O Le Faaaumea Auro Na Ou Le Manatuaina
A o siaki la’u i-meli i se tasi taeao, na ou vaaia ai se igoa ou te le manatuaina: o Enrique Jorge Dias. O le laina o le mataupu na faitauina, “Saludos [faamalo] mai se faaaumea auro.”
Sa leai ma so’u manatu pe o le a se savali o le a i ai, ma sa ou mafaufau lava e oomi le ki e tapē ai. Ae peitai, na manumalo lava lo’u fiailoa, o lea na ou tatalaina ai. Sa tusia i le faaSipaniolo.
A o ou faitauina, na ou iloa ai i le 18 o tausaga o Enrique Dias, sa nofo ai o ia i Adrogué, Atenitina, lea sa ou auauna atu ai faafaifeautalai faamisiona i le silia ma le 30 tausaga ua mavae. I se tasi taeao a o savalivali o ia i le ogatotonu o le taulaga, sa ou taofia o ia ma tuuina atu se tamaitusi e uiga i le Uluai Faaaliga. O i maua ma la’u soa, e tusa ai ma faatonuga mai lo ma peresitene o le misiona, e masani ona faaaluina ia taeao i le tufaina atu o tamaitusi i auala savali o Adrogué. Atonu sa matou talanoa i le faitau selau o tagata, e ui lava ina sa seasea ona ma iloaina o latou igoa. O le tele lava o a matou talanoaga na uma i le le sili atu ma le 30 sekone.
I le silia ma le tolusefulu tausaga mulimuli ane, sa leai se avanoa na mafai ai ona ou toe manatua lo’u talanoa atu i se alii talavou, ae sa ia manatuaina a’u. O nai vaiaso na muamua atu, na ou mauaina ai lana i-meli, na ou tuuina lo’u igoa i le itulau o le Uepi a le Misiona a Atenitina, o le mea lena na maua ai e Dias.
I lana i-meli sa ia faamatalaina ai, sa ia aveina atu le tamaitusi i le fale ma faaali atu i lona tina, o le na uunaia o ia e suesue atili e uiga ia Iosefa Samita. E oo ane i le taimi na taumafai ai o ia e sue ia faifeautalai i ni nai masina mulimuli ane, ua ou siitia ese i se eria fou.
Na fai lesona a Enrique ma na papatisoina ma faamauina ai o ia. Sa ou talai i Atenitina mo le isi 20 masina ae ou te lei iloaina lava se mea e uiga i lona papatisoga.
O le talanoaga puupuu sa ma fetufaai ai i le auala i lena taeao ua leva, na liua ai lona olaga ma olaga o le toatele o isi tagata. E lua tausaga talu ona uma lona papatisoga, ae valaauina o ia i se misiona i Atenitina i matu. Ina ua mavae lena, sa faaipoipo o ia ma tumau ai ma le faamaoni i le Ekalesia, na tautua i ni valaauga eseese, e aofia ai le avea o se epikopo, fesoasoani i ni peresitene se toalua o le siteki, ma sa fautua maualuga. Sa ia fai mai foi, o lona atalii matua lava na faamisiona i La Paz, Polivia.
Na le mafai e upu ona faamatalaina le olioli na oo mai i lo’u loto mai le faitauina o lena savali i le i-meli. O la’u misiona na tumu i le tele o taimi faamalieloto, ae o lenei tala fou na tuai ona ou maua mai ia Enrique Jorge Dias na atili suamalie ai mea uma na ou manatua a o avea a’u ma se faifeautalai.