O Le Malumalu o Navu ma le Falepuipui o Karefasi

Saunia e Jennifer Maddy

O mai tatou o e suesue nei nofoaga taua i le talafaasolopito o le Ekalesia!

I le 1841 o le toatele o le Au Paia i Navu na matitiva. Ae na latou iloaina o le mea latou te manaomia ona fausia o se malumalu, e pei ona ta’u atu e le Alii ia i latou. Na silia ma le 1,000 alii na faigaluega e fausia le malumalu. O tamaitai na suiina ofutino ma kuka mo le aufaigaluega. O le toatele o tagata na ositaulaga e fausia le malumalu. Sa latou tulimatai atu i faamanuiaga o le a latou maua ai iina.

Falepuipui o Karefasi

O le galuega o le malumalu na taofia ia Iuni 1844, ina ua fasiotia le Perofeta o Iosefa Samita. Na aveina atu Iosefa ma nisi o alii i le Falepuipui i Karefasi. I le aso 27 o Iuni na osofaia ai e tagata leaga le falepuipui. Sa latou fanaina ma fasiotia ai Iosefa ma lona uso o Ailama.

Faaumaina o le Malumalu

Sa ootia loto o le Au Paia ina ua leai lo latou Perofeta. Na silafia e Polika Iaga, lea sa avea ma Peresitene o le Korama a Aposetolo e Toasefululua, o le a faaauau pea le galuega a le Alii. Na iu lava ina faamaeaina e le Au Paia le malumalu. Na galulue taitai o le Ekalesia i le malumalu i ao ma le po ina ia mafai ona papatisoina le Au Paia mo o latou tuaa ma faamauina o ni aiga e faavavau.

Toefausiaina o le Malumalu

Ina ua tuua e le Au Paia o Navu, sa faaleagaina le malumalu e ala i le afi ma se asiosio. Na fofogaina i le 1999 e, Peresitene Gordon B. Hinckley (1910–2008) o le Malumalu o Navu o le a toefausia i lea lava nofoaga. I le taimi nei e mafai ona e vaai i lenei malumalu matagofie e pei lava o se tepa i tua i le vaitau o le 1840.

O se masina faaofuofu o loo vaneina i luga o le puipui i fafo o le malumalu.

Sa i ai i le Malumalu muamua o Navu ni ma’ala e 30.

O faatagata o Iosefa ma Ailama o loo tutu i luma o le Falepuipui o Karefasi. “Sa lei fevaevaeai i laua i le soifuaga, ma sa lei tuueseeseina i laua i le oti!” (MF&F 135:3).

Sa taufetuli atu tagata leaga i luga o lenei faasitepu i le Falepuipui o Karefasi ina ia maua mai Iosefa ma ana soa.

O Iosefa ma isi alii sa i ai i potu i luga o le falepuipui.