Sili Atu Nai Lo le Areto ma le Vai
Ona ua faamanuiaina i tatou e maua le avanoa e aai ma feinu i le faamanatuga i Aso Sa taitasi, e faigofie ai lava ona [tatou] manatu mama i ai ona tatou te tagofia i le tele o taimi. E mafai faapefea ona sili atu ona tatou talisapaia lenei sauniga paia? Ua faasoa mai e nisi o alii talavou mai le Uarota a Belgrade Lua, Siteki a Bozeman Montana, ia ni nai manatu.
O Brek ma Jake Halgren ma Michael ma Evan Romrell e mananao e manatua le Faaola ma ia aoga Lana Togiola i o latou olaga. O le tagofia o le faamanatuga e tuuina atu ai ia i latou—ma i tatou taitoatasi—lena avanoa. O se avanoa e tapuai atu ai i le Faaola ma ia alualu i luma. Ma a o fesoasoani ia alii talavou i le faamanatuga, latou te faaaogaina le perisitua e auauna atu ai i isi.
Lagonaina o le Faaaloalo mo le Faamanatuga
Ua iloa foi e nei alii talavou o le faamanatuga e taua i tagata o le uarota, o lea latou te manatu mamafa ai i lo latou tiute o le perisitua. O a mea latou te mafaufau i ai a o latou tufaina atu le faamanatuga i le uarota? E faafetai Jake, 16, mo le avanoa e auauna atu ai. “E te iloa ai o loo fai oe ma sui o le Alii,” o lana tala lea.
Fai mai lona uso o Brek, 18, “I le avea ai ma se ositaulaga, ou te taumafai ia mautinoa o loo sa’o ona ou faia mea uma. Ae o loo ou taumafai foi e mafaufau i le Togiola. O vaiaso uma lava e te maua ai le avanoa sili e salamo ai i au agasala, maua se amataga fou o le vaiaso, galue i mea e manaomia ona e galue i ai. O se avanoa maoae e siitia ai faaleagaga.”
E mafaufau foi Michael, 17, i le Faaola: “O se tasi o itu e sili ona malosi o la’u molimau, e uiga lea i le Togiola a Iesu Keriso. E mafai ona ou mafaufau i mea sese na ou faia ma iloa ai, afai ou te salamo, e faamamaina na mea sese ona o le mea na Ia faia. Soo se taimi lava tatou te tagofia ai le faamanatuga, e faamanatu mai ai lava ia te au le Togiola.”
O Le Ola Agavaa
Ua latou malamalama e taua le ola agavaa e umia le perisitua. Fai mai Brek o se faamanuiaga le umia o le perisitua. “Ou te vaai i ai o se avanoa sili. E te mataituina au gaoioiga i le vaiaso atoa. E aoga lava.”
Fai mai Evan, 15, “I le aluga o le vaiaso, o le iloa o loo ia te au le perisitua e fesoasoani ou te filifili ai le mea tonu ina ia mafai ona ou fesoasoani atu ma le agavaa i le faamanatuga.”
Aoaoina o le Faaaloalo
Na aoaoina e nei alii talavou le faaaloalo mo le faamanatuga a o avea i latou ma ni tamaiti laiti. Na fai atu o latou matua ia i latou e fifilemu a o tufa atu le faamanatuga. O lena lagona na oo atu lava i lo latou talavou. Fai mai Michael, “E le lava ona ou faamamafaina atu le taua o le faamanatuga ia te au. O le faamanatuga ua faatusaina i le tino o le Alii ma Lona toto. Tatou te tauaveina Lona suafa i o tatou luga. Tatou te o atu ma folafola atu Lana talalelei ma taumafai e avea ma ni faataitaiga lelei. E leai lava se isi auala e mafai ona tatou toe foi atu ai i lo tatou Tama Faalelagi, pe ana leai o Ia. O le faamanatuga o lona faamanatu lena.”
Sa latou aoaoina foi le faaaloalo mo le faamanatuga e ala i le vaai atu i isi alii o loo umia le Perisitua Arona, e aofia ai o latou uso matutua, a o faatinoina o latou tiute faaleperisitua. Mo se faataitaiga o Evan, na te manatua le taimi na talanoa atu ai lona uso matua, o loo faamisiona nei i Pasila, e uiga i le faamanatuga, le perisitua, ma isi autu o le talalelei.
O uso matutua o Brek o ni faataitaiga lelei foi ia te ia. “A o latou tapenaina le faamanatuga, ou te vaavaai atu pea ia i latou i taimi uma,” o le tala mai lea a Brek.
E mafaufau Michael i aoaoga a lona tina: “Sa ia faamamafaina e faapea, o le faamanatuga o le mafuaaga autu lea tatou te o mai ai i le lotu. Tatou te faia le faamanatuga e faamanatu mai ai ia i tatou le Togiola.”
O le Togiola a Iesu Keriso o se galuega o le auauna atu na aafia ai tagata uma. I se fua faatatau maualalo ifo, e mafai e i latou o loo umia le Perisitua Arona ona auauna atu i a latou uarota po o paranesi e ala i le fesoasoani atu i le faamanatuga, faaali i ai le faaaloalo, ma ola agavaa e taumamafa ai.