Aloese mai Mailei o le Agasala

Elder Jairo Mazzagardi

Of the Second Quorum of the Seventy

Ia tutumau malolosi ma ia fai filifiliga lelei o le a mafai ai ona e tofo i le fua o le laau o le ola.

I se taeao matagofie ma le susulu o le la, sa ou valaaulia ai le afafine o lo’u atalii, o Vicki, ua toeitiiti atoa lona valu tausaga, ma te savalivali i tafatafa o se vaituloto, o le mea moni o se faatanoa vai mo lo matou aai matagofie.

Sa ma savalivali fiafia, ma faalogologo i le pao malie o le tafe o se auvai manino i talaane o le auala sa ma ui ai. Sa laina i le auala ni laau lanulauava matagofie ma ni fugalaau manogi mananaia. Sa mafai ona ma faalogoina pesega a manulele.

Sa ou fesili atu i lo’u afafine mata lanumoana, fiafia ma le mama, pe o faapefea mai ana sauniuniga mo [lona] papatisoga.

Sa tali mai o ia i se fesili: “Tamamatua, o le a le agasala?”

Sa ou tatalo le leoa mo se musumusuga ma taumafai e tali atu i le faigofie ou te mafaia: “O le agasala o le lē usiusitai ma le loto i ai i poloaiga a le Atua. E faanoanoa ai le Tama Faalelagi, ma o ona taunuuga e tiga ma faanoanoa.”

Na manino lava lona popole, ma fesili mai ia te au, “Ae e faapefea ona oo mai ia i tatou?”

O le fesili na faaalia muamua mai ai le mama, ae ua faaalia ai foi le popolega pe faapefea ona aloese mai le aafia ai i le agasala.

Mo ia la ina ia malamalama manino atili atu, sa ou faaaogaina ai elemene o le natura sa siomia ai i maua e faamanino ai. Sa faaauau pea le ma savaliga i le auala, ma tau atu ai i se pou alā tele lava i autafa o se pa uaea maamaai; o se fausaga mamafa o loo ola faataamilo ai ni fugalaau, vao, ma ni laau iti. I le gasologa o taimi o le a tutupu tele atu ai nei laau iti nai lo le pou.

Ou te manatua o le agai teisi atu i lalo o le auala, na ma tau atu ai i se isi pou ua lilofia e sia mea itiiti ma sia mea itiiti, na toetoe lava a le iloaina, i laau ma vao na ola faataamilo ai. Na ou manatu faalemafaufau e le mafai ona iloa e le pou lena mea, e ui lava i lona malosi, e mafai lava ona siomia ma faatamaia e laau iti ma le mumu’a. Atonu na manatu faapea le pou, “E le afaina. Ou te malosi ma lapoa, ma e leai se mea leaga o le a faia e lenei laau itiiti ia te au.”

O lea la, a o tupu tele ae se laau na latalata ane i ai, sa le’i matauina muamua e le pou; ona amata ai lea ona fiafia le pou i le paolo na maua mai i le laau. Ae sa faaauau pea ona tupu le laau, ma fusia ai le pou i ona lala e lua lea o le taimi muamua, sa foliga mai e mu’amu’a lava ae mulimuli ane na felavesai ma fusia ai le pou.

Ae sa le iloa lava e le pou le mea o loo tupu.

E lei leva le ma savaliga, ae ma tau atu i le pou faafaatusa. Ua mase’i ese mai le eleele. Sa vaaia le maofa o le afafine o lo’u atalii ma fesili mai ia te au, “Tamamatua, o le laau la lea o le agasala?”

Ona ou faamalamalama atu lea ia te ia e faapea ua na o se faatusa, po o se faataitaiga, o le auala e oo mai ai le agasala ia i tatou.

Ou te le iloa po o le a se aafiaga o le ma talanoaga o le a i ai ia te ia, ae sa mafai ai ona ou mafaufau i le tele o foliga o le agasala ma le auala e tolotolo mai ai i o tatou olaga pe afai tatou te faatagaina.

E tatau ona tatou mataala aua o filifiliga laiti e mafai ona oo mai ai taunuuga tetele, e pei lava o le vave moe ma le alapo e i ai ni taunuuga tetele. Ua aoao mai i tatou i le Mataupu Faavae ma Feagaiga 88:124, “Ia alapo, ina ia faafouina o outou tino ma o outou mafaufau.” O i latou e vave momoe e alafa’i mai ua lava se malologa, ma ua faafouina le tino ma le mafaufau ma ua faamanuiaina e le Alii ona o le usiusitai.

O le mea atonu ua foliga mai e itiiti sona taua, e pei o le tuai ona moe, o le lē tatalo i se aso, o le faapasi o le anapogi, po o le solia o le Sapati—o nai sasi laiti ia—o le a faasolosolo malie ai lava ona aveesea lo tatou mataala e sia mea itiiti ma sia mea itiiti, ma faatagaina ai i tatou e fai nisi mea e sili atu ona leaga.

A o ou talavou, o le taimi sa tatau ai ona ou foi mai ai i le fale o le 10:00 i le po. O aso nei, o le taimi lena faatoa o ai tafaoga a isi e fiafia ai. Ae ua tatou iloa lava o le po e tutupu ai nisi o mea e sili ona matautia. O le taimi e pogisa ai e o ai nisi o le autalavou i nofoaga e le talafeagai le siosiomaga, lea e i ai musika ma upu e le mafai ona latou maua ai le mafutaga a le Agaga Paia. Ma, o nei la tulaga, e maileia gofie ai i latou e le agasala.

E masani lava, o le maileiaina e le agasala e amata atu i se tagata ua filifilia ni uo e le ogatasi o latou tulaga faatonuina ma le talalelei; ma ina ia avea ma se tagata lauiloa pe ina ia taliaina e lana tupulaga, ua fetuutuunai ai loa lea e le tagata ia aoaoga faavae ma tulafono o le talalelei, ma agai atu ai i lalo i se auala lea e na o le tiga ma faanoanoaga o le a aumaia ai i lenei tagata, ma i tagata e sili ona pele ia te ia.

E tatau lava ona tatou mataala ina ia lē faatagaina le agasala e ola i o tatou tafatafa. Ua i soo se mea ituaiga eseese o agasala—e oo lava, mo se faataitaiga, i se komepiuta po o se telefoni feaveai. O nei tekinolosi e aoga ma e mafai ona faamanuiaina tele ai i tatou. Ae o le faaaogaina ma le lē tatau o nei mea—e pei o le auai ai i taaloga e faamaumau taimi, o polokalama o le a faaosofia ai oe i tuinanau o le tino, po o mea e sili atu foi ona leaga e pei o ponokalafi—e faataumaoia. O ponokalafi e faatamaia ai uiga lelei ma magoto ifo ai le tagata e faaaogaina [ia mea faataumaoi] i le oneone mimiti o mea eleelea, lea e na o le pau lava le auala e mafai ona toe solaese mai ai le tagata o le mauaina o ni fesoasoaniga se tele.

O lenei saualii matautia e oo ai le tiga ma puapuaga i le tagata e faaaogaina ma i lana fanau, toalua, tamā, ma le tina e lē sala. O fua o tuinanau o le tino o le oona matuitui ma faanoanoaga. O fua o le usiusitai ma le ositaulaga o le fiafia ma le olioli e faavavau.

O filifiliga e uiga i tulaga faatonuina e mulimuli ai, e tatau lava ona vave fai, ae lē o le taimi ua tulai mai ai le faaosoosoga. O a tatou taiala e tatau ona faapenei:

• O le a ou faia le mea lenei aua e sa’o, e mai le Alii, ma o le a ou maua ai le fiafia.

• O le a ou le faia le mea lenei aua o le a toso ese ai a’u mai le upu moni, mai le Alii, ma mai le fiafia e faavavau ua Ia folafola mai i e faamaoni ma usiusitai.

Talu ai ona sa silafia lava e le Tama o le a tatou faia ni filifiliga sese, o lea, i Lana fuafuaga matagofie o le alofa, na Ia saunia ai se Faaola o le lalolagi e togiola mo agasala a i latou uma o e salamo; o e o mai ia te Ia e saili mo se fesoasoani, faamafanafanaga, ma le faamagaloga; ma ē e naunau e tauave i o latou luga Lona suafa—o Iesu Keriso.

Afai tatou te agasala, e tatau lava ona tatou vave sailia se fesoasoani aua e le mafai ona tatou sao ese na o i tatou lava mai le mailei o le agasala, e pei lava o le tala faatusa i le pou o le pa, e le mafai ona ia faasaolotoina o ia lava. E ao i se isi tagata ona fesoasoani mai ia i tatou e aveese ai le fusi matautia.

E mafai ona fesoasoani matua, ma ua valaauina e le Atua le epikopo e fesoasoani mai ia i tatou. O ia lea e tatau ona tatou o atu i ai ma tatala atu i ai o tatou loto.

O loo faamalamalama mai e le Mataupu Faavae ma Feagaiga e 58:42–43:

“Faauta, o le ua salamo i ana agasala e faamagaloina o ia, ma o au le Alii, ou te le toe manatua lava.

“Tou te iloa faapea se ua salamo i ana agasala—faauta, na te ta’uta’u atu ma lafoaia.”

O ni nai masina mulimuli ane talu ona mavae le ma savalivaliga i talaane o le vaituloto, sa faatalanoa le afafine o lo’u atalii e lona epikopo—o lona tamā lea—mo le papatisoga. Ina ua uma le faatalanoaga sa ou fesili atu ia te ia pe na a mai. Sa tali mai, na toetoe lava a a’oa’i mai a’u, “Tamamatua, o se faatalanoaga e lē faalauaiteleina. Ua e iloa lena mea.”

Epikopo, ou te faamoemoe tou te matuai manatu mamafa i lena tali. Na foliga mai ia te au sa tuputupu ae tele i le malamalama le afafine o lo’u atalii i si taimi puupuu lava.

E pei lava o le laau sa ou faamatalaina na aumaia le faanoanoa, tiga, mafatiaga, ma le mailei, e mafai foi e se isi laau ona aumaia le faafeagai. O loo ta’ua i le 1 Nifae 8:10–12:

“Ua oo ina ou vaai atu i le laau ua manaomia ona fua e faafiafia ai le tagata.

“Ua oo ina ou alu atu ma ou ‘ai ona fua, ma ua ou iloa ua suamalie tele, e sili i mea uma sa ou muai tofotofo ai. Ioe, sa ou vaaia ua pa’epa’e ona fua, e sili lona sinasina ai mea sinasina ua uma ona ou vaaia.

“Ina ua ou ‘ai lona fua, ua faatumuina ai lo’u agaga i le olioli tele lava;

Uso e ma tuafafine pele, ia tutumau malolosi ma ia fai filifiliga lelei o le a mafai ai ona e tofo i le fua o le laau o le ola. Afai, po o le a lava se mafuaaga, ua e sese ai pe aluese mai le ala, ua faaloaloa atu o matou lima ma matou faapea atu ia te oe, “Sau. O loo i ai le faamoemoe. Matou te alolofa ia te oe, ma matou te fia fesoasoani atu ia te oe ia e maua le fiafia.”

E alofa tele le Tama Faalelagi ia i tatou lea na Ia auina mai ai Lona Alo e Toatasi, o Iesu Keriso.

E alofa tele Iesu Keriso ia i tatou lea na Ia tuuina mai ai Lona soifua e togiola mo a tatou agasala!

O le a se mea ua tatou naunau e tuuina atu ia tatou mama ai ma maua lena olioli?

Ou te tuuina atu ai la’u molimau i le moni o nei mea i le suafa paia o Iesu Keriso, amene.