o a’u Tatalo o le Lotofaafetai

SauSa Saunia e Christie Skrinak

E alala le tusitala i Nevada, ISA.

A o matou tauivi i mea tautupe, na ou lagonaina e tele naunau o matou manaoga e manaomia ona matou tatalo ai. Mata e mafai moni ona taula’i atu a’u tatalo i le na o le agaga faafetai?

O tausaga ua mavae sa ma faatauina ai ma lo’u toalua se fale sa ma faamemelo i ai ma faaaluina le tele o taimi ma tupe i le toe faiga. O le sefuluvalu masina mulimuli ane, na tifato ai le tamaoaiga. Na tatau ai ona matou faaaluina le matou teugatupe sa faigata ona maua, i se nonogatupe na faatau ai le fale, ma le tele o tupe faaalu matou te le’i mafaufauina o le a i ai.

Na mavae atu masina o tofotofoga ma faigata tautupe. Sa matou feagai ma se masina na faapitoa le faigata ona o lipea o le fale ma le taavale, pili o le vaaiga o fomai, ma se faaitiitia o le totogi. Sa vave ona nimo atu le matou tupe teu.

Ou te manatua le tatalo ma aioi atu pea mo mea na matou manaomia. O le tumu i le atuatuvale, sa faigata ai ia te au ona vaai faalelei le ma fanau ma manaoga o le matou aiga, a o ou pau atu i le atuatuvale ma le faanoanoa. Ae, sa faaauau pea ona ou tatalo, sailia o le faalaeiauga ma le iloa o lenei mea o le taula lea na taofiofia a’u mai le pau atili atu i le pogisa.

Ina ua mavae masina o tatalo mo se fesoasoani, na amata ona ou mafaufau i ni auala e tatalo atili ai ma le loto atoa. Na aumai e le Agaga i lo’u mafaufau le fautuaga mai taitai perisitua ma tusitusiga paia na aoao mai ai le taua o le faaalia o le agaga faafetai i le Tama Faalelagi. O nei uunaiga sa fesoasoani ou te iloa ai, na manaomia ona ou faailoa atu le loloto o le agaga faafetai mo o’u faamanuiaga ae faaitiitia le ole atu mo mea sa manaomia e i matou ma le matou aiga. Sa ou filifili ai ou te taumafai mo le tasi le vaiaso e faataatiaese a’u olega i aso taitasi ae ia faaali atu na o le agaga faafetai i a’u tatalo.

Sa faigata. Sa ou lagonaina le i ai o le anoano o manaoga o lo’u aiga. Sa ou lagonaina e pei lava na ou tuua i lalo lo’u aiga e ala i le le ole atu mo faamanuiaga sa matou matuai manaomiaina lava. O le a faapefea ona faamanuia a’u e le Alii pe afai ou te lei ole atu?

E ui lava i lo’u le mautonu e uiga i ai, ae sa ou taumafai pea. E le’i umi ae ou iloaina o a’u tatalo sa le toe avea o ni olega ta’ufaafia. Sa ou toe mauaina le tomai e iloa ai manaoga o isi ma vaai i tua atu o o’u faafitauli i faamanuiaga na fai pea mo a’u. O lo’u agaga faafetai na ou latalata atili atu ai i le Faaola, ma faamafanafanaina ai a’u i auala ma semanu ou te le mauaina.

Na oo mai pea se mau i lo’u mafaufau: “Afai e faapea ona faaofuina e le Atua le vao o le fanua, o ola mai i le aso, a e lafoina a taeao i le ogaumu, e le sili ea ona faaofuina o outou e faatuatua itiiti?” (Mataio 6:30). O lenei mau na faalotomaualaloina au a o faaauau pea ona ou tatalo. E ala i le loto faafetai, na ou aoao atili ai e uiga i le lotomaualalo moni.

A o faagasolo le vaiaso, sa suia a’u tatalo mai le “Ou te faafetai i Lau afio mo meaai, lavalava, ma le malutaga” i le “ou te faafetai i Lau afio mo se aiga ua E faasaoina ma tausia lelei, mo le puipuiga o loo faaauau pea ona E tuuina mai ia i matou. Ou te faafetai i Lau afio mo mea o le a faaauau ona E faamanuia ai i matou.” Ou te manatua foi na ou tatalo, “Ou te faafetai i Lau afio mo le matou faalagolago atu i Lau afio, mo Lou manatu mai ia i matou, ma mo le ala o loo E sauniaina mo i matou e sao ese ai mai lenei nofopologa, po o le a lava.” O se mea faapena, na oo ina avea ai a’u tatalo ma tatalo e le na o le agaga faafetai, e le na o le lotomaualalo, ae o le faatuatua foi. E aunoa ma le ole atu mo le faamanuiaga, sa ou faaali atu ai le faatuatua o le a tausia i matou e le Alii, ma sa matuai maualuga le tupu o lo’u faatuatua.

I le taimi o nei talosaga, na tele ina tosina atu o’u mafaufauga i le ositaulaga a le au Paia anamua, ma ou te fesili ifo ai ia te au lava, po o le a se mea sa ou naunau e ositaulaga. Na mavae atu nai nisi aso, ona matou tuuina lea o le matou fale pele mo le faatauina atu. Sa matua maualalo le maketi o fanua ma fale, ae o le mea na ofo ai, sa faamanuiaina i matou i le taulia o le matou fale. E ui ina sa tele le matou tupe na gau—e pei ona sa matou manatulia—ae na i ai nei lo matou aiga i se tulaga e amata fausia ai se faavae sili atu ona mausali faaletino.

E ui i lea, o le faatauina atu o lo matou fale i taimi faigata faapena, e le o le vavega lea ua ou aoaoina mai i lenei aafiaga. O le vavega o le faatuatua na ou atiina ae ma le malamalama na ou maua ai. Ua folafola mai e peresitene James E. Faust (1920–2007), Fesoasoani Lua i le Au peresitene Sili, o le agaga faafetai o se “mataupu faavae faaola.”¹ Ou te manatu na ou oo i se mea e pei o le mea sa ia talanoa mai ai, a o liliu atu lo’u loto ma a’u tatalo i le Tama Faalelagi, mauaina o le faamafanafanaga, toafilemu, ma le taitaiga. O la’u molimau fou na maua e uiga i le agaga faafetai o le, e musuia ai le lotomaulalo, o le lotomaulalo e uunaia ai le faatuatua, ae o le faatuatua e aumaia ai vavega.