E! O Le Togafiti Poto a Le ua Leaga
M. Russell Ballard
Of the Quorum of the Twelve Apostles
O loo i ai se faamoemoe mo e ua i ai mea ua fai ma vaisu, ma o lenei faamoemoe e oo mai e ala i le Togiola a Iesu Keriso.
Uso e ma tuafafine, o le amataga o le tautoulu iinei i atu Atumauga Papa e aumai ai faatasi ma lanu mamalu o lau laau ua suia mai le lanumeamata i lanu sesega o lanu moli, mumu, ma le samasama. I le taimi o le tautoulu, o mea uma o le natura e oo atu i se tulaga o le fesuiaiga e saunia ai mo le malulu tele o le matagofie o le tau malulu.
O le tautoulu o se taimi fiafia faapitoa lea mo le au faifaiva i ‘ofe tā aua o le taimi lea e faaosofia ai i’avai i le fiaaai tele ma le faaloloto ina ia faamalolosia ai o latou tino mo le oge o meaai i le taumalulu.
O le sini a le faifaiva i ‘ofe tā o le maua lea o le i’a i se auala atamai taufaasese. E suesue e le faifaiva atamai ia amioga a i’avai, o le tau, o le tatafe o le vai, ma le ituaiga o iniseti e ’ai e i’a ma le taimi e fofoa ai na iniseti. E masani lava ona ia gaosia ia maunu na te faaaogaina. Na te iloa o nei iniseti fai o loo faamau i matau iti e manaomia ona atoatoa lona faafoliga taufaasese aua o le a iloa e le i’a e oo lava i sina sasi laitiiti, ona ia le ‘aina lea o le maunu.
O se mea mata’ina le matamata i se i’a o puna a’e mai le vai, ma u atu le maunu ma autafiti se’ia oo lava ina vaivai ma faaleleva ai. O le tauvaga, o le fetosoa’iga lea o le iloa ma le tomai o le faifaiva e feagai ai ma le i’a tautupu.
O le faaaogaina o maunu pa’u e faavalea ma pu’e ai se i’a, o se faataitaiga lea o le auala a Lusifelo e tele ina faaosooso ai, faaseseina ma taumafai e maileia ai i tatou.
E pei lava o le faifaiva i ‘ofe tā lea na te iloaina e ta’a’ina ia i’avai i le fiaai, o loo iloa foi e Lusifelo lo tatou “matelaina” po o vaivaiga ma tofotofoina i tatou i maunu taufaasese ia, afai e faaaogaina, e mafai ona faalavelaveina ai le filemu o o tatou olaga i ana faatosinaga lē alofa. Ma e le pei la o le tagata faifaiva lea na te pueina ma toe faasola le i’a i le vai e aunoa ma se manu’a, o le a lē manao lava Lusifelo e faamamulu. O lana sini ia malaia ē ua ia faaaafiaina ia pei lava o ia.
Fai mai Liae: “Ona ua pau ifo o [Lusifelo] ai le lagi ma ua malaia e faavavau, ua ia saili foi le malaia i tagata uma” (2 Nifae 2:18).
Ou te faaopoopo atu lo’u leo i siufofoga o o’u Uso i le asō, o Lusifelo o ia o se tagata poto ma le atamai tele. O se tasi o metotia autu o loo ia faaaogaina e faasagatau mai ai ia i tatou, o lona tomai lea e pepelo ai ma ‘olegia ina ia faatalitonu ai i tatou e lelei le leaga ae leaga le lelei. E mai lava i le amataga i le Fono Sili i le Lagi, na “saili [Satani] e faaumatia le saolotoga o le tagata ua tuuina atu e A’u le Alii le Atua, ia te ia. …
Ona avea ai lea o ia ma Satani, ioe, o le tiapolo lava lea, o le tamā o pepelo uma lava, e faasese ma faatauaso mafaufau o tagata, ma taitai faatagataotaua i latou i le mea e na te loto i ai” (Mose 4:3–4).
O loo faaauau pea lenei taua i aso nei i le faitalia na tuuina e le Atua i le tagata. Ua siosiomia i tatou e Satani ma ana au i ā latou maunu ma le faamoemoe o le a tatou pauu atu ma ‘aina na maunu ina ia mafai ai ona ia pu’eina i tatou i auala taufaasese. Ua ia faaaogaina mea ua fai ma vaisu e gaoia ese ai le saolotoga. E tusa ai ma le Lomifefiloi, o le upu vaisu (addiction) o soo se ituaiga o lona uiga o le lolo atu lea i se mea, o lea ua lafoaia ai le saolotoga ma avea ai ma sē e faalagolago i se mea po o se amio e faataumaoia ai le olaga.1
Ua ta’u mai e tagata suesue o loo i ai se faatufugaga i o tatou mafaufau ua ta’ua o le nofoaga autu o le fiafia.2 Pe a faagaoioia e ni fualaau oona faasaina po o ni amioga, o le a na puleaina le vaega o o tatou mafaufau lea e faafoe ai o tatou loto, o tatou faamasinoga, faautautaga, ma le tauleleia. E oo atu ai ina lafoaia e le tagata ua avea le leaga ma ana vaisu, le mea ua ia iloa e sa’o. Ma pe a tupu lena mea, o lona uiga ua mau le matau, ma pulea ai loa e Lusifelo.
E iloa e Satani le auala e faataumaoia ai ma maileia i tatou i mea faafoliga ma amioga e na o sina taimi e fiafia ai i ai. Ua ou matauina le aafiaga pe a tauivi se tasi ia toe maua le amio pulea, ia toe saoloto mai le faatautala ma vaisu faatafuna, ma ia toe maua le lagona o le faatauaina o ia lava ma le ola tutoatasi.
O nisi o fualaau faasaina e sili ona malosi le kalave, pe a faaaogaina ma le faatautala, e mafai ona segia ai le mafaufau ma aveesea ai le saolotoga o se tasi e aofia ai: nikotini; opiote—heroini, mofine ma isi fualaau o mea tiga; o fualaau malolosi e faatoafilemu ai [tranquilizers]; o pauta, ava malosi, mariuana, ma fualaau faasaina e faatupu malosi [methaphetamines].
Ou te faafetai mo fomai ua aoaoina e fautua mai fualaau sa’o e aveesea ai tiga ma mafatiaga. Ae paga lea e toatele tagata i nei aso, e aofia ai ma o tatou foi tagata, ua fai ma vaisu ma ua faatautala le faaaogaina o fualaau ua fautuaina mai e fomai. Ua iloa e Lusifelo le tamā o pepelo uma, lenei mea ma faaaogaina lana faatosinaga e faoa ai le saolotoga o se tasi ma ave faapagotaina le tagata faatautala i ana filifili matautia (tagai 2 Nifae 28:22).
Talu ai nei lava na ou talanoa ai i se tuafafine sa i ai i se falemai o le mafaufau, i le lotoifale. Sa ia faamatala mai lana malaga faanoanoa mai le maloloina atoa o le mafaufau ma le tino, se ulugalii matagofie ma le aiga, i se ma’i faalemafaufau, o le malosi ua mou atu, ma le faamalepeina o lona aiga—o ia mea uma na amata mai i le faatautala o le faaaogaina o le talavai mai le fomai mo fualaau o mea tiga.
I le lua tausaga a o lumanai le ma talanoaga, sa manu’a ai lona tua i se faalavelave tau taavale. Sa fautuaina mai e lana fomai se fualaau e faate’a ai le tiga sa toetoe a le mafai ona tatalia. Sa ia manatu na te manaomiaina se isi fualaau e sili atu, o lea na ia faaseseina ai le pepa talavai, ma tonu ai o le a ia faatauina fualaau faasaina o le heroini. Na oo ai ina moliaina ma faafalepuipuiina o ia. O lona ma’ivalea i fualaau faasaina na mafua ai ona faaletonu le la ulugalii. Na tatala e lona toalua le la faaipoipoga ma sa tuu ai le la fanau e tausia e lona toalua. Fai mai o ia, e le gata ina fesoasoani nei fualaau e faate’a ai lona tiga, ae sa aumai ai foi se lagona siitia pei e lele ma lona fiafia e ui lava e puupuu se taimi e lagona ai. Ae o ia inumaga o fualaau e na o ni nai itula e aoga ai, ma i faaaogaga taitasi sa foliga mai ua faaitiitia sona toomaga e maua ai. Sa amata ona faateleina lona faaaogaina o fualaau ma saisaitia ai loa i le taamilosaga leaga o ia vaisu. Na avea fualaau ma ona ola. O le po na sosoo ma le aso na ou talanoa ai i ai, sa ia taumafai ai e pule i lona ola. Sa ia fai mai ua le mafai ona ia tauaveina le tiga faaletino, faalemafaufau ma le faaleagaga. Sa ia lagona ua maua o ia i le mailei, ua leai se auala e sao mai ai i fafo—ma ua leai se faamoemoe.
O le faafitauli o le tuafafine i le talavai ma le faaaoga faatautala o isi fualaau, e le o se mea faatoa tupu; o loo tupu i soo se mea o tatou i ai. I nisi nofoaga e sili atu tagata e maliliu mai le faaaogaina faatautala o fualaau nai lo faalavelave tau taavale.3 Uso e ma tuafafine, ia taumamao mai soo se ituaiga o mea e ono saisaitia ai oe. E oo lava i sina sogisogi se tasi i se mea po o se fualaau se tasi po o se inu tasi i le ava malosi e mafai lava ona avea ma vaisu. Sa ta’u mai ia te au e se tagata ua uma ona foia ona vaivaiga o le inu ava malosi e faapea, na o se inu lava se tasi o le eseesega lea i le va o vaisu ma le mafaufau manino. Ua iloa e Satani lenei mea. Ia aua lava nei mau lana matau ia te outou i ana maunu faafoliga ia e mafai ona vave avea ma vaisu.
O lea, uso e ma tufafine, faamolemole aua le aveseseina le mea lea ou te fai atu ai. Ou te le o fesiligia talavai o fualaau ia ua fautua mai e fomai mo i latou o loo mafatia i ma’i e mafai ona togafitia, po o tiga ogaoga o le tino. O ia fualaau o se faamanuiaga moni lava. O le mea lea ou te fai atu ai e tatau ona tatou mulimuli ma le faaeteete i inumaga ua fautua mai e fomai. Ma e tatau ona tatou teumaluina na fualaau i se nofoaga saogalemu e le mafai ai e fanau laiti po o soo se isi lava ona mauaina.
O loo i ai foi se popolega tele lava e uiga i nisi o amioga ua fai ma vaisu ma le leaga e pei o taaloga faitupe ma ponokalafi ia e faataumaoi patino lava ma ua taatele i o tatou lotoifale. Ia manatua, uso e ma tuafafine, o soo se ituaiga lava o mea ua fai ma vaisu o le lolo atu lea i se mea, lea e lafoaia ai le saolotoga ae ola faalagolago atu i na mea. O lea la, e tatau ai ona faaopoopo atu i ai ma taaloga vitio ma feau tusitusia i luga o telefoni feaveai i le lisi. O nisi tagata taaalo e oo atu lava i le 18 itula o le aso e taaalo ai mai le tasi laasaga i le isi laasaga o taaloga vitio ua lafoaia ai isi vaaiga uma o o latou olaga. O feau tusitusia i luga o telefoni feaveai e mafai foi ona avea ma se vaisu leaga, e mafua ai ona le toe i ai ni fesootaiga taua faafesagai. E le i mamao atu na ta’u mai ai e se epikopo ia te au ni ana autalavou e toalua o loo tu le tasi i tala ane o le isi ae feaveai feau tusitusia i le isi, nai lo le talanoa faafesagai.
Sa faamatalaina e tagata popoto suesue faafomai mea leaga ua fai ma vaisu o se “faamai o le mafaufau.”4 E moni lenei mea, ae ou te talitonu o le taimi lava e mau ai le u’u a Satani i se tagata, o le a avea ai foi ma faama’i o le agaga. Ae e tusa lava po o le a le taamilosaga o mea ua fai ma vaisu ua saisaitia ai se tagata, o loo i ai pea se faamoemoe. Na aoao atu e le perofeta o Liae i ona atalii lenei upumoni e faavavau: “O lea ua saoloto ai tagata i la le tino; ma ua foaiina mai ia te i latou mea uma e tatau i tagata. Ua saoloto foi i latou e filifili le saolotoga ma le ola faavavau talu le Puluvaga sili o tagata uma, pe filifili le faatoilaloina ma le oti, e tusa ma le faatoilaloina ma le mana o le tiapolo” (2 Nifae 2:27).
Afai e i ai se tasi ua i ai se mea ua fai ma ana vaisu, ma ua i ai le manao e faatoilalo ai, o loo i ai se auala i le saolotoga faaleagaga—o se auala e sola ese ai mai le nofo pologa—o se auala ua faamaoniaina. E amata i le tatalo—o fesootaiga tumau, faamaoni ma le faatauanau ma Lē Foafoa o o tatou agaga ma tino, o lo tatou Tama Faalelagi. O le aoaoga faavae lava lea e tasi e talepe ai se mausa leaga po o le salamo mai agasala o soo se ituaiga. O le alafua mo le suia o o tatou loto, o o tatou tino, o o tatou mafaufau, ma o tatou agaga o loo maua i tusitusiga paia.
Na apoapoai mai le perofeta o Mamona ia i tatou: “O le mea lea, ou uso pele e, ia outou tatalo atu ai i le Tama ma le malosi uma o le loto, ina ia faatumuina outou i lenei alofa … ; na ia avea outou ma atalii o le Atua; … ina ia faamamaina outou, e pei ona mama o ia” (Moronae 7:48).
O lenei mau ma le tele o isi mau o loo molimau mai ia i tatou, o loo i ai se faamoemoe mo e ua i ai mea ua fai ma vaisu, ma o lenei faamoemoe e oo mai e ala i le Togiola a le Alii o Iesu Keriso ma le faamaualaloina o le tagata lava ia i luma o le Atua, e aioi atu ina ia faasaolotoina mai le nofopologa i vaisu ma le tuuina atu o o tatou agaga atoa ia te Ia i le tatalo faatauanau.
E mafai ona fesoasoani atu taitai perisitua, a o saili atu e i latou ua i ai ni mea ua fai ma vaisu ni fautuaga mai ia i latou. Pe a talafeagai ai, e mafai ona faasino atu i latou i tagata faufautua faatulafonoina ma le Tautua a le AAG mo Aiga. O le polokalama e toe faaleleia ai mai mea sa fai ma vaisu ua aumai mai uluai laasaga e sefululua o le Alcoholics Anonymous, lea ua faigofie ona maua mai le LDS Family Services.
Ia i latou o loo feagai ma se mea ua fai ma vaisu patino po o i totonu lava o lou aiga ou te toe faapea atu, o le tatalo faatauanau o le ki lea e maua ai le malosi faaleagaga e maua ai le filemu ma faatoilaloina ai se manaoga ua fai ma vaisu. E alofa le Tama Faalelagi i Ana fanau uma lava, o lea ia faafetai atu ai ia te Ia ma faailoa atu le faatuatua faamaoni ia te Ia. Ole atu ia te Ia mo le malosi e faatoilalo ai vaisu ua e oo i ai. Ia tuu ese le faamaualuga uma ma liliu atu lou olaga ma lou loto ia te Ia. Ole atu ia faatumulia oe i le mana o le alofa mama o Iesu Keriso. Atonu e tatau ona e faia lea mea i le tele o taimi, ae ou te molimau atu ia te oe, o lou tino, mafaufau, ma le agaga e mafai ona suia, faamamaina, ma faamaloloina, ma o le a faasaolotoina ai oe. Na fetalai mai Iesu, “O au nei o le malamalama o le lalolagi: o le mulimuli mai ia te au e le savali o ia i le pouliuli, ae ia te ia le malamalama o le ola” (Ioane 8:12).
Ona o la tatou sini ia avea e faapei o lo tatou Faaola ma ia agavaa mulimuli ai e faatasi ma lo tatou Tama Faalelagi, e manaomia e i tatou taitoatasi ona iloa le suiga tele i o tatou loto lea na faamatala mai e le perofeta o Alema i le Tusi a Mamona. (tagai Alema 5:14). O lo tatou alofa mo lo tatou Tama o i le Lagi ma le Alii o Iesu Keriso e tatau ona atagia mai i a tatou filifiliga ma amioga i aso taitasi. Ua La folafola mai le filemu, olioli ma le fiafia ia i latou o e tausia a La’ua poloaiga.
Uso e ma tuafafine, ia tatou faaeteete uma i maunu faafoliga ua tuuina mai ia i tatou e le faifaiva taufaasese o tagata, o Lusifelo lea. Ia tatou maua le poto ma le malamalamaaga faaleagaga e iloagofie ai ma teena le tele o ana mea matautia e tuuina mai.
Ma, mo outou ua faapologaina e soo se ituaiga o mea ua fai ma vaisu, o loo i ai se faamoemoe auā e alofa le Atua i Ana fanau uma lava, ma ona o le Togiola a le Alii o Iesu Keriso ua mafai ai mea uma.
Ua ou vaaia faamanuiaga ofoofogia o le toe faaleleia, lea e mafai ona faasaolotoina ai se tasi mai filifili o mea leaga ua fai ma vaisu. O le Alii o lo tatou leoleo mamoe ma e leai se mea tatou te matitiva ai pe a tatou faalagolago atu i le mana o le Togiola. Ou te iloa e mafai e le Alii ma o le a Ia faasaolotoina mai lē ua nofopologa i mea ua fai ma vaisu, aua e pei ona folafola mai e le Aposetolo o Paulo, “Ou te mafaia mea uma lava i le faamalosi mai o Keriso ia te au” (Filipi 4:13). Ou te tatalo, ou uso e ma tuafafine, ina ia faasaolotoina i latou oe o loo tauivi ma lenei luitau i lenei taimi i o latou olaga, ma e faia ai ma le lotomaualalo i le suafa o Iesu Keriso, amene.