Tauagafau: Faaaloalo mo le Alii
A o femalagaai le Au Pulega Aoao ma taitai o ausilali o le Ekalesia i le lalolagi atoa, ua matou iloa lelei ai lava ua amata ona faateleina le faatalale ma le faasalamausau i le lalolagi. Ua faaalia lenei mea i le tele o tulaga aemaise lava i le ala e fai ai lavalava o tagata. E moni foi lenei mea i nisi o tagata o le Ekalesia.
O le faatalale faapena atonu o se vaega o lona oo mai ona o le lē manatu popole. E ono oo mai ona o le lē malamalama po o le leai o ni faataitaiga sao. Ua tatou i ai nei i augatupulaga e lua i le tolu o le faiga o lavalava faasalamausau, ma atonu tatou te lei mauaina uma ni faataitaiga lelei mai i matua mo le fai lelei o lavalava ia talafeagai. O aganuu lauiloa foi latou te lei tuuina mai ni faataitaiga lelei. Atonu foi o se vaega o le oo mai o le fai ifo ona ua faigata ona faatau ni lavalava talafeagai e tausaafia ma tauagafau i faleoloa i aso nei.
O nei vaaiga ma nei luitau i le mafaufau ua ou manao ai e faamamafa atu le manaomia o le faaaloalo mo lo tatou Tama Faalelagi ma, mo le tausia o feagaiga sa tatou osia ma Ia, aemaise lava e faatatau lea i lavalava talafeagai.
O Le Mataupu Faavae o le Tauagafau
Atonu ua manatu nisi o le Au Paia o Aso e Gata Ai o le tauagafau o se aganuu a le Ekalesia pe faapea, na afua mai i amioga tausaafia ma lelei aiai. O le tauagafau e le na o se tulaga faaleaganuu. O le tauagafau o se mataupu faavae o le talalelei e faatatau i tagata o soo se aganuu ma soo se matutua. O le mea moni, o le tauagafau e taua i le agavaa ai mo le Agaga. O le tauagafau o le lotomaulalo foi lea, ma o le lotomaulalo e valaaulia ai le Agaga e faatasi ma i tatou.
Ioe, o le tauagafau e le o se mea fou. Na aoao atu ia Atamu ma Eva i le Faatoaga o Etena. “Ua faia foi ofu pa’u e Ieova le Atua mo Atamu ma lana ava, ua faaofu ai ia te i laua” (Kenese 3:21; tagai foi Mose 4:27). E pei foi o Atamu ma Eva, ua aoaoina i tatou o o tatou tino ua faia i le faatusa o le Atua ma o lea ua paia ai.
“Tou te le iloa ea o le malumalu outou o le Atua, o loo nofo foi le Agaga o le Atua i totonu ia te outou?
“… E paia le malumalu o le Atua, o outou lava ia” (1 Korinito 3:16–17).
O o tatou tino o malumalu ia o o tatou agaga. Ma le isi, o o tatou tino o le auala lea e mafai ai ona tatou aumaia agaga mai le afioaga o le Atua i lo latou olaga faitino. A tatou iloa o o tatou tino o ni meaalofa e pei ona i ai, ma a tatou malamalama i misiona latou te fesoasoani ia i tatou i le faataunuuina, tatou te puipuia ma faamamalu i ai i auala tatou te amio ai faapea ma o tatou lavalava.
I aso uma o le olaga, o lavalava e le tauagafau e pei o ofuvae e pupuu tele, lausakete mini, ofu fufusi, o mitiafu e aliali ai puimanava, ma lavalava valavala e le talafeagai ia. O alii ma tamaitai—e aofia ai alii talavou ma tamaitai talavou—e tatau ona fai lavalava e ufiufi ai tauau ae aloese mai lavalava e pupuu tele le pito i luma po o tua pe valavala foi i soo se itu. O ofuvae fufusi, mitiafu fufusi, o lavalava e ova le oo, lavalava e maanuminumi, ma lauulu e le faia faalelei, e le talafeagai lea. E tatau i tagata uma ona aloese mai le soona faia o ni tifiga o lavalava, tifiga i le teuina o ulu, ma isi tulaga o foliga vaaia. E tatau ona tatou tumama e le aunoa, ma aloese mai le fa’inaelo po o le manatu faasamasamanoa [i ofu ma teuga].1
O le tauagafau e i le totonugalemu o le avea [ma se tagata] mama a’ia’i ma le nofo mama, i mafaufauga ma amioga. O le mea lea, talu ai ona na te taialaina ma faatosinaina ai o tatou mafaufauga, amioga, ma filifiliga, o lea e avea ai le tauagafau ma se vaega tutotonu o o tatou uiga. O o tatou lavalava e sili atu nai lo na o le ufiufiina o o tatou tino; e atagia ai o tatou tagata ma le ituaiga tagata tatou te mananao e avea ai i tatou, iinei i le olaga nei ma le faavavau o le a mulimuli mai.
Tauagafau i Lavalava mo Sauniga a le Ekalesia
Pe a tatou o atu i sauniga a le Ekalesia, o lo tatou faamoemoega o le tapuai atu i lo tatou Tama oi le Lagi, ma Lona Alo o Iesu Keriso. O o tatou lavalava e tatau ona faaalia ai lo tatou migao ia te i Laua. E le faapea e fai o tatou lavalava ina ia vaavaai mai uma tagata ia i tatou, ma faapea ona faalavelave ai i isi ma mafua ai ona aluese le Agaga.
O le matafaioi a matua o le aoao o a latou fanau i le faiga o o latou lavalava ma saunia mo tapuaiga i totonu o maota o le Alii. E mafai ona aoao e tina ma tama a latou fanau e ala i le tagai totoa ua fai faalelei lavalava i se faiga e iloa ai le tauagafau ma le migao i o latou lava foliga vaaia ma amioga.
A o o’u laitiiti, na aoaoina a’u e lo’u tina e tatau ona ofu lo’u ofu “pito sili ona lelei mo le Aso Sa”—i se isi faaupuga, o lo’u ofu e sili ona lelei—i le lotu. O le a se mea e tupu i lou aiga a o e sauni e te sau i le lotu? E i ai se taimi ae e te lei tuua lou fale, e te toe tu ai e te tilotilo ia te oe lava i se faata pe fai atu i se tagata o lou aiga pe o le a sana vaai ia te oe?
Ia faaali le faaaloalo i le Alii ma mo oe lava e ala i le fai lelei o lavalava mo sauniga ma gaoioiga a le Ekalesia, e tusa pe fai i le Aso Sa po o aso o le vaiaso. Afai e te le mautinoa po o a lavalava e talafeagai, ia fesili i ou taitai mo se taiala.
Tauagafau i Lavalava mo le Auai atu i le Malumalu
E mafai ona e vaai faalemafaufau ia te oe lava ua e oo atu i le malumalu ma e sauni e ulufale atu i le maota o le Alii. I lou mafaufau, o loo see ni ou seevae tosotoso, ofuvae uumi mafiafia lanumoana, ma se mitiafu faapea ma lou ulu e veuveua? E leai. Ae e fetaui lou ofuina o ni ofu masani o soo se ituaiga i le malumalu? Afai o loo e susū mai i le maota o le Alii, pe le tatau ea ona e ofuina lou ofu e sili ona lelei o le Aso Sa?
O le isi taimi e te agai mai ai i le malumalu, tu e vaavaai i laufanua o le malumalu. Pe na e mafaufau ea pe aisea ua siomia ai le malumalu i laau mananaia, vai iila, ma lona fausaga? Latou te tuuina atu se vaaiga i fafo ma se lagona e saunia ai le tagata ulu mo sauniga paia o loo faatali mai i totonu o le malumalu. E tusa lava pe tu se malumalu i le ogatotonu o se aai tele, o le fausaga i fafo e tulaga ese ai le maota mai isi fale o loo siomia ai.
E faapena foi le taua o o tatou lavalava. O le “vaaiga” mo le faatusaina o o tatou tino o ni malumalu. E pei ona faaalia i laufanua o le malumalu ia le paia ma le migao mo sauniga o loo faia i totonu o le malumalu, o o tatou lavalava foi, e faaalia ai le matagofie ma le mama o o tatou tagata i totonu. O le faiga o o tatou lavalava e faaalia ai tatou te faaaloalo lelei i sauniga o le malumalu ma feagaiga e faavavau ma pe ua tatou saunia mo le mauaina o ia sauniga ma feagaiga.
I le tala faafagogo lauiloa, na ofuina ai e Cinderella se ofu matagofie i le siva a le aigatupu. E oo lava foi i ona seevae na faapea ona atagia ai le taua o le afiafi! Semanu e iloa ai lona le magafagafa pe ana sau o ia i ona ofu faigaluega. O le mea moni, e leai se tasi na taunuu atu i le siva i ni ofu le talafeagai po o ni ofu masani. Sa latou laei mamalu uma mo le faamoemoe.
O le a le toe i ai se isi faamoemoe e sili atu le taua i lou olaga nai lo le aso o lau faaipoipoga. O lau faaipoipoga o se tasi lea o faamoemoe aupito sili ona paia o lou olaga, ma e faamoemoe lava o le a faia i le malumalu paia—o le maota e aupito sili ona paia o le Tama Faalelagi iinei i luga o le fogaeleele. Afai e te malamalama lelei i le natura o feagaiga o le a e osia, o le a e faaatagiaina i lou ofu [faaipoipo]. Tamaitai faaipoipo, o le a e filifilia se ofu paepae o le malumalu o lona tino ma lima e talafeagai mo le ofuina o ofusa o le malumalu. O le a e faia lenei mea ona o le sauniga o le faaeega paia ma feagaiga na e tauaveina i ou lava luga e sauniuni ai mo le sauniga o lou faamauga. Alii faaipoipo, o ou laei ma foliga vaaia o le a tauagafau ma mama. O le a e le ofuina se ofutino maanuminumi po o se ofuvae e ova le oo i totonu o le malumalu.
Pe a oo mai lena aso mo oe, o le a e osia ai ni feagaiga paia ma le Tama Faalelagi. O le a e manao e matuai mananaia ou laei ma ou foliga a o e tootuli ma le faaaloalo i se fata faitaulaga i luma o le Atua.
Matua, e pei lava ona fesoasoani le tina faaleagaga o Cinderella ia te ia, e mafai foi ona outou fesoasoani e saunia o outou atalii ma afafine. Fesoasoani ia latou malamalama i le taua o feagaiga o le a latou osia. O le faamamaluina o a tatou feagaiga, e amata atu i le papatisoga, e aafia ai po o ai i tatou ma po o a foi mea tatou te faia, e aofia ai ituaiga tala tatou te tautatala ai, o musika tatou te faalogologo ai, ma lavalava tatou te ofuina. Pe a tatou osia ma tausia feagaiga, ua tatou o ese mai le lalolagi ma o atu i le malo o le Atua. E tatau ona atagia i o tatou foliga vaaia lena mea.
Ae e te lei auai atu i le malumalu, e tusa pe ina ia e faaipoipo, ia maua faaeega paia, po o le faia o galuega mo e ua maliliu, ia tu mo se taimi ma fesili ifo ia te oe lava i fesili nei: “Ana faapea e i ai le Alii i le malumalu i le aso lenei, o a ni olavalava e fai? E faapefea ona ou manao e faaali atu au ia te Ia?” Ioe, ua manino lava le tali. O le a e manao ia sili ona manaia ou foliga ma ou lagona.
Ia fesili ifo ia te oe lava i fesili nei e uiga i le auai atu i le lotu i le Aso Sa i lo outou falelotu i le lotoifale. O iina o le a e faafouina ai au feagaiga o le papatisoga e ala i le taumafa i le faamanatuga. Ia manatua, o loo e sau i le maota o le Alii na faapaiaina mo tapuaiga ia te Ia.
Foliga Vaaia i Fafo—o Savali Tatou te Auina Atu
A faapea la o loo e matamata i se tala faatino. Ua sau i luga o le tulaga ia se tagata faafiafia o loo teu mai o se tagata faaluma, ae tei ua amata ona ia faatinoina se vaega a le tagata autu. Atonu e te tali atu e ala i lou mafaufau faapea, e le o fetaui le mea lenei—masalo o i ai se mea ua sese i teuga po o tagata faafiafia.
Ia mafaufau la i le le talafeagai o le alu atu i le lalolagi po o le sau i le lotu i ni laei e le o iloa moni ai oe i le agaga. O o tatou foliga vaaia i fafo ma a tatou amioga e auina atu ai se savali. O le a se savali o loo tatou auina atu? Pe o atagia ai o i tatou o ni fanau a le Atua? Pe a tatou o atu i le lotu po o le malumalu, e taua tele le faiga o o tatou lavalava e faaalia ai ua tatou saunia e tapuai ma e faailoa atu ai ua tatou saunia faalemafaufau ma le faaleagaga e valaaulia le Agaga ia faatasi ma i tatou e le aunoa.
O tausaga ua mavae, i le avea ai o se tamā ma se epikopo i le Ekalesia, sa ou le malamalama i mafuaaga a le autalavou o e na oofu i ni ofu e lanu malolosi ma tifiga soona fai e faaalia ai lo latou “pupula tetee” ma le le tauagafau, tulafono ma aga masani o le fai faalelei o lavalava. O le mea malie, i la’u matau atu i ai, o le usitai lelei o nei talavou i tulafono ese i le faiga o o latou lavalava na manaomia ai lo latou matuai usiusitai ma le taaina i faatosinaga a le tupulaga, nai lo le mea na manaomia e tagata lautele.
Afai e fai o tatou lavalava ona o le manao ia taulai mai tagata ia i tatou, tatou te le o valaauliaina le Agaga e faatasi ma i tatou. E ese a tatou amioga pe afai e fai o tatou lavalava ona o vaaiga a le lalolagi. Ma le isi, o lavalava tatou te ofuina e aafia ai uiga o isi e agai mai ia i tatou.
Mafaufau pe aisea e laei ai ma le faaeteete faifeautalai i se lausakete ma se ofutino po o se suti ma se ofutino paepae ma se fusiua. Mata o le a se tali atu a se tagata pe afai e veuveua ulu o faifeautalai pe faia foi se ofuvae uumi mafiafia lanumoana, seevae tosotoso, ma se mitiafu e i ai se faaupuga mataga o lolomi ai? Atonu e ono fesili ifo lena tagata, “Pe o se sui ea lenei o le Atua?” Aisea o le a manao ai lena tagata e faia se talanoaga aloaia e uiga i le faamoemoega o le olaga po o le Toefuataiga o le talalelei ma se faifeautalai faapena?
E moni e le manaomia ona tatou faia ni laei e pei o faifeautalai i taimi uma lava. Ae e i ai lava taimi faapitoa e talafeagai ai lavalava masani e tauagafau. Ae o le uiga o le: O le ala e fai ai o tatou lavalava e aafia ai foi le ala e tali mai ai tagata ia i tatou. E faaalia ai foi le mea moni o loo fia i ai o tatou loto.
O o tatou lagona i totonu e faaalia foi i fafo. E faaali lo tatou alolofa ma faaaloalo ia i tatou lava ma isi e ala i o tatou uiga, faamatalaga, ma lavalava. E faaali lo tatou alolofa ma le faaaloalo mo taitai o le Ekalesia ma tagata o le uarota po o le paranesi e ala i le tautala atu, faiga o lavalava, ma amio i se amioga e le aumaia ai ni taulaiga le talafeagai ia i tatou lava. E faaali lo tatou alolofa ma faaaloalo i uo ma paaga pe afai e le tufanua ma le mataga a tatou gagana, lavalava, ma amioga. Ma e faaali lo tatou alolofa i le Alii e ala i laei ma amioga lotomaulalo. “O le mea lea e iloa ai e tagata uma lava o o’u soo moni outou, pe afai ua outou fealofani” (Ioane 13:35).
Ia Oofu “i le Ofutau Atoatoa”
Pe a tatou iloa o ai i tatou—o fanau a le Atua—ma malamalama e faapea o o tatou foliga vaaia i fafo e aafia ai o tatou faaleagaga i totonu faapea foi ma a tatou amioga, ona tatou faaali atu lea o le faaaloalo mo le Atua, mo i tatou lava, ma i latou o loo siomia i tatou e ala i le tausaafia i lavalava ma amioga.
Na fesoasoani lou tama, o le na avea o se tusiata, ia ou malamalama i lenei mataupu a o ou laitiiti. Sa ia tusia mo au se ata o se fitafita i lona ofutau ma faaigoa ia vaega taua “o le ofutau atoatoa o le Atua” e pei ona faamatalaina i tusitusiga paia (tagai Efeso 6:11–17; MFF 27:15–18). Sa tautau lena ata i totonu o lo’u potumoe ma na avea ma se faamanatu o mea e tatau ona matou faia ina ia tumau ai i le amio sa’o ma faamaoni i mataupu faavae o le talalelei.
E pei lava ona tatau ona tatou “oofu” i le ofutau o le Atua, e tatau foi ona tatou “oofu” i o tatou lavalava o se puipuiga mo i tatou faapea ma isi. O le faaofuina o i tatou lava i ofu talafeagai ma amioga tauagafau ma le tausaafia—o le alofa tunoa, agalelei, lotomaulalo, onosai, ma le alofa mama—o le a valaaulia ai le mafutaga a le Agaga ma o le a faatosinaina ai i latou o e siomia i tatou i se itu lelei (tagai Kolose 3:12, 14).
Pe o tatou naunau ea e avea o se Au Paia i le malo o le Atua, pe ua sili atu ona tatou lagolelei i ala o le lalolagi? Mulimuli ane, o le faiga o o tatou lavalava o le a matuai aafia ai lo tatou usiusitai i poloaiga ma le tuuto atu i feagaiga. O le faia o lavalava talafeagai o le a taialaina ai o tatou uiga ma amioga a o tatou ola i aso taitasi. E i ai foi le taimi e ono filifilia ai e o tatou lavalava ia ituaiga uo ma paaga tatou te ono maua, e faapea ona musuia ai pe tatou te ola agavaa e olioli i faamanuiaga o le fiafia i le olaga nei ma le faavavau.
O lau tatalo faatauanau ina ia tatou tausia a tatou feagaiga ma ia talafeagai o tatou lavalava ma tauagafau ma tausaafia amioga a o tatou auai atu i le lotu, asiasi i le malumalu, ma ola i o tatou olaga i aso taitasi. A o tatou faia na mea, o le a tatou faaali atu le faaaloalo mo i tatou lava, o tatou matua, o tatou taitai o le Ekalesia, ma isi, ma o le a tatou faaali atu le migao i lo tatou Tama Faalelagi ma valaaulia le Agaga ina ia mafuta ma i tatou e le aunoa.