Manatu Faaopoopo mo Taimi o Fetufaaiga, Aokuso 2008

O manatu faaopoopo nei e mafai e taitai o le Peraimeri ona faaaogaina faatasi ma le Taimi o Fetufaaiga o loo lomia i le Liahona o Aokuso 2008. Mo le lesona, faatonuga, ma le gaoioiga e o faatasi ma nei manatu, tagai “O Le Malo i Luga” i itulau U4 ma le U5 o le vaega a tamaiti o le lomiga lenei.

Fai i tamaiti e faalogologo a o e hamuina pe tataina le pese “O Le Agaga Paia” (Tusipese a Tamaiti, 56; Liahona, Me 1991, U7). O loo tuuina atu e le pese se faaataataga e uiga i le tagata taua o le a e talanoa e uiga i ai. Fai i tamaiti e faasoa mai ni mea ua latou iloa e uiga i le Agaga Paia, ma ia aofia i le talanoaga ia faamatalaga e fa o loo maua i le Peraimeri 3, lesona 12, i. 63.

Faaali atu ata o le Taga Ata o le Talalelei 601 (Papatisoga) ma le 602 (O le Meaalofa o le Agaga Paia). Toe faamanatu sauniga o le papatisoga, faamauga, ma le mauaina o le meaalofa o le Agaga Paia. Ia tuu atu i tamaiti taitasi se kopi o le lio o le papatisoga ma le faamauga o loo maua i le itulau U4. Tuu atu ia i latou se taimi e faauma ai le gaoioiga. Ia faamamafa atu o nei sauniga e o faatasi lava ma o le lio o le a fesoasoani ia i latou e manatua ai le taua o ia aafiaga e lua.

Tofi ni tamaiti e faasoa mai ni aafiaga na musuia ai i latou e le Agaga Paia e fai ia filifiliga lelei. A uma ona faasoa mai ia aafiaga taitasi, ia usu ia fasifuaiupu mulimuli e lua o le fuaiupu o le “O Le Agaga Paia,” e amata i le “Ia ou faalogo pea i le leo malu.” Tuu atu lau molimau e uiga i le faamanuiaga o le mauaina o le meaalofa o le Agaga Paia ma le auala na fesoasoani ai o Ia ia te oe i le faia o filifiliga amiotonu.
Ia ao mai ma saunia ia mea e faaaoga i le taaloga “Tausia o a Tatou Feagaiga o le Papatisoga” (Liahona, Oke. 2006, U8). Amata i le faamatalaina o le tala “Toe Mama” (Liahona, Oke. 2006, U10). Ia tusi i luga o le laupapa ia laasaga o le salamo, ma ia toe faamanatu faatasi ma tamaiti (tagai Peraimeri 3, lesona 10, i. 51).

Taaalo i le taaloga “Tausia o a Tatou Feagaiga o le Papatisoga.” A o faia le taaloga, soo se taimi e oo ai se tamaitiiti i se sikuea e manaomia ai ona ia toe foi i tua, ia talanoa e uiga i laasaga o le salamo ma tofi ni tamaiti e fautua atu ni mea e mafai ona ia faia e salamo ai. Ia faaiu i le usuina o se pese po o se viiga e uiga i le salamo. Tuu atu lau molimau e uiga i le salamo.
Pese aoaoina: “Ina Ua Papatiso Iesu Keriso” (Children’s Songbook, 102; Liahona, Sete. 1997, U5). Faaali atu ata o le Taga Ata a le Ekalesia 208 (O Ioane le Papatiso o loo Papatisoina Iesu), ma tofi ni tamaiti e faasoa atu mea ua latou iloa e uiga i lenei tulaga. Faitau le Mataio 3:13–17. A o e aoaoina atu le fuaiupu muamua o le “Ina Ua Papatiso Iesu Keriso,” ia valaaulia ni tamaiti e sii o latou lima pe a faamanatu atu e le pese ia mea na tutupu mai le tala faaletusi paia.

A o e aoaoina atu le pese, ia faauai atu le faalogo a tamaiti e ala i le fai atu o fesili e pei o le “O le a le igoa o le vaitafe na papatiso ai Iesu?” “O ai sa i ai iina i le taimi na papatiso ai Iesu?” “O le a le mea o loo ou mulimuli i ai pe a ou papatiso?” “E faapefea ona papatisoina au?” “O le a le pule o loo faaaoga e fai ai papatisoga?” “O le malo o ai o le a avea ai au ma ona sui pe a ou papatiso?” “O le a le mea o le a taitaiina au i taimi uma?” O le pese lenei e maua ai se avanoa lelei e aoao atu ai le aoaoga faavae taua i tamaiti. Tuu atu le molimau e uiga i nei upumoni taua a o e aoao atu.

O le fati o le pese lenei e faifaimalie ma malu. Fai i tamaiti e usu ma le faaaloalo. Atonu o le a fesoasoani pe a aoina i se saoasaoa lemu nai lo le saoasaoa o loo fautuaina. Ma a masani loa tamaiti i upu, ona faasaoasaoa teisi lea i le saoasaoa ua fautuaina e le fatupese. Ina ia faaopoopo atu i le fiafia o tamaiti a o e faamanatuina le pese lenei, ia usuusu malie ia laina muamua e lua o le pese, ona tuutuu lea i luga le leotele pe a sii i luga le fati i le laina lona tolu. Fesoasoani i tamaiti ia iloa o le fati o le laina mulimuli e fai si maualalo o le leo, e faapea ona latou usuina ai i se leo malu le laina mulimuli.