Faataitaiga Faamaoni

Saunia e Jean A. Stevens

Fesoasoani Muamua i le Au Peresitene Aoao o le Peraimeri

Ata

Jean A. Stevens

“Ma o le a taitaiina i latou e le tamaitiiti” (2 Nifae 21:6).

I le avea ai ma se tasi o le au peresitene aoao o le Peraimeri, ou te fiafia e feiloai i tamaiti i le lalolagi atoa. Soo se mea ou te alu i ai, ou te feiloai i ni tamaiti lelei lava o e o mulimuli ia Iesu Keriso ma ola faamaoni i le talalelei. E masani ona latou taitaia o latou aiga ma isi i le tausia o poloaiga.

I se tasi taimi sa asiasi ai se Pulega Aoao i se uarota i Hong Kong lea sa tauivi ai tagata e tausi o latou aiga. Sa ia ta’u atu i le epikopo e tatau ona totogi e tagata o le ekalesia a latou sefuluai.

Sa popole le epikopo. Sa toetoe lava a leai ni meaai ma ni tupe a tagata e faafetaiaia ai o latou manaoga.

“Afai o le a latou totogiina a latou sefuluai, o le a faamanuiaina i latou e le Alii,” o le saunoaga lea a le Pulega Aoao.

Sa mafaufau le epikopo mo sina taimi. Ona ia fai atu lea, “O le a ou talanoa atu i nisi o tagata e sili ona faamaoni o le matou uarota—o tamaiti o le Peraimeri!”

O le Aso Sa na sosoo ai, na asiasi atu ai le epikopo i le Peraimeri. Sa ia aoaoina le fanau e uiga i le tulafono o le sefuluai. Sa ia fai atu ia i latou e totogi le sefuluai mai tupe na latou mauaina. Na folafola atu e tamaiti o le a latou faia—ma sa latou faia!

I ni nai masina mulimuli ane, sa faia ai se fonotaga a le epikopo ma tagata matutua o le uarota. Sa ia fai atu ia i latou o loo totogiina e a latou fanau le sefuluai.

“Mata e mafai ona outou totogiina foi le sefuluai?” sa ia fesili atu ai.

Sa ootia lava tagata matutua e ala i faataitaiga faamaoni a le fanau. Sa latou fai mai o le a latou totogi foi a latou sefuluai. Talu ai na faia e tamaiti se faataitaiga, na maua ai e o latou aiga ia faamanuiaga sa latou manaomiaina (tagai i le Malaki 3: 8–10). Na tuputupu ae le faatuatua ma molimau a tagata uma.

Po o fea lava o e ola ai, e mafai ona e taitai isi i au faataitaiga lelei.Tausi poloaiga ma mulimuli ia Iesu Keriso. Ona avea lea o oe ma se faamanuiaga i lou aiga ma isi.

Matou te tatalo mo outou. Ma ua matou iloa lena mea, e pei lava o le fanau i Hong Kong, o au faataitaiga e mafai ona faia ai se eseesega mo le lelei!