Papa [Falaoa] ma Molimau
I se tasi Aso Sa anapogi i le taimi o le Aualofa, na tulai ai se uso o le matou uarota e tuuina mai lana molimau. Ina ua uma lana faamatalaga e faapea ua ia iloaina le alofa ma le tausiga a le Alii mo ia, ona ia faasoa mai loa lea o le aafiaga lenei.
Sa ma’i o ia i le limonia, ma i se tasi taeao sa matuai mafatia ai lava o ia. Na matuai leai ma sona fiaai, ma na pau lava le mea na mafai ona ia aiina o se falaoa e fai i le fale. Sa amata ona ia lagona le lotovaivai ma sa tatalo foi mo se fesoasoani ina ia mafai ona ia onosaia ona tiga.
O lena lava taeao na tu atu ai lona faiaoga asiasi ma se papa falaoa na fai i le fale. Na molimau mai le uso e uiga i le alofa na ia lagonaina mai lona Tama Faalelagi. Sa Ia faafofogaina ana talosaga ma tuuina atu le mea tonu sa ia moomia.
A o ou faalogologo, na ou iloaina ai o au lea o lena faiaoga asiasi. Sa ou toe mafaufau i lena taeao, ma taumafai e manatua le mafuaaga na ou filifili ai e ave atu le falaoa i lena taimi. Ou te lei faalogo i se leo pe lagonaina foi se mu o lo’u loto. Sa na ona ou ala ae lava i lena aso ma na te’i lava ua oso lo’u fia fai falaoa.
A o ou saunia ia papa falaoa, sa ou mafaufau i se uso o le matou uarota na ma’i. Sa ou lagonaina lava le leai o so’u aoga i lona gasegase ona sa ou le iloa se mea e mafai ona ou faia e tuu mama ai lona mafatia. Na oo mai le manatu i lo’u mafaufau e tatau ona ou aveina atu ia te ia se papa falaoa. Sa ou mafaufau foi e aua le aveina atu se mea, ona sa ese lava foliga o falaoa. Ae ina ua ou tofoina se isi falaoa, na foliga mai na lelei lava. Sa ou mafaufau e faapea, “O le mea sili lava o le a ia iloaina ai sa ou mafaufau atu ia te ia.”
Sa ou afifiina le papa falaoa mafanafana ma le foliga le manaia, ma avatu loa i lona fale. A o ou tuuina atu le falaoa ia te ia, na ataata o ia ma faafetai mai ia te au, ae sa ia teena lau ofo e fesoasoani atili atu ia te ia. Sa ou alu i le fale ma le lagona manaia ae sa ou popole lava ona sa le tele sa’u fesoasoani mo ia.
O ni masina mulimuli ane, ina ua ou faalogo i lana molimau, sa faapea ona ou malamalama ai na uunaia au e le Agaga Paia o se tali i ana talosaga. O lenei aafiaga na aoaoina ai au i se lesona tele lava e uiga i le taua o le tali atu i musumusuga a le Agaga. A oo mai loa se manatu ia i tatou e faia se mea lelei, e tatau ona tatou faia loa. Na fetalai mai le Faaola, “O mea uma foi e faaoleole i tagata e fai le amiolelei e mai ia te au lea; aua e le alu atu le lelei mai se tasi na o a’u” (Eteru 4:12).
Soo se taimi tatou te maua ai se manatu e fai se mea lelei, e mafai ona tatou faapea ane ua sau lea mai le Agaga. Tatou te le iloa lava le taua o le oo mai o na musumusuga. Na leai ma so’u mafaufau o se papa falaoa e fai i le fale, o le a avea ma se tali i se tatalo o le a faamalosia ai se molimau. Ma ina ua musuia le uso e faasoa mai lona aafiaga i le Aualofa, na te lei iloaina se lesona taua na ou aoaoina e uiga i le iloaina o le Agaga.