O Le Faamasinoga Tonu ma le Alofa Mutimutivale o le Atua
Mai se lauga o le faeasaite, “Borne Upon Eagles’ Wings,” na tuuina atu i le aso 2 Iuni, 1974, i le Iunivesite o Polika Iaga. Mo le tusiga atoa i le gagana Peretania, alu i le speeches.byu.edu.
Ou te iloa o le a tatou toe faatasi ma le Faaola, pe afai lena tatou te faamaoni ia te Ia, o le a tutu saoloto—e aunoa ma ni noataga ma ni avega—ma o le a tatou iloa i le faailoga i Lona tino se mea o Lona nofopologa ma le faapagotaina ma le taulaga maliu mo i tatou.
Ata na pueina e Jeremy Burke Hunter, e le mafai ona kopiina
Sa lei pei o nisi sauniga faauu na ou auai atu i ai muamua. E toa 44 le au faauu, o alii uma. Sa lei i ai ni o latou ofu talaloa faaakatemia masani ai po o ni pulou po o ni ofu faauu. Na tofu laeina e alii taitasi se ofutino lanumoana vaivai ma se ofuvae lanumoana malosi.
E lei faia le sauniga i se faletaalo po o se malae taalo pe oo lava i se fale faafiafia matagofie. Sa faia i se tamai falelotu e faaaoga e le tele o lotu i le Falepuipui o le Setete o Iuta. O le vasega faauu na maea ma le manuia se tausaga o le suesue i le Tusi Paia, lea sa lagolagoina e Le Ekalesia a Iesu Keriso o le Au Paia o Aso e Gata Ai ae sa tatala mo i latou uma o e na fia auai.
O le tatalo amata sa faia e se alii talavou sa foliga mai o se tama itiiti. A oti o ia i le fefe, ae sa ia tuuina atu se tatalo mai lona loto. Sa faafalepuipuiina o ia mo le 10 tausaga atonu foi o lona olaga atoa i se faasalaga o le gaoi faaauupegaina. O le tatalo faaiu na saunia e se alii na 45 pe 50 tausaga le matua ma na foliga mai o se alii o se aiga o se tasi. Sa faasalaina o ia e soloatoa i le falepuipui ona o le fasioti tagata faamoemoeina.
O se alii talavou na tatala mai i tua mai le falepuipui na toe foi e avatu lana tusi faamaonia ma ia faamalosiau i ana paaga. Sa ia faapea mai, “Alii, o le vaaiga i le falepuipui e matua mataga lava. E sili atu le manaia o foliga o fafo. Taumafai e manatua lena mea.” Ona ia liliu atu lea i tagata fai mai, i uo ma aiga o e na o mai, ma faapea atu, “O outou o se malamalama i se nofoaga pogisa. Pe ana leai lo outou alolofa, semanu e le mafai ona matou o ese mai i le mea o loo matou i ai i le mea e tatau ona matou i ai.”
Ina ua maea le sauniga, na faapea mai le pagota lea na taitai, ma se lagona ootia i lona leo ma sina puao i ona mata, “O se mea sili ona lelei lenei ua tupu i lo matou tausaga. E sili atu nai lo le Kerisimasi. E sili atu nai lo le aso Faafetai. E sili atu foi nai lo le Aso o Tina. E sili atu ona ua matou malamalama, ma o le latalata lena matou te oo atu i ai i le ola saoloto.”
Ata pue © Thinkstock
Ona pao lea o le tapuniga o faitotoa i o maua tua ma lou toalua. I lena po na ma o ai i le fale, ma ou te faailoa atu sa le mafai ona ou moe. Sa faapopoleina au e lena aafiaga. I le vaveao o lena taeao, sa ou maua ni lagona ma ni manatu ma se tali atu i le faafalepuipuiina ma le saolotoga (ma lo la fesootaiga i le malamalama ma le alofa) ou te lei mauaina muamua.
O Le Faamasinoga Tonu a le Atua
O se tasi o lagona sa ou maua i lena po e faapea, o le Atua e sa’o ma tonu. Fai mai Alema: “E te manatu ea e mafai e le alofa mutimutivale ona faoa le faamasinotonu? Ou te fai atu ia te oe, e Leai; e leai sina iota e tasi. Afai e faapea, po ua le toe avea le Atua ma Atua” (Alema 42:25). Na faapea atu le Aposetolo o Paulo i Kalatia, “Aua nei faaseseina outou; e le ulagia le Atua: aua o le mea e luluina e le tagata, o le mea lava lea e seleseleina mai ai e ia” (Kalatia 6:7).
O se tasi o o’u manatu na sosoo ai e faapea, o le uiga moni lava o le tala a Paulo tatou te mauaina taunuuga e tusa ai ma a tatou amioga ma galuega. Na ou toe manatuaina foi afai tatou te totoina ni vaotuitui, tatou te le fuafua moni lava e selesele mai ni sitolōperi [strawberries]. Pe afai tatou te totoina le ita, tatou te le faamoemoe moni lava e maua mai ai le tele o le alofa. Tatou te mauaina mai mea sa tatou totoina.
Ona oo mai lea o se isi manatu a ou manatuaina na alii i o latou faanoanoaga: o se mea e tasi le seleseleina o se mea na tatou luluina, ae i se isi itu, o le a tatou seleseleina pea i ni aofaiga tetele. Tatou te totoina se vaotuitui laitiiti, ma tatou maua ai le tele o vaotuitui—o tausaga ma tausaga o vaotuitui, o togavao tetele ma ona lala. E le mafai ona tatou tineia seiiloga e sasa i lalo. Afai tatou te luluina sina ita laitiiti, e le umi ae tatou seleseleina le matua faateleina o le ita—feitagai ma le le fiafia ma taua’iupuga ma iu ai ina fetauai ma amioleaga.
Ma, o le le mafaufauina, sa ou maua ai se malamalamaaga faamafanafanaina o lo’u manatu muamua sa i ai—o le Atua e sao ma tonu—sa le tiga tele e pei ona faalogoina ai. Pe o le a lava le taufaafefe atonu e i ai le mafaufau i se Atua e tonu ma sao, ae e sili atu ona matua taufaafefe ia te au le mafaufau atu i se Atua e le tonu ma sao.
O se mataupu faavae autu o aoaoga faavae o le Au Paia o Aso e Gata Ai, o le tatau lea ona tatou iloa o le Atua e sao ma tonu ina ia mafai ai ona agai i luma. O se tasi o uiga taua o le Atua o le faamasino tonu, ma o le a tatou le maua le faatuatua—ona o le fefe—e ola amiotonu ai pe ia lelei atu ona alofa ai, pe ia sili atu ona naunautai ma vave salamo ai, pe afai tatou te lei manatu o le a tatou taulia mo le faamasinoga tonu, ae afai na tatou manatu o le a sui e le Atua Lona finagalo ma filifili ai sa i ai se isi seti o tulafono.1 Talu ai ona ua tatou iloa o le Atua e sao ma tonu, ma o le a le toe avea ma Atua pe ana faapea e le faapena, ua ia i tatou le faatuatua e agai ai i luma, ma le iloaina o le a le avea i tatou ma tagata e aafia fua i faaiuga le talafeagai, po o ni suiga e lei fuafuaina, po o se aso leaga, po o se ulaga le lelei. O lena faamautinoaga e ese le faamalosiauina.
O Le Alofa Mutimutivale o le Atua
Ona ou mauaina lea o se isi foi manatu. Oka sou faafetai ona o le Atua o Ia lava lea, e tatau foi la ona avea o Ia ma Atua alofa mutimutivale. I le Alema e 42, ina ua uma ona faamautinoa atu e Alema ia Korianetona o le Atua e sao ma tonu, sa ia tautino mai o lena lava Atua e tatau ona alofa mutimutivale foi ma o le a maua e le alofa mutimutivale le tagata salamo. Ia, o lena manatu sa ese ia te au aua o lea na ou i ai nei lava i le falepuipui a le setete. O lenei manatu na aumaia ia te au le faamalosiauga: E maua e le alofa mutimutivale le tagata salamo. Sa tonu ia te a’u e faapea, afai e tatau ona o na alii i le falepuipui ina ia faaaoga ai le meaalofa o le alofa mutimutivale—ma afai o le o atu iina latou te maua ai le talalelei a Iesu Keriso po o tusitusiga paia po o le Togiola—o lona uiga na aoga lo latou faafalepuipuiina.
O lea ia tatou o ai i le nofoaga o le faanoanoa—i le epikopo po o le Alii po o i latou ua tatou faatiga i ai, pe ia i latou na faatiga ia i tatou. Ou te matea, o loo i ai o tatou lava tamai falepuipui, ua siomia ai i tatou. Afai o le o i ai iina o le mea lena o le a tatou salamo moni ai, ma ia mafai ai ona tatou talosagaina ai ma le tatau le meaalofa o le alofa mutimutivale, ona tatau lea ona tatou faia.
Ou te iloa e le faigofie le foi i tua ma toefaafoi i tua mea ua uma ona fai ma faia se amataga fou, ae ou te talitonu ma lo’u loto atoa e faigofie atu ma e mautinoa lava e sili atu ona faamalieina le toe amata nai lo le alu ai lava ma taumafai e talitonu o le a leai se aafiaga o le faamasinoga tonu.
Ata na tusia e Welden C. Andersen
Fai mai se tasi o tagata Peretania atamai ou te fiafia i ai: “Ou te le manatu o tagata uma o e filifilia auala sese e fano; ae o lo latou laveaiina e aofia ai le toe faafoi atu i le auala sao. O se faaopoopo [faamatematika] e [le sao le faiga] e mafai ona toe faasao: ae na pau lava le ala e mafai ai o le toe foi i tua seia e mauaina le measese [ona] toe fai atoa lea mai lena tulaga, aua e le mafai lava ona sa’o pe a faaauau ai pea. E mafai ona toe faaleaoga le leaga, ae e le mafai ona ‘oo atu’ i se mea lelei. E le faaleleia e le taimi. E tatau lava ona aveese le mala.”2
O lea la, o le Atua e sao ma tonu, e “maua e le alofa mutimutivale le aia i le tagata ua salamo” (Alema 42:23), ma e mafai ona toe talepeina le leaga.
O Le Manaomia o le Salamo
O le manatu faaiu ma le sili na ou maua na fesoasoani ou te malamalama ai i le mea atonu ou te lei malamalama moni i ai. O le mafuaaga lea i augatupulaga uma, i tisipenisione uma, na fetalaia mai ai e le Alii le mea na Ia fetalaia mai i le amataga lava o aoaoga faavae o lenei tisipenisione: “Ia leai se mea e te fai atu i lenei tupulaga tau lava o le salamo; tausi i a’u poloaiga” (MF&F 6:9). Na avea lena mea ma se manatu ma se fuaiupu ua sili ona lelei, aoga, ma faagaeetia mo au. I se isi itu, na ou iloaina, ou te lei malamalama muamua, e leai lava se isi auala e ese mai i le salamo.
Afai e pei oe o isi tagata o le olaga nei, e i ai nisi o vaega e tatau ona tatalaina mai ai oe lava ia, e i ai ni ou noataga ma saisaitiaga e mafai ona faasaoloto mai ai oe, ma e i ai nisi o agasala e mafai ona e salamo mai ai. Sei ou faaaogaina sina faataitaiga lava e tasi: o le nofopologa i le valea.
O le a mea e foliga mai ia te au o le saisaitiaga muamua aupito maualuga i o tatou olaga, o le utiuti lea o mea tatou te iloa. Tatou te vave aoaoina i o tatou olaga ni faaupuga laiti tautalagia soo. O le lua o ia mea o le, “O le valea e taitai atu ai i le fiafia atoatoa” ma le “O mea ou te le iloaina o le a ou le tiga ai.” Sei ou fai atu ma le malosi uma o ia te au, e leai se mea o le a sili atu ona tiga ia te oe nai lo mea e te le iloa. Ou te talitonu o le a tuuaia i tatou mo noataga faaleagaga tatou te aafia ai, ma o le a faasalaina i tatou i lenei olaga po o le isi foi olaga mo mea tatou te le aoaoina.
I totonu o mataupu faavae o lo tatou faatuatuaga ua tatou aoao ai e le mafai ona faasaoina i tatou i le valea (tagai i le MF&F 131:6), o mea tatou te aoaoina i lenei olaga o le a tutulai ae ma i tatou i le toetutu (tagai i le MF&F 130: 18), o le a tatou maua faamanuiaga e tele i le lalolagi a sau, pe afai tatou te maua le atamai (tagai i le MF&F 130:19), e faaolaina i tatou i le aofaiga o mea ua tatou aoaoina,3 o le malamalama ma le upumoni o le a lafoaiina le leaga (tagai i le MF&F 93:37), o le mamalu o le Atua o le atamai lea (tagai i le MF&F 93: 36), ma isi lava mea. I se tasi taimi i le amataga o le tisipenisione lenei, na tuuaia uma ai le Ekalesia atoa. Ua fetalai mai le Alii i le vaega e 84 o le Mataupu Faavae ma Feagaiga:
“Ma ou te tuu atu nei ia te outou se poloaiga ia outou faaeteete e faatatau ia te outou lava, ia outou gauai ma le filiga i upu o le ola e faavavau.
“Ona ia outou ola i afioga uma e tulei mai le fofoga o le Atua.
“Aua o le afioga a le Alii o le upumoni lea, ma o soo se mea ua moni, o le malamalama lea, ma o soo se mea ua malamalama, o le Agaga lea, o le Agaga lava lea o Iesu Keriso” (fuaiupu 43–45; ua faaopoopo le faamamafa).
O le amataga o le a iu ina tatou oo i ai i le afioaga o le Alii o Iesu Keriso, lea o loo ave i ai i tatou e le vaega e 84 o le upu lea.
“Afai tou te tumau ia te au, a tumau foi a’u upu ia te outou,” na tautino mai e le Alii i Lana auaunaga, “o mea uma lava tou te mananao i ai, tou te ole atu ai, ona faia lea mo outou” (Ioane 15:7; ua faaopoopo le faamamafa).
O Le Taua o le Saolotoga
Afai tatou te filifilia se autu mo lo tatou olaga—le olaga lea ua tatou iloa i le taimi nei, e le o lo tatou olaga ua mavae i le muai olaga ma e le o le olaga foi o loo i le lumanai—o lena autu e tatau ona i ai se mea e fai i le sailiga mo le saolotoga moni. Ua tatou iloa o se vaega taua o le Fono tele i le Lagi sa faaaluina lea i le aoaoina o i tatou i le auala tatou te ono agai atu ai i luma i le saoloto atoatoa. O le ala a le Tama o le faitalia ma filifiliga—o le saolotoga e faia ai se mea sese ae i le iuga lava o le saolotoga ia faamanuiaina. Na tuuina mai le tele o malupuipuiga faapea ma mana uma o le atulaulau ina ia tuuina mai ai le faamaoniga o lo tatou saolotoga e faaaoga ai o tatou faitalia ma toe foi atu ai i lo tatou aiga faaselesitila. O nei malupuipuiga e aofia ai le atoatoaga o le upumoni o le talalelei ma le Togiola a le Faaola o Iesu Keriso.
O Iosefa Samita i le Falepuipui o Liperate, saunia e Greg K. Olsen, e le mafai ona kopiina
Tatou te oo moni lava i le nofopologa ma le falepuipui pe a tatou le saoloto. Na toeitiiti lava a ou moomoo maimau pe ana faapea sa faafalepuipuiina au i se taimi o lou olaga, ina ia matuai manino ai lenei faamatalaga. Maumau pe ana mafai ona ou tautala e pei o Peteru po o Paulo ma o mai ai agelu e faatei leoleo ma tatala faitotoa o le falepuipui (tagai i le Galuega 12:5–11; tagai foi i le 16:25–26) pe faapei o Alema ma Amoleka lea na solofa ai puipui o le falepuipui (tagai i le Alema 14:23–29) pe faapei o Iosefa Samita, o lē na mafai ona tusia ia mea atonu e sili ona musuia o tala faatusipaia o lo tatou tisipenisione i le lotolotoi ma le totonugalemu o se falepuipui laitiiti, eleelea, ma faavaivai loto (tagai i le MF&F 121–23). Tatou te faafetai i le Atua ua tatou ola i se vaitaimi e pei ona tatou ola ai nei, lea e le manaomia ai le soifua o le Peresitene ma le perofeta o le tatou Ekalesia i le mata’u i le faafaalepuipuiina, ma e le o manaomia ona tatou, oo i le faapologaina pe avea ma ni pologa, i tulaga faaupufai ma faaletino. Ae o loo i ai isi ituaiga o noataga ma o loo i ai isi ituaiga o falepuipui i o tatou olaga lea e tatau ona tatou faatamaiaina. O mea uma ua tatou o mai iinei e fai, e tatau ona tatou faia.
Ou te talitonu ma lou loto atoa afai e mafai ona tatou salamo i a tatou agasala, pe afai e mafai ona tatou malamalama i agasala a isi, pe afai e mafai ona tatou maua le lototetele agai atu i o tatou tulaga ma manao e faia se mea e uiga i ai, o le aapa mai i lalo le Tama soifua o i tatou uma ma, i le faaupuga faatusi paia, “sapasapa i [tatou] i luga e pei o i luga o apaau o aeto” (MF&F 124: 18).
Sa sapasapaia a’u i luga o apaau o aeto. Ou te iloa ma lo’u loto atoa o loo soifua le Atua ma o Iesu o le Keriso. Ou te iloa o loo taitai e Iesu lenei Ekalesia, o Lana Ekalesia, o Ia o le maatulimanu autu, lea ua faataatia faataamilo ai le faavae o aposetolo ma le perofeta soifua. Ou te iloa o le a tatou toe faatasi ma le Faaola, afai o le a tatou faamaoni ia te Ia, ma o le a tatou tutu saoloto—e le noatia ma saisaitia—ma o le a tatou matauina i faailoga i Lona tino se mea i Lona nofopologa ma le faafalepuipuiina ma le maliu e ositaulaga ai mo i tatou. Ou te iloa e tatau ona tatou salamo i a tatou agasala ma o le Atua e tatau lava ona faamasino tonu, ae ou te fiafia tele i tusitusiga paia ma upu a perofeta soifua e faapea, o le mea e tele ai le agasala, e sili atu foi ona tele ai le alofa tunoa, ma o le “alofa mutimutivale e maua le aia i le tagata salamo.”