Elder D. Todd Christofferson: Ua Saunia E Auauna Atu I Le Alii
A o avea ma se talavou na ola ae i Somerset, New Jersey, sa auai Todd Christofferson i le vaega sa faatinoina le Hill Cumorah Pageant e lata ane i Palamaira, Niu Ioka, mo taumafanafana e lua. I le taimi o le faaaliga i le tausaga muamua, sa manatua e le alii talavou o Todd upu a se epikopo ua mavae. Sa ia fautuaina le autalavou o le uarota ina ia aua lava nei fiu e taumafai faatasi ma le Alii seia oo ina “mumu i o [latou] loto se molimau o le talalelei.”
Sa faaaoga ma le atoatoa e Todd ia upu a lona taitai perisitua, ma sa tatalo mo lana molimau mai lea taimi i lea taimi. Peitai o iina i Palamaira, le mea na amata ai le Toefuataiga, sa tonu ai ia te ia o le taimi lenei ma le nofoaga o le a ia mauaina ai se faamautinoaga mautu.
“I se tasi po ina ua uma le faaaliga, sa ou alu ai na o au i le Vao Paia,” na ia manatua ai. “O se afiafi matagofie o le taumafanafana. Sa tatala o’u seevae, ma ou savali atu i totonu, ma amata ona ou tatalo. Sa ou tatalo ma le matuai maelega mo se itula, pe sili atu foi—ma e leai se mea na tupu.”
Ina ua mavae sina taimi, sa fiu o ia ma tuua loa. Sa tumu o ia i le le fiafia. O le a sana mea na sese? Aisea na le tali mai ai le Tama Faalelagi i lana tatalo?
E lei umi, ae maea le lua vaiaso sa faatino ai le faaaliga, ma ua toe foi Todd i New Jersey. Pe tasi le masina mulimuli ane, a o ia faitauina le Tusi a Mamona i le fale i lona potumoe, ae ona mauaina lana tali.
“E aunoa ma le ole atu mo le tali, na oo mai le molimau,” na ia tomanatu ai. “Na oo mai e aunoa ma ni upu, ae na ou mauaina se faamautinoaga faaleagaga e ese le mamana—le ituaiga e leai se tau faaletonu—e uiga i le Tusi a Mamona ma Iosefa Samita.
“Ina ua ou toe tilotilo i tua i lena aafiaga, na ou iloa ai e le mafai ona tatou faalauina atu i le Atua po o afea, po o fea, pe faapefea foi ona Ia fetalai mai ia i tatou. E na ona tatou nofouta lava mo le taliaina o mea, ma le taimi Na te poloai mai ai. E oo mai e tusa ai ma Lona finagalo.
“Ua ou fiafia lava ona e lei tali mai le Tama ia te au i lena po i Palamaira. Semanu ou te manatu ai faapea e tatau ona e i ai i se nofoaga faapitoa ia maua mai ai se tali i tatalo pe maua ai foi se molimau. Ae e te le tau faia se malaga i Palamaira ia iloa ai o Iosefa Samita o se perofeta, pe faapea ai foi e moni le Tusi a Mamona. E te le tau alu i Ierusalema ina ia iloa ai o Iesu o le Keriso. Afai na maua au e le Tama Faalelagi i Somerset, New Jersey, e mafai ona Ia taliina tatalo a soo se tagata, i soo se mea i le lalolagi. Na te silafia lelei i tatou, ma e mafai ona Ia tali mai ia i tatou pe o fea lava o tatou i ai po o le a foi o tatou tulaga o i ai.”
Faatasi ma lena molimau na “mumu” i lona loto, sa saunia ai Todd Christofferson mo se olaga o le auauna atu i le malo o le Alii.
Tulaga Sologa Lelei Faatamaitiiti
Na soifua mai David Todd Christofferson ia Paul Vickery ma Jeanne Swenson Christofferson i le aso 24 o Ianuari, 1945, i American Fork, Iuta. Sa i Saina lona tuaa, sa tautua ai i le militeli a le I.S. i le taufaaiuiuga o le Taua Lona Lua a le Lalolagi, o lea sa nonofo ai Todd ma lona tina i matua o Sister Christofferson, o Helge ma Adena Swenson, pe tusa ma le 18 masina. O le amataga lena o se sootaga vavalalata i le va o Todd ma matua o lona tina, lea na matua tumu i uunaiga i lona olaga atoa.
Sa soifua ae Todd ma ona uso laiti e toafa i Pleasant Grove ma Lindon, Iuta. Sa latou olioli i le mea na ia faamatalaina o se tulaga “toafilemu” ma le “lelei” faatamaitiiti, o se tulaga sa olioli ai tamaiti i taimi e le fuafuaina e taaalo ai, fatufatu ai mea fou, ma aoao ai.
“Sa matou maua se olaga faaleaiga malupuipuia, ma fiafia,” na manatua ai e Elder Christofferson. “Sa aoaoina i matou e tama ma tina e ala ia laua faataitaiga ma sa faaali mai ai ia i matou le ala e ola ai e tusa ai ma le mamanu o le talalelei.”
E manatua foi e ona matua, e faapea, o Todd o se atalii usitai, ma le fiafia. “O Todd o se tama lelei ma na te iloaina i taimi uma le ituaiga olaga e manao e ola ai,” o le tala lea a lona tama. “O ia o se uunaiga sili i ona uso.”
E manatua foi e ona matua lona naunautai e fesoasoani i soo se mea na te iloa e manaomia ai. Ina ua 13 tausaga o Todd, sa faia se taotoga tele o lona tina o se vaega o togafitiga o le kanesa. Sa iloa e le tama o Elder Christofferson, o le sa i ai ma [lona tina] i le falemai, sa faapotopoto e Todd ona uso ma faia ni talosaga mo lo latou tina.
Sa manuia le taotoga, ae na tuuitiitia ai le gafatia o Sister Christofferson ona faauma nisi o feau masani i le fale. Sa iloa e Todd le fiafia tele o lona tina i falaoa e gaosi lava i le fale—ma le faigata ona ia toe faaauau ai e fai. Sa fesili o ia i lona tinamatua e aoao atu ia te ia le faiga o le falaoa, ma sa ia faia ai e le aunoa mo lona aiga seia oo ina ua alu i le kolisi mo ni tausaga mulimuli ane.
Aiga Fou, Aafiaga Fou
Ina ua tusa ma le 15 tausaga o Todd, sa maua se galuega fou a lona tama, o se fomai manu, i New Brunswick, New Jersey. I le taimi na siitia ai le aiga, sa tau leai ni tagata sa i ai i Lindon, Iuta, o lea, o le masii atu i le nofoaga ua sili atu ona toatele tagata ua nofoia o New Jersey, o se suiga matautia mo le aiga atoa o Christofferson. Ae, i ni nai tausaga na sosoo ai—o le tumu i nofoaga fou, tagata, ma avanoa—o nisi ia o mea aupito taua o le olaga ma le atiina ae o Todd.
Na pau le tagata e auai i le Ekalesia i lana vasega o le aoga maualuga o Todd, ma sa fiafia o ia i faauoga ma mafutaga ma tagata mai itu eseese faaleaganuu ma faalelotu, o se mea foi o le a faifai pea i lona soifuaga. Sa iloa e Todd o le tele o ana uo sa matua faamaoni i o latou talitonuga e pei ona ia lagonaina mo ia lava, lea na mafua ai ona mafaufau loloto ma tatalo e uiga i mea sa ia iloa. Fai mai a ia, “Sa amata ona ou vaaia sa le na ona manaia le Ekalesia. Sa matua taua e pei lava o le ola ma le oti. Sa amata ona ou talisapaia mea sa ou maua.”
E manatua e Greg Christofferson, o se tasi o uso o Elder Christofferson, o le sa la potu faatasi mo le silia ma le 16 tausaga, “O Todd sa mafuli lava i le faaleagaga ma avea ma faaa’oa’o i lana amio.” Sa matau e Greg lona uso ina ua mavae ni nai tausaga talu ona uma lona faauuga mai le aoga maualuga, ma o se tasi o uo tulaga ese a Todd la te vasega, sa tatalo ma lona toalua e uiga i le auala e tausia ai le la fanau laiti. Ina ua o atu faifeautalai o le Au Paia o Aso e Gata Ai i lo latou fale, sa manatua e le tamaloa le lelei ma le tamalii o Todd, ona pau lea o se tasi o le Au Paia o Aso e Gata Ai, sa ia iloa. Ona o lena manatua, o lea sa valaaulia ai e lenei alii ia faifeautalai, ma sa auai loa o ia ma lona aiga i le Ekalesia.
O le molimau tuputupu ae a le Taulealea o Todd—na faumautuina i le mea na oo i ai ina ua maea le Faaaliga i le Mauga o Kumora—sa atili faamausali e se vaega lagolago o taaga a tupulaga talavou o le Au Paia o Aso e Gata Ai i le Uarota a New Brunswick i le Siteki a New Jersey, o se vaega na ta’ua e Christrofferson “sa sagisagi fiafia e faatasitasi i Aso Lulu ma Aso Sa.”
“O le Ekalesia o le totonugalemu o lo matou olaga faaleaiga,” e manatua pea e Elder Christofferson. “Matou te vavalalata ai o se aiga, ma matou vavalalata ai i isi o le uarota.”
Misiona i Atenitina
Ina ua maea lona faauuga mai le Aoga Maualuga a Franklin i Somerset, sa aoga Elder Christofferson i le Iunivesite a Polika Iaga mo se tausaga ona tuua ai lea ia Setema i le 1964, e auauna atu i le Misiona i Atenitina i Matu, o se mea na ia manatu na uunaia ai lona olaga. O lona alofa mo tagata ma aganuu a Amerika Latina, o loo tumau pea ona avea ma se vaega taua o lona soifua.
I le taimi o lana misiona, sa aoaoina ai ia Elder Christofferson “e ni peresitene maoae se toalua o le misiona,” o Peresitene Ronald V. Stone ma Peresitene Richard G. Scott, lea ua avea nei ma uso o le Korama a Aposetolo e Toasefululua. E manatua ma le faamemelo ma le agaga talisapaia e Elder Christofferson le sao a na peresitene e toalua ma o la’ua faletua.
E manatua e Elder Scott ia Elder Christofferson o “se faifeautalai e maoae lona tulaga ese, ma o lona faamaoni tuuto ma gafatia sa iloga ma o le a tulaga ese ai lona soifua.” Na matauina e Elder Scott, o lenei faifeau talavou sa patino lava lana amio solia, usitai, ma galue malosi, ma sa ia faaalia “se le gaoia o le agaga sa faamanuiaina ai ana soa taitasi ma pele ai o ia i ana tagata sailiili ma tagata na liliu mai.”
Na ta’ua e Elder Scott se mea patino na tupu ina ua ia vaai ia Elder Christofferson i se faalavelave na lavea ai lana uila ma faaleagaina ai lona suti ma manu’a ona lima. Ae e lei i ai ma sona popole. Fai mai Elder Scott, “Sa na ona tago lava tafitafi faamama o ia, ma toe oso i luga o le uila, ma agai atu ma lana soa i se aiga na atofaina.”
Iunivesite ma le Faaipoipoga
Ina ua toe taliu mai Atenitina ia Tesema 1966, sa toe a’e Elder Christofferson i le BYU, lea na ia aoaoina ai le Igilisi ma aofia i le au pulega a tamaiti aoga ma afeleti a le iunivesite.
Ina ua latalata i le iuga o le semesa muamua talu ona uma lana misiona, sa i ai se tamaitai talavou lalelei na ia vaai i ai i le aoga, na tosina atu i ai lana vaai. E ui lava e lei feiloai atu i ai o ia i lena taimi, ae na ia manatuaina ona foliga ma sa ia sueina ai o ia ina ua uma ona lolomi le tusi faaletausaga a le aoga i ni nai masina mulimuli ane.
O le tamaitai aoga o Kathy Jacob, o se tamaitai talavou lalelei, tausaafia sa nofo i Kalefonia faapea foi Iuta. O le tautoulu na sosoo ai, ina ua toe a’e le aoga, na faatulaga ai e Todd e auala atu i se uo mamae, la te o ma Kathy e tafafao faamasani.
Ina ua mavae ni nai masina na sosoo ai, sa la iloaina e mafai ona la mafuta. Sa tuputupu pea lo la alolofa ma ua oo ina ‘ioe, ma o le tautotogo na sosoo ai, i le aso 28 o Me, 1968, na faaipoipo ai i laua i le Malumalu o Sate Leki.
“Sa ou iloaina e lelei ma ofoofogia Kathy ina ua ma faatoa faaipoipo,” o le tala lea a Elder Christofferson. “Sa ou le iloaina po o le a le loloto o ona uiga ma tulaga auaumama ma le atamai ma lona lelei. Sa ou matua ofo lava ma le fiafia a o gasolosolo aso, ona e sili atu o ia nai lo le mea sa ou iloa ai o ia i lena taimi.”
Sa faamautinoa mai foi e le afafine o le au Christofferson, o Brynn Nufer, le lelei o lona tina. Fai mai a ia, “O soo se mea lava sa matou nonofo ai, e ese le alolofa o tagata ia te ia. E matua maoae lava lona fatufatu mea fou. E moni lava o ia. Ma e malie, malie, malie lava o ia!”
O Se Galuega Maoae i le Tulafono
Sa faauu Elder ma Sister Christofferson mai le BYU i le 1969. Sa faaauau e Elder Christofferson lana aoga mo se faailoga i le tulafono i le Iunivesite o Duke. Ina ua maea lana aoga i le 1972, sa faigaluega o ia o se failautusi o le tulafono i le alii faamasino faaitumalo o John J. Sirica, o le faamasino lea na pulefaamalumalu mulimuli ane i faamasinoga o le Watergate. Na faaigoa e le mekasini o le Time ia Faamasino Sirica o le Tamalii o le Tausaga, ma sa latou faaigoaina le mataupu o le Watergate “o le tausuaiga faaupufai silisili ona leaga i le talafaasolopito o le Iunaite Setete.”1 Na faatumulia talafou o le I.S. i le tausuaiga ma ona faamasinoga faaletulafono i le 1973 ma le 1974.
Sa fuafua e Elder Christofferson e avea ma failautusi o le tulafono mo le tausaga e tasi, ona faigaluega ai lea mo se kamupani lauiloa faaletulafono i Uosigitone, D.C. lea na ofo atu ai se galuega mo ia. O Elder Ralph W. Hardy, lea ua avea nei ma se Fitugafulu Eria, sa faigaluega ai foi i lena kamupani, ma na te manatuaina na aso faigata o le Watergate, sa faafesootai ai e Faamasino Sirica le paaga pule o le kamupani ma faapea atu, “E le mafai ona ou tuua Todd e alu. E matua taua tele o ia. Na o ia le tagata e mafai ona ou talanoa i ai.” O le taunuuga, na lagolago atu Todd ia Faamasino Sirica i taualumaga uma o le Watergate.
Na ta’ua e Elder Hardy i le taufaaiuiuga o le 1992, na sau ai se loia e lē o se Au Paia o Aso e Gata Ai i lona ofisa ma fai mai ma le leotele, “O lea faatoa ou sau mai le sauniga o le falelauasiga aupito musuia ua ou auai.” O [le falelauasiga] o Faamasino Sirica, lea sa talosagaina ai e lona aiga ia Elder Christofferson e saunoa ai. Sa aoao atu ai e Elder Christofferson le ata o le faaolataga.
Ina ua mavae lona tofi faafailautusi, sa faataunuuina e Elder Christofferson se tulaga manaomia o se tiute iloga i le Ami a le I.S., ma sosoo ai ma tausaga e valu i le fitafita faaleoleo. Sa maea lana tautinoga i le militeli a o avea ma kapeteni faaleoleo.
I le silia ma le 30 tausaga na sosoo ai, sa feagai Elder Christofferson ma se galuega iloga faaletulafono. Sa galue muamua o ia i se kamupani loia a Dow Lohnes PLLC, ona avea lea ma loia faufautua o le kamupani loia mo se ofisa o le tausiga faasoifua maloloina ma ni faleteutupe. Sa avea o ia ma loia faufautua o le pulega sili faapaaga a le NationsBank Corp. (lea ua ta’ua nei o le Bank of America) i le taimi na tofia ai o ia i le Au Fitugafulu. O lana galuega na malaga ai lona aiga i Uosigitone, D.C.; Nashville, Tennessee; Herndon, Virginia; ma Charlotte, Karolaina i Matu. O le mea na ta’ua e Elder Christofferson na sili ona ia fiafia i ai i tausaga na ola ai ma lona aiga i le Iunaite Setete i sasae o le “mafutaga ma tagata lelei o soo se itu o le olaga ma faatuatuaga uma.” E le gata i lana tautua i le Ekalesia—lea e aofia ai valaauga o se peresitene o le misiona a le siteki, epikopo, peresitene o le siteki, ma le sui risone—ae sa auai foi o ia i vaega e tele o auaunaga i isi lotu ma alaalafaga.
O Mea e Manatua e le Aiga
E toalima le fanau a le au Christofferson: Todd, Brynn, Peter, Ryan, ma Michael. E toavalu foi fanau a le fanau. E faamatalaina e fanau a le au Christofferson le tausiga o i latou e ese le lelei, e alolofa, ma taulai i mataupu faavae o le talalelei. Latou te manatuaina le paleni lelei o mea malie faaleaiga ma le aoaoina o tagata taitoatasi.
E manatua e Peter le avea o ia ma se soa i lona tama, o se faiaoga fou o aiga i le taimi e faatitino ai le pisi o lona tama. Sa galue Elder Christofferson o se loia faufautua faapaaga ma sa avea foi ma peresitene o le siteki, ae na te faaavanoaina lava le taimi e aoao ai lana fanau. “Sa musuia lava au i le faamaoni o lo’u tama i le avea ai ma se faiaoga maoae o aiga, e ui lava ina utiuti ona taimi,” na ta’ua ai e Peter. “O se tasi o tuafafine sa ma asia ua nofofale. Sa tausia o ia ma le agaalofa e Tama, ma faamautinoa o ia maua e le aunoa le faamanatuga ma taulima mea sa ia manaomia.”
E manatua foi e Brynn lona tama e ese le magafagafa. Na o le lua aso talu ona ia tuua lo latou aiga ae alu i le Iunivesite o Polika Iaga, sa ia mauaina ai se teufugalaau i lona potu, mai lona tama. O le tusi na auina atu faatasi ai sa i ai se faaupuga faapea, “Ia e maua se semesa maoae.”
“E ui ina sa maualuluga faamoemoega o le Tama mo i matou, ae na te le tala’i mai ia i matou. E ese le alofa ma e agamaualalo tele,” o lana tala lea. “O ia o se tagata sa ese le fiafia, ma e manao o ia ina ia matou fiafia.”
Auaunaga i le Au Fitugafulu
O le aso 3 o Aperila, 1993, sa lagolagoina ai Elder Christofferson e avea o se uso o le Korama Muamua a le Au Fitugafulu. O lona tofiga muamua na oo ai lona aiga i le Aai o Mekisiko, lea na avea ai o ia ma Peresitene o le Eria.
O le aso 15 o Aokuso, 1998, na tofia ai Elder Christofferson e avea ma uso o le Au Peresitene o Fitugafulu, lea na auauna atu ai seia oo ina valaauina o ia i le Korama a Aposetolo e Toasefululua. O ona tiutetauave e aofia ai le avea ma Faatonu Sili Faapitoa o le Matagaluega o Talafaasolopito o Aiga ma le Ekalesia, ona ia faafoeina ai lea o le Eria a Amerika i Matu i Sautesasae. Talu ai nei lava, sa i ai ia te ia le tiutetauave mo Eria a Amerika Matu i Matusisifo ma Amerika Matu i Sisifo. O na tofiga na ia maua ai avanoa e feiloai atu ai i le Au Paia i vaega eseese o le lalolagi.
Ou te matua faafetai lava i la maua mafutaga ma Elder Christofferson i le Au Fitugafulu faapea foi i le Au Peresitene o Fitugafulu. E matua agavaa lava o ia, e gauai atu i uunaiga a le Agaga, ma e alofagia ma mata’ina e uso o le au Fitugafulu. Ua lauiloa o ia i lona aga malie, ma o se olioliga le galulue faatasi ma ia.
O Se Valaauga i le Korama a Aposetolo e Toasefululua
Fai mai Elder Christofferson ina ua ia mauaina lona valaauga fou mai ia Peresitene Thomas S. Monson, na muamua lava “foliga mai e le mafai.”
“O Aposetolo o tagata ou te mata’ina ma mulimuli ma faalogo i ai i lo’u olaga atoa, ma e foliga mai e le mafai ona avea a’u o se tasi o i latou,” na ia saunoa ai. “O le tiutetauave e foliga mai e lofituina pe a ou mafaufau loloto i ai. Peitai, sa ia te au ni faiaoga ofoofogia a o matou galulue faatasi ma uso o le Au Fitugafulu ma le Korama a le Toasefululua i le silia ma le 15 tausaga talu ai.”
Na vave foi ona ia faamaoti mai lē tatou te faalagolago uma i ai—o le Faapogai lava e tasi o ana tali ina o talavou, a o sailiili mo le faamautuina o lana molimau. “O au o se tagata e talitonu aiai i le mana o le tatalo,” o lana saunoaga lea. “E mafai ona tatou liliu atu e le aunoa i le tatalo. O nisi taimi, na pau lava lena o le mea e mafai ona matou faia, ae e lava i taimi uma mo le mea o loo manaomia.
“I soo se fitaituga lava, i soo se fesuiaiga, i soo se mea lava sa ou manaomia, e maua lava le Tama Faalelagi e ala i le tatalo. Sa ou faatuatuaina lava o Ia ma e lei i ai lava se taimi na ou le fiafia ai. E moni lava, e tumau Ana folafolaga. Ou te iloa o le a tuuina mai e Ia ia te au le fesoasoani ou te manaomia foi iinei.”