O Le Tofotofoga Sili o Lona Olaga … E Oo Mai Nei
A o sauniuni mo lana suega tele, na aoao ai Andrea i le ki e pasi ai le suega aupito taua.
I le avea ai o se tupulaga talavou na ola ae i Santiago, Chile, na lei tele lava ni mea na i ai ia Andrea González vagana ai o se miti—o se tikeri mai le iunivesite e mafai ai ona ia tausia lona aiga pe a talafeagai.
Ina ia oo atu iina, sa faamoemoe o ia e faauu mai i le seminare, maua ni togi lelei i le aoga, ma ia lava le maualuga o ona togi i le suega mo se tulaga i le iunivesite (PSU) e alu ai i se iunivesite e aoao ai le faaenisinia.
Ae e oo atu i le taimi ua amata ai lona tausaga mulimuli i le aoga maualuga e sauniuni ai mo le PSU, sa amata ona tomanatu o ia pe mata e mafai ona ausia se mea o na mea. “O au sini uma lava na foliga mai e faigata ona ausia,” o lana toe tomanatu lea.
E Le o Ni Sini Faigofie
Sa taumafai Andrea e sue atu i se itu faaleaoaoga e faigata ma na matele lava i alii. Ona o le tele o le tauvaga, o lea sa saili ai e iunivesite aupito lelei ia togi e matuai maualuluga i le vaega o le matematika o nei suega PSU, o togi e masani ona maua e i latou o e e gafatia ona totogi aoga tutoatasi.
O le taumafai e faatoilalo ia nei faafitauli, na tausi ai e Andrea se faatulagaga luitauina i lona tausaga mulimuli. Sa alapo o ia ma fai ana meaaoga i le tuua o le aoga seia oo i le leva o le po, faatoa ai pe a maua sona taimi avanoa ma faaofiofi atu i ai ma le seminare i afiafi e fa o le vaiaso.
“O nisi taimi na lotovaivai lava,” o lana tala lea. “Sa ou faia ni osigataulaga i le tele o taimi. Ou te le iloa pe faafia ona faalogo mai a’u uo o ou fai atu, ‘Leai, e tatau ona fai au meaaoga’ pe faafia foi ona ulagia au ona o lo’u fia poto.”
Ae sa ia iloaina e le mafai ona fiu gofie o ia pe afai e manao e faamautu lona lumanai.
Pasia o le Suega
Na aogā lava ana osigataulaga. I le vaega o le matematika o le suega PSU, o Andrea o se tasi lea o tamaiti aoga e toa 200 a le atunuu na maua ni togi atoatoa e 850 ma o se tasi mai le na o le toalua o teine mai aoga a le malo na maua ia togi.
Sa faauu foi o ia mai le seminare, maua ni togi lelei sa suesue malosi ai o ia, ma na faaigoaina e tamaiti o lana vasega o le “Uo Sili” o le tausaga ona o taimi uma sa ia faaaluina e fesoasoani ai i isi i a latou lava meaaoga.
Ae e talitonu o lona faamanuiaina e itiiti lava se mea na faatatau i le tele o lona iloa nai lo mea na faia e mea na ia iloa e tatau ona ia faia. I se isi faaupuga, e oo mai faamanuiaga mai le mulimuli i fautuaga a le Alii, ae le o i tatou lava (tagai 2 Nifae 9:28–29). “E leai lava ma se aoga o le tatou atamamai ae tatou te faagaloina foi le Atua,” o lana tala lea. “E tatau lava ona e faamuamua le Atua i taimi uma.”
O Le Isi Suega
O le aoaoina o lena mataupu faavae a o ia suesue mo lana suega i le kolisi sa faapea foi ona taua i le isi suega na sueina e Andrea—o le suega o le olaga lea e tatau ona faia e tagata uma.
Ua faamalamalama mai e le Alii lava Ia lenei suega i totonu o tusitusiga paia: “Ma o le a tatou faataitai ai i latou, ia iloa ai, pe latou te faia mea uma e poloaiina ai i latou e le Alii lo latou Atua” (Aperaamo 3:25).
“E suesue i tatou e le Tama Faalelagi e iloa ai po o a mea o le a tatou faia,” o le tala lea a Andrea, i le toe mafaufau atu i le faatulagaga faigata na tatau ona ia tausisia ma le ulagia o ia i nisi taimi lea sa tatau ona ia onosaia. “Ina ia pasia le suega o le olaga, e tatau lava ona tatou usiusitai,” na fai mai ai Andrea.
Ma e le faapea seiloga e sologa lelei mea uma, ae faapea foi i taimi o faigata.
“O le tofotofoga sili o le olaga,” na saunoa ai Peresitene Henry B. Eyring, Fesoasoani Muamua i le Au Peresitene Sili, “o le vaai lea po o tatou faalogo ma usitai i poloaiga a le Atua, i le lotolotoi o afa o le olaga.”1
E Leai Se Tofotofoga E Mamafa ia te Ia
E masani lava ona pauu faatasi ana suega e lua. O le taimi lena na iloa ai e Andrea o le faamuamua o le Atua o le mea lilo lena i le pasia o ana suega uma e lua.
O le tele o taimi na tatau ai ona ia filifili i le va o gaoioiga a le Ekalesia ma gaoioiga a le aoga, i le va o le suesue i le talalelei ma le suesue mo lana suega. Fai mai a ia, na vave lava ona ia iloaina, e lelei atu ona faalogona pe afai na te filifili e faamuamua le Ekalesia. E faamalosia ai lana molimau e faapea o le a fesoasoani mai le Tama Faalelagi ia te ia ma ona popolega pe afai o lona popolega muamua o Ia [Atua].
O nei aafiaga ua aoaoina ai foi Andrea i se isi lesona taua. “E mafai ona fesoasoani mai o Ia i tofotofoga ua Ia tuuina mai ia te au,” o lana tala lea.
Po o le, e pei ona fai mai se tasi o ana faataitaiga sili, o Nifae, “Ua ou iloa e le aumai e le Atua ni poloaiga i le fanauga a tagata, seiloga na te saunia le ala mo i latou ia mafai ai i latou ona fai le mea ua ia poloaiina ai i latou” (1 Nifae 3:7).
Ua iloa e Andrea e ui lava ua pasi lana suega muamua, ae e tele lava mea e tatau ona ia aoaoina ona faatoa ona lagona lea ua saunia e pasi le isi.
Ae ua ia iloa afai na te faamuamua le Atua, o le a fesoasoani mai o Ia na te pasia ai lena foi suega.