Sa Mafai ona Ou Faagalo Lo’u Faanoanoa
O le tusitala e sau mai Taiuani.
Ina ua papatisoina au uo o Uso Chen ma lona faletua i totonu o la matou uarota, sa ou matuai fiafia lava. I se tausaga talu ona mavae lo latou papatisoga, na faamauina ai i latou i le malumalu, ma sa faamauina lo la atalii ia i laua lea na maliu ae latou te lei auai i le Ekalesia. Sa matagofie le vaai atu i le Au Chens o tuputupu ae i le talalelei.
Ona maliu lea o Uso Chen i se faalavelave tau taavale i le tausaga na sosoo ai. Ina ua mavae le faalavelave, sa foliga mai ua i ai pea lona maliu i taimi uma i lo’u mafaufau ma ua tele ina taufaafefe i a’u miti. Sa ou ala ae i loimata ma tuufesili pea lava pea, “Aisea? Aisea e faatagaina ai e le Alii lenei ituaiga o faalavelave e tupu? Aisea ua tupu ai lea mea faapea i lenei aiga matagofie?” I se tasi aso a o ou tauivi ma nei fesili, sa ou tago ai i se tusi lesona ma faitau i upu nei mai ia Peresitene Spencer W. Kimball (1895–1985):
“Afai tatou te vaavaai i le olaga faaletino o le soifuaga atoa lava lea, o tiga, faanoanoaga, toilalo, ma le puupuu o le soifua o le a avea ma mala. Ae afai tatou te vaavaai i le olaga o se mea e faavavau e oo mamao atu i tua i le muai olaga ma oo atu ai i le lumanai pe a mavae le oti, ona mafai lea ona tuu uma mea e tutupu i se vaaiga tatau. …
“Pe tatou te le oo ea i faaosoosoga e tofotofo ai lo tatou malosi, o ma’i ina ia tatou aoao ai le onosai, o le oti foi ina ia mafai ai ona maua le tino ola pea ma le faamamaluina?”1
O le taimi lena, sa ou filifili ai e faagalo lo’u faanoanoa ma vaai atu i le lumanai folafolaina e mafai ona maua. Sa ou vaai faalemafaufau i le toefaatasia fiafia o Uso Chen ma lona aiga. O lena vaaiga na aumaia ia te au le filemu. Ou te iloa o le a aumai ia i tatou e le Tama Faalelagi le poto ma le lototele e feagai ai ma faigata.