Fesili & Tali
“E i ai ni a’u uo se toalua ua le toe o mai i le lotu. O a ni auala e fesoasoani ai ina ia la toe foi mai ai?”
Soo se tagata fou lava e manaomia se uo i le lotu, o se tofiga i le Ekalesia, ma fafagaina i le “afioga lelei a le Atua” (Moronae 6:4).1 E ui ona o au uo atonu e le o ni tagata faatoa liliu mai, ae e mafai foi ona fesoasoani nei mea e tolu ia te i laua.
E mafai foi ona e tatalo mo se fesoasoani. I le Tusi a Mamona, o se tasi o tala sili ona mamana o se tagata e toe foi mai i le talalelei na tupu ai ona o le tatalo (tagai Mosaea 27:14).
Ia iloa e au uo e te alofa ia i laua, ma ia avea oe ma se faataitaiga lelei. Faaali atu ia i laua o le ola i tulaga faatonuina o le talalelei o se auala sili lea e maua ai le fiafia (tagai Mosaea 2:41).
Ma le mea mulimuli, aua lava e te fiu. E faataua e le Alii lo tatou saolotoga ma faataga i tatou taitoatasi e o mai ia te Ia pe a ua tatou sauni. Mo nisi atonu e fai si umi atu o lenei mea nai lo isi. Ae e tusa lava pe o le a le umi, o le a aoga lava au taumafaiga.
O lou fesoasoani i au uo ia toe foi mai i le ekalesia, ua faapea ona e mulimuli ai i le faataitaiga a le Faaola. I le alofa ma le agalelei, sa Ia valaaulia ai isi e o mai ia te Ia, ola atoatoa i le talalelei, ma ia alualu i luma i o latou tulaga gafatia atoatoa.
Talanoa i ai e uiga i Mataupu o le Talalelei
Sa ou popole ina ua ou matauina ua le toe sau la’u uo lelei lava i le lotu. Na ou iloa [mulimuli ane], e lei leva ona maliu sana uo lelei lava, ma ua amata ona le mautonu o ia. I se tasi aso, na ou valaauliaina ai o ia i se pati faatasi ma nisi teineiti mai le lotu. Sa ou faia se sini ia pe a ma le faatasi ona ou ta’ua le Ekalesia [i se talanoaga]. Ina ua tuumuli isi teineiti, sa ma talanoa loa i ni autu eseese o le Ekalesia, lea sa ou manatu ou te le talanoa lava i ai ia te ia. Na ou iloa ai, o le faia o la’u vaega, o le a taulima ai e le Alii isi mea uma. Na pau lava le mea e tatau ona tatou faia o le tatala o o tatou gutu (tagai MFF 28:16).
Rebecca T., 16, Uosigitone, ISA
Tatalo mo i Laua
O se mea o le a matuai aoga lava o le asiasi atu ia i laua ma ia faaali atu lou amanaia o i laua. Valaaulia i laua i gaoioiga a le Ekalesia. Ia tatalo e le aunoa i le Tama Faalelagi. Ole atu ia te Ia e fesoasoani ia e iloa le auala sili e fesoasoani ai ia i laua ia toe foi mai, ma ia tatalo mo i laua ina ia suia o la loto e suitulaga i soo se manaoga le lelei i le manao e mulimuli ia Keriso. Fai se faataitaiga lelei ia i laua, ma ia faailoa atu o le talalelei e aumaia ai le fiafia.
Marilú P., 17, Nuevo León, Mekisiko
Fetufaai Atu Lau Molimau
O le mea muamua lava ou te fia iloa, o le mafuaaga ua la le toe o mai ai i le lotu. A uma lena ona ou valaauliaina lea o i laua matou te fai’aiga i le afiafi, afiafi faaleaiga, faapea foi nisi gaoioiga a le Ekalesia. I le taimi lava lena, ou te manao ai ia la iloa le alofa tele o lo tatou Tama Faalelagi ia i laua e ala i le fetufaai atu o nisi o mau ma valaaulia i laua e o mai i le lotu. O le a tuuina atu la’u molimau ia i laua e uiga i le moni o lenei Ekalesia, na o le pau lena o le auala e mafai ona tatou toe foi atu ai ma mafuta faatasi ma lo tatou Tama oi le Lagi.
William V., 20, Togatapu, Toga
Tali a Laua Fesili
O le taumafai e toe aumai ni uo i le lotu e faigata. E tele mafuaaga a tagata e toe pauu ese ai. E tatau ona e talanoa i au uo mo mafuaaga ua le toe o mai ai. E mafai foi ona e fesoasoani ia latou malamalama i tali o ni a la fesili atonu o i ai o loo faapea ona taofia ai i laua mai le o mai. Ia faailoa atu foi le misia tele o i laua. Ae a o mai loa i le lotu, fai ni tulaga la te lagonaina ai le alofaina ma le taliaina o i laua.
Madison B., 14, Arisona, ISA
Ia Avea ma se Uo Lelei
Ia tau lava o le avea o oe ma uo e sili ona lelei e mafai ona avea ai oe. Ia e i ai iina mo au uo. Ia avea ma se faataitaiga. Tatalo mo i laua. Tuu atu i le Alii e faaali atu ia te oe le auala e mafai ona e fesoasoani ai i au uo. Na te silafia ma alofa i Ana fanau ma o le a Ia toe taitaiina mai i laua i le ala sa’o pe afai la te faatagaina ai o Ia.
Jenna K., 19, Lower Saxony, Siamani
Fesoasoani ia i Laua e Manatua ni Aafiaga Faaleagaga
Fai atu i ai e manatua a la molimau, lea na faaosofia ai i laua e papatiso. Fai atu ia i laua e manatua ia vavega na faia e le Alii mo i laua e tusa ai ma lo la faatuatua. Ma ia fai foi i ai e manatua le mana o le tatalo ma le mana o le perisitua.
Anna R., 21, Donets’k, Iukureini
Faailoa Atu i ai e te Alofa ia i Laua
Ua ou iloaina o le auala e sili ona faigofie e uunaia ai i laua e toe o mai i le lotu o le tau atu lea i ai e te alofa ia i laua ma e alolofa le uarota ia i laua. Talu ai nei foi na ou aumaia ai se tasi o a’u uo ua le toaga i le lotu ma ua toe tautino e toe sau i gaoioiga a le Maea Meite. O le a faaali atu e le Atua le auala e te pai atu ai i o laua loto.
Denali L., 15, Alaska, ISA