Tausiga Lototetele Faamātua
Larry R. Lawrence
Of the Second Quorum of the Seventy
I nei aso e gata ai, o le mea o loo manaomia moni e le lalolagi, o le i ai o ni tausiga lototetele faamatua mai tina ma tama e le fefefe e faailoa atu o latou talitonuga ma taofimau ai i o latou talitonuga.
Ou te fia talanoa atu i le aso i matua o le tupulaga talavou. O a outou talavou atamamai ma aumalolosi o le lumanai lea o le Ekalesia, ma o le mafuaaga lena, ua avea ai i latou ma taulaiga autu a le fili. E toatele outou o tina ma tama faamaoni o loo faafofoga mai i le Konafesi i le aso, ma tatalo mo ni tali e fesoasoani ai i a outou fanau i nei tausaga taua [o o latou olaga]. O le fanau matutua a la’u fanau, e lei leva atu ona avea ma tupulaga talavou, o lea la, o lenei mataupu e taua tele ia te au. E leai ni matua e atoatoa ma e leai foi ni tali e faigofie, ae o loo i ai mataupu faavae o le upu moni e mafai ona tatou faalagolago i ai.
O le autu o le Mutuale a Alii ma Tamaitai Talavou mo le 2010 sa aumaia mai le Tusi a Iosua. E amata faapea, “Ia e faamalosi ma loto tele; aua e te fefe (Iosua 1:9). O lenei fasifuaitau mai tusitusiga paia e mafai ona avea ma se autu lelei foi mo matua. I nei aso e gata ai, o le mea o loo manaomia moni e le lalolagi, o le i ai o ni tausiga lototetele faamatua mai tina ma tama e le fefefe e faailoa atu o latou talitonuga ma taofimau ai i o latou talitonuga.
Tagai faalemafaufau mo sina taimi e faapea, o loo saofai lou alo tamaitai i luga o le auala o se nofoaafi, ma ua e faalogo atu o loo tatagi mai le faaili o le nofoaafi. Mata e te lapataia o ia e aluese mai le auala? Pe e te faatautu, ma popole ina nei faapea ua ova tele lou taofiofia o ia? Afai na te le amanaiaina lau lapataiga, mata e vave ona e aveese atu o ia i se nofoaga saogalemu? Ioe, e te faia. O lou alofa i lou afafine o le a sili atu i lo isi lava manatu uma. O le a sili atu ona e faatauaina lona ola nai lo ona manatu lelei na o sina taimi.
O le oo mai o luitau ma faaosoosoga i o tatou tupulaga talavou ua pei lava o le saoasaoa ma le malosi o se nofoaafi la’u uta. E pei ona faamanatu mai ia i tatou i le Folafolaga i le Aiga, o matua e nafa ma le puipuiga o a latou fanau.1 O lona uiga o le faaleagaga ma le faaletino.
I le Tusi a Mamona, tatou te faitau ai e uiga ia Alema le Itiiti ma lona fautuaina o lona atalii faalogogata. Sa faia e Korianetona ni mea sese ogaoga a o faamisiona i sa Sorama. Sa matuai alofa tele Alema ia te ia o lea sa ia talanoa tuusao atu ai e uiga i le faafitauli. Sa ia faailoa atu lona matuai le fiafia ona o le amio le mama a lona atalii, ma faamalamalama atu ia te ia le matautia o taunuuga o le agasala.
E musuia lava a’u i taimi uma ou te faitauina ai nei upu lototele mai ia Alema: “O lenei foi, ua faapea mai le Agaga o le Atua ia te au: Ina poloai atu ia i lau fanau ia amiolelei … ; o le mea lea ou te poloai atu ai ia te oe, lo’u atalii e, ma le mata’u i le Atua, ia e ’alo’alosa i au amioletonu.” (Alema 39:12). O le vave faasalavei atu o lona tama na avea lea ma se taimi taua o suiga mo Korianetona. Sa salamo o ia ma mulimuli ane auauna atu ma le faamaoni. (tagai Alema 42:31; 43:1–2).
E ese mai la i le faataitaiga a Alema, ia se faataitaiga a se tasi o tama mai le tusi paia, o Eli i le Feagaiga Tuai. Sa avea Eli ma faitaulaga sili i Isaraelu i aso o Samuelu le perofeta. Fai mai le tusi paia sa matuai aoaiina o ia e le Alii, “aua o ona atalii ua fai mea e fetuuina ai i laua, a ua ia le taofi ia te i la’ua (1 Samuelu 3:13). O le tala ia Eli ua aoao mai ai i tatou e faapea, o matua e alolofa i a latou fanau e le tatau ona faamata’uina i latou e a latou fanau i le faia po o le le faia o se mea.
O ni nai tausaga ua mavae i le Konafesi Aoao, sa faamanatu mai ai e Elder Joe J. Christensen ia i tatou: “O le tausiga faamātua e le o se tauvaga ia lauiloa.”2 I le agaga lava lea e tasi, na saunoa ai Elder Robert D. Hales: “O nisi taimi tatou te fefefe ai i a tatou fanau—fefefe e fautuaina i latou ina nei o tatou faatiga ia i latou.”3
O ni tausaga ua alu, sa manao ai lo ma atalii e 17 tausaga e alu i se malaga faatasi ma ana uo i se faaiuga o le vaiaso, o ni alii lelei uma foi. Sa fesili mai o ia mo le faatagaga e alu ai. Sa ou fia fai atu i ai ua lelei, ae ou te le iloa le mafuaaga, sa ou le maua ai se faalogoga lelei e uiga i lenei malaga. Sa faasoa atu o’u lagona i lo’u toalua, ma sa ia matuai lagolagoina lava. Sa ia fai mai, “e tatau ona ta faalogo i le leo lena o le lapataiga.”
Ioe, sa le fiafia lo ma atalii ma fesili mai pe aisea na ma le mananao ai e alu. Sa ou tali faamaoni atu i ai, ou te le iloa pe aisea. “E na ona lē o lelei o o’u lagona i ai,” sa ou faamalamalama atu i ai, “ma o lo’u alofa tele ia te oe ou te le manao ai e lē amanaia nei lagona e i lo’u loto.” Sa fai si ou te’i ina ua ia fai mai, “E le afaina, Tama, ua ou malamalama.”
E tele atu le malamalama o le tupulaga talavou nai lo le mea tatou te manatu i ai; aua o loo ia i latou foi le meaalofa o le Agaga Paia. O loo latou taumafai e iloa le Agaga pe a fetalai mai o Ia, ma o loo vaavaai mai i a tatou faataitaiga. Latou te aoao mai ia i tatou le gauai atu i a latou musumusuga, e faapea, afai latou te “le o maua se lagona lelei e uiga i se mea”, e sili ai le aua le faia.
E ese le taua i tane ma ava ona lotogatasi pe a faia ni faaiuga faamātua. Afai e le fiafia se tasi o matua e uiga i se mea, ona le tatau lea ona tuu atu i ai se faatagaga. Afai e i ai se isi o i laua e le o maua se lagona lelei e uiga i se tifaga, se ata o le televise, se taaloga vitio, se pati, se ofu, se ofutaele, po o se gaoioiga i le Initoneti, ia maua le lototele e lagolago ai e le tasi le isi ma fai atu leai.
Ou te fia faasoa atu se tusi mai se tina loto nutimomoia. Sa faasolosolo lava ina aluese le agaga mai lana tama tama talavou ma aluese atu ai mai gaoioiga a le Ekalesia. Sa ia faamatalaina le mafuaaga na tupu ai lenei mea: “O tausaga uma lava o le talavou o la’u tama, sa ou popole ma taumafai e taofi mai o ia mai le soona taalo i taaloga vitio o tāūga. Sa ou talanoa i lo’u toalua, ma faaali atu i ai ni tusiga o le Ensign ma nusipepa sa lapatai mai ai e uiga i nei taaloga. Ae sa manatu lo’u toalua e leai se afaina. Fai mai o ia, e le o fealuai lo ma atalii ma faaaoga ni fualaau faasaina, ma e tatau ona tuu lo’u popole. Sa i ai taimi ou te nanaina ai le ki faatonutonu o taaloga, ae e toe ave lava i ai e lo’u toalua. Sa amata ona faigofie ia te au ona ou gauai atu i ai, … nai lo le tetee atu. Ou te matuai lagona lava o le faiga o lena taaloga e tutusa lava le avea ma vaisu e pei foi o fualaau faasaina. Ou te faia soo se mea e puipuia ai isi matua mai le oo atu i lenei aafiaga.”
Uso e ma tuafafine, afai e le lagona e lou toalua le toafilemu e uiga i se mea, ia faaali atu le faaaloalo mo na lagona. Afai e te uia le auala faigofie e aloese ai, e ala i le leai o se tala po o se mea e fai i ai, atonu ua e faatagaina le oo atu o ni amioga faataumaoi.
E mafai e matua ona taofia le tele o le lototiga i le aoaoina o a latou fanau e tolopo ni faauoga o faamasaniga tumau seia oo i le taimi ua latou sauni ai e faaipoipo. O se mea matautia le vave feoai taitoalua ma se uo tama po o se uo teine. O le avea ma se “uo fuifuilua” e faaosofia ai ni lagona militino, lea e masani ona oo atu ai i le militino faaletino. Ua iloa lelei lava e Satani le faasologa lenei, ma faaaoga ai mo lona lelei. O le a ia faia soo se mea e mafai ona ia faia e taofia ai alii talavou mai le o i misiona, ma taofia ai faaipoipoga i le malumalu sa.
E taua le maua e matua o le lototele e talanoa atu ai ma faasalavei atu a o lei manumalo ai Satani. Na aoao mai Peresitene Boyd K. Packer “a aafia ai loa le ola mama, ua ia i tatou loa le aia tatau ma le matafaioi e tuuina atu ai se leo o le lapataiga.”4
Sa ou talitonu pea lava e leai se mea lelei e tupu mai i le leva o le po, ma e tatau ona iloa e le au talavou le taimi e tatau ona oo mai ai i le fale i le po.
O loo i ai se atamai maoae e faaalia pe a ala lava matua ma faatalitali mo le la fanau se’i foi mai i le fale. E lelei atu filifiliga e fai e alii ma tamaitai talavou pe a latou iloa o loo ala ma faatalitali mai o latou matua e faalogologo pe na faapefea mai o latou afiafi ma sogi atu ia i latou e faamanuia ai le po.
Sei ou faailoa atu la’u lava lapataiga e uiga i se faiga masani ua taatele i le tele o aganuu. E faatatau la’u faamatalaga i “falemoe” po o le “moe i se po” i le fale o se uo. I le avea ai ma se epikopo, sa ou iloaina ai ua toatele le autalavou e solia le tulafono o le Upu o le Poto ma le Legavia, mo le taimi muamua, ona o se vaega o se “falemoe”. E masani foi, o le taimi muamua lea latou te matamata ai i ponokalafi, ma e faapena foi ma lo latou taimi muamua e fetaiai ai ma se leoleo, o le taimi lea latou te momoe ese ai mai o latou aiga.
E sili atu le malolosi o faatosinaga a le tupulaga pe a o ese atu a tatou fanau mai a tatou uunaiga, ma pe a faavaivaia o latou puipuiga i le leva o le po. Afai e te lei maua se lagona lelei i se gaoioiga e fai i le po atoa, aua e te fefe e tali atu i lena leo o le lapataiga.Ia e e maua le gaga tatalo i taimi uma pe a oo i le puipuiga o lau fanau faapelepele.
O tausiga lototetele faamatua e le faapea o taimi uma e aofia ai le fai atu “leai”. E tatau foi i matua ona fai atu “ioe” i fautuaga a perofeta o aso nei. Ua fautuaina i tatou e o tatou taitai faale-Ekalesia e faatulaga ni mamanu amiotonu i totonu o o tatou aiga. Mafaufau i faiga faavae taua nei e lima ua i ai le mana e malutia ai o tatou tupulaga talavou: o tatalo faaleaiga, suesuega faaleaiga o tusitusiga paia, afiafi faaleaiga, taumafataga faatasi a le aiga i afiafi, ma faatalanoaga faifai pea a le tama ma fanau taitoatasi.
E manaomia le lototele e faapotopoto mai ai tamaiti po o le a lava mea o loo latou faia ma tootutuli faatasi o se aiga. E manaomia le lototele e tape ai le televise ma le komepiuta, ae tata’i atu lou aiga i itulau o tusitusiga paia i aso uma lava. E manaomia le lototele e teena ai isi valaaulia i afiafi o Aso Gafua, ina ia e faaavanoaina lava lena afiafi mo lou aiga. E manaomia le lototele ma le lotopulea e aloese ai mai le soona faia o ni fuafuaga faatulagaina, ina ia mafai ona i ai uma lou aiga i le fale mo le ‘aiga o le afiafi.
O le tasi o auala e sili ona aoga e mafai ona tatou uunaia ai se atalii po o se afafine o le faia lea o ni faatalatalanoaga taitoatasi. O le faalogo ma le totoa, e mafai ai ona tatou iloa manaoga o o latou loto, fesoasoani ia i latou e faatutu ni sini amiotonu, ma fefaasoaai ma i latou ni musumusuga faaleagaga na tatou maua e uiga ia i latou. O le fefautuaai e manaomia ai le lototele.
Taumafai e vaai faalemafaufau pe o le a faapeī le tulaga e oo i ai le tupulaga faia’e pe afai e faatino i taimi uma nei mamanu amiotonu e lima i totonu o aiga uma lava. E ono faapei o tatou tupulaga talavou o le autau a Helamana: e le faatoilaloina (tagai Alema 57:25–26).
O le tausiga faamatua o tupulaga talavou i aso e gata ai o se tofiga e sili ona faalotomaulaloina. O loo taumafai Satani ma ana au e faatoilalo lenei tupulaga; o loo faamoemoe mai le Alii i matua lotototoa e faaeaina i latou. Matua, “Ia faamalosi ma lototele; aua e te fefe.” (Iosua 1:9). Ou te iloa e faafofoga ma tali mai le Atua i a outou talosaga. Ou te molimau atu e lagolagoina ma faamanuiaina e le Alii ia matua lototetele. I le suafa o Iesu Keriso, amene.