Faalagolago o le Tagata Ia te Ia Lava

Suesue ma le agaga tatalo i mea nei, ma pe a talafeagai ai, ia talanoaina faatasi ma uso e te asia. Faaaoga fesili e fesoasoani ai ia te oe e faamalolosia ai ou uso ma avea ai le Aualofa ma se vaega malosi o lou lava olaga. Mo nisi faamatalaga, alu i le reliefsociety.lds.org.

Faatuatua, Aiga, Toomaga

O le faalagolago o le tagata ia te ia lava o le tomai lea, tautinoga, ma o se taumafaiga ina ia saunia mo le manuia faaleagaga ma faaletino o i tatou lava ma o tatou aiga.¹

A o tatou aoao ma faaaoga mataupu faavae o le ola faalagolago o le tagata ia te ia lava i o tatou aiga ma nuu, ua tatou maua ai avanoa e tausia ai e matitiva ma e le tagolima, ma fesoasoani ai i isi ia ola faalagolago ia i latou lava, ina ia mafai ai ona latou onosaia taimi o faigata.

Ua tatou maua le avanoa ma le tiute e faaaoga ai lo tatou faitalia e ola faalagolago ai le tagata ia te ia lava faaleagaga ma faaletino. I le saunoa ai e uiga i le ola faalagolago o le tagata lava ia faaleagaga ma lo tatou faalagolago i le Tama Faalelagi, na aoao mai ai Elder Robert D. Hales o le Korama a Aposetolo e Toasefululua e faapea: “E liua i tatou ma ola faalagolago ai le tagata ia te ia lava faaleagaga pe a tatou ola ma le agaga tatalo ia tatou feagaiga—e ala i le aai ma feinu ma le tatau i le faamanatuga, agavaa mo se pepa faataga o le malumalu, ma ositaulaga e auauna atu i isi.”²

Ua fautuaina i tatou e Elder Hales ia ola faalagolago le tagata ia te ia lava i le faaletino, “lea e aofia ai le aoga i le iunivesite po o le aotauina faalematata, aoao e galue, ma le ola ai e tusa ma mea tatou te maua. E ala i le aloese mai le aitalafu ma teu ni tupe i le taimi nei, tatou te saunia ai mo auaunaga tumau i le Ekalesia i le olaga atoa i tausaga o lumanai. O le faamoemoega o le ola faalagolago o le tagata ia te ia lava faaletino ma faaleagaga o le ave lea o i tatou lava ia tutu i ni tulaga maualuluga, ina ia mafai ai ona tatou siitia i luga isi o pagatia.³

Mai Tusitusiga Paia

Mataio 25: 1–13; 1 Timoteo 5:8; Alema 34:27–28; Mataupu Faavae ma Feagaiga 44:6; 58:26–29; 88: 118

Mai lo Tatou Talafaasolopito

Ina ua maea ona faapotopoto le Au Paia o Aso e Gata Ai i le Vanu o Sate Leki, o se toafa mamao ese, sa manao ai Peresitene Polika Iaga ia i latou ia uluola ma atiae ni aiga tumau. O lona uiga sa manaomia e le Au Paia ona aoaoina ni tomai o le a faatagaina ai i latou e avea ma tagata ola tutoatasi. I lenei taumafaiga, na matuai faatuatuaina ai e Peresitene Iaga ia malosiaga, taleni, faamaoni, ma le naunautaiga o tamaitai, ma sa ia uunaia i latou i tiute maoti faaletino. E ui e tele lava ina eseese ia tiute maoti o le usoga a le Aualofa i le taimi nei, ae e tumau pea ia mataupu faavae e le suia:

Aoao ia fiafia e galue ae aloese mai le paie.
Ia maua se agaga o le ositaulaga o oe lava ia.
Ia talia le tiutetauave patino mo le malosiaga faaleagaga, soifua maloloina, aoaoga, galuega, tupe, meaai, ma isi mea e tatau ai mo le tausiga o le ola.
Tatalo mo le faatuatua ma le lototele e fetaiai ai ma luitau.
Faamalolosia isi o e manaomia le fesoasoani.⁴