E Amata ia Oketopa ia Autu Fou mo Faiaoga Asiasi
E amata atu ia Oketopa 2013 o le a taulai atu ai Savali a Faiaoga Asiasi o le Aualofa i le misiona paia a Iesu Keriso ma le tele o Ana matafaioi ma uiga paia.
E pei ona tatou faitau ai i le O Afafine i Lo’u Malo: O Le Talafaasolopito ma le Galuega a le Aualofa, “A o i ai Iesu Keriso i le fogaeleele, sa Ia faailoa mai ia i tatou ia ala e tatau ona tatou ola ai.”1 E ala i le suesue ma le taulai atu i matafaioi ma uiga paia o le Faaola, o le a aoao ai ia tuafafine i le Ekalesia ia avea e faapei o Ia2 ma o le a mafai ai ona talanoaina faatasi ma tuafafine latou te auauna i ai le auala e mafai ai e aoaoga ma faataitaiga a le Faaola ona uunaia o latou olaga.
Sa faaali mai e le Alii ia i tatou le auala e auauna atu ai—le auala e leoleo ai, faamalosia, ma aoao ai e le tasi le isi. O Lana galuega o se auaunaga i tagata, e taitoatasi.3 O faiaoga asiasi o la tatou avanoa lea e mulimuli ai i Lana faataitaiga.
Sa molimau mai Peresitene Henry B. Eyring, Fesoasoani Muamua i le Au Peresitene Sili e faapea, “o faiaoga asiasi o se vaega o le fuafuaga a le Alii e tuuina atu ai fesoasoaniga mo tagata i le lalolagi atoa. … ‘Sa Ia faatulagaina se mamanu.”4 I le avea ai ma faiaoga asiasi, tatou te manatua foi le fautuaga a Peresitene Thomas S. Monson: “O i tatou o aao o le Alii i le lalolagi, ua i ai le tiutetauave e auauna atu ma siitia Ana fanau. O loo faalagolago mai o Ia ia i tatou taitoatasi.”5
© Puletaofia e le IRI