E Faapefea ona Faamautuina Aoaoga Faavae?

Saunia e LaRene Porter Gaunt

Mekasini a le Ekalesia

E oo mai aoaoga faavae i aso nei e pei ona sa i ai anamua—e ala mai i se faaaliga faalelagi i perofeta.

I le avea ai ma Au Paia o Aso e Gata Ai, “matou te talitonu i mea uma na faaalia mai e le Atua, ma mea uma ua ia faaali mai nei, ma matou te talitonu foi o le a Ia faaalia mai le tele o mea silisili ma le taua tau le Malo o le Atua” (Mataupu Faavae o le Faatuatua 1:9).

O le sootaga i le va o le faaaliga ma aoaoga faavae, na saunoa ai Elder D. Todd Christofferson o le Korama a Aposetolo e Toasefululua e faapea, “I le Ekalesia i aso nei, e pei foi o anamua, o le faamautuina o le aoaoga faavae a Keriso po o le faasa’oina o aoaoga faavae sese o se mataupu lea o faaaliga faalelagi ia i latou ua faaee i ai e le Alii le pule faa-aposetolo.”¹

E pei lava ona avea faaaliga ma auala e oo mai ai aoaoga faavae i perofeta, tagatavaai, ma talifaaaliga, e mafai foi e i tatou taitoatasi ona maua a tatou lava faamaoniga i le moni o aoaoga faavae o le talalelei a Iesu Keriso. O lenei faaaliga faaletagata lava ia e oo mai e ala i le tatalo, suesue i tusitusiga paia, ma le molimau a le Agaga Paia. Tatou te faaali atu tatou te taliaina le aoaoga faavae a Iesu Keriso e ala i le salamo, i le papatisoina, mauaina o le meaalofa o le Agaga Paia, ma faaauau pea ona mulimuli i tulafono ma tausi feagaiga o le talalelei i o tatou olaga atoa.

O le siata faasolo lenei, e faatatau lea i le saunoaga a Elder Christofferson i le konafesi aoao ia Aperila 2012, o loo faailoa atu ai le ala e faavae ai se aoaoga faavae.²

O le faaaliga o aoaoga faavae e oo mai mai ia Iesu Keriso

Pe afai o le faaaliga o le aoaoga faavae mo le Ekalesia atoa, e na o le Au Peresitene Sili ma le Korama a Aposetolo e Toasefululua e oo mai i ai (tagai i le Amosa 3:7; MF&F 1:38; 28:2).

E oo mai faaaliga e ala i …

Lona lava afio mai

Na faaali atu le Atua ia Mose, ma faasino atu ia te ia galuega a Ona lima (tagai i le Mose 1:1–9; tagai foi i le Iosefa Samita—Talafaasolopito 1:15–20).

Lona lava siufofoga

Na fetalai mai le Alii ia Nifae ma poloaiina o ia e fau se vaa e ave ai lona aiga i Amerika (tagai i le 1 Nifae 17:7–8).

I le siufofoga o le Agaga Paia

O lenei ituaiga o faaaliga e fesootai atu le Agaga i le agaga. O Aposetolo o le Feagaiga Fou na mauaina se faamaoniga e ala i le Agaga Paia e le tatau ona latou faamalosia ni tagata fou liliu mai e tausia le tulafono a Mose (tagai i le Galuega 15:5–29).

Avefeau

Na faaali mai ia avefeau o Mose, Elaia, ma Elia ia Iosefa Samita ma Oliva Kaotui ma tuuina atu ki o lona tisipenisione i le Perofeta (tagai i le MF&F 110:11–16).

E oo mai faaaliga i …

Le Peresitene o le Ekalesia Lava Ia

O le perofeta ma le Peresitene o le Ekalesia e mafai ona maua se faaaliga faaletagata lava ia e avea ai ma aoaoga faavae pe a lagolagoina e ala i le finagalo autasi o le Au Peresitene Sili ma le Korama a Aposetolo e Toasefululua (tagai i le Galuega 10; Tautinoga Aloaia 2).

Perofeta o loo Galulue i Aufono

Sa tatalo le au soo i Amerika ia iloa po o le a le igoa e tatau ona faaigoa ai le Ekalesia. Na faaali mai Keriso ia i latou ma tali mai, “O lea, soo se mea tou te faia, ia outou faia i lou igoa; o lea ia outou faaigoa ai le ekalesia i lou igoa” (3 Nifae 27:7).

O Le Au Peresitene Sili

O Le Korama a Aposetolo e Toasefululua