Aoao mai Perofeta Soifua
Sii mai se faeasaite a le Ofisa o Aoga a le Ekalesia na faia i le aso 4 o Mati, 2007, lua tausaga ao lei valaauina Elder Andersen i le Korama a Aposetolo e Toasefululua.
Mata e mafai ona sili atu ona malolosi, auiliili, ma taliaina lo tatou gauai atu i fautuaga ma aoaoga a le Usoga?
E moni tatou te alolofa ia Peresitene Thomas S. Monson, o fesoasoani e toalua i le Au Peresitene Sili, ma le Korama a Aposetolo e Toasefululua. Ae i le faailoaina atu o lo latou alofa ma lo tatou lotonuu, o le a fesili atu ai, Mata e mafai ona sili atu ona malolosi, auiliili, ma taliaina lo tatou gauai atu i fautuaga ma aoaoga a le Usoga?
O Fesili e Fa e Fesiligia
Mafaufau pe faapefea ona e tali atu i fesili nei:
-
Mata e mafai ona e ta’u mai ia te au ia suafa o sui e toatolu o le Au Peresitene Sili ma suafa o i latou taitoatasi o e auai i le Korama a Aposetolo e Toasefululua? O nei tamalii e toa 15 ua e lagolagoina ma ou lagolagoina o ni perofeta, tagatavaai, ma talifaaaliga.
-
Afai tatou te tuuina i luga se ata o nei Uso, mata e te iloaina i latou taitoatasi? E seasea ona tatou gauai latalata atu i se tasi tatou te le matauina pe lei iloa.
-
Mata e mafai ona e faasoa maia ia te au le fautuaga na tuuina atu e le Au Peresitene Sili ma le Korama a Aposetolo e Toasefululua mai le konafesi aoao na tea nei? Ma pe mafai ona e faailoa mai ia popolega o Peresitene Monson, Peresitene Eyring ma Peresitene Uchtdorf i Savali a le Au Peresitene Sili o Liahona o lenei tausaga?
-
Atonu o le mea sili ona taua, mata e mafai ona e faasoa mai ia te au se faaiuga talu ai nei lea na e suia ai se mea i lou olaga ona o se fautuaga na maua mai i se tasi o nei tamalii e toa 15?
O Le Mamanu a le Alii
O mafuaaga e taua tele ai a tatou tali i nei fesili e faalagolago lea i valaauga ma tiutetauave o le Au Peresitene Sili ma Aposetolo e Toasefululua. Soo se taimi lava na faatuina ai le Ekalesia a le Alii, na valaauina e le Alii ia perofeta ma aposetolo. Na fetalai mai le Faaola, “Ua le filifilia a’u e outou, a ua filifilia outou e a’u, ua ou faauuina foi outou” (Ioane 15:16). I nei tamalii o lena faauuga e aumai ai se mana faaleagaga ma se tiutetauave paia—o se mana e iloa ai ma molimau atu ai ma o se tiutetauave e aoao atu ma faamanuia. E aumaia ai foi se tiutetauave ma se folafolaga ia i tatou uma.Ua ia i tatou le tiutetauave e faalogo ma mulimuli ai, ma ua ia i tatou se folafolaga e faapea o le a oo mai faamanuiaga pe a tatou talitonu ma faatinoina a latou upu.
Ina ua valaauina e le Alii ia soo e toasefululua i Amerika ina ua mavae Lona Toetu, sa Ia aoao atu ai i tagata: “Amuia outou pe afai tou te uai atu i upu a lenei toasefululua o e ua ou filifilia mai totonu ia te outou, e auauna atu ia te outou, ma avea ma a outou auauna” (3 Nifae 12:1). I lo tatou vaitaimi, i se taimi sili ona faigata, na folafola atu ai e le Faaola i le Au Paia, “Ma afai e faalogo mai lo’u nuu i lo’u leo, ma le leo o a’u auauna o e ua Ou tofia e taitaia lo’u nuu, faauta, e moni Ou te fai atu ia te outou, o le a le aveesea i latou i fafo mai lo latou nofoaga” (MF&F 124:45).
O le mamanu lenei a le Alii. Na Ia valaauina ni tamalii e toa 15 mai “tulaga le aloaia o le olaga”1 ma faaee atu i ai ki ma le mana e taialaina ma faatonutonu i tatou. E le o faamalosia i tatou e usitai i ai; e leai se fosi. Ae afai tatou te gauai atu i a latou upu, afai tatou te talia ma naunau e suia a tatou amioga e pei ona faamautinoa mai e le Agaga Paia a latou fautuaga, o le a le aveesea mai i tatou mai lo tatou tulaga—o lona uiga o le a tatou pipiimau i le ai uamea ma o le a faavavau pea ona tumau ma le saogalemu i le ala e tau atu i le laau o le ola.
Ata na pueina e Craig Dimond © IRI; tuaata: thinkstock/istockphoto