O Tatou Aiga, O Tatou Auaiga
E Lei Avaavau Mai Lava le Alii ia te Au
Sa ou lagonaina le faavaivai i le vaavaai atu i lo ma atalii ulumatua ua pa’u atu i mailei a Satani, ma sa masani ona faailoa atu lo’u fefe e ala i le ita. Sa ao ina ou sui au lava nai lo le taumafai e suia lo’u atalii.
Ao laiti le ma fanau e toafa, sa ma manatu ma lo’u toalua e faapea, afai ma te faia ni faataitaiga lelei ma aumaia i latou i totonu o le talalelei i le tele o le alofa ma le tumau, e mautinoa lava o le a le o ese mai i lena ala.
I se tasi aso o le taumafanafana na faamalosia ai i maua e lafoai lena manatu. Sa alu lo ma atalii ulumatua, pe tusa ma le 14 tausaga le matua, e taeele i le vaitaele ma ana uo. Ina ua ou sau i le vaitaele ma le fanau laiti, na ou manatu sa ou vaai atu ia te ia ma se sikaleti i ona lima. Sa ou popole, o lea sa ou talanoa atu ai ia te ia i lena mea i se taimi mulimuli ane. Sa na ona ia fai mai lava e sese au. O le mea e faanoanoa ai, o le amataga lena o ana pepelo.
I le aluga o taimi sa taumamao atili ai pea o ia mai ia i maua. Sa le toe mafai ona talanoa i ai ma e tele lava ina ita e aunoa ma se mafuaaga e ita ai. Sa faaopoopo atu i sikaleti le ava malosi, fualaau faasaina, gagana masoa, ma le faupuega o pepelo. Ma sa avea ma avega mamafa ana amioga e faasaga i le aiga.
O le taimi muamua sa ma taumafai ai e faatapulaa ana gaoioiga ina ia mafai ai ona puipuia o ia, ae na atili ai ona faatautee mai. Sa le aoga ia aoaiga. Ina ua ou fautuaina o ia ma luiina o ia ia sui, sa oo ai lava a ma talanoaga i le tele o taimi i finauga leotetele lea sa atili ai ona i ai lo ma va.
Sa faigata ia i maua ma lo’u toalua lo ma popolega mo lo ma atalii ulumatua. Sa ma taumafai e saili le taitaiga e ala i le tatalo, ae sa ou lagonaina le faavaivai i le vaavaai atu i lo’u atalii ulumatua o loo filifilia lea ala matautia. Ao ma tatalo, sa taialaina i maua e tuu atu i lo ma atalii nisi avanoa sili atu nai lo le puleaina o ia i ni tulafono saisaitia sili atu. Na foliga mai na matuai tutupu mai ai pea faafitauli e le tusa ai ma o ma faamoemoega, ae o a ma taumafaiga uma muamua e taofi ana amioga sa lei faamanuiaina. O lea na ma filifili ai e faasala o ia pe taofia o ia pe a aafia tonu lava lo matou olaga faaleaiga i ana amioga.
E ui i le taumafai e mulimuli i fautuaga a le Alii, ae sa ma iloaina le faateleina o le leaga o le faafitauli. Sa ou tauivi e faatoilalo ou lava ia le mautonu ma le lotovaivai. Sa ma taumafai ma lo’u toalua ina ia fai pea afiafi faaleaiga ma tatalo faaleaiga, ae sa lofituina au i le tausalaina a o ou manatuaina i taimi uma lava lo ma le atoatoa ma taimi uma sa sese ai lo ma taulimaina o le ma atalii. Ou te tagi soo, moe itiiti, ma o nisi taimi sa matua vaivai ai lava le tino lea sa na o le gafatia lava e gaoioi ai.
O le olaga faaleaiga lea sa matou iloaina, ua seasea toe i ai. O afiafi faaleaiga sa tele lava ina faaiu i vesiga ma finauga. Ae maise lava sa ou le onosai i e sa pele ia te au ma faailoa atu ia i latou i le leotele.
Na ma iloaina ma lo’u toalua e le mafai ona ma tuua lo ma aiga e noatia i lalo i lea tulaga. Sa ma filifili e faaauau pea ona mulimuli i le fautuaga a le Alii ma perofeta, o lea na ma faia ai se taumafaiga e faia ni afiafi faaleaiga faasamasamanoa e le fuafuaina, faatasi ma le fanau o e na naunau mai. Ae sa ou le mafai lava ona taliaina le saisaitia o lo ma atalii ulumatua i mailei a Satani. Faatasi ai ma le tatalo, anapogi, ma le faamoemoe—o mea uma na foliga mai na totoe ia i maua—sa ma lafo atu le ma avega i le Alii ma faalagolago atu ia te Ia.
Sa faateteleina le leaga o faafitauli. I se tasi taimi sa sili ona faigata, sa ou talosaga atu ai i lo’u toalua mo se faamanuiaga faaleperisitua. Sa ou faamoemoe mo upu faamafanafana ma faamalosiauga. Ae, sa silafia e le Alii ou manaoga moni. Sa lapataiina au i le fefinauai leotetele ma lo’u atalii. Sa faailoa mai e le Alii ia te au, e le’i i ai se taimi se tasi na Ia avaavau mai ai ia te au—ae o lea ou te e’e i la’u fanau i taimi uma.
I lena faamanuiaga, sa toe fautuaina ai au e manaomia ona ou talanoa i lo’u atalii e uiga i ou popolega mo ia nai lo le faitioina o ia. Na ou iloaina ai o lo’u ita ma faitioga sa o se faailoga moni lava lea o lo’u fefe mo ia. Sa ou osofaia pea o ia, ma sa ia puipuia o ia lava i soo se ala na te mafai ai. Sa ou mafaufau i auala e suia ai la’u amio.
O le taimi lea, sa ou auauna atu ai o se faiaoga o le inisitituti. Na ou iloa sa le faigata ona taulimaina le autalavou i le lotu ma le toafilemu ma le magafagafa lelei ona sa le faigata ia te au lagona o se tina.
Sa ou le taumafai e vaai atu i lo’u atalii i ni mata o se tina popole ae o se tagata ese. O lenei fuafuaga, ma le tele o le tatalo ma anapogi, sa fesoasoani ai ia te au e pulea o’u lagona ootia ma vaai atu i lo’u atalii—lea ua toeitiiti atoa le 18 i le taimi nei—i ni mata fou. Sa toe mafai ai ona ou toe vaai atu i ona uiga lelei. Na mafai ona ou faailoa atu o’u lagona ma popolega ia te ia ma le faamaoni e aunoa ma le atuatuvale.
Sa avea lea mea ma se suiga tele i le ma mafutaga. Sa ma talanoaina ma lo’u atalii le tele o mea, ma na mafai ai ona ou tuu atu ia te ia e onosaia e ia lava ia taunuuga o ana amioga. Sa tau na ona ma faufautua atu ma lo’u toalua ia te ia i auala e mafai ai ona ia foia ona faafitauli mo ia lava.
Sa faasolosolo lava, ona amata ona ia taliaina lo ma alolofa ma le lagolago. O a matou fegalegaleaiga ma ia, ina ua mavae tausaga faigata e lima, ua faavasegaina muamua nei i le faaaloalo. O lona olaga, i le tele o tulaga, o loo faaletonu lava, ae ua i ai o ia i luga o le ala o le toe faatulagaina. Ua faasolosolo malie lava ona ia iloaina le mea e taua moni i le olaga ma mea e aumai ai le faamalieina tumau.
O le faatinoina o le fautuaga a le Alii ua fesoasoani i lo matou aiga e toe maua ai se olaga e sili atu ona fiafia. Ua ma aoaoina ma lo’u toalua le mamanuina o o maua lava olaga ma lo matou olaga faaleaiga nai lo le taumafai e mamanu le olaga o lo ma atalii.
Ua ou iloa nei le uiga o le tuu atu o la’u fanau i le Alii. Na te silafia i latou e sili atu nai lo au. Ua ou aoaoina e aua nei ou lagonaina o a’u e faamasinoina mo filifiliga uma a la’u fanau. Ua ma iloaina ma lo’u toalua, o le fesoasoani sili ona lelei e mafai ona ma tuuina atu i lo ma atalii o le liliu atu lea i le Alii ma faalagolago atu i Lona finagalo ma fautuaga.
Ata na tusia e ben sowards