Ou Te Manao e Faatasi ma Oe e Faavavau!

Saunia e Leongina Adamés de Ubrí

E alala le tusitala i Santiago, Dominican Republic.

O le faatuatua a se afafine e ono tausaga le matua na fesoasoani ia te au e toe maua lou faatuatua.

Ina ua atoa le 22 o ou tausaga, sa tupu se mea e lei mafaufauina i lou olaga: sa maliu lou tina. O ia ma lou tama o ni tagata o le faatuatua maoae, ma sa laua tausia au i le talalelei. Ina ua mavae lona maliu, sa masii ese atu lou tama mai lo matou atunuu i le Iunaite Setete. A o faagasolo le taimi, sa amata ona ou lagona le tuuatoatasi talu ai na o au le tama a ou matua. E lei i ai lou tina ma au i le lalolagi, ma o lou tama sa mamao le mea sa nofo ai; sa na o le tolu vaiaso ou te vaai ai ia te ia i le tausaga.

Faatasi ai ma na lagona, sa amata ai ona faateleina lou saili mo le taliaina i au “uo” mai le kolisi ma mai le ofisa lea sa ou galue ai. I se taimi puupuu, sa ou amata ai ona maua le fiafia sese i mea faaletino. Sa taofia lou auai i le lotu, ma sa amata ona faasolosolo ina ou le toe malosi. Mulimuli ane, sa ou faaipoipo atu i se alii lelei o le, e ui sa ia te ia ni mataupu faavae lelei tele, ae sa lei iloaina se mea e uiga i le talalelei. Sa ma maua ni fanau e toatolu: o Lea, Isaako, ma Isamaeli.

Ata

Mother and daughter

Ata na tusia e Kelley McMorris

I se tasi taimi ia Oketopa, sa sau ai lou tama e asiasi mai ma vaai i le pepe fou. I le taimi o lana asiasiga, sa fesili ai Lea e ono tausaga i lona tamamatua pe aisea na te le avatua ai lava tinamatua faatasi ma ia. Ona faamalamalama lea e tama ia te ia o Tinamatua o loo i ai i se nofoaga faapitoa e latalata i le Tama Faalelagi. O le taimi lava na alu ese ai lou tama, sa malosi le fai mai o Lea ia te au, “Tina, ou te fia feiloai ia Tinamatua. Ou te iloa o loo i ai o ia i le lagi, ae ou te manao foi ia tatou i ai iina faatasi i se aso—o Tinamatua ma Tamamatua, Tama, Isaako, Isamaeli, ma oe, ma au. Ou te manao e faatasi ma oe e faavavau. Ou te manao ia i tatou ia avea o le aiga e tasi i le lagi e pei ona tatou i ai i le lalolagi ina ia mafai na tatou taaalo faatasi ma Tinamatua!”

Ou te lei iloa le tala e fai atu. Sa ou pai atu i ona foliga aulelei, ma le mama, ma savali atu i lou potumoe. Sa ou faapau ifo i ou tulivae ma tagi ai seia uma ou loimata. Sa ou ole atu i le Tama Faalelagi mo le faamagaloga. Sa ou iloa sa ou tuua le auala lea e faataga ai i tatou e nonofo faatasi o se aiga e faavavau. Sa ou toilalo i lou tiutetauave e taitai i latou i le auala sao, ma sa ou toilalo e talanoa atu i lou toalua e uiga i le talalelei.

Ina ua mafai ona ou tu i luga, sa ou faafesootaia se taitai faaleEkalesia, ma tuu au e fesootai ma toeaina o lau uarota. O le po na sosoo ai, sa latou o mai ai ma aoao lou toalua. Mai lena po, sa suia o matou olaga e faavavau. O le taimi nei ua matou auai i aso Sa uma o se aiga. O loo ia te au se valaauga e mafai ai e au ona fesoasoani i uso e le toaaga mai. O loo matou sauni foi e auai atu i le malumalu.

O nisi taimi, e taiala i tatou e le Agaga o le Atua i na tagata e itiiti lo tatou faamoemoeina. O le taimi lea sa tupu e ala i lau tama teine e ono tausaga le matua. Ou te iloa e ala i le faamauina i le malumalu, e mafai ona ou ola faatasi ma lou aiga e faavavau.