O Se Tatalo o Lo’u Loto
E alala le tusitala i Metro Manila, Filipaina.
O le siitia o o’u tulaga faatonuina o musika ou te faalogologo i ai na fesoasoani ia te au ina ia ou fiafia atili i ai.
Ou te fiafia i musika, ma e foliga mai e le atoatoa lo’u aso sei vagana ua ou faalogologo i ai pe usuina. Talu ai nei lava, ua ese le ala ua tuputupu ae ai lou fiafia i musika, ma ua ou aoaoina ai nisi o mea ua suia o le ala ou te mafaufau i ai ma faaaoga ai le musika.
Sa amataina ina ua ou faitauina le mau lea na fetalai mai ai le Alii, “Aua e fiafia lo’u agaga i le pese a le loto; ioe, le pese a e amiotonu o se tatalo mai ia te au, ma o le a talia ma se faamanuiaga i luga o o latou ulu” (MF&F 25: 12). Ina ua ou faitauina lena fuaiupu, sa ou manatuaina se mea sa aoaoina ai au e lo’u tina. I se tasi taimi, ina ua ou usuina ia viiga i se auala le talafeagai, sa ia faamanatu mai ia te au e faapea, e mafai ona avea viiga ma ni tatalo ma e tatau ona ou usuina faalelei i latou. Ou te manatu o nei fuaiupu o loo faatatau e le gata i viiga lava ia ae faapea foi i soo se pese tatou te usuina ma se faanaunauga amiotonu. Vaai faalemafaufau pe o a faamanuiaga o le a oo mai i luga o i tatou, e pei ona fai mai le mau, pe a tatou usuina ni pese i le Alii.
Sa ou aoaoina ai foi le taua o le faalogologo i musika lelei. Ina ua maea le faitauina o lenei mau, sa amata ona ou tilotilo solo i lau lisi o pese ma tapeese ia pese ia e lei lagolagoina ia aoaoga o i le Mo le Malosi o le Autalavou.
E lei umi ae ou faia ni filifiliga e uiga i le musika e sili atu i le mea sa i ai i la’u lava faaputuga. I se tasi aso ao ou i ai i le aoga, sa amata ona tataina e se uo mai le vasega se pese leaga. E lei lelei ou lagona e uiga i le pese, o lea sa ou fai atu ia te ia e sui le pese, lea na ia faia. Ou te iloa e mafai e i tatou taitoatasi ona maua lena foi lototele i tulaga faapena. Ma i nisi taimi pe a le suia ai e tagata le musika mo i tatou, o loo ia i tatou lava se isi filifiliga: e mafai ona tatou o i se isi nofoaga.
Ou te iloa e ala i musika lelei e mafai ona tatou latalata atili atu ai i lo tatou Tama Faalelagi. E mafai e musika ona faamalamalamaina i tatou, musuia i tatou, valaaulia le Agaga Paia e faatasi ma i tatou, uunaia i tatou i ni amioga amiotonu, ma fesoasoani ia i tatou e tetee atu i faaosoosoga a le fili (tagai i le Mo le Malosi o le Autalavou [tamaitusi, 2001], 22–23).
Ia manatua a o tatou usuina le pese a e amiotonu, o loo tatou tatalo moni lava i lo tatou Tama o i le Lagi.