Faia o ni Uo
O Le Masani a Pablo
O tamaiti i le lalolagi atoa e tatalo, usu pese Peraimeri, ma aoao e uiga i le talalelei—e pei lava o oe! O le masina lenei sei o tatou feiloai atu ia Pablo Chiroy o Ciudad Vieja, Kuatemala.
Ua le mafai e Pablo Chiroy ona faatali ia avea ma se faifeautalai, o lea ua ia faataitai ai i le taimi nei. E fiafia o ia e alu i le lotu ma aoao e uiga i le Tama Faalelagi ma Iesu Keriso; e tietie o ia i lana uila i avanoa uma na te maua; ma ua amata ona ia fetufaaiina atu le talalelei i ana uo ma tuaoi i Ciudad Vieja.
O Le Papatisoga o Pablo
Ina ua atoa le valu tausaga o Pablo, na papatisoina ma faamauina loa o ia o se tagata o le Ekalesia. Na faafetai foi o ia ona sa i ai iina lona tama aua, sa le gata ina fiafia Pablo, ae sa fai foi si ona popole laitiiti.
“Sa fai si ou popole ina nei ou malemo,” o lana tala lea. Ae ioe ou te lei malemo. Ma ina ua uma [ona papatiso] na ia lagonaina se mea fou. “Sa manaia lau faalogo—na ese lava.”
O se lagona manaia tele o lea sa manao ai o ia e faasoa atu i isi.
O Le Galuega Faamisiona a Pablo
Ina ua talosaga atu faifeautalai i le aiga o Pablo e fesoasoani ia i laua i le sailia o ni tagata e aoao, sa ave e Pablo se tasi o a laua tamaitusi. O le taeao na sosoo ai a o alu atu o ia i le aoga, sa ia tuuina atu ai [le tamaitusi] i le tina o lana uo i le nofoaga e faatali ai pasi.
“O taeao uma na te fesiligia ai o ia pe ua ia faitauina le tamaitusi,” o le tala mai lea a lona tama. “Ou te iloa e le taitai tuua lona fesili soo seiloga lava na te faitauina.”
O Le Kuatemala a Pablo
E fiafia tele Pablo e asiasi atu i nofoaga fou ma matamata i mea mananaia. E laki o ia ona e nofo i se nuu e sili ona manaia.
O Pablo e nofo i tua mai lava o Antigua Kuatemala, o se nuu e faauigaina lona igoa o “Kuatemala Tuai.” Ua toeitiiti atoa le 500 tausaga o le nuu. Talu ai ona sa faasaoina e tagata ia le matagofie o fale tuai o fausaga faaSipaniolo, o lea ua asiasi atu ai ia turisi mai soo se itu o le lalolagi i Antigua.
E mafai lava ona matamata Pablo i mea mananaia uma i le mea o loo nofo ai, ma o ona matua e faigaluega o ni tagata e faatulagaina ia maimoaga taamilo, e aveina atu tagata i nofoaga mananaia i Kuatemala. E ese le fiafia o Pablo pe a faataga o ia e ona matua latou te o. “Ou te fiafia matou te malaga faatasi ma lou aiga,” o lana tala lea.
O Le Aiga o Pablo
E fiafia tele le aiga o Pablo e faatasitasi. E faapitoa ona latou fiafia e pepese faatasi o se aiga mo le afiafi faaleaiga.
O Pablo e i ai ona tuafafine laiti e toalua: o Andrea e ono tausaga le matua ma Sofia e lua tausaga. Fai mai o ia, “Matou te faifai mea faatasi lava, o nisi taimi ua lelei ae o nisi taimi ua masei.”
Ae e taumafai lava o ia ina ia avea o se tuagane matua lelei ma latou taaalo faatasi. E fiafia Andrea i le mea lena. La te vaai maualuga ia te ia e pei foi ona ia vaai maualuga i lona tama.
O le tama o Pablo e auauna atu o se tineimu volenitia, ma e faamoemoe Pablo a uma ona ia fesoasoani i tagata i le avea ai ma se faifeautalai, o le a mafai foi ona fesoasoani atu o ia i tagata i se aso i le avea o se tineimu.