Tala Faamamai o le Talalelei
O Le A Le Uiga o Iesu ia i Tatou i Aso Nei?
Sa faauuina Elder David B. Haight o se Aposetolo i le aso 8 o Ianuari, 1976, ma sa auauna atu i lena korama seia oo ina maliu o ia i le 2004. I le avea ai ma se Fesoasoani i le Aufono a le Toasefululua, na ia fofogaina ai lenei lauga i le konafesi aoao i le aso 6 o Aperila, 1974. Mo le anotusi atoa i le Faaperetania, tagai i le Ensign Me 1974 i le LDS.org.
O Iesu o loo ou iloa ma talitonu i ai o Iesu le Keriso, le Alo o le Atua.O lenei molimau ua faaalia mai ia te au e ala i le faamanuiaga ma le uunaiga a le Agaga Paia. Ou te iloa o Ia o … le Foafoa o le lalolagi ma mea uma o loo i ai, o Ia o lo tatou Faaola o lē alofa ia i tatou taitoatasi ma o lē na maliu i luga o le satauro mo i tatou, o lē o loo aoao mai ia i tatou le agaalofa ma le faamagalo atu, o le uo a tagata uma lava, o lē faamalolo i e mamai, o lē foai mai le filemu ia i latou uma o le a faalogo ma talitonu.
E le tatau ona se ese tagata o aso nei mai upumoni anamua ma aso e gata ai—upumoni ma aafiaga faaleagaga ia na tutupu ao savavali perofeta ma talanoa faatasi ma Iesu. O le a le uiga o Iesu i le au aposetolo anamua? O le a Lona uiga ia Peteru?
E le tatau ona se ese tagata o aso nei mai upumoni anamua ma aso e gata ai—upumoni ma aafiaga faaleagaga ia na tutupu ao savavali perofeta ma talanoa faatasi ma Iesu.
Ia Fai ma Faamanatuga ia te Au, saunia e Walter Rane
Ua tusia e Mareko mea na tutupu i le taeao o le Toetu, o loo taua ai na faatonuina ia Maria le Makatala ma Maria le tina o Iakopo e ni [agelu se toalua] na latou fetaiai ao ulu atu i le tuugamau e faapea, “O atu … ina ta’u atu i ona soo atoa ma Peteru” (Mareko 16:7). Sa patino lava le faatonuina o i laua ia faailoa atu ia Peteru. Sa faanatinati atu Peteru ma Ioane i le tuugamau. Sa ulufale atu Peteru, ma vaaia lavalava o ie lino ua gaugau faalelei ma le solosolo na i ai i Lona ao. Ua avea nei Peteru ma se molimau patino o lenei mea maoae ua tupu.
I le aso o le Penetekoso, sa tali atu ai Peteru … e uiga i le talalelei mamalu ma molimau atu e uiga ia Iesu o Nasareta. Sa tuia loto o tagata ma fesili atu, “Sema e, le au uso e, se a se mea matou te faia?” (Galuega 2:37) Ma o Peteru, faatasi ai ma lena talitonuga maumaututu fou ua faalolotoina, na tali atu ai, “Ina salamo ia, ma ia taitasi ma papatisoina outou uma i le suafa o Iesu Keriso mo le faamagaloina o agasala, ona maua lea e outou o le mea foai fua mai, o le Agaga Paia lea” (Galuega 2:38). Sa talitonu tagata e tolu afe ma na papatisoina. Sa latou lagonaina le agaga ma le mana o le Aposetolo sinia a lo tatou Alii. Pe tatou te masalosalo ea i le uiga o Iesu ia Peteru?
E faamalosia lava au i taimi uma e ala i le tuuto ma le maoae o le talitonuga maumaututu o Ioane. Sa matua leai lava se masalosalo. Na ia molimau mai: “Sa i le amataga le Lokou, sa i le Atua le Lokou, o le Atua foi le Lokou. … Na ia faia o mea uma lava. … Sa ia te Ia le ola; o le ola foi o le malamalama lea o tagata. Ua pupula mai foi le malamalama i le pouliuli; ae lei talia e le pouliuli” (Ioane 1:1, 3–5). …
Atonu e le oo lo tatou lava ia malamalama e iloa ai le uiga o Iesu ia Nifae ina ua faaali atu le Keriso toetu i le konetineta i sisifo, ma fetalai atu, “Faauta, o Au o Iesu Keriso, o le na molimau i ai perofeta o le a sau i le lalolagi.” …
Ona tusia lea e Nifae e faapea, “Na o atu le motu o tagata i luma, ma tuu atu o latou lima i lona itu, ma latou tagotago i tulaga o fao i ona lima ma ona vae” (3 Nifae 11:10, 15). … Sa latou i ai i Ona luma, ma sa mafai ona latou molimauina.
O le a le uiga o Iesu i le taulealea o Iosefa Samita? O le faaali mai o le Atua le Tama ma Iesu Keriso i le perofeta taulealea i aso nei ua faamatalaina i ana lava upu: “sa ou vaaia se malamalama faaniutu tonu lava i le aluga o lou ulu, e sili atu le pupula nai lo le la. … Ina ua oo ifo le malamalama i o’u luga, sa ou vaaia ni Tagata se toalua, e le mafaamatalaina lo la’ua mamalu ma lo la’ua pupula, o tutu mai i ou luga a’e i le ea. Sa fetalai mai le tasi o i laua ia te au, ma sa ia ta’u lo’u igoa ma fetalai mai a o tusi ane lona aao i le tasi—O Lo’u Atalii Pele lenei. Faalogo ia te Ia!” (Iosefa Samita—Talafaasolopito 1:16–17). …
O malamalama faaleagaga ma aafiaga faaleagaga e le tatau ma e le manaomia ona mou mai le mafaufau o tagata o aso nei, aua o le molimau a perofeta anamua ma aso nei ua faamaumauina mo le manuia o le a le tagata lava, ma o le taimi nei, ua molimau atu ai tagata talitonu i nei upumoni. O tagata o ona po nei e tatau ona suia le le mautonu ma le masalosalo i se naunautai e fiailoa atili e uiga ia Iesu.
O lo tatou tiutetauave ma avanoa mamalu o le molimau soo atu e uiga ia Iesu Keriso. E tatau ona tatou molimau atu i le lalolagi i Lona tulagafaaleatua, i le moni o Lona soifua mai i le tino i ni matua faalelagi ma faalelalolagi. Sa filifilia o Ia e faatino le misiona taua o le Toefuataiga ma le Togiola. O lenei mea na Ia faia—faasatauroina o Ia ma toetu mai mai le tuugamau, o lea ua mafai ai e tagata uma ona toetutu e ala mai i lenei Togiola ofoofogia a Iesu, e tutusa pau ai le tagata amiotonu ma le tagata agasala.
E mafai ona tuu atu mea uma i le ala o le alualu i luma e faavavau. O tagata uma o e talia o Ia ma salamo e maua le faamagaloga o ana agasala ua tuanai ma le avanoa e maua ai le faaeaga. “O a’u nei le ala, ma le upu moni, ma le ola: e le alu atu lava se tasi i le tama, pe a le ui mai ia te a’u” (Ioane 14:6). Mata e mafai e le mafaufau o le tagata ona atiina ae se manatu sili ona tamalii mo le faasinomaga o le tagata? O Iesu Keriso o le tagata autu lea.
I le fesili “O le a le uiga o Iesu i le tagata o aso nei?” Ou te molimau atu o Ia ua faauigaina o mea uma lava.