Mai le Misiona
E Ala i Puipui Manifinifi
E alala le tusitala i Iuta, ISA.
Matou te lei iloaina lava seia oo i se taimi mulimuli ane, a o matou aoaoina se tasi o aiga i le talalelei, na matou aoaoina foi lo latou tuaoi e sosoo atu.
I le avea ai ma ni tamaitai faifeautalai, sa ma faasoaina atu ai le talalelei i se tamaitai na ola i ni tulaga faatauvaa i le pito i lalo o se mauga tele i talaane o se mea e sasaa ai lapisi a le tamai aai i nuu a uta o Asunción, Parakuei.
O Soledad ma lona toalua o Oscar, sa nonofo i se tasi o potu o se fale umi, ma le vaapiapi lea sa avea moni lava o se faasologa o potu e pipii faatasi itu, ma e manifinifi ia puipui. O potu taitasi sa avea o se tamai fale mautotogi e tasi le faamalama, tasi le faitotoa, tasi le laulau, ma tasi le moega. Sa tele ia ituaiga fale i lenei eria, na fausiaina i laupapa, o le taualuga e ato i lau ma le fola e palapala. O kelei sa faaaoga e faapipii i pupu lea na taofia ai i fafo nisi o le malulu.
Na Faalogo Soledad
O Soledad o se tina o se fanau laiti e toatolu, ma sa talavou foi o ia lava—ma lofituina. Na pau ia o mea na mafai ona ia faia e tausi ai lona aiga ma mea e manaomia o aso taitasi e lana fanau. Peitai sa foliga mai sa ia fiafia i a maua asiasiga ma iloaina se manaomia o le Atua i lona olaga.
Sa saoloto le faaalia e Soledad ona manatu ma lagona. Sa alofa o ia ma faamemelo atu ia Oscar ma sa la sosolaese ma Oscar mai lona aiga, e ui sa lei fiafia i ai ona matua. Sa lei ma’ua e i laua uma ma lona toalua ni aoaoga po o ni galuega, ma sa le mautonu lo laua lumanai. Sa ia mafaufau pe ua lafoaia o ia e le Atua ma pe sa Ia faasalaina i laua ona o filifiliga le lelei sa la faia.
Na tuleia e Oscar se taavale tosolima e i ai ni mea teuteu mo tamaitai i lea faitotoa i lea faitotoa i se taumafaiga e fesoasoani ai i lona aiga ina ia feola. A lelei sona aso, na te faataua se meaai ma, o nisi taimi, o ni meaalofa itiiti mo tamaiti. Ae a le lelei se faatauga, e masani lava ona ia toe foi faanoanoa, ita, ma onā i le aiga.
Sa ma lagona le luitauina ina ia fesoasoani ia i laua i le taulimaina o le tele o popolega faaletino. Ae sa ma lagonaina foi le uunaiga a le Agaga ina ia faaauau pea ona alofa ma aoaoina i laua, e ui lava na i ai taimi sa faalelelei ai lo laua alualu i luma.Ina ua mavae le tele o nisi asiasiga ma ni tatalo faamaoni, na iu lava ina ma lagonaina le manaomia o le tuuina atu ia i laua sina taimi e mafaufau ai i mea sa ma aoaoina ai i laua, suesue i le Tusi a Mamona, ma tatalo mo na o i laua lava.
Sa ma faamalamalamaina atu ia Soledad o maua atugaluga, ma sa le fiafia o ia. Sa ia manatu ua ma tuulafoaia lona aiga. Sa ia tau mai foi ia i maua o loo maitaga i lana tama lona fa ma e na te leiloa pe faapefea ona latou ola. I lona ita sa ia fai mai ai ia i maua ma te o ese loa ma aua nei toe foi atu.
Na Faalogo Foi Juan
Ae peitai, ma te le’i iloaina, o le tuaoi na sosoo ai, o Juan, sa faalogologo mai i puipui i mea sa ma aoaoina atu. Sa talavou o ia, fiailoa, ma e matamuli tele. A o ia faalogologo, sa i ai ni ana fesili se tele e uiga i le ata o le faaolataga, le Tusi a Mamona, ma le salamo. Na ia nonoina foi le kopi o le Tusi a Mamona a Soledad, faitau i ai, ma tatalo e tusa ai ma mea uma na ia aoaoina ma le le leoa.
Na mavae atu aso. Na amata ona popole Juan ina ua ma le toe foi atu e aoao Soledad ma Oscar. Ona oo lea i se tasi po, a o faamalumalu mai ia afa malolosi o le taumalulu, sa ia fesili ai ia Soledad po o fea ma te nonofo ai ma pe faapefea ona ia faafesootaia i maua. Sa fai atu o ia [Soledad] e na te leiloaina, ma sa amata ona tagi o ia [Juan]. Sa ia tuuina atu lana molimau ia te ia [Soledad] i le moni o la maua savali ma tamoe atu i fafo i le po matagia e saili mo i maua ao maligi timuga, ma amata ona liua magaala i vaitafe palapala.
Sa faaauau pea le sailiga i itula mulimuli ane, i le vaivai ma le malulu. Na amata ona ia tatalo ao agai atu i le pogisa, folafola atu i lona Tama oi le Lagi, afai o le a Ia fesoasoani ia te ia i le sailiga o i maua, o le a ia papatiso ma auauna atu ia te Ia i aso uma o lona olaga. I lena lava taimi, o Soledad, i le faagaeetia ai i le molimau a Juan, na amata ona tatalo ina ia ma toe foi atu. Na toe foi Juan i le fale ae na faaauau pea ona tatalo ma faitau le Tusi a Mamona mo le lua aso na sosoo ai. Na tatalo faatauanau foi Soledad ma talanoa ma Oscar. Na amata ona la faitaua faatasi le Tusi a Mamona.
Ma Na Faafofoga mai le Tama Faalelagi
O le lua o aso ina ua maea le matagi, a o ma tootutuli ma la’u soa i le tatalo, na ma lagonaina le manaomia o le toe foi atu i na tamai fale e i le pito i lalo o le mauga. Sa vave ona ma o, ma ina ua ma taunuu, sa faafeiloaia i maua i loimata o le fiafia ma le naunautai mai ia Soledad, Oscar, le la laua fanau, ma Juan. Sa latou faamatala mai mea uma na tutupu, ma talu mai lena taimi, na latou naunau uma e aoao e uiga i le talalelei. E lei umi ae papatisoina ia Juan, o Soledad ma Oscar na sosoo ai.
Ou te manatua le mafaufau ai pe aisea na matuai faagaeetia ai le faaauau ai pea ona aoao atu e ui lava e le o lelei le tali mai a Soledad ma Oscar. Ou te manatua le mafaufau ai pe aisea na ma lagona ai se faanatinati e toe foi atu ao lea sa tuliesea i maua i le ita. Ae ina ua ou vaaia le olioli lea na oo mai i le olaga o Juan ma sosoo ai ma Soledad ma le aiga a Oscar, na ou iloa ai e le gata sa faalogologo mai Juan i puipui manifinifi ae na faafofoga mai foi le Tama Faalelagi ia matou tatalo auauai taitoatasi, o tatalo e sau mai le loto.