E Manaomia e Alii Talavou o Aso Nei ni Faataitaiga Amiotonu

Saunia e Hikari Loftus

Mekasini a le Ekalesia

O faataitaiga amiotonu e mafai ona faamanuiaina tele ai le tupulaga i se tasi o tulaga e sili ona ogaoga o o latou olaga.

I le aoga maualuga, sa i ai ni sini se lua a Todd Sylvester: ia maoae i le pasiketipolo ma ia tautaua i le aoga o le tagata e sili ona fiafia e pati.

I le 14 o ona tausaga, sa amata ai e Todd ona inupia ma faaaoga fualaau faasāina. Sa le o ia o se tagata o le Ekalesia, ma sa le’i aoaoina o ia e ona matua “i soo se auala” e faatatau i lana amio, e pei ona ia faamatalaina ai. I le aluga o tausaga, sa faatamaia ai e lana vaisu o fualaau faasaina ma le inupia ia lana matata o le pasiketipolo lea sa faapea e faamanuiaina ai ma auina atu ai o ia i lalo i se ala na tuua ai o ia e mafaufau e pule i le ola.

O le mea e leaga ai, o elemene o le tala a Todd e mafai ona vaaia i olaga o le toatele o alii talavou i aso nei, e oo lava foi i tagata o le Ekalesia. Ae peitai, e i ai se mea e le’i i ai ia Todd o loo i ai i alii talavou o le Ekalesia: o ni faataitaiga amiotonu. O taitai matutua o le Ekalesia e mafai ona avea ma se faamanuiaga tele i le tupulaga i se tasi o tulaga e sili ona ogaoga o o latou olaga. Ona o le tulaga sa i ai lona olaga, o Todd, o lē sa auai i le Ekalesia i le 22 o ona tausaga, ua taumafai nei ia avea ma se faataitaiga lelei i le autalavou o lana uarota.

O le liliuga o Uso Sylvester na oo mai i lona taimi sa sili ona pogisa, sa ia faia ai se tatalo faatauvaa: “Le Atua, ou te manaomia se fesoasoani.” O se masina ma le afa mulimuli ane, sa valaau atu ai ia te ia se uo ua leva, o se tagata o le Ekalesia, ma fai atu, “Todd, na ou lagona le musuia e fai atu ia te oe matou te manaomia oe i le matou au. … O le a e fesoasoani i ni tagata se toatele, ae maise lava o le autalavou ma tamaiti.”

O ni nai tausaga mulimuli ane, ina ua uma lona papatisoga ma le faaipoipoga i le malumalu, na valaauina ai Uso Sylvester e auauna atu i le polokalama a Alii Talavou—o se valaauga o le a taitai atu ai o ia e auauna atu i alii talavou mo le 14 tausaga.

O le faaaogaina o lona tuanai e fai ma uunaiga e fesoasoani ai i alii talavou sa valaauina ai o ia e auauna atu i ai, sa maua ai e Uso Sylvester se auala e faatatau atu ai i tauiviga sa ia vaaia e aafia ai nei alii. “Ou te manatu o le toatele o tamaiti e fefefe e talanoa e uiga i ai pe a latou feagai ma tauiviga,” o lana tala lea. “Ae sa ou faasoaina atu la’u tala ma nei tamaiti i tausaga uma lava. Ou te manatu ona o lena mea, latou te lagona ai le toafimalie e o mai ai ia te au ma fai mai, ‘Ei, o loo o’u tauivi ma ponokalafi po o le inupia, po o mafaufauga e pule i le ola.’” E lagolago e Uso Sylvester i latou a o latou galulue i le salamo, lea e aofia ai feiloaiga ma le epikopo.

O taitai o e faalogo ma tuuina atu le tali alofa i le autalavou i taimi faigata, e mafai ona fatuina se fesootaiga malosi lea e fesoasoani e mamanu ai le faasinomaga o se tagata talavou. Fai mai, Mat Duerden, o se polofesa lagolago i le Iunivesite o Polika Iaga o le na maua lona PhD i le atinaega o le autalavou, “O tausaga i le olaga talavou o le [taimi] e atiae ai e [tagata taitoatasi] se lagona o le faasinomaga patino: tulaga faatauaina, talitonuga, tiute, ma isi. O se faagasologa suesue lena. O se vaega o lena faagasologa o le maua mai o manatu faaalia mai tupulaga po o matua po o isi tagata matutua, ma e mafai ona matuai mamana pe afai o se tagata matua faaaloalogia ma faatauaina.”

Na faaauau le faamatalaga a Uso Duerden, “O matafaioi faafaufautua e sili ona aoga e fausia i luga o le vafealoaloai tutusa mo le tasi i le isi ma le lagonaina e le autalavou e faapea, o loo i ai se tagata e alofa moni ia te ia e tusa lava pe o a ona ofu e fai ma ana tala e fai.”

“O le toatele o tama e moomoo ia i ai se mafutaga ma o latou tamā,” o le tala lea a Uso Sylvester. “Afai latou te le maua lena mea, o le isi mea sili ona lelei e sosoo ai o le mafai lea ona i ai o se alii matua e mafai ona latou talanoa i ai, lafo atu i ai manatu, ae e le faamasinoina, ulagia, pe faitioina ona o o latou faafitauli. Ou te le’i i ai iina e suitulaga i o latou tamā, ae sa ou manao e i ai iina ina ia mafai ona latou talanoa mai ia te au i se auala lelei.”

E ui o taitai matutua o le Ekalesia e mafai ona faia se matafaioi taua i le fesoasoani lea e faufautua ma taiala se talavou, ae ua saunoa mai perofeta ma aposetolo, o faataitaiga muamua lava mo le autalavou o o latou matua. Mo se faataitaiga, na saunoa mai Elder M. Russell Ballard o le Korama a Aposetolo e Toasefululua e faapea: “Tama, o outou o faataitaiga autu o le tulaga faatamatane mo ou atalii. O oe o le latou uo ma le taitai e sili ona taua, ma talitonu i ai pe leai, o oe o le latou tama autu i le anoanoai o itu. O au upu ma au faataitaiga o se faatosinaga tele lea ia i latou” (“Tama ma Atalii: O Se Mafutaga Tulaga Ese,” Liahona, Nov. 2009, 47).

E leai ma se tasi o sootaga malolosi na fatuina e Uso Sylvester ma alii talavou na vave tupu; sa tatau ona ia atiaeina na sootaga i le gasologa o tausaga o auaunaga. O le 20 o alii talavou sa ia aoaoina, e 17 sa o e fai ni misiona. E le itiiti ifo ma le toa 5 o nei alii sa leai se faamoemoe e auauna atu a o le’i fegalegaleai ma Uso Sylvester.

“O le mafuaaga na tele ai lo’u faamanuiaina i nei alii ona, sa latou iloa sa matuai ou alofa ia i latou,” o le tala lea a Uso Sylvester. “Sa latou iloaina—e le ona sa ou fai atu i ai ae ona sa ou faaali atu i faatinoga. Sa matuai ou taulai atu i lo latou mauaina o se sootaga ma lo latou Faaola. Sa ou lagonaina o le ki lena mo i latou e sao ai mai mea uma ma ia agai ai i luma i le olaga ma ia faamanuiaina.”

O le fesoasoani atu i nei alii talavou e atiae se sootaga ma le Faaola, ua faamoemoe ai Uso Sylvester o a latou molimau o le a taitai atu ai i latou i le faia o ni misiona, faaipoipo i le malumalu, ma le tausia o se aiga amiotonu. “O le fuafuaga lena o le fiafia,” o lana tala lea. “O le mea lena e taua ai le [fesoasoani i le autalavou].”

“E taua le i ai o aafiaga tutusa ma le autalavou ina ia e i ai i le malae taalo e tasi. Nai lo le tutu i autafa o le laina, e manaomia lava lou auai ma le punouai. O loo i ai le malosiaga moni i aafiaga e fefaasoaai.

“E tatau i tagata uma o le Ekalesia ona auai punouai ma le autalavou, e tusa lava po o a o latou valaauga.”

Mat Duerden, polofesa lagolago, Iunivesite o Polika Iaga

TALA FAAMANUIAINA

O alii talavou o loo ta’ua i lalo sa ia i latou ni tagata sa avea ma ni faataitaiga lelei o e sa faia se eseesega i o latou olaga.

Ou te Le’i Toe Misia Lava se Sauniga Faamanatuga

I le avea ai ma se talavou, sa ou oo ai i tofotofoga masani o talavou o na vaitausaga. Ma le isi, sa i ai so’u tamā sa le malosi i le Ekalesia, ma sa na o lo’u tina lo’u sootaga ma le talalelei. E ui atonu ou te le’i iloaina, ae sa ou manaomia se tagata e umia le perisitua e faataitai i ai.

Sa tuu mai e le Tama Faalelagi i lo’u ala se alii o lē, e oo mai i le asō, o loo faatinoina pea ni faatosinaga maoae ia te a’u. O lona igoa o Paulo César dos Santos.

Ou te manatua se tasi o Aso Sa na ou le fia alu ai i le lotu. Sa ou manao i lo’u tina e tuua au i le filemu. Sa ou fai atu ia te ia e muamua atu i le lotu ae o le a ou sauni ona ou alu atu mulimuli ai lea. Ou te le’i alu ae sa ou nofo i le fale ma matamata se tuuga sa sau i le televise. Ae peitai, ina ua mavae sina taimi, sa ou faalogoina le leo masani o Epikopo Paulo o taufonō mai i le faitotoa. Sa ia talanoa mai ma le faapalepale ia te a’u, ma sa ou alu atu ma le musuā i le sauniga faamanatuga.

O lenei aafiaga sa i ai se taunuuga tumau ia te a’u, ma talu mai lena aso ou te le’i toe misia lava se sauniga faamanatuga.

Vinicius Elias Barbosa Jardim, São Paulo, Pasila

Sa Ia Vaai Mai ia te A’u o se Atalii o le Atua

I lo’u olaga talavou atoa i Misuri, ISA, sa avea ai Blaine Bartholomew, o se sui o le au peresitene o Alii Talavou a le siteki, ma se uo lelei ia te au i gaoioiga. Ae peitai, ou te le’i faatauaina lava lana faauoga po o ana fautuaga. Ae ana le atoa lava lo’u 18 e le amata moni ona i ai se sootaga loloto atu. Sa ia vaai mai i lo’u tauivi ma faaauau ona ou pau, ma i le avea ai ma o’u epikopo i le taimi lena, sa taumafai ai o ia e fautuaina a’u ma toe taitai mai a’u i le ala o le amiotonu. Sa iu ina ou pau atu i fualaau faasaina ma le ava malosi, ma ina ua ou siitia ese, sa faaauau pea ona ou uia lena auala tifato.

Ina ua ou toe foi mai i le fale, sa ou manatuaina Blaine ma lona alofa ia te a’u. Sa ia faaauauina ma le naunautai lena faauoga ma fai a’u ma se vaega o lona aiga. Sa le gata ina avea o ia ma se uo ae sa avea foi ma se tamā lona lua. E tele taimi sa ou onā ai pe oo foi i faatosinaga a fualaau faasaina, ae sa ia tausia lava au.

Ua ou matua nei ma teufatuina le ma mafutaga ma Blaine. O lana faamalosiau, alofa, ma le lagolago faifaipea sa sili atu ona taua nai lo le mea e mafai ona ia iloa. Na te le’i masalomia lava lo’u gafatia i le avea ai ma se atalii o le Atua. O le taimi nei o loo ou taumafai e faatoilalo a’u agasala ma le faamaualuga ma ua ou latalata atu lava i le osia o feagaiga ia sa ou le mafaufauina o le a mafai ona ou faia. Ou te faafetai ona sa saunia e le Tama Faalelagi se alii faapenei e fai ma se faataitaiga mo a’u.

Ua taofia le igoa, Iuta, ISA

Ata na tusia e Welden C. Andersen