O Le A La Le Mea e Sili Ai le Fale Tele ma le Ateatea?
E alala le tusitala i Iuta, ISA.
A ta’u mai e le lalolagi e sili atu le latou ala, ia maua le lototele e tu atu ai ma ola i upumoni o le talalelei.
Ata na tusia e Steve Kropp
Ua fiafia tele Abby o le a alu i le siva ae sa moomoo ia faapei teisi lona ofu fou o ofu o ana uo ia o le a ofuina. Na manatu o ia o le a sili atu ona foliga matagofie ma aulelei ana uo i o latou ofu e leai ni lima nai lo lona ofu e tauagafau, ma sa popole o le a matilatila mai o ia.
Na tafafao Nate ma ana uo i se tasi afiafi ae aumai ai e se tasi o ana uo ni apa pia ma tufatufa solo. Ina ua musu Nate i le taimi muamua, ma fai atu, “Ou te le inuina,” sa amata ona talie ana uo ma taufaalili ia te ia. E le manao Nate e faapea ana uo o ia e le tautaua, o lea na ia mafaufau ai e miti laitiiti i le apa pia e taofi ai le talie o ana uo.
Pe e foliga masani ea nei tulaga? E pei o Abby ma Nate, tatou te oo uma lava i ni fetaulaiga ala i o tatou olaga lea e fofola mai ai i o tatou luma ni filifiliga eseese e pei o ni auala. I nei vaega o filifiliga faigata ma taua, o nisi taimi tatou te fefefe ai e tutu atu mo mea tatou te talitonu i ai aua ua tatou fefefe o le a tatou matilatila ai.
Ua oo Abby ma Nate i nisi o faafitauli o loo faamatala mai i le faaaliga a Liae i le laau o le ola. I lena faaaliga, ua tatou iloa ai o mafuaaga autu e lua o le tuua e tagata o le ala sa’o ma le lauitiiti, ona ua faatauasoina i latou i faatosinaga o faaosoosoga (tagai i le 1 Nifae 8:23; 12:17) ma ua latou maasiasi e ala i le tauemu mai o i latou o i le fale tele ma le ateatea (tagai i le 1 Nifae 8:26–28). Sei o tatou iloiloina ia vaega nei e lua o le faaaliga a Liae ia iloa ai e le gata ia tatou malamalama lelei ai ae ia aoao mai ai foi ia maua le malosi e tutu atu ai ma ia matilatila atu mo le mea sa’o.
Savali i le Ala Lenei
O le faafitauli i faaosoosoga o le lalolagi o le, ua matua taufaaosooso tele, aea? E pei o le saunoaga a Peresitene Spencer W. Kimball (1895–1985): O ai na fai mai o le agasala e le malie? … O le agasala e lalelei ma manaomia. … O le agasala e faigofie ma ua i ai se kamupani tele o ni soa e fiafia.”1
E ui lava ina tatou inoino e tau atu, ae o le tele o isi na auala e masani ona foliga moomia. O nisi o auala e faafuasei lava ona pio ese atu i ni auala mananaia, ao o isi e tau le iloa le pi’o ese lea o sina taimi e foliga mai ai o loo ogatasi lava ma le ala o le talalelei. O nisi ua matuai manaia le ufiina i le kapeta lanumumu ma lagonaina ai le patipatia. O nisi e foliga mai ua sausau auro ma fola i maataua.
O le faatosina o le fale tele ma le ateatea lava ia e talitutusa lava. Ae a faafefea foi, o ni isi o tagata sili ona mauoa, sili ona iloga, sili ona aulelei, ma sili ona malolosi i le lalolagi o loo nonofo ai iina! O ai se o le a le manao e tafafao faatasi, amio faapei, ma oofu faapei o na tagata? E masani ona latou foliga mai o loo sili atu lo latou fiafia nai lo le toatele o i tatou o loo taumafai e tumau i le ala o le talalelei.
E pei o la tatou uo, o Abby, o le tele lava o le ua’i atu tatou tuuina atu i tagata o loo nonofo i le fale tele ma le ateatea, o le tele foi lena o le tatou ono lagonaina o le lotoleaga po o le le fiafia po o le ita foi. Atonu tatou te mafaufau faapea e le fea lo latou mauaina o le tele o mea mananaia ao lea o loo tatou taumafai e tumau i le ala o le laau o le ola.
Ua iloa e Satani o se tasi o auala sili e aumai ai ni tagata ia tuua le ala o le talalelei o le faaseseina lea o i latou i le talitonu e faigata tele, le manaia, pe ua autausaga, le tumau ai i le ala. E le popole o ia po o fea o auala tatou te uia—soo se auala lava o le a talafeagai—pau lava le mea ia le o le auala o le talalelei.
“Pe Faapeī Le Tofo o Lena Fua?”
O le tauemuina o e faamaoni o se gaoioiga e sili ona fiafia i ai le fale tele ma le ateatea. Na saunoa Peresitene Thomas S. Monson, “O loo faatupulaia pea, o nisi o tagata lauiloa ma isi … i le vaaiga a tagata lautele, ua i ai se lagona e taufaifai i tapuaiga i tulaga lautele ma, o nisi taimi, ua faapitoa lava i le Ekalesia. Afai e le o matuai mauaa a tatou molimau, o faitioga faapena e mafai ona tatou masalomia ai o tatou talitonuga pe faavaivai ai foi lo tatou naunautaiga [e tausi poloaiga].”2
E foliga mai e tusa lava po o fea tatou te o i ai i le olaga, pe faafesagai pe o le initoneti, o le a i ai lava se faamalama e matala mai le fale tele ma le ateatea lata ane ma se tasi ua sauni e tusi mai se tamailima ma talie mai i mea tatou te faatauaina. Atonu ua tatou oo uma i lenei tauemuga i taimi eseese, ma e mafai ona matuai tiga lava. Ua tatou iloa e tatau ona tatou tali atu i se auala faa-Keriso, ae e le faigofie i taimi uma. E leai se tasi e manao e talie ia te ia pe tuuitiitia ni talitonuga ua matua uumauina. E pei o Nate, atonu o nisi taimi tatou te tali atu ai i se fuaitau faapea “E le mafai—o au o se Mamona,” ae faalogoina ai le talie tetele mai o isi.
“E Le Mafai …”
Na e matauina le ala o loo taulai atu ai ia tauemuga i upu e le mafai? E pei o le, “Aisea e le mafai ai ona e inuina lena mea?” “Aisea e le mafai ai ona ta o ta te faatau i le aso Sa?” po o le “Aisea e le mafai ai ona e faia ni feusuaiga ae e te lei faaipoipo?”
O lenei taulaiga i upu e le mafai e ona oo ai i tatou i lagona o le leai o se malosiaga. Atonu e lagonaina ai e pei lava tatou te vaivai ma palaaai. Atonu o le a lagona e pei lava i tatou o ni tagata ua tuulafoaia e se Atua pulepuletutu ma ua lokaina ina ia aua nei o tatou maua le fiafia.
O lenei metotia ua matuai matua lava. Le mea moni, na faaaogaina lava e Satani talu mai le amataga. Ina ua tuuina e le Atua ia Atamu ma Eva i le Faatoaga o Etena, na Ia fetalai atu ia i laua, “O laau uma o le faatoaga e mafai ona e ai saoloto ai” (Mose 3:16). Faamata o upu “laau uma” o se tapulaa i lau faalogo? E ui na fetalai atu le Atua ia Atamu ma Eva o le a i ai ni taunuuga faapitoa mo le ‘aiina o le laau e iloa ai le lelei ma le leaga, ae Na te lei faatapulaaina faaletino i laua. Sa la mauaina le faatoaga atoa mo i laua lava ma sa faatonuina, “e mafai ona e filifili mo oe lava, ona ua tuuina atu ia te oe” (Mose 3:17). E foliga e pei o le saolotoga lena mea ia te au!
Ma o se mea mataina ina ua oo ane Satani i se taimi mulimuli ane ma ia fai atu, “Ioe, na fetalai mai ea le Atua—Aua lua te aai i laau uma o le Faatoaga?” (Mose 4:7). O le mea moni lava, sa fesili Satani, “Aisea e le mafai ai ona lua aai i le fua o lena laau?” i lena lava leo faatauemu lea e sau mai i le faamalama o le fale tele ma le ateatea. Na taulai atu Satani i le mea e tasi lea na tuuina atu ai e le Atua ni taunuuga, ma sa ia faia ina ia foliga mai na finagalo le Atua ina ia aveesea mai ia Atamu ma Eva. Na mimilo e Satani ia afioga a le Atua, ma faaopoopo i ai ni pepelo i se taumafaiga e tauanau ai i laua e mulimuli ia te ia nai lo le Atua. I le iuga, o le ‘aiina o le fua o se vaega lava o le fuafuaga i le taimi atoa. Ma na saunia e le Atua se Faaola e tuuina atu ia Atamu ma Eva ma a laua fanau le avanoa e tuputupu ae ai ma toe foi atu i le aiga.
“Ou te Le Faia!”
Ma o le a tonu lava se mea o tatou fai atu ai pe a tatou tali atu, “E le mafai—o au o se Mamona?” Pe o tatou fai atu ea faapea, “Maimau pe ana mafai, ma pe ana le o au o se Mamona, ou te faia lava?” Sa i ai sau uo i se tasi taimi e masani lava ona talasua e uiga i mea uma lava na te fia manao e fai pe ana le o ia o se tagata o le Ekalesia. O le faafitauli la, sa le mafai i taimi uma ona ou iloa pe o tausua o ia.
Nai lo le taulai atu i le e le mafai ma le aua, o le a sili atu ia i tatou pe afai tatou te faaaogaina upu le faia. E pei o le, “ou te le faia — o au o se Mamona.” O le faaaogaina o le faia nai lo le e le mafai ua suia ai le taulaiga o le fuaitau ma ua faailoa atu ai ua ia i tatou le mana e filifili ai mo i tatou lava. O le faapea atu “ou te le faia,” ua tatou tali atu ai, “ua ou filifili e aua nei faia lena mea, e le faapea la ona o au o se tagata o loo mulimuli tauaso pe ona ua faasāsāina, ae ona ua ou talitonu i le faitalia ma le tali atu mo au lava ia, ma ou te manao e fai le mea sao. Ua ou filifili e galue ae le o le faamalosia” (tagai i le 2 Nifae 2:14, 26).
O le faaaogaina o le “Ou te le faia” nai lo o le “e le mafai” o se faatinoga maoae foi o le lototele. E leai se lototele e manaomia e mulimuli ai i le tumutumu o tagata i lalo o auala eseese o le lalolagi. Soo se tasi e mafai ona faia lena mea. O le tutu atu mo le upumoni e faaalia ai le faatuatua moni. O le tutu atu mai le lalolagi e manaomia ai le moni o le lototele. E faaalia ai lo tatou faaaogaina moni lava o lo tatou faitalia ma le mafaufau moni mo i tatou lava. O tagata o i le fale tele ma le ateatea e ta’ua pea lava pea o se faapotopotoga o tagata e leai ni igoa, o se faapotopotoga o tagata leaga e leai ni foliga. I le iuga, o a latou upu e ‘ōō ma e leai se uiga. O le faaaogaina ma le faamaoni o lo tatou faitalia, o le a mafai ai ona tatou maua le lototele e faapea atu ai, e pei ona faia e Liae ma tagata lototoa ma le faamaoni o lona aiga, “sa matou le amanaiaina i latou” (1 Nifae 8:33).
I le ogatotonu o se lalolagi ua faateteleina le amioleaga, o i latou o e tutu i luga ma savavali i ala o le talalelei, e moni lava o le a tutu matilatila atu. Ae e le o tuua ai na o i latou. E pei ona valaaulia ai i tatou e Peresitene Thomas S. Monson, “Tau ina ia tatou lototetele pea ma saunia e tutu mo mea ua tatou talitonu i ai, ma afai e tatau ona tatou tutu na o i tatou i le faagasologa, tau ina ia tatou faia ma le lototele, ua faamalosia e lo tatou iloa, e moni lava e le o tuua na o i tatou pe a tatou tutu faatasi ma lo tatou Tama o i le Lagi.”3