Ua Saunoa Mai i le Aso
Ua Tau Atu e Elder Perry i le Au Faauu o le Iunivesite ia Faatumauina le Paleni o le Olaga
Sa saunoa atu Elder L. Tom Perry o le Korama a Aposetolo e Toasefululua i le sauniga o le faauuga mo le Iunivesite o Polika Iaga i Provo, Iuta, ISA, ia Aperila 2013. Sa ia saunoa e uiga i le manaoga mo le sailia o le paleni i le olaga ma ia faamamafa atu le manaomia ona tuu atu se taimi mo le aiga, taimi mo le galuega, taimi mo suesuega, taimi mo auaunaga, taimi mo le tagata lava ia, aemaise lava o le taimi mo le talalelei a Iesu Keriso.
Sa ia fautuaina le au faauu ia ola fuafua ma faautauta. “O se tasi o lesona taua o le a e aoaoina, o le puipuiga ma le filemu lea e sau mai le ola e tusa ma mea ua e maua,” sa ia saunoa ai.
Sa ia faamamafa atu foi le taua o le faavaeina o se aiga e faatutotonu ia Keriso. “O tatalo ma le suesueina o tusitusiga paia i aso taitasi e tatau ona avea ma se vaega o aiga uma o le Au Paia o Aso e Gata Ai,” sa ia saunoa ai. “Ia avea le talalelei a Iesu Keriso ma se vaega taua ma le ola o lou olaga.”
Ua Asia e Elder Nelson le Eria a Asia i Matu
Mai le aso 23 o Fepuari i le aso 3 o Mati, 2013, sa asia ai e Elder Russell M. Nelson o le Korama a Aposetolo e Toasefululua le Eria a Asia i Matu. Fai mai Elder Nelson po o fea lava o le lalolagi e malaga i ai, e tasi lava lana savali. “Ua matou i ai iinei e aoao atu ma molimau atu e uiga i le Alii o Iesu Keriso ma Lana talalelei toefuataiina,” sa ia tau atu ai i tagata o le ekalesia i le eria. “O la tatou savali o le savali o le filemu ma le olioli, o le faamalolosia o aiga, fusia o tane ma ava, o fanau i o latou matua, faapea ma tagata i o latou tuaa … ina ia mafai ona latou olioli uma ai i le ola e faavavau i le afioaga o le Atua pe a maea la latou malaga i le lalolagi.”
E faaopoopo ai i le fono ai ma taitai perisitua ma tagata o le ekalesia i le eria atoa faapea ai ma se itu faapitoa mo taitai o le militeli i Okinawa, sa feiloai ai foi Elder Nelson ma ni taitai o le malo se toalua i le lotoifale i Iapani.
Ata na pue e Jeffrey D. Allred