O Mea Na Aoao Mai e Iosefa

Mafanafana i le Taimi o le Maliu

Mai Aoaoga a Peresitene o le Ekalesia: Iosefa Samita (2007), 184–89.

Na silafia e le Perofeta o Iosefa Samita e mafai e le ata o le faaolataga ona faamafanafanaina i tatou pe a maliu se e pele [ia i tatou].

I lona soifuaga, na mafatia ai Iosefa Samita i le maliliu o le toatele o ona aiga ma uo pele, e aofia ai lona tama, se fanau e toaono, ma ni uso e toatolu. Ae sa ia maua foi le mafanafana mai le tele o faaaliga na ia mauaina e uiga i le olaga pe a mavae le oti. O nisi nei o ana aoaoga e uiga i lenei mataupu.

O LE OTI O SE TETEAGA E LE TUMAU

“Pe a ou talanoa ia i latou ua tagitui, o le a la latou mea ua leiloa? O o latou aiga ma uo ua na ona aveeseina mai o latou tino mo sina vaitaimi puupuu: o o latou agaga sa faatasi ma le Atua ua tuua le fale omea mo sina taimi puupuu, e pei o lea upu; ma o loo i ai nei i se nofoaga o loo o latou talatalanoa ai faatasi e pei lava ona tatou faia i luga o le fogaeleele.”

“O le talitonuga o le a vaai i au uo i le taeao o le toetutu ua faafiafiaina ai lou agaga ma mafai ai ona ou onosaia mea leaga o le olaga.”

O LE MALILIU O TAMAITI LAITI

“Sa ou mafaufau loloto i lenei mataupu, ma fesili ai i le fesili, aisea ua aveesea ai fanau iti, e leai ni agasala, mai ia i tatou. … E aveeseina e le Alii le toatele e oo lava i le fanau iti, ina ia latou o ese ai mai le losilosivale o tagata, ma faanoanoaga ma leaga o lenei lalolagi; e mama tele i latou, matagofie tele, e soifua ai i le lalolagi; o le mea lea, afai e manatunatu i ai ma le sa’o, o le a leai se faavauvau ae o le a i ai le mafuaaga e fiafia ai ona o le a aveeseina mai i latou mai le leaga, ma o le a le toe umi ona tatou toe faatasi lea ma i latou.”

“O fanau … e tatau ona toetutu e pei lava ona o latou oti; ona tatou faafeiloai atu lea ia tatou fanau iti matagofie ma le mamalu lava e tasi—le matagofie lava lea e tasi i le mamalu selesitila.”

FAALAGOLAGO I LE ATUA

“Sa faigata ia te au ona ola ai i luga o le fogaeleele ma vaai atu i … alii talavou … ua aveese atu mai ia i matou i le taulotoaiga o o la olaga talavou. Ioe, sa faigata tele ona toafilemu i nei mea. … Ae peitai ou te iloa e tatau pea ona tatou filemu ma iloa o le finagalo o le Atua, ma toafilemu i Lona finagalo; o loo sa’o mea uma.”