O Tala o le Uluai Faaaliga

Vaaiga Aoao

Na faamaumau e Iosefa Samita e faapea na faaali mai le Atua le Tama ma Iesu Keriso ia te ia i se togavao e lata ane i le fale o ona matua i le Setete o Niu Ioka sisifo i le taimi pe tusa ua 14 ona tausaga. I lona popole i ana agasala ma le lē mautonu po o fea le ala faaleagaga e mulimuli ai, sa sailia e Iosefa le taitaiga e ala i le auai i fonotaga, faitauina o tusitusiga paia, ma tatalo. O le tali, na ia mauaina se faaaliga faalelagi. Na faasoa atu ma faamaumauina e Iosefa le Uluai Faaaliga, e pei ona silafiaina, i le tele o taimi; sa ia tusia pe na tofia ni tusitala e tusia ni tala eseese se fa e uiga i le uluai faaaliga.

Na lomia e Iosefa Samita tala e lua o le Ulua’i Faaliga i le gasologa o lona soifuaga. O le muamua o ia tala, ua iloaina i aso nei o le Iosefa Samita—Talafaasolopito, na faamamaluina aloaia i le Penina Tau Tele ma ua avea ai ma tala ua sili ona lauiloa. O tala e lua e lei lomia, o loo faamaumauina i le mua’i tusitalaaga a Iosefa Samita ma mulimuli ane i se tala faamaumau, sa tele lava ina galo se’ia o’o ina toe mauaina e tusitala sa galulue mo le Ekalesia a Iesu Keriso o le Au Paia o Aso e Gata Ai ma lomia ai i le vaitau o le 1960. Talu mai lena taimi, o nei pepa o faamatalaga sa talanoaina so’o lava i totonu o mekasini a le Ekalesia, i totonu o galuega sa lomia e lomitusi a le Ekalesia ma lomitusi e i ai sootaga ma le Ekalesia, ma ala mai i le au sikola a Au Paia o Aso e Gata Ai i isi nofoaga.¹ E faaopoopo atu i tala a e na mua’i iloa, o loo i ai foi isi faamatalaga e lima o le faaaliga na faamauina e i latou o lana tupulaga.²

O faamatalaga eseese o le Uluai Faaaliga ua faamatala ai se tala tumau, e ui lava e masani ona eseese mea e faamamafaina ma auiliilia. Ua faamoemoe le au tusitalafaasolopito faapea afai e toe faamatalaina e se tasi se aafiaga i ni tulaga eseese i ni tagata faalogologo i le aluga o le tele o tausaga, o le a faamamafa e tala taitasi ni manatu eseese o le aafiaga ma o loo i ai ni faamatalaga tulaga ese. E moni lava, o eseesega e pei ona i ai i le uluai faaaliga o loo maua i le tele o tala faatusitusiga paia o le faaaliga a Paulo i le ala i Tamaseko ma le aafiaga o Aposetolo i le Mauga o Liua.³ Ae e ui lava i eseesega, e i ai pea se faavae tumau i tala uma o le Uluai Faaaliga. O nisi ua finau sese e faapea, soo se eseesega lava i le toe faamatalaina o le tala o se faamaoniga o se tala fatu. I le isi itu, o le faamaumauga anoa o le talafaasolopito e mafai ai ona tatou aoao atili e uiga i lenei mea ofoofogia na tupu, nai lo le mea semanu tatou te aoaoina pe ana faapea e laiti faamatalaga na faamauina.

Tala o le Uluai Faaaliga

O tala taitasi o le Uluai Faaaliga na tusia e Iosefa Samita ma i latou o lana tupulaga e i ai a latou lava tala faasolopito ma faatatauga ia na aafia ai le ala na toe faamatalaina, faailoaina ma faamaumauina ai le mea na tupu. O nei tala o loo talanoaina i lalo.

Tala o le 1832. O le tala muamua o loo iloa o le Ulua’i Faaaliga, e na’o le pau lea o le tala na tusia i le aao o Iosefa lava ia, o loo maua i se talafaasolopito puupuu, e le’i lolomiina lea na gaosia e Iosefa i le afa lona lua o le 1832. I lea tala, na faamatalaina ai e Iosefa lona iloaina o ana lava agasala ma mea na ia toilalo ai i le le mafai ona ia maua o se ekalesia lea e ono fetaui lelei ma lea na ia faitau ai i le Feagaiga Fou ma lea e mafai ona taitai atu ai o ia i le togiola. Ua ia faamamafaina le Togiola a Iesu Keriso ma le togisala patino sa ofoina mai ai. Sa ia tusia e faapea sa faailoa mai “le Alii” ma faamagalo o ia i ana agasala. O se taunuuga o le faaaliga, sa maua e Iosefa le olioli ma le alofa, e ui lava, e pei ona ia ta’ua, sa le mafai ona ia mauaina se tasi na talitonu i lana tala. Faitau le tala o le 1832 iinei.

Tala o le 1835. I le tau toulu o le 1835, na toe faamatala ai e Iosefa Samita lana Ulua’i Faaaliga ia Robert Matthews, o se tagata asiasi i Katelani, Ohaio. O le toe faamatalaina, o loo faamauina i le api talaaga a Iosefa e lana tusiupu o Warren Parrish, o loo faamamafa ai lona taumafai e fia iloa po o le fea ekalesia e sa’o, o le tete’e na ia lagonaina a o ia tatalo, ma le faailoa mai o le tasi tagata paia lea na soso’o mai ai ma le isi. O lenei tala o loo matauina ai le faaalia mai o agelu i le faaaliga. Faitau le tala o le 1835 ii.

Tala o le 1838. O le faaleoina o le Ulua’i Faaaliga ua sili ona lauiloa i le Au Paia o Aso e Gata Ai i aso nei o le tala o le 1838. Na faasalalauina i le 1842 i le Times and Seasons, o le nusipepa a le Ekalesia in Navu, Ilinoi, o le tala o se vaega o se talafaasolopito umi sa faamauina e Iosefa Samita i le va o vaitau o le malosi o le tetee. A o le tala i le 1832 o loo faamamafa ai le tala e sili ona patino ia Iosefa Samita lava ia o se alii talavou o loo saili le faamagaloga, o le tala o le 1838 o loo taulai atu i le faaaliga o le amataga o le “tulai mai ma le alualu i luma o le Ekalesia.” E pei o le tala o le 1835, o le fesili tutotonu o lenei tala o le fea o lotu e sa’o. Faitau le tala o le 1838 ii.

Tala o le 1842. Na tusia e tali atu ai i le faatonu o le Chicago Democrat faatonu o Ioane Wentworth i le talosaga mo faamatalaga e uiga i le Au Paia o Aso e Gata ai, na lomia ai i totonu o le Times and Seasons i le 1842. (Ua tele ina iloa o le “O Tusi a Wentworth,” o se punavai foi mo Mataupu Faavae o le Faatuatua.)⁴ O le tala, na fuafuaina mo le lolomiina atu i se aofia e le masani ai i talitonuga Mamona, e atoatoa ma tuusa’o. E pei ona i ai tala muamua, sa faailoa mai e Iosefa le le mautonu na aafia ai o ia ma le faaali mai o ni tagata se toalua o se tali i lana tatalo. I le tausaga na sosoo ai, na tuuina atu ai e Iosefa Samita lenei tala faatasi ai ma suiga laiti i se tusi talafaasolopito e igoa ia Isaraelu Tanielu Rupp, o le sa lomiaa o se mataupu i totonu o lana tusi, He Pasa Ekalesia [The Whole Church]: An Original History of the Religious Denominations at Present Existing in the United States.⁵ Faitau le tala o le 1842 ii.

Tala Mai Isi na Faalogo Ai. E ese mai nei tala mai ia Iosefa Samita lava ia, e lima tala na tusia e nisi o lana tupulaga o e na faalogo ia Iosefa Samita o talanoa e uiga i le faaaliga vaaia. Faitau nei tala ii.

O Finauga Faatatau i Tala o le Uluai Faaaliga a Iosefa Samita

O tala eseese ma le aofai o tala o le Uluai Faaaliga ua taitai atu ai nisi o le au faitio e fesiligia pe o tutusa faamatalaga a Iosefa Samita ma le moni o ona aafiaga. E lua finauga e masani ona faia faasaga i lona talitonuga/faatuatua: o fesili muamua, o le manatuaina e Iosefa Samita o mea na tutupu; o fesili lona lua pe na te teuteuina vaega o le tala i le gasologa o taimi.

Manatuaga [o le komepiuta]. O le tasi o finauga e faatatau i tala o le Uluai Faaaliga a Iosefa Samita o loo molia mai e faapea o faamaoniga faaletalafaasolopito e le lagolagoina le faamatalaina e Iosefa Samita o le faaosofia faalelotu i Palmyra, Niu Ioka, ma le siosiomiaga i le 1820. O nisi ua finau mai e lu’iina e lenei mea le mau a Iosefa Samita e uiga i faaosofia faalelotu ma le tala lava ia o le faaaliga vaaia.

O faamaoniga tusitusia, peitai, e latou te lagolagoina faaupuga a Iosefa Samita e uiga i faaosofiaga. O le itulagi sa ia nofo ai sa lauiloa mo ona tulaga vevesi faalelotu ma sa le fesiligia lava o se tasi o nofoaga iloga o le faaosofia faalelotu. Sa ta’ua e tusi talafaasolopito le vaega lea o le atunuu o se “itu ua ova le solituina” ona o le faaaogaina tele o le laueleele e taitai o lotu e faia ai a latou tolauapiga faaosofia ma saili ai tagata liliu mai i le vaitaimi o le popofou o le 1800.⁶ Ia Iuni 1818, mo se faataitaiga, sa faia se fonotaga tolauapi a le Metotisi i Palmyra, ma le tau mafanafana na sosoo ai, na toe faapotopoto Vienna (lea ua igoa ia Phelps), Niu Ioka, e 15 maila mai le faatoaga a le aiga o Samita. O tala faamaumau a se faifeau Metotosi e fealuai o loo faamauina ai le tele o le faaosofia faalelotu i le eria faafanua a Iosefa i le 1819 ma le 1820. Sa latou lipotiina faapea o le Faifeau o Siaosi Lene, o se faifeau Metotisi toe faaolaola mai, sa i ai i lena vaega o le laueleele i tausaga uma e lua, e tautala atu “o le metotia a le Atua e aumaia ai le Toefaatulagaina.”⁷ O lenei faamaoniga faaletalafaasolopito e tutusa ma le faamatalaga a Iosefa. Sa ia faapea mai o le faaosofia faalelotu tulagaese i totonu o lana itu po o le vaega sa “amatalia i le Metotisi.” E moni lava, na ta’ua e Iosefa e faapea na amata ona ia “faatasi atu” i le Metotisi.⁸

Teuteuga. O le finauga lona lua e masani ona faia e uiga i tala a Iosefa Samita o le Mua’i Faaaliga Vaaia e faapea e na te teuteuina lana tala i le aluga o taimi. O lenei finauga o loo taula’i atu i ni auiliiliga se lua: o le numera ma foliga o avefeau mai le lagi lea na faapea mai Iosefa Samita na ia vaai i ai. O tala o le Uluai Faaaliga a Iosefa o loo faamatalaina ai avefeau mai le lagi faatasi ma le tele o auiliiliga i le aluga o taimi. Na faapea mai le tala o le 1832, “Ua tatala e le Alii le lagi i o’u luga ma sa ou vaai i le Alii.” O loo faapea mai lana tala o le 1838, “Na ou Vaai i Tagata e toalua,” O le tasi o i La’ua ua faalauiloa atu le isi o “Lo’u Atalii Pele.” O le taunuuga, o e faitio na finau mai na amata mai o faapea mai Iosefa Samita na tasi le tagata na ia vaaia”—o le Alii—“a e mae’a ane ua ia faapea mai ua ia vaaia i la’ua uma, le Tama ma le Alo.⁹

O loo i ai isi ala sili ona laugatasia e vaai ai faamaoniga. O se faaleleiga patino i le faafesili i le gasologa o taimi e ao ona faalauiloa mai lava i le amataga: o le tolu mai le fa o tala o loo manino le faapea mai e lua tagata sa faaali ia Iosefa Samita i le Mua’i Faaaliga. O le isi e ese mai, o le tala o le 1832 a Iosefa Samita, lea e mafai ona faitauina o loo faatatau i le tasi po o le toalua o tagata. Afai e faitauina e faatatau i le tasi le tagata faalelagi, e tele le avanoa e faatatau ai i le tagata o le na faamagaloina ana agasala. E tusa ai ma tala na mulimuli mai, o le tagata paia muamua na ta’u atu ia Iosefa Samita e “faalogo” i le lona lua, o Iesu Keriso, o le na tuuina atu le savali autu, lea e aofia ai le savali o le faamagaloga.¹⁰ O le tala a Iosefa Samita o le 1832, o lea, e ono lilifa atu ia Iesu Keriso, le e tau’aveina le faamagalo atu.

O se isi ala o le faitauina o le tala o le 1832 e faapea na faatatau atu Iosefa Samita i tagata e toalua, o i la’ua uma na ia ta’ua “Alii.” O le finau mai e faapea sa ia toe teuteuina lana tala i le aluga o taimi e faalagolago lea i le faatatauga e faapea o le tala o le 1832 o loo faamatalaina le faailoa mai na o le tasi le tagata paia. A e o le tala o le 1832 e le o faapea mai, na o le tasi le tagata na faaali mai. Manatua o faatatauga e lua i le “Alii” o lo o eseese i le taimi: muamua “o le Alii” tatala le lagi; ona vaaia lea e Iosefa Samita o “le Alii.” O le faitauga lea o le tala e o gatasi ma le tala o le 1835 a Iosefa, lea e tasi le tagata na faailoa muamua, sosoo mai ai lea ma le isi. O le tala o le 1832, lea, e mafai ona faitauina faapea e mafai ona faauiga faapea na vaai Iosefa Samita i se tagata e toatasi, o le na faailoa atu le isi ma na ia ta’ua i la’ua uma o “le Alii”: “o le Alii na tatalaina le lagi ia te a’u ma ou vaaia ai le Alii.”¹¹

O le faatupula’ia o le patino o faamatalaga a Iosefa, lea e mafai ai ona matua faitauina o ni faamaoniga o le faatupulaia o le malamalama, faaopoopoina i le gasologa o taimi, faavaeina i luga o aafiaga o le poto masani. O se vaega, o eseesega i le va o tala o le 1832 ma tala na mulimuli mai, atonu e i ai se mea e faasino ai i le eseesega i le va o upu tusitusia ma upu tautalagia. O le tala o le 1832 ua avea ma sui o le taimi muamua na taumafai ai Iosefa Samita e tusi i lalo lana talafaasolopito. I lena lava tausaga e tasi, na ia tusi atu ai i sana uo e faapea na te lagonaina le faafalepuipuiina e le “pepa, peni ma le vaitusi ma se gagana le atoatoa, le sa’osa’o ma taei faataapeapeina.” Na ia ta’ua le upu tusia o se “falepuipui lauitiiti laitiiti.”¹² O le talatala tele o tala mulimuli ua sili ona malamalama gofie ma tatou manatu ai pe a tatou iloaina e foliga mai o ni tala na faamatala----o se saoasaoa faigofie ma talafeagai mo Iosefa Samita ma se tasi na faatagaina upu ia faasolo mai ma le faigofie.

Faaiuga

Na molimau soo Iosefa Samita e faapea na ia maua se aafiaga matagofie o le vaai i le Atua le Tama ma Lona Alo, o Iesu Keriso. Ua le o le moni o le Uluai Faaaliga po o ni finauga e faasaga i ai e mafai ona faamaonia e ala i sailiiliga o talafaasolopito lava ia. O le iloaina o le moni o le molimau a Iosefa Samita e manaomia taitasi ai le saili ma le faamaoni o le upumoni mai faamaumauga ona faaaoga lea o le faatuatua atoa ia Keriso e ole ai i le Atua i le tatalo faatauanau, ma le lotomaulalo pe ua moni le faamaumauga. Afai e saili ma le loto faamaoni e faatino le tali e pei ona faaali mai e le Agaga Paia, o le a faamaonia le faaaliga a Iosefa Samita. I lenei auala, e mafai e tagata taitasi ona iloa sa tautala faamaoni Iosefa Samita ina ua ia tautino mai, ‘Sa ou vaai i se faaaliga; Na ou iloaina, ma sa ou iloa na silafia e le Atua, ma e le mafai ona ou faafitia lava’¹³

E faafetaia e le Ekalesia saofaga a sikola i le anotusi faasolopito ua folasia i lenei folasaga; o a latou galuega ua faaaogaina faatasi ma faatagaga.

Na faasalalauina muamua Novema 2013.