Mo Le Malosi o le Autalavou
O Faatosinaga a Musika
Ua faaalia i se suesuega e faaaoga ai isumu le ala e aafia ai i tatou i le tele o musika tatou te faalogologo i ai.
Ina ua ou fesili atu i se tasi, “O le a se mea e sili ona e manatuaina e uiga i le Peraimeri?”o le tali masani lava, “O Le musika.” O upu i pese Peraimeri e le o ese lava ma i tatou—o loo totoina mausali i o tatou loto. Ia, mo se faataitaiga, o pese Peraimeri nei. E mafai ona e faamaeaina fuaitau taitasi?
“Ou te taumafai e avea …”
“Le Tama e, o … ?”
“Tala o le Tusi Mamona …”
A o e faamaeaina ia fuaiupu taitasi, na e iloaina lou usuina o le fati?
Afai o lea, masalo ona o musika e faaleleia ai o tatou lagona faaletagata, faagaeetia ai o tatou lagona, ma fatuina ai ni mea e manatua. E leitioa a tatou faamanatuina ai faapaiaga o malumalu i se gaoioiga faaleaganuu lea e auai ai talavou i musika musuia ma siva. O nei mea e tutupu tatou te “alalaga atu i le Atua” ma “pepese atu i lona suafa mamalu” (Salamo 66:1–2).
E Aafia i Tatou e Musika i Taimi Uma
O loo aoao mai le Mo le Malosi o le Autalavou faapea, “e i ai se aafiaga loloto o musika i lou mafaufau, agaga, ma le amio.”1 O musika e mafai ona faatamaoaiga ai lou olaga i le tele o auala, ae e mafai foi ona lamatia ai. Na saunoa peresitene Thomas S. Monson, “O musika e mafai ona fesoasoani e te latalata atili atu ai i lou Tama Faalelagi. E mafai ona faaaoga e aoao ai, faamalamalama ai, musuia, ma lotogatasi ai. Ae peitai, o musika e mafai, e ala i lona fati, pao, leotele, ma upu, ona aveese ai lou mataalia faaleagaga. E le tatau ona outou faatumuina o outou mafaufau i musika lē lelei.”2 Ma atonu e le afaina pe afai e te faalogo lelei i upu pe leai; o upu e tuu i musika e masani ona faigofie ona aoaoina ma faigofie ona manatua.3 E leitioa a lapataia i tatou ina ia “filifili ma le faaeteete ia musika [tatou] te faalogologo i ai.”4
Isumu, Musika, ma Aoaoga
O lau filifiliga o musika e mafai foi ona aafia ai lou gafatia e faataunuu ni galuega po o le aoao. Na faailoa mai e ni tagata suesue e toalua lenei fesootaiga e ala i le suesueina o ni aafiaga o le musika ma le pao i o neura o le isumu. Mo le valu vaiaso, o se tasi o vaega o isumu na faalogologo i taimi uma i pese uosi a Strauss (o ni musika e maualuga le faatulagaina ma le faagasologa), a o le vaega lona lua na faalogologo i leo paovale faifai pea o tanipalau. O le vaega lona tolu na tausia i le le leoa.
Ina ua mavae le valu vaiaso, sa tuu isumu i se auala felavesa’i e o e su’e ai ni meaai. O isumu sa i le vaega lona lua na savavali e aunoa ma se lagona o le taitaiga—“o se faailoga manino o loo latou pagatia i le aoaoina”—ma sa sili atu le umi na saili ai meaai nai lo le mea na latou i ai i le amataga o le suesuega. O isumu ia na aafia “i leo paovale e le gata ina atinaeina ni faigata o le aoaoina ma le manatua, … ae sa i ai foi ni suiga taua i sela o o latou faiai.” O le sailiiliga a le au suesue sa matuai mataina lava: “Matou te talitonu na taumafai isumu e taui atu mo lenei osofaiga faifaipea o leo pisapisao. … Sa latou tauivi e tetee atu i le vevesi.”5
Mata o le a se tulaga “vevesi” i nisi o musika o aso nei—o mea e ono taofia ai oe mai le aoaoina ma le mataalia? Atonu e fesootai i le fati ma le pao o le musika (e pei o le isumu) po o upu foi na faaaoga po o le savali na faailoa mai ai. Na saunoa peresitene Boyd K. Packer, Peresitene o le Korama a Aposetolo e Toasefululua, “O loo i ai le lalolagi i se suiga maaleale ae malosi. Ua faateleina le tuufau o musika ua oo i se tulaga ua taliaina na musika i faafiafiaga. Ma o lona taunuuga, o le tele o musika ua usuina e tagata faafiafia lauiloa i ona po nei, ua foliga mai ua faamoemoe e faaoso ai le vevesi ae le o le faamalieina, ma ua faateleina ai le popole ae le o le toafilemu.”6
O Mea e Taua o le Taimi ma le Agaga
E le na o le pao o le pese ma upu o musika paovale lea e le lelei. O le faalogologo i ia ituaiga musika, ua tatou taofia ai foi taimi filemu lea e mafai ai ona tatou mafaufau ma le manino ma faalogo i le Agaga. I le The Screwtape Letters, o se tala tusia lauiloa faaKerisiano, o se tagata e igoa ia Screwtape e faatusaina ia Satani ma o loo taumafai e taitaiina ia agaga lelei i lana galuega. Fai mai Screwtape, “E malie tele le auala e masani ona mafaufau ai tagata o loo matou tuuina ni manatu i o latou mafaufau: ae o le mea moni lava o le matou galuega sili lava o le taumafai lea e taofi i fafo ia mea.”7 I le tulaga lava ia, e iloa e Satani e le o taimi uma e na te faatumu ai o tatou mafaufau i ni mafaufauga leaga pe a fai e na te mafai ona taofia i tatou mai le taulai atu i mea a le Agaga. “Afai e te faalogologo i musika i taimi uma, atonu e te le maua se taimi filemu e manaomia mo le mafaufau, lagona, ma le mauaina o le taitaiga faaleagaga.”8
Tatou te manaomia le Agaga Paia e faatasi ma i tatou i taimi uma. Mo lena mafuaaga, e tatau ona tatou filifili ma le faaeteete musika tatou te faalogologo i ai ma siva tatou te auai atu i ai. Tuu atu i le Agaga e avea ma ou taiala, ma a i ai ni ou masalosaloga e uiga i le musika o loo e faalogologo i ai po o tulaga o e i ai, ia maua le lototoa e galue ai ina ia mafai ona tumau ai le Agaga ma outou.
Mai le agavale: thinkstock/iStockphoto; ata pue o Rosemary M. Wixom © Busath Photography; ata na pueina e Robert Casey; thinkstock/Comstock; tuaata: thinkstock/Ablestock.com