Auala e Faasoa atu ai le Talalelei

Saunia e Elder M. Russell Ballard

O Le Korama a Aposetolo e Toasefululua

Mai se saunoaga i le konafesi aoao ia Aperila 2000.

E le tatau ona tatou faatoese atu mo o tatou talitonuga pe fetuutuunai mea ua tatou iloa e moni. Ae e mafai ona tatou faasoa atu i le agaga o le malamalama alofa—lototoa ma le mautinoa, ma le taulai tasi atu i le mamalu o le Atua—e aunoa ma le faamamafa atu i o tatou tagata faalogologo pe lagona ua tatou toilalo i lo tatou tiute pe afai ua latou le taliaina i se taimi vave mea ua tatou talitonu i ai.

Afai tatou te mauaina le mafutaga a le Agaga Paia, ona mafai lea ona tatou faia ni mea faigofie e fesoasoani e faamalamalama atili atu ai le talalelei i olaga o tagata ua le o toe toaaga mai a le Ekalesia faapea foi ma i latou e le auai i la tatou tapuaiga. E le manaomia nisi polokalama fou e faia ai lenei mea. Tatou te le manaomia se tusitaulima po o se valaauga po o se fonotaga faaleaoaoga. Na pau le mea e manaomia o le aoao o tagata lelei o le Ekalesia ina ia faalagolago i le mana o le Agaga Paia ma, faatasi ai ma lenei mana, aapa atu ma pai atu i olaga o fanau a lo tatou Tama. E leai se auaunaga sili ona maoae e mafai ona tatou tuuina atu nai lo le faasoa atu o a tatou molimau patino ma i latou o e leai se malamalamaaga e uiga i le talalelei toefuataiina a Iesu Keriso.

O lea la, uso e ma tuafafine, ua tatou saunia e faia se mea? E mafai e i tatou taitasi ona filifili i le aso e faateleina la tatou lava sauniuniga faaleagaga e ala i le sailia o le taitaiga a le Agaga Paia ona, faatasi ai lea ma Lona mana o le avea ma a tatou soa, faamanuia atili fanau a lo tatou Tama ma se malamalamaaga ma le atamai e moni le Ekalesia?

Ou te molimau atu o loo soifua le Faaola ma o le a Ia faamanuiaina i tatou taitoatasi pe afai o le a tatou faia mea uma e mafai ona tatou faia e uunai ai i luma lenei galuega maoae o Lana Ekalesia. Tau ina ia taitasi i tatou ma filifili ia faia nisi mea se tele.