Ia Avea ma se Malamalama i Au Uo
Sa ou ola ae ma ni uo lava e tasi mo uluai tausaga e 12 o lou olaga. Sa matou tuaoi. Sa tutusa aoga matou te aooga ai ma auai i pati o aso fanau o le tasi ma le isi. O nisi taimi ou te ‘ai ai i o latou fale, sa latou o mai i lou fale, ma sa matou maua le fiafia faatasi. Ae ina ua matou talavou, na amata ona suia na mea. Sa lei avea i latou o ni tagata o le Ekalesia, na latou palalauvale, ulaula, ma inupia. Na matuai ese lava se latou vaaiga e uiga i le tulafono o le ola mama nai lo au.
Sa ou mafaufau ma le toto’a e uiga i le faafitauli, ma o lea sa ou talanoa atu ai i lo’u tama e uiga i le mea e fai. Sa ia faapea mai, “E tatau ona e filifili. O nei uo lelei e ese mai ia te oe.I le amataga sa lei mafai ona e iloaina, ae o le taimi nei ua matuai tele lava se eseesega.”
Sa ou faatuatuaina le fautuaga a lo’u tama. Na iloa e a’u uo o a’u o se tagata o le Ekalesia, ma afai ou te filifili ou te le alu i mea latou te o i ai i taimi uma, sa latou malamalama. Na iu lava, ina faaitiitia ia taimi matou te faatasitasi ai e ui lava sa matou faauo pea.
O se tofotofoga ia te au le tuua o au uo, ae na ou iloaina sa taua le tausisia o mataupu faavae o le talalelei i lo’u olaga. Sa ou manatu e uiga i le fautuaga a Alema i ona atalii ina ua ia aoao i latou e faatuatua i le Atua. Sa ia faapea atu, “O ai lava e tuu atu lo latou faalagolago i le Atua e lagolagoina i o latou tofotofoga” (Alema 36: 3).
O se tasi o mea na fesoasoani ia te au ina ia manumalo ai i lenei taimi faigata o le auai i gaoioiga a le Ekalesia i vaiaso taitasi, e aofia ai le Mutuale. Sa ou faaaluina lou taimi i siva, taaloga, ma konafesi a le autalavou.
Sa ou feiloai i se uo fou e le auai i le Ekalesia, ma o nisi taimi na te valaauliaina au ma te o i pati. O nei pati na pau tonu lava i aso o le Mutuale, o lea sa ou fai atu ai ia te ia, “Ou te faamalie atu. Ou te fia alu, ae e i ai isi au fuafuaga.”
Sa ia fesili mai pe o le a la’u mea sa fai. Sa ou ta’u atu ia te ia, “Ou te alu i le Mutuale.”
”O le a le Mutuale?” na ia fesili mai.
Sa ou faamatala atu e tele ia o a matou gaoioiga malie e fai i le Mutuale ma ou te galue o se fesoasoani i le au peresitene. Ina ua uma ona ou teena ni valaaulia se tolu i ana pati, na ia fai mai, “Valaaulia au i le Mutuale.”
O lea sa ma o ai, na aoaoina o ia e faifeautalai, ma na iu ina papatisoina o ia.
Ou te valaaulia outou e faia ni filifiliga i le taimi nei ina ia mafai ona avea outou o se malamalama i a outou uo. E tasi le mea e mafai ona e faia o le auai i le seminare. E faia e a outou faiaoga seminare a latou vaega; latou te tuu atu se taumafaiga tele i le sauniaina o lesona mo oe. O le a sili atu ona avea le seminare o se faamanuiaga ia te outou pe afai e te faia lau vaega: faitau meaaoga, tatalo ma anapogi, maua ma talia aoaoga. O le a tupu le aoaoina pe a fai e vaega uma e lua mea e manaomia ona fai.
Ina ua ou i ai i le aoga maualuga, sa valaaulia au e se tasi o a’u uo i se pati ma faapea mai, “Ta o e fesili i lo’u tama pe mafai ona ta faaaogaina lana taavale.” Sa lei manao lona tamā e tuu atu ia te ia le taavale. Ma, ina ua vaai mai lona tama ia te au, sa ia faapea mai, “Ua lelei, o le a ou tuuina atu le taavale, ae na o Peniamina lava e aveina le taavale.”
Na iloa e lenei tamalii o lo matou aiga o ni tagata o le Ekalesia, matou te le inu ava malosi, ma o le a avea au ma se avetaavale saogalemu.
O tali mai o le tama o la’u uo na fesoasoani ia te au e talisapaia ia aoaoga a o’u matua ma faataitaiga la te faia. I le fale sa matou faia afiafi faaleaiga ma tatalo faaleaiga. O le Aso Sa o se aso lea matou te malolo ai. O nei ituaiga mea o ni faatinoga o le talalelei mo i matou, ma sa matou fiafia tele i ai. E masani ona valaaulia e lou tama nisi tagata o le Ekalesia e o mai i lo matou fale i aoauli o Aso Sa e talatalanoa e uiga i le talalelei. Na matou aai faatasi, matou talatalanoa e uiga i le talalelei, ma matou faasoaina se faigauo vavalalata.
Saunia nei e fausia o outou lava aiga malolosi o le lumanai. E te faia lena mea pe a e toaga e aoao e uiga i le talalelei. Manatua afai o le a e faalagolago atu i le Atua; fai ni tatalo faatauanau i aso uma; faitau ia tusitusiga paia; tausisia lo outou lava mama; ma galue i lau Tiute i le Atua po o le Alualu i Luma o le Tagata Lava Ia, o le a puipuia outou mai faigata, o le a avea ma se malamalama i au uo, ma o le a maua le olioli i lou olaga.
Ata na tusia e Scott Greer