O Le Faamaualuga ma le Perisitua
Dieter F. Uchtdorf
Second Counselor in the First Presidency
O le faamaualuga o se ki lea e tapeina ai le mana o le perisitua. O le lotomaualalo o se ki lea e faaolaina ai.
O’u uso pele e, faafetai atu mo le potopoto faatasi ai i le lalolagi atoa mo lenei sauniga perisitua o le konafesi aoao. O lo outou auai ua faaalia ai la outou tautinoga e fegalegaleai ai i soo se mea o tou i ai, faatasi ai ma o outou uso o loo umia le perisitua paia, ma o loo auauna ma faamamaluina lo outou Alii ma le Togiola, o Iesu Keriso.
E masani lava tatou te fuatiaina o tatou olaga i mea e tutupu ia e tuua ai ni maka i o tatou mafaufau ma loto. E tele ia ituaiga o mea e tutupu i lo’u foi olaga, o se tasi o ia mea na tupu i le 1989 ina ua ou faalogo i se lauga o le a tāua pea a Peresitene Ezra Taft Benson, “Faaeteete i le Faamaualuga.” I le folasaga sa iloa ai ua leva ona mamafa i le finagalo o Peresitene Benson lenei autu mo se taimi umi.1
Sa ou lagonaina foi lea avega lava e tasi i nai masina ua tuanai atu. Ua tauanauina au e uunaiga a le Agaga Paia e faaopoopo atu so’u leo e avea o se isi molimau i le savali a Peresitene Benson na tuuina mai i le 21 tausaga talu ai.
Ua tofu silafia e tagata uma se aafiaga o le agasala o le faamaualuga. E leai se tasi ua mafai ona aloese mai ai; e toaitiiti e manumalo ai. Ina ua ou ta’u atu i lo’u toalua o le autu lea o la’u lauga, sa ia ata ma fai mai, “Matuai lelei tele lou talanoa i mea ua lava lou iloa i ai.”
O Isi Uiga o le Faamaualuga
Ou te manatuaina foi se tasi o taunuuga mālie o le lauga faatosina a Peresitene Benson. Sa umi se taimi na toetoe lava a le toe taliaina ia tagata o le Ekalesia ona fai atu e latou te “mitamita” i a latou fanau po o latou atunuu pe faapea foi latou te “mitamita” i a latou galuega. O lea lava upu o le faamaualuga e foliga mai ua avea o se upu e sala ese i la tatou vaogagana.
I totonu o tusitusiga paia tatou te maua ai le tele o faataitaiga o tagata lelei ma le amiotonu o loo olioli i le amiotonu ma i le taimi lava e tasi o loo vivii i le agalelei o le Atua. Sa faailoa mai e le Tama Faalelagi lava ia Lona Alo Pele i upu ia “Ou te fiafia ia te Ia.”2
Na vivii Alema i le manatu e faapea atonu e avea o ia ma “se tufugaaao o le Atua.”3 Na vivii atu le Aposetolo o Paulo i le faamaoni o tagata o le Ekalesia.4 O le faifeautalai maoae o Amona na vivii atu i le manuia na latou oo i ai ma ona uso o ni faifeautalai. 5
Ou te talitonu e i ai se eseesega i le va o le mitamita i ni mea faapitoa ma le lagonaina o le faamaualuga. Ou te mitamita i le tele o mea. Ou te mitamita i lo’u toalua. Ou te mitamita i le ma fanau ma fanau a fanau.
Ou te mitamita i le autalavou o le Ekalesia, ma ou te olioli i lo latou lelei. Ou te mitamita ia te outou, ou uso peleina ma le faamaoni. Ou te mitamita e tutu faatasi ma outou o sē umia le perisitua paia a le Atua.
O Le Faamaualuga o le Agasala o le Faasausili
O le a la le eseesega i le va o lenei ituaiga o faamaualuga ma le ituaiga lea na ta’ua e Peresitene Benson “o le agasala lautele?”6 O le faamaualuga o le agasala, e pei ona manatuaina i le aoao mai o Peresitene Benson, aua e na te fofoaina le ita po o le feitagai ma tuua ai tatou e faasagatau i le Atua ma o tatou uso a tagata. I lona natura, o le faamaualuga o se agasala o le faatusatusaga, aua e masani lava ona amata i le “Vaai i lo’u maoae tele ma mea maoae ua ou faia,” ma e masani lava ona foliga mai e faaiu i le faapea “O le mea lea, e sili atu ai au nai lo oe.”
Pe a faatumulia o tatou loto i le faamaualuga, ua tatou faia se agasala matuia, aua ua tatou solia poloaiga sili e lua.7 Nai lo le tapuai atu i le Atua ma alofa atu i o tatou tuaoi, ua tatou faailoa le mea moni lava o loo tatou tapuai ma alofa i ai—o le foliga lea tatou te vaaia i le faaata.
O le faamaualuga o le agasala sili lea o le faasausili. Mo le toatele, o se Rameutoma patino lava, o se tulaga paia lea e faamaonia mai ai le lotoleaga, faaloloto, ma le lotofefete i mea le aoga.8 I se lagona, o le faamaualuga o le uluai agasala lea, aua a o le i faavaeina lenei lalolagi, o le faamaualuga na pa’u ai Lusifelo, o se atalii o le taeao o le sa i ai se pule i le afioaga o le Atua.”9 Afai e mafai e le faamaualuga ona faaleagaina se tasi e pei lava ona tupu ia Lusifelo, pe le tatau ea la ona tatou suesueina o tatou foi ia agaga?
E Tele Foliga o Le Faamaualuga
O le faamaualuga o se kanesa matautia. O se agasala lea e taitai atu ai i le tele o isi vaivaiga uma faaletagata. O le mea moni, e mafai ona faapea o isi agasala uma o se aūga, o se faaalia lea o le faamaualuga.
O lenei agasala e tele ona foliga. E taitai atu ai nisi e matuai fiafia i le vaaiga i lo latou lava taua faaletagata lava ia, o mea ua ausia, o taleni, tamaoaiga, po o tofiga. Latou te faitauina nei faamanuiaga o ni faamaoniga o le “filifilia,” “avea ma tagata sili,” po o “ua amiotonu atu” nai lo isi. O le agasala lea o le “Faafetai le Atua ua sili atu lo’u taua nai lo outou.” I lona natura tonu lava o le manao lea ina ia faamemelo atu pe lotoleaga atu [ia te ia]. O le agasala lea o le viia o ia lava ia.
Mo isi, o le faamaualuga e liliu ai i le lotoleaga: latou te vaai atu ai ma le matau’a ia i latou o i ai ni tofiga lelei atu, talenia atu, pe tele atu ni mea nai lo latou. Latou te saili atu e faamanu’alia, faatasinaina, ma faatoilaloina isi i se taumafaiga lē aoga ma le taitaiseseina i le faasausili. Pe a tautevateva ma mafatia i latou ua latou lotoleaga i ai, ona patipati faalilolilo lea.
O Le Potu Suesue o Taaloga
Atonu e leai se isi nofoaga sili atu e matauina ai le agasala o le faamaualuga nai lo le lalolagi o taaloga. Ou te fiafia lava e auai ma matamata i taaloga. Ae ou te tautino atu, e i ai taimi e maasiasi ai pe a leai se amio solia i taaloga. E mafai faapefea e ni tagata soifua e masani lava ona agalelei ma agaalofa ona matua le onosaia ma faatumulia i le ita i le isi ’au ma a latou uo?
Ua ou vaai i tagata e fiafia i taaloga o latou upuleaga atu ma fai uiga tufanua i tagata o le isi ’au. Latou te vaavaai masei ma faatele. Latou te faamaonia mai lo latou ita i faamatalaga faasoloatoa ma faalauaitele atu ai i tagata uma lava e fegalegaleai ma le isi au. Latou te olioli pe a mafatia ia tagata i a latou faiga le manuia.
Uso e, o le mea e leaga ai o loo tatou vaaia i aso nei ia lava ituaiga o uiga ma amioga ua aafia ai foi lauga faalauaitele a tagata faaupufai, o ituaiga, ma tapuaiga.
O’u uso pele o le perisitua, o’u uso ā soo peleina e, o le Keriso agalelei, pe le tatau ea ona tatou tuua i tatou lava i se tulaga maualuga? I le avea ai ma ē umia le perisitua, e ao ona tatou iloa ua laeiina uma e le fanau a le Atua le ofu lava e tasi. O la tatou au o le usoga o tamalii. O lenei olaga faitino o lo tatou malae taalo lea. O la tatou sini o le aoao lea e alolofa i le Atua ma faalautele atu lena lava alofa e tasi i o tatou uso a tagata. Ua tatou i ai iinei ina ia ola ma soifua e tusa ma Ana tulafono ma atiina ae le malo o le Atua. Ua tatou i ai iinei e fausia, siitia, taulimaina tutusa, ma faamalolosia fanau uma a le Tama Faalelagi.
E Le Tatau Ona Tatou Aafia Ai i se Tulaga Lē Lelei
Ina ua valaauina au e avea ma se tasi o le Au Pulega Aoao, sa faamanuiaina au i le aoao mai o le tele o le Usoga matutua i le Ekalesia. O se tasi o aso, sa ou maua ai le avanoa e malaga ai ma Peresitene James E. Faust i se konafesi faalesiteki. I le taimi atoa a o ma malaga ai i le taavale, sa faaalu e Peresitene Faust le taimi e aoao ai au i nisi o aoaoga faavae taua e uiga i lo’u tofiga. Sa ia faamalamalama mai le loto saafi o tagata o le Ekalesia, aemaise lava i le Au Pulega Aoao. Sa ia fai mai, “O le a latou taulimaina oe ma le agalelei. O le a latou tautatala i ni mea lelei e uiga ia te oe.” Ona ia soisoi lemu lea ma faapea mai, “Dieter, ia e loto faafetai mo lena mea. Ae aua lava ne’i e aafia ai i se tulaga lē lelei.”
O se lesona lelei lena mo i tatou uma, uso e, i soo se valaauga lava po o se tulaga e tupu i le olaga. E mafai ona tatou faafetai atu mo lo tatou malosi, tamaoaiga, o meatotino, po o tofiga, ae pe a amata ona tatou aafia ai i ni tulaga le lelei—pe a amata ona tatou faamemelo i o tatou lava tulaga; pe a tatou taulai atu i lo tatou lava tāua, o le pule, po o le ta’uleleia; pe a tatou mafaufau pea i manatu o isi e uiga ia i tatou ma talitonu i tala ua fai e isi e uiga ia i tatou—o iina la e amata ai loa faafitauli; o iina loa e amata ai ona faaleagaina e le faamaualuga.
E tele lapataiga e uiga i le faamaualuga i totonu o tusitusiga paia, “Na o le faamaualuga lava e tupu ai le misa; a o e filifili, e popoto i latou.”10
Na lapatai mai le Aposetolo o Peteru e faapea “E tetee atu le Atua i e faamaualuga, a e foaiina mai le alofa tunoa i e faamaualalo.”11 Na faamalamalama mai e Mamona, “E le talia e le Atua se tasi, na o e agamalu ma lotomaualalo.”12 E tusa ai ma le fuafuaga, ua filifilia e le Alii “mea vaivai o le lalolagi e faamaina ai mea malolosi.”13 Ua faia e le Alii lenei mea e faaali mai ai o loo i ai Lona aao i Lana galuega, a leai tatou te “faalagolago i le malosi o le tino.”14
O tatou o auauna a lo tatou Alii ma le Faaola, o Iesu Keriso. E le i tuuina mai ia i tatou le perisitua ina ia mafai ai ona tatou maua ni faamamaluga i mea ua tatou faia ma fiafia ai i viiga ua tatou maua. Ua tatou i ai iinei ina ia afe i luga lima o tatou ofutino ma galulue malosi. Tatou te le o i ai i se galuega faatauvaa. Ua valaauina i tatou e saunia le lalolagi mo le afio mai o lo tatou Alii ma le Faaola, o Iesu Keriso. Tatou te le saili la mo so tatou lava mamalu ae ia tuuina atu le viiga ma le mamalu i le Atua. Ua tatou iloa e itiiti lava se sao e mafai ona tatou faia e i tatou lava; ae ui o lea, a o tatou faagaoioia le mana o le perisitua i le amiotonu, o le a faia e le Atua se galuega tele ma le ofoofogia e oo mai e ala i a tatou taumafaiga. E ao ona tatou aoao, e pei ona faia e Mose, e faapea “o le tagata o le mea noa”15 pe a na o ia lava ae “e mafaia mea uma i le Atua.”16
O Iesu Keriso o le Faataitaiga Atoa o le Lotomaualalo
I le aloese mai ai i le faamaualuga, e pei ona i ai i mea uma, o Iesu Keriso o lo tatou faataitaiga atoa lea. A o taumafai Lusifelo e sui le fuafuaga o le faaolataga a le Tama ma maua ai le mamalu mo ia lava, na fetalai atu le Faaola, “Lo’u Tama e, ia faia lou finagalo, ma ia ia te oe pea le mamalu e faavavau.”17 E tusa lava po o a Ona tomai ofoofogia ma mea na Ia ausia, na agamalu pea ma lotomaualalo le Faaola.
Uso e, ua tatou umia “le Perisitua Paia, e tusa ma le Faatulagaga o le Alo o le Atua.”18 O le mana lea ua foaiina atu i alii i le lalolagi e galulue ai mo Ia. Ina ia faagaoioia Lona mana, e ao ona tatou taumafai ia avea e faapei o le Faaola. O lona uiga tatou te saili atu e fai le finagalo o le Tama i mea uma lava, e pei ona faia e le Faaola.19 O lona uiga tatou te tuuina atu le mamalu uma i le Tama, e pei lava ona faia e le Faaola.20 O lona uiga tatou te tuuina atu i tatou lava e auauna atu i isi, e pei lava ona faia e le Faaola.
O le faamaualuga o se ki lea e tapeina ai le mana o le perisitua.21 O le lotomaualalo o se ki lea e faaolaina ai.
Ia Lotomaualalo ma Ia Faatumulia i le Alofa
E faapefea la ona tatou faatoilaloina lenei agasala o le faamaualuga ua matua taatele ma faataumaoia? E faapefea ona faalotomaualaloina atili i tatou?
E toetoe lava a le mafai ona faafefeteina i tatou i le faamaualuga pe afai ua faatumulia o tatou loto i le alofa moni. “E leai se tasi e mafai ona fesoasoani i lenei galuega vagana o le a loto maualalo o ia ma tumu i le alofa.”22 Pe a tatou vaavaai atu i le lalolagi o loo siomia ai i tatou e ala i le alofa mama o Keriso, e amata ai ona tatou malamalama i le loto maualalo.
O nisi e manatu o le lotomaualalo o lona uiga o le lagona o le tausalaina o i tatou lava. O le lotomaualalo e le faapea ua faatalitonuina i tatou lava tatou te lē aogā, leai se uiga, pe itiiti foi so tatou taua. E le faapea foi e faafitia ai pe taofia ai taleni ua tuuina mai ia i tatou e le Atua. Tatou te le mafaufau i le lotomaualalo e ala i lo tatou manatu faatauvaa ia i tatou lava; tatou te mafaufau i le lotomaualalo e ala i lo tatou lē manatu mo na o i tatou lava. E oo mai i lo tatou galulue ma se uiga o loo auauna atu i le Atua ma o tatou uso a tagata.
O le lotomaualalo e taitaia lo tatou gauai ma le alofa i isi ma i faamoemoega o le Tama Faalelagi. E fai e le faamaualuga le faafeagai. E maua mai e le faamaualuga lona malosiaga mai vaieli loloto o le manatu faapito. O le taimi lava e taofia ai lo tatou faamemelo ia i tatou lava ma tuu atu i tatou lava i auaunaga, o le taimi foi lena e faaitiitia ai le faamaualuga ma amata ai ona mate atu.
Ou uso pele e, e matua toatele lava tagata o loo manaomia se fesoasoani e mafai ona tatou mafaufau i ai nai lo le tatou manatu ia i tatou lava. Ma faamolemole ia aua lava nei faagaloina lou lava aiga, ma lou lava toalua. E tele auala e mafai ai ona tatou auauna atu ai. E leai se taimi tatou te manatu faapito ai na o i tatou lava.
Sa i ai sa’u peni sa ou fiafia lava e faaaoga i le taimi o la’u galuega o se pailate i se kamupani vaalele. E na o le mimilo lava o le au, e mafai ai ona ou filifili se lanu se tasi mai lanu e fa. E lei faitio mai lava le peni pe a ou manao e faaaoga le lanu mumu nai lo le lanu moana. Na te lei fai mai lava ia te au, “Ou te le fia manao e tusitusi pe a te’a le 10 i le po, po o le mamafa o le puao, po o le oo atu foi i tafailagi maualuluga.” E le i fai mai le peni, “Ia faaaoga au tau lava o faamaumauga taua, ae aua lava mo galuega faalelalolagi o aso uma.” Faatasi ai ma le faatuatuaina sili, sa ia faatinoina ai galuega uma sa ou manaomia, e tusa lava po o le a le taua po o le aoga. Sa saunia lava o ia e le aunoa e auauna.
I se auala tutusa, o tatou o meafaigaluega i aao o le Atua. Pe a i ai o tatou loto i le nofoaga tonu, tatou te le faitio lava e faapea o tatou galuega atofaina e le talafeagai ma ō tatou tomai. Tatou te auauna atu ma le fiafia i soo se mea ua talosagaina ai i tatou. Pe a tatou faia lea mea, e mafai ona faaaogaina i tatou e le Alii i auala e sili atu ma lo tatou malamalama e faataunuu ai Lana galuega.
Sei o’u faaiu atu i upu mai le savali musuia a Peresitene Ezra Taft Benson i le 21 tausaga talu ai: “
O le faamaualuga o le maagao tele lea i Siona. “
E ao ona faamamaina i tatou lava e ala i le faatoilaloina o le faamaualuga. …23
“E ao ina tatou ua’i atu i musumusuga uma a le Agaga Paia,’ ma tuu ese le ‘tagata [faamaualuga] o le lalolagi,’ ae avea ma tagata paia e ala i le togiola a Keriso le Alii,’ ma avea ‘e pei o se tamaitiiti, e gauaigofie, ma agamalu, ma lotomaualalo.’ …24
“Ua finagalo le Atua i se nuu lotomaualalo. … ‘Amuia i latou o e latou te faalotomaualaloina i latou lava e aunoa ma le faamalosia ia loto maualalo.’ …25
“Ia tatou filifili e lotomaualalo. E mafai ona tatou faia. Ou te iloa tatou te mafaia.”26
Ou uso pele e, ia tatou mulimuli i le faataitaiga a lo tatou Faaola ma aapa atu e auauna atu nai lo le saili i viiga ma mamalu o tagata. O la’u tatalo lea ina ia tatou iloaina ma aveesea uiga faamaualuga lē amiotonu mai i o tatou loto ma ia tatou suia i le “amiotonu, amioatua, faatuatua, alofa, onosai, [ma le] agamalu.”27 I le suafa paia o Iesu Keriso, amene.