tagata ma le sogi?” (Luka 22:48). O le tali a Iesu, e ui e lei aveesea ai mai ia Iuta ia taunuuga o ana amioga, e lei taoto foi le tuuaiga i ona luga ae nai lo lena o le aioiga ina ia lagona e Iuta le sa’o ma le sese.
Ina ua mavae ona onosaia e Iesu i lima o fitafita Roma le taimi o le faapagotaina, sasaina, sauaina, savalia o le ala i le aai, ma amoina ma le tutuiina i fao i se satauro, Na Ia silasila atu ma le alofa mutimutivale i e na pueina o ia ma aioi atu, “Lo’u Tama e, ia e faamagaloina atu ia te i latou; aua ua latou le iloa le mea ua latou faia” (Luka 23:34).
Na faaali atu e Iesu le alofa mutimutivale e ala i le filifili e alofa nai lo le faasala.
I le amataga o Lana galuega, na tu ai Iesu e malolo ma ia maua Sona faasiligamalosi i se vaieli i Samaria i se tasi o Ana malaga. Sa sau se fafine i le vaieli e utu vai, ma sa fetalai atu le Faaola ia te ia. Na faateia o ia i Lona fetalai atu ia te ia, “aua e leai ni mea e feaveai a Iutaia ma Samaria.” Peitai Na te lei amanaiaina ia aga masani ia na ta’ufaatauvaaina ai o ia i le vaai a isi tagata. Sa Ia aoaoina o ia e uiga i le vai ola o le talalelei, ma sa Ia molimau atu ia te ia, “O Au lava lenei, o le tautala atu ia te oe [o le Mesia].” (Tagai Ioane 4:3–39.)
I aso faaiu o Lana galuega i Perea, na ui ane ai Iesu i le aai o Ieriko e agai atu i Ierusalema. O se tagata saasaa, mauoa e igoa ia Sakaio na ae i luga o se laau ina ia matamata i le Faaola ao Ia ui ane. Sa silasila atu Iesu ia te ia ma valaaulia o Ia Lava i le fale o Sakaio. Na tomumu nisi o soo o Iesu ina ua latou vaaia lenei mea, ua faapea mai “ua alu atu ia [Iesu] i le tagata agasala e api ai.” Ae na silasila Iesu i le agalelei o Sakaio ma fetalai atu, “Ua oo mai le faaolataga i le aiga nei i le aso ina ua fai o ia ma atalii o Aperaamo.” (Tagai i le Luka 19:1–10.)
Na faaali atu e Iesu le alofa mutimutivale e ala i le tuuina atu i isi o avanoa e tele e salamo ai ma ia faamagaloina.
I le amataga o Lana galuega, na toe foi ai Iesu i le sunako o Lona nuu i le aai o Nasareta, lea na Ia tapuai ai i le tele o taimi. Na ia faitau atu ia i latou o e na faapotopoto mai mo le Sapati se valoaga mai ia Isaia e uiga i le Mesia. Ona Ia molimau atu lea ma le manino ia i latou o Ia o le Mesia. O tagata sa i le malumalu sa “faatumuina i le toasa” i Ana upu, ma sa latou “tuli ia te ia i tua o le aai … ina ia latou lafo ifo ia te ia” mai le tofē. (Tagai i le Luka 4:16–30.) Na avea uo o Iesu i le olaga atoa ma Ona fili. I se taimi mulimuli ane, na toe foi atu ai Iesu i Nasareta ma aoao atu i tagata. Ma e ui lava ina latou toe feita foi ia te Ia, ae sa Ia taumafai faalua e fesoasoani ia i latou ina ia malamalama. (Tagai i le Mataio 13:54–57.)
O taitai Iutaia o fili ia na sili ona feita i le Faaola. Sa latou saili e fasioti ia te Ia aua sa lamatiaina e Ia a latou tu ma aga masani. Ae sa faaauau pea ona uunaia i latou e Iesu ina ia salamo ma ia faaleleia i le upumoni. O loo faamaumauina i tusitusiga paia le le itiiti ifo ma le 10 ni lauga tetele na tuusao atu e Iesu i nei taitai, lea na Ia faailoa atu ai a latou agasala ma valaaulia i latou ina ia salamo.
Na faaali atu e Iesu le alofa mutimutivale e ala i le aloese mai le [loto] tiga.
O Ierusalema o le nofoaga mulimuli lea na puapuagatia ma maliu ai le Faaola. Na mafai lava ona maua o Ia i le le fiafia ma le ita i le nuu ma ona tagata; ae nai lo lena, sa masani ona Ia faaalia le faanoanoa i lo latou amioleaga ma le mumusu e salamo.
I aso a o lumanai Lona Faasatauroga, na tietie atu ai Iesu i Ierusalema i se asini. Na olioli le motu o tagata o e na mulimuli ia te ia, ma faataatitia o latou ofu i luga o le auala i Ona luma ma vivii atu i le Atua. (Tagai i le Luka 19:28–38.) Peitai na silafia e Iesu o le a le tumau le faamaoni o tagata i Ierusalema. A o Ia silasila atu i le aai i le taimi o Lona vaiaso faaiu, na tutulu le Faaola, ma fetalai atu, “Ierusalema e, Ierusalema e, o lē fasiotia perofeta, ma fetogi i maa i e ua aauina atu ia te oe; ua tele lava o’u manao e faapotopoto i la’u fanau, … a e lei mafafai outou!” (Mataio 23:37; tagai foi i le Luka 19:41–44).
O nai aso mulimuli ane, na liliu ane ai le motu o tagata ia Iesu ma faatonuina le fasiotiga o Ia. A o taitaieseina atu le Faaola ina ia faasatauroina, “sa mulimuli atu ia te ia le motu o tagata e toatele, ma fafine, … ua taufaitagitui ma taufaitagiaue ia te ia.
“A ua faliu Iesu ia te i latou, ua fetalai atu, Tama fafine a Ierusalema e, soia le tagi ia te au, a ia outou tagi ia te outou, atoa foi ma a outou fanau” (Luka 23:27–28). E ui lava i le tauemuina o Ia i luma o tagata lautele ma mafatiaga matautia faaletagata lava ia i lima o tagata Ierusalema, ae sa lei ita lava le Faaola ia i latou ma sa faaali atu le faanoanoa i lo latou mumusu e salamo.
Na faaali atu e Iesu le alofa mutimutivale e ala i le fesoasoani atu i isi e i ai manaoga.
I se tasi o Ana malaga, na afio atu ai Iesu i le aai o Naina, lea na Ia vaaia ai “se tagata oti, o le tama e toatasi o ia a lona tina, o ia foi le fafine ua oti lana tane” (Luka 7:12). Na faamatalaina e Elder James E. Talmage (1862–1933) o le Korama a Aposetolo e Toasefululua le vavega na tupu i se taimi mulimuli ane e lei mamao i lana tusi Jesus the Christ: “Na silasila atu lo tatou Alii ma le agaalofa i luga o se tina faavauvau, lea ua tuua nei e le tane ma le atalii; ma, na lagonaina e Ia lava le tiga o lona mafatiaga, o lea na Ia fetalai atu ai i se siufofoga malu, ‘Aua e te tagi.’ Na Ia pa’i atu i le fata [ma… fetalai atu i le tagata oti ua Ia faapea atu: ‘Le taulealea e, ou te fai atu ia te oe, Ina tulai ia.’ Ma na lagona e le tagata oti Lona siufofoga o le Alii o mea uma lava, ma vave ona nofo i luga ma tautala atu. Na tuuina atu ma le agaalofa e Iesu le taulealea i lona tina.”5
Na faatinoina e Iesu le tele o isi vavega mo tagata i taimi o mafatiaga. Na Ia faamaloloina se lepela, faatoafilemuina le sami, ma toe faatuina le afafine o Iairo mai le oti. Sa Ia faaatoatoaina se tagata ma’i i le taelega i Petesa, le tagata tutuli ma e le lelei lana tautala, ma faamamaina ni lepela e toa 10. Na matuai leai lava se faamoemoe o i latou taitoatasi.
Na faatinoina e Iesu le anoanoai o vavega mo tagata i taimi o mafatiaga. Na Ia faamaloloina se lepela, faatoafilemuina le sami, ma toe faatuina le afafine o Iairo mai le oti.
Ata na tusia e Dan Burr
Ua faailogaina e le Faaola le ala e mulimuli ai. E mafai ona tatou taumafai ia alofa mutimutivale e ala i le le tuuaia o isi, filifili e alofa atu nai lo le faasala, tuuina atu i isi le tele o ni avanoa e salamo ai, ma aloese mai le le fiafia, ma fesoasoani atu i isi o i ai manaoga. O le tele o lo tatou iloa ma manatua o le anoanoai o alofa mutimutivale ua tuuina mai ia i tatou e ala mai ia Iesu Keriso, o le tele foi lea o lo tatou aoao e faasafua atu le alofa mutimutivale i isi.
Ua fautua mai Peresitene Uchtdorf: “Ua lava le lototiga ma le faanoanoa i lenei olaga e aunoa ma lo tatou faaopoopo atu i ai e ala i lo tatou lotomaaa, lē fiafia, ma le ita. … E tatau ona tatou lafoai a tatou faitioga. … O le ala lena a le Alii.”6
Ina ua asiasi atu le Alii toetu i tagata sa Nifae i Amerika, na Ia aoao atu i tagata. Ma ina ua oo i le taimi e malaga ese ai o Ia, “sa toe silasila solo faataamilo ona fofoga i luga o le motu o tagata, ma silasila atu ua maligi o latou loimata. …
“Ma sa ia fetalai mai ia te i latou: Faauta, ua tumu lo’u loto i le agaalofa ia te outou.
“E i ai ea ni isi o ia te outou ua mama’i? … Ia aumai i latou iinei ma o le a ou faamaloloina i latou, ona ua ou agaalofa tele ia te outou; ua tumu lo’u loto i le alofa mutimutivale” (3 Nifae 17:5–7; faaopoopo le faamamafa). O Lona alofa mutimutivale e le iu. O le a Ia faamanuiaina i tatou i le meaalofa faalelagi o le alofa mutimutivale pe a tatou o mai ia te Ia (tagai i le Moronae 10:32).