Faatuatua o se Aiga

SAUNIA E Kimberly Reid

Mekasini a le Ekalesia

E oo mai lava i aso nei, o falesa tetele ua tai fia seneturi o i ai, o nisi ia o fale aupito maualuluga i Italia. O toega o fale ua leva na faaleagaina o le faailoga lea o nuu i aso ua mavae, ae o fale o fausaga tuai o loo i ai lava i magaala piopio uumi. O tulafono o le fausiaina o fale i aso nei ua faasaina ai le fausiaina o ni fale maualuluga, ma o le fanua maotua o Tuscan ua puipuia faaletulafono mai le soona atiina ae. O le mafuaaga ona ua tautino tagatanuu o Italia i le faasaosaoina o lo latou talafaasolopito. A faapea e toe foi mai le alii lauiloa o le Renaissance [Amataga Fou] o Michelangelo i le lalolagi i le taimi nei, e faamoemoe tagata Italia o le a faigofie ona ia iloaina lona nuu moni.

Ua fiafia tagata o le Ekalesia i Italia atoa i le faasaoina o mea e sili atu i lo na o fausaga o fale ma laufanua. Ua latou tulimatai atu i le faasaosaoina o le faatuatua i augatupulaga uma. E pei o le tele o tagata o le Ekalesia i le lalolagi atoa, o le Au Paia o Aso e Gata Ai i Italia, o ni paionia i le foafoaina o le tele o augatupulaga faaleaiga e auai i feagaiga o le talalelei. O nei tagata o le Ekalesia o loo feagai ma aganuu tuai ma le malosi o le faalelalolagi o loo siomia ai i latou, ae peitai latou te taulai atu i le Faaola ma taumafai e fausia le faatuatua o le a faapea ona ola i loto o a latou fanau.

Faaaloalogia o le Aiga

O se tasi o vaega autu i le fausiaina o le faatuatua i aiga o le lototele e amata se aiga. O Marco ma Raffaella Ferrini o le Paranesi a Firenze Lua, Itu a Florence Italia, sa tafafao faamasani muamua ao lei faia ni a la misiona. E lei umi ona uma mai a la misiona, ae musuia i laua i totonu o le malumalu e tatau ona la faaipoipo i se taimi vave. “I Italia, o se mea masani lava le faaipoipo pe a 30 ma ona tupu ou tausaga,” o le tala lea a Marco. Na fesiligia i laua e nisi o a laua uo ma aiga, “Aisea o le a oulua faaipoipo ai ae e te lua lei taitai?”

Na faafetaia e le ulugalii ia faatosinaga a matua o Marco, o Anna ma Bruno, mo le fesoasoani ia i laua e faataua le faaipoipoga. Ina ua auai Anna i le Ekalesia i le 1968, sa toaitiiti lava tagata o le Ekalesia i Italia. Ina ua uma ona tatalo o ia mo lana filifiliga, sa faaipoipo atu loa o ia i a Bruno, o se alii na faaaloalo i ona talitonuga ma faatagaina o ia e aoao la laua fanau i le talalelei. “Ou te lei popole lava i le faaipoipo atu i se Mamona ona o le faaaloalo tele o i maua ma Anna o le tasi i le isi,” o le faamatalaga lea a Bruno.

E ui lava ina sa lagona le faanoanoa o Anna ona sa le mafai ona ia tuuina atu i lana fanau ia faamanuiaga uma o se aiga e faavavau, ae fai mai o ia, “Na ou iloaina lava o lo’u toalua o se alii lelei ma o le a iu lava ina manuia mea uma.” O le taimi lea, sa ia aoaoina ai lana fanau tama, o Marco ma Alessio, ina ia fai le Faaola ma totonugalemu o o laua olaga ma ia faataua le aiga.

Mulimuli ane, ua auai Bruno i le Ekalesia. O le taimi nei o loo peresitene o ia i le Paranesi a Firenze Lua. Ae o le 29 tausaga lea sa le naunau ai o ia e auai i le Ekalesia, sa la galulue ai lava ma Anna e faia se faaipoipoga fiafia. O le la mafutaga mafana na faia ai se aafiaga lelei i le la fanau ma o la taitoalua. “O le taimi muamua lava na ou tuvae ai i totonu o le latou fale, na matuai faagaeetia ai lava au i le manaia o lo latou olaga faaleaiga,” o le tala lea a Raffaella. “E le ee atu le tasi i le isi. O i latou o ni tagata e to’afimalie ma agalelei le tasi i le isi. Sa matuai ou manao lava i se olaga faapena.”

Sa manao foi Raffaella i se faaipoipoga i le malumalu. Fai mai o ia, “O le faaipoipo i le malumalu o se sini lelei lea,” e ui lava atonu e fai si faigata atu i atunuu e tau leai ai ni tagata o le Ekalesia. “O loo taumafai Satani e faaosooso i tatou e fai ia filifiliga sese, ae afai ua i ai sa tatou sini lelei ua manino lona tulaga i o tatou mafaufau, o le a fesoasoani le Tama Faalelagi ia tatou faatoilaloina mea uma ina ia mafai ona tatou ausia lena sini.” Ua faafetai o ia ona ua faigofie atu i aso nei ona feiloai i tagata o le Au Paia o Aso e Gata Ai nai lo le vaitaimi o le tupulaga a ona matua. Ua fiafia foi o ia ona ua faamanuiaina o ia e le Alii i le avanoa e faaipoipo atu ai “e le gata o se tagata o le Ekalesia ae o se tagata agavaa foi e umia le perisitua.”

Na faaalia e Raffaella ma Marco lo laua agaga faafetai i le Alii e ala i le faia o ni osigataulaga ina ia mafai ona la faaipoipo i le taimi na taialaina ai i laua e le Agaga e faaipoipo ai. Sa la fuafuaina se fiafia faigofie ma e le taugata, ma na tonu ia Marco e tolopo le faaumaina o ana aoaoga i le iunivesite. “E taugata lava mea uma iinei, ma e faigata foi le faia o le sili atu ma le tasi se mea i se taimi e tasi—aoga, faigaluega, ma le faia o se aiga,” o lana tala lea. O atugaluga tautupe e faaosofia ai le toatele o tagata Italia e faauma aoaoga, ma faamautu ni galuega ona faatoa faaipoipo ai lea, “ae peitai o o maua faanaunauga autu lava o le amataina o lo maua aiga,” o le tala lea a Marco. Na ia iloaina e na o le tolu lava mea sa sili ona manaomia e mafai ai ona faia: o se galuega, o se fale e nonofo ai, ma le faatuatua e agai ai i luma. O le taimi muamua “ou te lei maua se galuega lelei tele, ae na lava lava,” na fai mai ai Marco. “Soo se taimi lava e te faia ai se filifiliga faigata, ia na o lou faia lava. E te faia i lou faatuatua ma taumafai le mea sili e te mafaia,” ma le faatuatua o le a oo mai faamanuiaga manaomia. Mulimuli ane, na faamanuiaina o ia i se galuega e lelei atu le totogi i galuega faaturisi, e faafetai ai i gagana eseese sa ia aoaoina i lana misiona. O loo i ai foi sana molimau i le totogiina o le sefuluai aua e lei faapea lava na matitiva lona aiga talavou.

E faataua foi e Marco ia fautuaga a taitai o le Ekalesia ia maua ni aoaoga lelei, a o fuafua o ia ia maua lona tikeri pe a matutua teisi ae lana fanau. Ae o le taimi nei, “Ou te lagona lava ua tau mai e le Agaga ia te au e taua lou i ai faatasi ma lou aiga. Ma talu lava ona fananau mai lau fanau e toalua o Giulia ma Lorenzo, ou te lei faanoanoa lava i se mea.”

“E le tele ni a matou tupe,” o le tala lea a Raffaella, “ae o loo matou fiafia lava.” Latou te faafetai i le auai i le ala sili o le fiafia ma aoao atu ona upumoni i le isi tupulaga e sosoo ai—le tupulaga lona tolu o le latou aiga ua maua faamanuiaga o le talalelei.

Tasi i le Faamoemoe

O le lotogatasi faaleagaga e mafai ona avea o se elemene faapitoa i le fausiaina o le faatuatua mausali a le aiga, o le faamatalaga lea a Piero Sonaglia o le Siteki a Roma Italia. “O le tasi i le faamoemoe e mafai ona avea ma punavai o le malosi mo aiga uma,” ae e sili atu ona avea o se faamanuiaga pe afai o lena faamoemoega o le “ia o atu faatasi ia Iesu Keriso.” O le sini aupito taua lenei a lona aiga.

E lei faapea na i ai i taimi uma ni itu na ave i ai le faamuamua a Piero. I le 15 tausaga o lona matua na aluese ai o ia mai le Ekalesia ma e lei toe mafaufau ai lava e toe foi mai seia oo ina avea o ia ma se tama ma le taulimaina ai o le tulaga na toeitiiti a pe ai le fatu o lona lava tama. O nei mea na tutupu na faaosofia ai mea e manatua ai aoaoga o le talalelei sa ia aoaoina a o laitiiti. “Sa ou iloaina lelei lava na tatau ona ou salamo ma faatulaga lelei lo’u olaga,” o lana tala lea. Na ia iloaina foi “o se suiga taua ma le tele faapena” o le a aafia ai lona aiga. Na tete’a ona matua, o se vaega o le [mafuaaga o le tete’a] ona o eseesega i tulaga faalelotu, ma sa manao o ia ina ia faatasia lona lava aiga.

O le faletua o Piero, o Carla, na soifua ae i se ekalesia e ese mai le ekalesia a [Piero], ma sa auai o ia i Aso Sa taitasi a o laitiiti. “Ae ou te sau lava i le fale ua atili ai lo’u le mautonu,” o lana tala lea. Ia te ia lava, o le lotu na avea o se tu masani ae le o se mea e faatonutonu ai lona olaga. Sa matelaina Carla mo se mea e sili atu. Fai mai a ia, “Sa malosi o’u lagona ou te fia tatalo lava a’u ia i le Tama Faalelagi, e faaaoga ai a’u lava upu” nai lo tatalo ua uma ona tusia. O lona latalata ma le agaga tatalo i le Alii na saunia ai o ia e opogi le talalelei toefuataiina ina ua toe malosi Piero [i le Ekalesia].

I le avea ai o ni matua ua faatasia i le faatuatua, o loo taumafai ai Piero ma Carla e saunia o la atalii o Ilario ma Mattia, e tetee atu i faaosoosoga—ua amata i le taimi lava lenei, a o laiti i laua. “E faitau a matou tusitusiga paia i po uma, fai a matou afiafi faaleaiga,” o le tala lea a Carla. “E fiafia lava le ma fanau tama e auai ai. Matou te o i le lotu. Matou te tatalo faatasi. Ma te o i le malumalu.” O le auai atu e le aunoa o Piero ma Carla i le malumalu e le o se mea faigofie pe afai o le malumalu aupito lata ane o loo i Suitiselani ma Sepania.

“Ma te taumafai e faataua taimi uma o se avanoa e aoao atu ai,” o le faaopoopo mai lea a Piero. “O le tulaga lenei o o laua olaga, o loo faapitoa lava le aoaoina e le ma fanau laiti o le usiusitai i o la’ua matua.” E faamoemoe Piero o le a fesoasoani lenei mea la te iloa ai ona usitai i le Tama Faalelagi, ma faaaupegaina ai i laua i le malosi ma le molimau e manaomia e tumau ai ma le faamaoni i o la’ua olaga talavou ma le matutua atu. Ua ia iloa—ma e manao ia iloa e lana fanau—o le fiafia tumau e na o le usiusitai lava i le Atua e maua ai.

E pei foi o Piero, o Andrea Rondinelli o le Siteki a Roma Italia na ia mauaina le talalelei ina ua mavae se mea na tupu na suia ai lona olaga, o le maliu lea o lona tama. “Na ou iloaina e le tatau ona muta ai faapena,” o lana tala lea. Na ia lagonaina e tatau lava ona i ai se olaga e i tua atu o le tuugamau ma se faamoemoega i le ola ma le oti. Sa ia iloaina le Ekalesia i le 15 o tausaga muamua atu, ina ua papatisoina ona tuafafine. Ina ua uma le maliu o lona tama, sa ia sailia loa faifeautalai ma na faapea ona papatisoina ai o ia i le 15 o aso mulimuli ane.

E lei leva ae maua lona faamanuiaga faapeteriaka. Na folafola mai ai e le Alii ia te ia se soa e faavavau. “A o ou saili mo ia, sa ou tatalo e le aunoa,” o lana tala lea. Sa manao o ia i se toalua o le a tutusa o la faamoemoega faaleagaga, ma sa ia faamutaina se tasi o ana faamauga ina ua le manao lana uo la te faamau i le malumalu. “Sa ou faia mea uma e mafai ona ou faia ou te saunia ai mo le taimi ou te feiloai ai i lo’u toalua,” o lana tala lea. O le tali i se tasi o ana tatalo, na maua ai e Andrea se lagona e i ai se aso o le a maua ai sona atalii. O lenei aafiaga na fesoasoani ia te ia e onosai ai pea seia oo ina feiloai atu o ia i a Mariela.

Na maua e Mariela le talalelei i Kolomupia i le 11 o ona tausaga. Ina ua maea lana misiona i lona atunuu moni, sa asiasi atu o ia i Italia. Sa faateia o ia—ma na fai si ona le fiafia—i le lagonaina o le uunaiga a le Agaga e nofomau ai iina. “Sa lelei lava mea uma i Kolomupia,” o lana tala lea. “Sa ou faigaluega. Sa ou toaga i le lotu. Sa ou maua le avanoa ou te aoga ai. Ae na ou lagonaina lava i lo’u loto sa ou iinei mo se faamoemoega, ma o lo’u tiute na i ai iinei.”

E faafetaia e Andrea lena uunaiga. Na la feiloai ma Mariela i le lua o tausaga talu ona papatisoina o ia, ma o le taimi nei, ua la fiafia i le ituaiga faaipoipoga sa la faatalitali i ai—ia faamauina i le malumalu, ma tauamo faatasi i le faatuatua. O loo faaauau ona fausia lo laua lotogatasi e ala i le “faaaluina faatasi o o la taimi, pei o le o i ni savalivaliga,” na fai mai ai Mariela.

O afiafi faaleaiga e sili foi ona taua. “O le papatisoga o le ma atalii na aafia uma ai le aiga atoa,” o le tala lea a Andrea. Ua leva ona latou faaaluina ni afiafi faaleaiga e aoao ai i auala e sauniuni ai mo le papatisoga ma le faamauina ma le suesue i mataupu faavae o le a faapea ona taliaina e Daniele. Sa matou aafia faatasi uma ai, ma sa matou lagonaina ua matou saunia lelei mo le faamoemoe.” Soo se taimi e fai ai a latou afiafi faaleaiga, e aafia ai foi le fanau. “O le ma afafine o Valentina, e taitaia musika,” o le tala mai lea a Andrea. Na ataata o ia. “E ese lona lelei.” E filifili e Daniele ia viiga ma o nisi taimi e fesoasoani ai e tapena ia lesona. “O Aso Gafua uma lava o se aafiaga matagofie lea mo tagata uma o le matou aiga,” na fai mai ai Andrea. O aafiaga faapena e faamalosia ai faavae faaleagaga e mafai ona tutupu ma ola ae ai le ma fanau ma fanau a le ma fanau.

Ola i le Olioli

O se elemene lona tolu e fausia ai le faatuatua o le aiga o le ola lea i le fiafia, na fai mai ai Lorenzo Mariani o le Paranesi a Pisa, Itu o Florence Italia. O Lorenzo o se fesoasoani i le au peresitene o le itu ae o lona faletua o Ilaria, o se tina e nofo i le fale ma o loo auauna atu i [le ausilali a] Tamaitai Talavou. E tele a laua mea e fai, ae e taumafai lava e faataunuuina ma se foliga ataata. La te talitonu o le vaaia o le la fiafia e mafai ona fesoasoani e faatulagaina ai amioga a le la fanau agai i le talalelei. “A matou faia se mea mo le Ekalesia, ma te faaali atu se faataitaiga lelei e ala lea i le le foliga popole ma ia i ai se uiga faaalia lelei,” o le tala lea a Lorenzo. “E iloa lava e tamaiti lou faia o se mea ma le fiafia ia pe na ona fai lava ona o se tiute.”

“O aso uma e tele lava ina ou mafaufau ai pe faapefea ona ou faatumauina le faatuatua i totonu o la’u fanau,” o le tala mai lea a Ilaria. Ua faamoemoe o ia o lana tausiga agalelei e le aunoa o le a iloa ai e lana fanau tama o Gioele ma Davide, le fiafia i aiga ma e sili atu le taua o mafutaga faaleaiga nai lo tupe. Fai mai o ia, “O malosiaga o loo tau faamatau i le aiga i Italia e aofia ai tagata ua le mananao e faaipoipo pe o le le mananao ia sili atu ma le toatasi se tamaitiiti ina ia mafai ona latou tausia lena tamaitiiti ia ona maua ni avanoa se tele.” Sa ia faailoaina foi o isi tamaiti e tele atu a latou mea ua maua nai lo ia, “ae peitai o nei mea e itiiti se aoga” nai lo le faaaluina o le taimi e aoao ai lana fanau i upumoni e faavavau.

O nisi taimi e lagona ai e Ilaria le tuua toatasi pe a toatele tamaitai e fegalegaleai faatasi i falefaigaluega, ae e tatalo o ia mo le fesoasoani ma lagonaina le faatumuina o ia e le Agaga i le fiafia ma le malosi. “Ua faamanuiaina foi au i le toatele o ou uso i totonu o le Ekalesia o e alolofa ia te au,” o lana tala mai lea. O nisi taimi pe a tatalo o ia mo se fesoasoani, e valaau atu se uso o le paranesi ma ofo atu le fesoasoani.

Ae mo le aiga lautele, ua tepa taulai atu Ilaria ma Lorenzo i le aso o le a faatoateleina ai e i latou e tupuga mai ia i laua ni augatupulaga faamaoni o tuaa e aoao ma faataitai mai ai. “Matou te tatalo mo i latou e tupuga mai ia i maua,” o le tala lea a Lorenzo. I le avea ai ma se tupulaga lona lua ua auai i le Ekalesia, “Ou te lagona o se tiutetauave tele ua i luga o ou tauau ina ia avea au ma se sooga malosi o le filifili.”

E lagona e Lorenzo ma Ilaria le lofituina o le agaga faafetai mo le faamanuiaga o le avea o ni paionia—o nisi o tagata muamua i lo latou aiga ua tausia se fanau i totonu o le malamalama o le talalelei. O le tina o Lorenzo o le tagata muamua lea o lona aiga na auai i le Ekalesia, ae na faalogo Ilaria i le Ekalesia mai se tamaitai o lona aiga. “Ua matuai fesoasoani lava le talalelei e faamalosia la maua faaipoipoga,” o le tala lea a Lorenzo. Ua “aumaia ai ia i maua se vaaiga e faavavau e uiga i lo matou aiga. Matou te taumafai e fai ia filifiliga sao i se vaaiga e faavavau nai lo se vaaiga faaletino.” O nei filifiliga o le vaega lea o ni sootaga malolosi, e fesootai ai le tasi augatupulaga faamaoni i le isi.

“O nisi taimi pe a ou faalogo i tala i le konafesi aoao e uiga i matua o matua o matua o se failauga na avea ma ni paionia, na sopoia laufanua lafulafua, e oso ai lava si ou fuā laitiiti,” o le tautino mai lea a Ilaria. E faigata ia te ia ona vaai faalemafaufau i ni tagata uma o ni aiga atoatoa o e na ositaulaga mo le talalelei. Ae ua faamalosiauina i laua ma Lorenzo i le vaaia o le ola o le Ekalesia i totonu o le latou atunuu. La te faafetaia ai uluai faifeautalai o e na totoina ni fatu iina, ma ua la iloaina, o le a oo mai se seleselega tele lava.

Na ataata Ilaria, ma vaai faalemafaufau i lena aso. “Ou te iloa o le a i ai se aso o le a faitauina ai e se tasi le tusi o talaaga a le Olomatua o Ilaria.” O tala faaleaiga e uiga i le faatuatua o loo ua amataina ia te ia i le taimi nei.

Sauniaina o a Laua Fanau

A o faasaoina e tagatanuu o Italia ia maafaamanatu mai anamua ma le lalelei o le Renaissance, ua faapea foi ona faia e le Au Paia o Aso e Gata i Italia ni talafaasolopito. Latou te fatuina ni talafaasolopito faaleaiga e taua faavavau e ala i le tausia o poloaiga ma le aoaoina o a latou fanau ia faia foi faapena. Latou te tepa taulai atu i le toe foi mai o le Faaola ma latou te faamoemoe lava ia i ai tagata uma e tupuga mai ia i latou faatasi ma Ona soo.

Ina ia ausia lenei mea, o loo latou taumafai ai e avea i latou lava o ni soo faamaoni. Ua latou faamaonia e mafai ona tutumau, ia filiga, ia fiafia, ma ia faatutuina ni aiga faatuatua e fusia i feagaiga o le malumalu. E ala i le upu ma faataitaiga latou te aoaoina ai le tupulaga fai a’e i le uiga o le faafaileleina i le faatuatua ia Iesu Keriso.