“E Le Uma le Alofa”
Thomas S. Monson
President of the Church
Nai lo le faamasinosino atu ma faitioina e le tasi le isi, ia tofu maua e i tatou le alofa mama o Keriso mo i latou o loo tatou malaga faatasi i lenei faigamalaga o le olaga.
Ua olioli o tatou agaga i le po nei ma ua oo atu i le lagi. Ua faamanuiaina i tatou i musika matagofie ma savali musuia. O loo i ai le Agaga o le Alii iinei. Ou te tatalo mo Ana musumusuga ina ia mafutaina a’u i le taimi nei a o o’u faasoa atu ia te outou nisi o o’u mafaufauga ma lagona.
Ou te amata i se talafaatusa puupuu e faapupula ai se manatu ou te fia faasoa atu.
Sa i ai se ulugalii talavou, o Lisa ma Ioane na sii atu i se pitonuu fou. I se tasi taeao a o fai le la tausamiga o le taeao, sa tilotilo atu Lisa i le faamalama ma iloa atu ai lona tuaoi o tautau lana tāgā lavalava.
“E le mama le la tāgā lavalava!” o le tala lea a Lisa. “E le iloa e lo tatou tuaoi le auala e faamama ai lavalava!”
Sa tilotilo atu i ai Ioane, ae sa leai se tala.
O taimi uma lava e tautau ai se tāgā lavalava a lona tuaoi e faalala, o le tala lava lea a Lisa.
Na mavae ni nai vaiaso, sa faate’ia Lisa ina ua autilo atu i lona faamalama ma vaaia ai se tāgā lavalava mama manaia o tautau i le lotoa o lona tuaoi. Na ia fai atu i lona toalua, “Vaai Ioane—o le la faatoa na iloa nei le auala e tatā sa’o ai! Pe na faapefea ona ia faia?”
Sa tali atu Ioane, “E te iloa oe la’u pele, ou te iloa le tali. Na ou alapo nei i le taeao ma fufulu a ta faamalama!”
Ou te fia faasoa atu i le po nei ni nai mafaufauga e faatatau i le ala tatou te vaai atu ai le tasi i le isi. Pe o tatou tilotilo atu i se faamalama e manaomia ona tatou fufuluina? Pe o tatou faia ea ni faamasinoga ae le o ia i tatou mea moni uma e faamaonia ai? O le a le mea tatou te vaaia pe a tatou tilotilo atu i isi? O a faamasinoga tatou te faia e uiga ia i latou?
Na fetalai mai le Faaola, “Aua tou te faamasino atu.”1 Na Ia faaopoopo mai, “Se a le mea e te vaai atu ai i si fasilaau i le mata o lou uso, a e te le iloa e oe le utupoto i lou lava mata?”2 Po o le, i se isi faaupuga, o le a le mea e te vaai atu ai i le mea e manatu o se taga lavalava palapala i le fale o lou tuaoi, ae e te le vaai oe ia i le faamalama palapala o lou lava fale?
E leai se tasi o i tatou e atoatoa. Ou te le iloa se tasi o le a faapea mai e atoatoa. Ae e i ai lava se mafuaaga, tusa lava po o a o tatou le atoatoa, e i ai so tatou uiga e faasinosinolima ai i faaletonu o isi tagata. Tatou te faia faamasinoga o a latou taga fai po o mea foi e le faia.
E matua leai lava se auala e mafai ai ona tatou iloa le loto, o faamoemoega, po o tulaga o siomia ai se tasi e ono faia se tala pe faia se mea ua tatou manatu e faitioina ai. O le mea lea, o le poloaiga, “Aua e te faamasino atu.”
E atoa i le Konafesi Aoao lenei le fasefulufitu tausaga, talu ona tofia au i le Korama a Aposetolo e Toasefululua. O le taimi lena, sa ou galue ai i se tasi o komiti aoao o le perisitua o le Ekalesia ma o lea, a’o lei tuuina atu lo’u igoa, sa ou nofo ai faatasi ma uso o lena komiti o le perisitua, e pei ona tatau ai mo au. Peitai, sa matua leiloa e lo’u toalua po o fea o le a alu e nofo ai ma sa leai se tasi e mafai ona alu i ai la te nonofo, o le mea moni, sa na le mauaina se nofoa e nofo ai i totonu o le Tapeneko. Sa i ai se ma uo pele, o se sui auai o se tasi o le aufaatonu aoao o se tasi o ausilali, sa nofo i le itu na atofa mo sui auai o le aufaatonu, na ia fai atu ia Sister Monson e nofo i ona tafatafa. Sa matuai le iloa e lenei tamaitai se mea e uiga i lo’u valaauga—lea o le a le pine ona valaauina lea—ae na ia iloa atu Sister Monson, ma na ia silafia lona popolega, ma sa ia ofoina atu ai ma le agalelei sona nofoa. Sa mapu ifo ma le agaga faafetai si o’u toalua pele mo lenei ofo agalelei. Ae, ina ua nofo ifo o ia i lalo, sa ia faalogo atu i se musumusu leotele i ona tua, a o faaali atu e se tasi o sui auai o le aufaatonu ia i latou sa i ona autafa lona le fiafia, i le le mafaufau o se tasi o le aufaatonu ma lona valaauliaina o se “tagata ese” e nofo i le nofoaga ua atofa mo na o i latou. Sa leai se ‘alofaga o lana amio lē alofa, tusa lava po o ai na valaaulia e nofo ai iina. Peitai, e mafai ona ou iloa lagona o lena fafine ina ua ia iloaina o le “tagata ese” o le faletua o le aposetolo aupito fou.
E le gata ina tatou faamasinoina taga fai ma upu a isi, ae o le toatele o i tatou e faamasinoina foliga vaaia: o lavalava, o teuga o lauulu, lapopoa. E le muta lava le lisi.
O se faataitaiga lelei lava o le faamasinoina o foliga vaaia, sa tusia lea i se mekasini faaleatunuu i le tele o tausaga ua mavae. O se tala moni lava—atonu ua outou faafofoga i ai ae e tatau lava ona toe faamatala.
O se tamaitai e igoa ia Mary Bartels sa i ai sona fale e faafesagai tonu lava ma le magaala e ulufale atu ai i se falemai. Sa nonofo lona aiga i le fogafale autu ae faaaoga ia potu i le fogafale i luga e mautotogi ai tagata mama’i e tausavali atu i le falemai.
I se tasi afiafi na tu atu ai i le faitotoa se toeaina e matuai lē tautagatā lava foliga, ma fesili pe i ai se potu mo ia e moe ai i le po. E faano’uno’u ma maanuminumi, ma sa le gatusa ona foliga ona e fulafula—e mūmū totototo. Fai mai a ia sa fiu e saili se potu mai lava i le aoauli ae le’i manuia. “Masalo ai ona o o’u foliga,” o lana tala lea. “Ou te iloa e mataga, ae fai mai lo’u fomai atonu lava e mafai ona faaleleia atili pe a mavae nisi togafitiga.” Sa ia faailoa atu o le a fiafia lava e moe i luga o le nofoa faalue i le poletito. A o talanoa atu Mary ia te ia, sa ia iloaina e matua telē naua le loto o lenei toeaina e le ofi i si ona tamai tino. E ui lava sa tutumu uma potu o lona fale, ae sa ia fai atu ia te ia e faatali i le nofoa ae se’i alu e vaai se mea e moe ai.
Ina ua oo i le taimi e momoe ai, sa faatu e le toalua o Mary se moega tolauapi mo le toeaina. Ina ua ia siakiina i le taeao, ua uma ona gaugau lelei ieafu a o la ua nofonofo i le poletito. Sa lei fia tausami o ia i le taeao, ae ina ua oo i le taimi e alu ai e faatali lana pasi, sa ia fesili pe mafai ona toe foi mai i le isi taimi e fai ai ona togafitiga. “O le a ou le faasaulalala lava,” na ia folafola atu ai. “E mafai lava ona ou moe i luga o se nofoa.” Na faamautinoa atu e Mary ia te ia e talileleia lava o ia pe a toe sau.
I le tele o tausaga sa alu ai o ia mo ona togafitiga ma nofo i le fale o Mary, e aveina ai lava e lenei toeaina ni meaalofa o taumafa mai le sami aua o ia o se faifaiva, po o ni fualaau taumafa mata mai lana faatoaga. O nisi taimi na te auina atu ai ni afifi i le meli.
A mauaina e Mary nei meaalofa mai le loto, e tele ina mafaufau o ia i se faamatalaga na faia e lona tuaoi ina ua tuua e le toeaina faano’uno’u ma foliga mataga le fale o Mary i le taeao muamua lava. “Na moe i lou fale anapo le tamaloa foliga mataga la le? Na ou tulieseina. E mafai ona le toe o mai ni au malo pe a e taliaina ituaiga tagata faapena.”
Sa iloa e Mary atonu pe ua faatasi pe faalua ona le o mai ni a latou malo, ae sa ia mafaufau, Oi, maimau e pe ana mafai ona latou iloaina o ia [le toeaina] atonu semanu ua faigofie atu ona latou onosaia o latou gasegase.
Ina ua maliu le toeaina, sa asiasi atu Mary i se uo e i ai sona fale o laau toto. A o tilotilo atu o ia i fua o laau a lana uo, sa ia matauina se italia samasama matagofie, ae sa le mautonu o ia ona sa ola i totonu o se pakete omoomo, tuai, ma elea. Sa faamatala e lana uo, “Ua le lava ipu e toto ai, ma i lo’u iloa ai e matagofie tele lenei laau, o lea sa ou mafaufau ai o le a le afaina lava pe a amata ona ola i lenei pakete tuai. O le a mo na o sina taimi itiiti lava, seia oo ina mafai ona ou tuuina i le togalaau.”
Sa soisoi Mary a o manatunatu i se vaaiga faapea i le lagi. “Ua faapitoa lava le matagofie o lea,” atonu na faapea le Atua ina ua oo atu i le agaga o lenei toeaina. “O le a le afaina lava ia te ia pe a amata i lenei tama’i tino, lē atoatoa i le taimi nei.” Ae, ua leva lena taimi, ma i le faatoaga a le Atua ai lava se maualuga o le tu a lenei agaga matagofie!”3
E mafai ona matua taufaasese lava ia foliga vaaia, e pei o se foliga mativa o se tagata. Na apoapoai mai le Faaola, “Aua le soona faamasino a ia faamasino i le faamasinoga tonu.”4
Sa faitio se sui auai o se faalapotopotoga a tamaitai ina ua filifilia se tasi tamaitai e avea ma sui o le faalapotopotoga. E le’i feiloai muamua o ia i lea tamaitai, ae na vaai o ia i ata ma sa le’i fiafia i le mea na ia vaai i ai, ma fai mai e lapo’a tele. Fai mai lana tala, “I le fiaafe o fafine o lenei faalapotopotoga, e mautinoa lava e i ai se isi sui e sili atu sa mafai ona filifilia.”
E moni, o le fafine na filifilia e le “manaia sona fuaitino.” Peitai, o i latou na iloaina o ia ma iloa ona uiga auau mama, e matua tele atu ni mea sa latou vaaia nai lo mea sa faaalia i le ata. Na faaali i le ata e laufofoga fiafia ma e i ai foliga o le mautinoa. O le mea e le’i faaalia i le ata o ia o se uo lotonuu ma le agaalofa, o se tamaitai atamai e alofa i le Alii ma fiafia e tautuaina Lana fanau. E le’i faaalia ai o ia sa ofofua atu i le nuu, ma sa o se tuaoi mafaufau ma popole mo isi. A faapuupuu, e le’i faaalia mai i le ata lona tagata moni.
Ou te fesili atu: pe a na fai na faaalia galuega ma faamoemoega faaleagaga i foliga faaletino, pe mata e tutusa foliga o le fafine na faitio ma le matagofie o le tamaitai lea na ia faitioina?
O’u tuafafine pele, e tulaga ese outou taitoatasi. E tele itu e ese ai oe mai i isi. E i ai nisi o outou ua faaipoipo. O nisi o outou ua nonofo i le fale ma a outou fanau, a o isi o outou e faigaluega. O nisi o outou ua le o toe i ai se fanau i le fale. E i ai nisi o outou ua faaipoipo ae leai se fanau. E i ai nisi o outou ua tatala faaipoipoga, o nisi ua maliliu tane. O le toatele o outou e nofofua. O nisi o outou ua maua faailoga mai i iunivesite, o nisi e leai. E i ai nisi e gafatia tifiga faanei ona po ma i latou ua laki ua maua se laei talafeagai mo le Aso Sa. O na eseesega e toetoe lava ina leai se mutaaga. Pe faaosoosoina ea i tatou e faamasino atu ai e le tasi le isi ona o nei eseesega?
Na saunoa Mother Teresa, o se tamaitai sā Katoliko sa galue i tagata matitiva i Initia i le tele o lona soifuaga, i lenei upumoni maoae: “Afai e te faamasinoina tagata, ua leai sou taimi e te alofa ai ia te i latou.”5 Na apoapoai mai le Faaola, “O la’u poloaiga lenei, ia outou fealofani, pei ona ou alofa atu ia te outou.”6 Ou te fesili atu: pe mafai ona tatou fealofani, e pei ona poloai mai le Faaola, pe afai tatou te faamasino atu o le tasi i le isi? Ma ou te tali atu—faatasi ma Mother Teresa: leai, e le mafai.
Na aoao mai e le Aposetolo o Iakopo, “Ai se tasi … o outou e manatu ifo o ia o le tagata amio Atua, ae le taofi i lana upu, a e faaseseina e ia lona lava loto, ua le aoga le amio Atua a lea tagata [po o lea tamaitai].”7
Ou te fiafia pea i le mautauave a la outou Aualofa: “E le uma le alofa.”8 O le a le alofa? Ua aoao mai e le perofeta o Mamona ia i tatou e faapea “o le alofa o le alofa mama lea o Keriso.”9 I lana savali faamavae atu i tagata sa Lamana, na tautino atu ai e Moronae, “Afai ua le ia te outou le alofa, e le mafai lava ona faaolaina outou i le malo o le Atua.”10
Ou te manatu o le alofa—po o le “alofa mama o Keriso”—o le faafeagai lea o le faitio ma le faamasino atu. I lo’u talanoa atu la i le alofa, ou te le mafaufau i lenei taimi i le faamama avega atu i e mafatia e ala i le foai atu o a tatou oloa. E moni lava, ua tonu ma ua tatau ai lena mea. Peitai, o le po nei, ua ou mafaufau i le alofa lea e faaalia ia lava, pe a tatou onosa’ia isi ma faapalepale i a latou taga fai; le ituaiga alofa e faamagalo atu; le ituaiga alofa e onosai.
Ua ou mafaufau i le alofa e uuna’ia ai i tatou ia tigaalofa, agalelei ma alolofa mutimutivale, e le gata i taimi e mama’i ai ma puapuagatia ma faanoanoa, ae o taimi foi e vaivai ai ma sese isi.
O loo i ai se tulaga manaomia tele o le alofa lea e gauai atu ai ia i latou e le amana’ia, o le faamoemoe ia i latou ua lotovaivai, fesoasoani ia i latou ua puapuagatia. O le alofa moni lava o le alofa faatino. Ua i ai i soo se mea le manaomia o le alofa.
Ua manaomia le alofa e musu e faamalieina i le faalogo atu po o le saga faia o lipoti o mafatiaga e oo mai i isi, sei vagana ai o le faia o lena mea e manuia ai le sa mafatia. Na ta’ua e se faitofa ma se tamalii o upu fai o Horace Man, “O le mafaufau alofa i lē ua mafatia o se uiga faaletagata; o le saili e faamafanafana i lē ua mafatia o se uiga faale-Atua.”11
O le alofa o le onosai lea i se tasi ua mafua ai ona tatou lē fiafia; o le teena lea o le lagona ia itaitagofie. O le taliaina lea o vaivaiga ma faaletonu. O le taliaina o tagata i o latou tulaga moni o i ai. O le faasēloa o le vaai i luga atu o le vaaiga faaletino, i uiga faaleatua e le mu itiiti i le gasologa o le olaga. O le teena lea o le lagona e tuufaavasega isi.
O le alofa, o le alofa mama lena o Keriso, ua faaalia pe a malaga se vaega o tamaitai talavou mai se uarota o talavou nofofua i le fiaselau maila e auai i se sauniga o le falelauasiga mo se tina o se tasi o o latou uso i le Aualofa. E faaalia le alofa pe a saga foi atu pea lava pea ia faiaoga asiasi tuuto, i lea masina ma lea masina, i lea tausaga ma lea tausaga i le tuafafine lava lea e tasi e le fia naunau mai. E iloagofie lava pe a manatuaina se fafine matua ua oti lana tane ma ave o ia i gaoioiga a le uarota ma gaoioiga a le Aualofa. E lagonaina pe a maua e le tuafafine o loo nofonofo na o ia i le Aualofa le valaaulia, “Sau—tatou nonofo.”
I le fiaselau o nai mea iti, e faailoa atu ai e outou uma le alofa. E leai se tasi o i tatou e atoatoa i lenei olaga. Nai lo le faamasinosino atu ma faitioina e le tasi le isi, ia tofu maua e i tatou le alofa mama o Keriso mo i latou o loo tatou malaga faatasi i lenei faigamalaga o le olaga. Ia tatou iloa o loo faia e tagata taitoatasi le mea sili na te mafaia e taulimaina ai luitau la te feagai, ma ia tatou taumafai e faia le mea sili tatou te mafaia e fesoasoani ai.
Ua faauigaina le alofa “o le ituaiga alofa e aupito sili ona maualuga, tamalii, ma malosi,”12 o le “alofa mama o Keriso … ; o i latou uma foi ua maua ua i ai lea alofa i le aso gataaga, e lelei ia te [ia].”13
“E le uma le alofa.” Ia avea lenei mautauave ua loa a le Aualofa, lenei upumoni faavavau, e taialaina ai outou i mea uma tou te faia. Tau ina ia faatumulia ai o outou agaga ma ia faatinoina i o outou mafaufauga uma ma mea e fai.
Ou te momoli atu o’u alofaaga mo outou, o’u tuafafine e, ma tatalo ina ia tumau faamanuiaga a le Lagi ia te outou. I le suafa o Iesu Keriso, amene.