“O Mai Ia Te Au ma le Loto Atoa, Ona Faamaloloina ai Lea o Outou”
Elder Patrick Kearon
Of the First Quorum of the Seventy
O lo tatou Faaola o le Aloalii o le Filemu, o le Fomai Sili, ua na o Ia lava le e mafai ona faamamaina moni i tatou mai le ū o le agasala.
O le po nei ou te fia faasoa atu ai se savali o le filemu ma le faamalologa i soo se tasi o outou o lagonaina le tuua toatasi pe ua tuulafoaiina, ua le maua se toafilemu i le mafaufau po o le loto, pe ua lagona foi ua e faamaumauina sou avanoa se tasi na totoe. O le faamalologa atoa lava ma le filemu e mafai ona maua i aao o le Faaola.
A o avea ai ma se tamaitiiti e fitu tausaga i le Penisula o Arapi, sa ta’u mai pea e o’u matua ia te au ia fai o’u seevae fafao i taimi uma ma sa ou malamalama i le mafuaaga. Sa ou iloa o le a puipuia e seevae o’u vae mai le tele o mea taufaamata’u e maua i le toafa—e pei o gata, akarava, ma laau talatala. I se tasi o taeao ina ua maea se po o le tolauapiga i le toafa, sa ou manao ai ou te alu e matamata, ae ou te lei fia manao e fai ou seevae fafao. Sa ou mafaufau e na ona ou alu lava mo sina savalivaliga, ma o le a ou latalata lava i le tolauapiga. Nai lo le faia la o seevae fafao, sa fai o’u seevae tosotoso. Sa ou faapea ifo o seevae tosotoso ā, o seevae—o se isi ituaiga. Ma i se isi itu, o le ā lava se mea e mafai ona tupu?
A o ou savalivali la i luga o le oneone mālū—i o’u seevae tosotoso—sa ou faalogoina se mea e pei o se laau talatala ua tuia ai luga mai o ou tamaivae. Sa ou tilotilo atu i lalo ma vaaia ai e le o se laau talatala ae o se akarava. A o faamautu mai e lo’u mafaufau le akarava ma ou iloa ai le mea lea ua tupu, na amata ona sosolo mai le tiga o le ū mai lo’u vae e oo mai i luga o lo’u vae atoa. Sa ou uu mau lo’u vae e taumafai e taofi le tiga matuitui mai le sosolo a’e i luga, ma sa ou faataio mo se fesoasoani. Sa taufetuli mai o’u matua mai le tolauapiga.
A o sasa mate e lo’u tama le akarava i se suo, sa taumafai ma le toa se uo matua sa matou tolauapi faatasi e mimiti mai le ‘ona mai lo’u vae. I lea taimi, sa ou manatu ai o le a ou oti. Sa ou tagi masusu a’o siiina atu a’u e o’u matua i se taavale ma faanatinati ese atu loa mai le toafa ma agai atu ai i le falemai pito i lata ane, lea e lua itula le mamao. Sa matuai ogaoga le tiga o lo’u vae, ma i lena malaga atoa, sa ou faapea lava o le a ou oti.
Peitai, ina ua matou taunuu mulimuli ane i le falemai, sa mafai ona faamautinoa mai e le fomai ia i matou e na o tamaiti laiti ma tagata e le lava le malosi mai meaai paleni, e faamata’uina i le oti e le ū a lea ituaiga o akarava. Sa ia faia so’u tui, lea na gase ai lo’u vae ma aveesea ai lagona uma o le tiga. I totonu o le 24 itula, ou te le i toe lagonaina lava ni aafiaga mai le ū a le akarava. Ae sa ou aoaoina ai se lesona maoae.
Ua ou iloa ai ina ua ta’u mai e o’u matua e fai ou seevae fafao, la te le’i fai mai o seevae tosotoso; sa lava lo’u matua e iloa ai e le mafai e seevae tosotoso ona aumaia le puipuiga lava lea e tasi e pei ona aumai e seevae fafao. Ae o lena taeao i le toafa, na ou le faaaogaina ai le mea na ou iloa e sa’o. Sa ou le amanaiaina le mea na aoao mai pea e o’u matua ia te au. Sa ou paie ma sa ou fouvale teisi foi, ma sa ou totogia ai le tau mo lena mea.
A o o’u talanoa atu ia te outou alii talavou faamaoni, o o outou tamā, faiaoga, taitai, ma uo, ou te faamalo atu ia i latou uma o loo tauivi ma le filiga e avea ma tagata e finagalo le Alii e avea ai outou. Ae ou te molimau atu mai lo’u lava aafiaga o se tamaitiiti, ma se alii, o le le faaaogaina o le mea ua tatou iloa e sa’o, pe ala i le paie po o le fouvale, o le a oo mai ai pea taunuuga faataumaoi faaleagaga e le manaomiaina. E leai, e le i lamatiaina lo’u olaga mulimuli ane e akarava, ae na mafua ai le tiga tele ma le atuatuvale ia te au ma o’u matua. Pe a oo mai i le auala e ola ai i le talalelei, e le tatau ona tatou tali atu ma le paie po o le fouvale.
I le avea ai ma tagata o le Ekalesia a Iesu Keriso, ma ē umia le perisitua, ua tatou iloa poloaiga ma tulaga faatonuina ua tatou osifeagaiga ai e tausia. Pe a tatou filifilia se isi ala mai le ala tatou te iloa e sa’o, e pei ona aoaoina e o tatou matua ma taitai, ma e pei ona faamautu mai i o tatou lava loto e le Agaga Paia, e pei lava o le laa atu i le oneone o le toafa i seevae tosotoso nai lo seevae fafao. Ona tatou taumafai lea e faamaonia o tatou uiga paie po o uiga fouvale. Ua tatou ta’u atu ia i tatou lava e leai se mea sese o tatou faia, ma e le afaina lea, ma e leai se mea leaga o le a tupu mai i le faamamulu tasi o le ai uamea. Atonu tatou te faatoafilemuina i tatou i le manatu o loo faia uma foi e isi tagata—pe leaga sili atu—ma o le a tatou le afaina ai lava. I se isi tulaga tatou te faatalitonuina ai i tatou lava o tatou e le aofia i le tulafono ma o lea e le aafia ai i taunuuga o le soligatulafono. O nisi taimi tatou te mumusu ai ma le loto i ai e “usitai tonu”1—e pei ona ta’u mai i le Talai La’u Talalelei—ma ua tatou taofia mai se vaega o o tatou loto mai le Alii. Ona ū ai lea o i tatou.
Ua aoaoina i tatou e tusitusiga paia e faapea “e manaomia e le Alii le loto,”2 ma ua poloaiina i tatou e alofa atu i le Alii ma auauna atu ia te ia ma o “[tatou] loto atoa.”3 O le folafolaga la e faapea “o le a mafai ai ona tatou tutu ma le le pona i luma o le Atua i le aso gataaga” ma toe foi atu ai i Lona afioaga.4
O tagata Aneti-Liae-Nifae i le Tusi a Mamona sa lafoa’ia a latou auupega o le taua ma tanumia maualalo i le eleele, na osifeagaiga e le toe siitaua atu lava i o latou uso. Ae sa sili atu se mea na latou faia nai lo lena. “Ua avea i latou ma nuu amiotonu” aua “ua latou lafoai auupega o lo latou fouvale, ua le toe tau ai ma le Atua.”5 Na matuai atoatoa ma faamaoni lo latou liua lea na latou “le toe liliu ese ai lava.”6
Ae a o le i liua i latou, ia manatua lo latou tulaga sa i ai: sa latou ola i se tulaga na ta’ua e tusitusiga paia o le “matuā fouvale i le Atua.”7 O o latou loto fouvale ua saisaitia ai i latou e ola “i le tofi e leai se fiafia” aua ua latou “o ese foi mai mea a le Atua.”8
Ina ua latou lafoaia a latou auupega o le fouvale, na agavaa ai i latou lava mo le faamalologa a le Alii ma le filemu, ma e tatou te mafaia foi. Na faamautinoa mai e le Faaola e faapea, “Afai foi latou te le faamaaa o latou loto, ma lē faamalō o latou ua ia te au, o le a faaliliuina i latou Ou te faamalolo foi ia i latou.”9 E mafai e oe ma a’u ona talia Lana valaaulia ia “liliu mai ma salamo, ma o mai ia te au ma le loto atoa, ma ou faamaloloina [outou].”10
Ia faatusatusa lenei faamalologa faavavega ma le mea e tupu “pe a tau ufiufi a tatou agasala, pe faamalie lo tatou loto faamaualuga, [po o] lo tatou fia sili le aoga, … e punitia lava le lagi; e tiga le Agaga o le Alii” ma ua tuua ai na o i tatou “e aa i tui, … ma faasagatau i le Atua.”11
Uso e, na o le pau le mea tatou te maua ai le faamalologa ma le toomaga pe a tatou tuu atu i tatou lava i aao o le Fomai Sili, o lo tatou Faaola o Iesu Keriso. E tatau ona tatou lafoai a tatou auupega o le fouvale (ma ua tatou iloa uma lava na auupega). E tatau ona lafoai a tatou agasala, faasausili, ma le faamaualuga. E tatau ona lafoai lo tatou manao e mulimuli i le lalolagi, ma le manao e faaaloalogia ma viia e le lalolagi. E tatau ona tuu lo tatou faasagatau i le Atua ae tuu atu i ai o tatou loto atoa ia te Ia, e aunoa ma se mea e taofia. Ona mafai lea ona Ia faamaloloina i tatou, e mafai ona Ia faamamaina i tatou mai le au oona o le agasala.
“Aua e le i auina mai e le Atua lona Atalii i le lalolagi ina ia faasala i le lalolagi a ia faaolaina le lalolagi ia te ia.”12
Na aoao mai e Peresitene James E. Faust:
“A avea le usiusitai ma a tatou sini, e le toe avea ma se faasoesa; e le toe avea foi ma se maa faalavea aao, ae avea ma se maa e fausia ai. …
“… O le usiusitai e taitai atu ai i le saolotoga moni. O le tele o lo tatou usitai i upu moni faaalia, o le tele lena o lo tatou faasaolotoina.”13
I le vaiaso ua te’a atu na ma feiloai ai ma se toeaina ua 92 tausaga le matua sa i ai i le tele o vaega tetele o le Taua Lona Lua a le Lalolagi. Sa faasaoina mai o ia mai ni manuaga se tolu, o se tasi o ia manuaga e mai se maina na tatao i le eleele na pa i le taavale sa malaga ai, lea na fasiotia ai le avetaavale. Sa ia iloaina, ina ia faasaoina mai se ogaeleele o tao maina, e tatau ona e mulimuli tonu lava i le auala o loo alu ai le taavale lea e i luma o oe. O soo se mimiloga i le itu taumatau po o le agavale e mafai [ona lamatia]—ma o le mea moni lava—e matuai malaia lava.
O loo faaauau pea ona faasino mai e o tatou perofeta ma aposetolo, o taitai ma matua, le auala e tatau ona tatou mulimuli ai pe afai o le a tatou aloese mai se faafanoga tele o o tatou agaga. Ua latou iloa le auala e saogalemu ai mai maina (po o akarava foi), ma o loo latou valaau mai pea ia i tatou ma le le faavaivai e mulimuli atu i o latou tua. E matuai tele lava mailei faataumaoia e taufaasese ai i tatou mai le ala. O le se ese atu i fualaau faasaina, ava malosi, ponokalafi, po o amioga le mama, i luga o initoneti po o taaloga vitio, o le a taitai sa’o atu ai i tatou i se faatafunaga. O le mimilo solo i le taumatau po o le agavale o le ala saogalemu i o tatou luma atu, pe ona o le paie po o le fouvale, e mafai ona faamaonia lona matautia i o tatou olaga faaleagaga. E leai se ’alofaga i lenei tulafono.
Afai ua tatou se ese mai le ala, e mafai ona tatou sui, e mafai ona tatou toe foi mai, e mafai ona tatou toe maua lo tatou olioli ma lo tatou filemu i totonu. O le a tatou iloaina o le toe foi mai i le ala lea ua aveesea ai maina na tatao ai, e oo mai ai se toafilemu tele.
E leai se tasi na te mauaina se filemu i se ogaeleele o tao maina.
O lo tatou Faaola o le Aloalii o le Filemu, o Fomai Sili, ua na o Ia lava lē e mafai ona faamamaina moni i tatou mai le ū o le agasala ma le au oona o le faamaualuga, ma suia ai o tatou loto fouvale i le loto ua liua ma faaosifeagaigaina. O Lana Togiola e lē mafuatia ma e taliaina i tatou uma.
O le valaaulia na tuuina atu ia sa Nifae, ina ua Ia asiasi atu ia i latou o se Keriso Toetu, o loo avea pea ma mea e faamalosia mo oe ma au: “Po ua ia te outou nisi ua mama’i? Au mai ia i latou iinei. Po ua ia te outou ea nisi ua pipili, pe tauaso, pe setu, pe manua, pe lepela, pe mamae, pe tutuli, pe puapuagatia i se tasi mea? Ina aumai ia i latou iinei, ou te faamaloloina i latou.”14
E leai se tasi o outou ua lafoaia o outou avanoa mulimuli. E mafai ona outou sui, e mafai ona outou toe foi mai, e mafai ona outou maua le alofa mutimutivale. O mai ia te Ia, ua na o Ia lava e mafai ona faamaloloina outou, ma o le a outou maua ai le filemu. I le suafa o Iesu Keriso, amene.