O Le Sauniga Faamanatuga Aupito Umi

Saunia e Okon Edet Effiong

E alala le tusitala i Lagos, Nigeria.

O le sauniga faamanatuga e masani lava ona oo atu i le 70 minute. Ae o se tasi Aso Sa na foliga mai na toso atu lava i le faavavau.

Ou te fiafia e faitau tusi faalelotu o le Au Paia o Aso e Gata Ai. Ma talu ai o nei tusi e le faigofie ona maua i Nigeria, sa ou nonoina mai ai mai se uo. O le manao e toe faafoi atu le tusi a la’u uo i ni nai aso, na ou tauaveina ai i taimi uma ma faaaogaina ai ou taimi avanoa e faitau ai.

I se tasi Aso Sa sa i ai ia te au se tusi nono mai a o ou auai i le sauniga faamanatuga i le uarota lea e tofia i ai au o se fautua maualuga. Sa ou faitauina le tusi a o ou faatali e tuuina atu i le epikopo se savali mai le au peresitene o le siteki. Ina ua taunuu atu le epikopo, sa ia fai mai ia te au e talanoa i lona fesoasoani muamua talu ai na te fia faafeiloai atu i ni tagata asiasi. Ina ua uma ona tuuina atu le savali i le fesoasoani muamua, sa ou alu ma nofo i luga o le tulaga.

E lei leva lava ona ou saofai i lalo, ae, ou iloaina loa ua leai se tusi a la’u uo. Pe a ma le lima minute ao lei amataina le sauniga—ma faatasi ai ma le taitai pulefaamalumalu o loo nofo i luga o le tulaga—sa ou manatu ai e le tatau ona ou aluese. O le le fiafia i le faafaanoanoaina o la’u uo, sa faapea ai ona amatalia lo’u mafatia i se sauniga faamanatuga aupito sili ona umi sa ou auai.

Sa ou faamoemoe o le a vave ona faagasolo le taimi, ae peitai o aitema uma lava na i ai o le fonotaga na foliga mai o le a alu ai le olaga atoa. Sa ou le mautonu, sa ou tatalo lemu ia puipuia e le Atua le tusi. E moni lava, e lei umi ia lauga, ae sa lofituina lou mafaufau i se popole faigata. O le lima minute a o lei faaiuina le sauniga, sa le mafai lava ona ou toe tatalia. Sa ou pasia atu i le fesoasoani muamua se faamatalaga tusitusia ma fesili i ai pe na ou tuua le tusi i ona autafa. Sa ou moomoo ina ia lue mai lona ulu i le ioe. Nai lo lena sa lulu mai lona ulu.

Sa le moeiini ou mata i le taimi o le tatalo faaiu ae na ou mataituina ma le faaeteete ia nofoaga e lua ia na totoe sa ou manatu atonu o i ai le tusi. O le taimi lea, na ou filifili ai, pe a talafeagai ai, o le a ou alu i vasega o le Aoga Sa e folafola atu ai le leiloa o lau tusi.

Ae peitai, o le mea e ofo ai, ina ua faaiuina le sauniga faamanatuga, na suia atoa ou lagona, ma sa ou le popole i le tusi. Na faaali mai ia te au e le Agaga Paia—i ni nai taimi puupuu o le malamalama faaleagaga—ua galo o’u popolega. Sa ou iloaina ai o le mea na taua moni, o le pe o le a ou puipuia pe leai foi ia na mea sa tuuina mai e le Atua i lau tausiga. Sa faafuasei lava ona lisiina i lou mafaufau mea ou te manatuaina na tuuina mai ia te au e le Atua: lou agaga, lou aiga, i latou ou te faiaoga asiasi ai, i latou e tatau ona ou faasoa atu i ai le talalelei, tagata o le uarota ou te auauna i ai, o’u tuaa ua maliliu ma e manaomia le galuega faalemalumalu, ma isi mea.

Ou te lei maua le tusi i le mavae ai o se mea na avea ma se aafiaga taua o le sailiga loloto. Ae i le faaiuga o le sauniga faamanatuga aupito umi, sa ou maua ai foi ni vaega o lou olaga lea e manaomia le faaleleia. Ma sa ou maua ai le tautinoga e galue ai i mea e finagalo le Tama Faalelagi e faamuamua.

Ata na tusia e Les Nilsson