O Laasaga i le Fiafia
Mai se lauga na tuuina atu i le autalavou i Salta, Atenitina, ia Novema 2011.
O poloaiga e le i tuuina mai e taofiofi ai ae nai lo lena ia mafai ai mea tatou te mananao moni lava i ai ma mea e finagalo i ai lo tatou Tama Faalelagi, o le e alofa ia i tatou, mo i tatou.
Ata na tusia e David Habben; ata na tusia e Robert Casey © IRI
I nisi taimi, e le mautonu ai nisi o tagata, ma mafaufau ai o poloaiga o ni taofiofiga po o ni tapulaa e faafaigata ai le olaga, lea e aveesea ai avanoa po o le fiafia po o mea fiafia o le olaga. O le mea moni, o poloaiga e puipui ai i tatou ma taialaina i tatou i le fiafia. E le o ni mea e taofiofia ai ae nai lo o lena ia mafai ai—ona faatagaina i tatou ia ausia i lenei olaga ma le isi—o mea tatou te matua mananao moni lava i ai ma mea e finagalo i ai lo tatou Tama Faalelagi, o lē e alofa ia i tatou, mo i tatou.
E pei uma lava o ni faasologa o faasitepu. O sitepu taitasi e mafai ona faatusa i se poloaiga se tasi, ma o poloaiga taitasi tatou te usitaia, o le a mafai ona tatou agaigai ai i luga. Ma, afai tatou te malamalama i le agaga o le poloaiga, o le a tatou mananao atili i ai. Tatou te le lagonaina se le fiafia e faatatau i poloaiga; tatou te mananao atili i ai ina ia mafai ai ona alualu i luma. Ma o le a tuuina mai ia i tatou e se Tama Faalelagi o lē e alofa ia i tatou e tusa ma o tatou manaoga. Afai tatou te mananao i ai, o le a Ia tuuina mai ia i tatou nisi poloaiga ina ia mafai ai ona faatautaia lo tatou alualu i luma.
O lea, le tupulaga talavou e, faamolemole aua nei faitio e uiga i poloaiga. Aua nei fai mai, “Ou te le toe manao i ai”, ae ia fai mai, “Ioe, ia atili aumai, ma toe aumai. Ou te manao ia alualu i luma. Ou te fia maua le fiafia. Ou te manao ia avea faapei o lo’u Tama Faalelagi. Ma o poloaiga e faaali mai ai ia te au le ala e fai ai. Latou te tatalaina le ala i ou luma ma puipuia foi au mai mea leaga ma mea e faatamaia ai le fiafia—ma o nisi taimi latou te puipuia ai foi le ola lava ia.”
Ou te faamoemoe ua e talitonu. E ao ona tatou faia mea uma e tatau ai e tausi ai poloaiga, e tusa lava pe foliga mai ua tuua na o i tatou pe a tatou faia lena mea.
Lesona i Aso Sa
O Le Autu o le Masina lenei: O Poloaiga