Mataupu Faavae Faavaloaga o le Faamaoni
Saunia e Elder C. Scott Grow
O Le Fitugafulu
Mai se saunoaga i le faigalotu, “Where Will You Be in 20 Years? [O Fea o le a E I Ai i le 20 Tausaga?]” na tuuina atu i le Iunivesite o Polika Iaga–Idaho i le aso 15 Me, 2012. Mo le tusiga atoa i le gagana Peretania, alu i le web.byui.edu/devotionalsandspeeches.
O a ni faaiuga ma tautinoga e tatau ona e faia i le taimi nei ma le lumanai o le a fesoasoani e te tumau faamaoni ai?
Ua silia ma le 20 tausaga ua mavae, na faamaeaina ai lau auaunaga o se peresitene o le misiona i Amerika i Saute. Sa ma vaaia ma lou toalua o, Rhonda, ni taimi matagofie o le olioli faapea foi ma mafatiaga faavauvau i olaga o a maua faifeautalai i le 20 tausaga mai lena taimi.
O le toatele lava o a maua faifeautalai ua faamauina ma le fiafia i le malumalu, tausia ni fanau amiotonu ma auina atu i latou i ni misiona, ma auauna atu ma le faamaoni i ausilali a le Ekalesia ma valaauga o le perisitua. Ae peitai, o nisi, ua le o toe toaaga mai, o nisi na faaipoipo ma ua toe tetea, ma o nisi ua tape igoa mai le Ekalesia.
O le a le mea na faia le eseesega i olaga o a maua faiafeautalai na i ai? O le a se mea e ono ese se faiga e nisi o i latou e aloese mai ai i faanoanoaga faaletagata lava ia? Ae a oe? O fea o le a e i ai i le 20 tausaga? O a ni faaiuga ma tautinoga e tatau ona e faia i le taimi nei ma le lumanai o le a fesoasoani e te tumau faamaoni ai?
Ou te fautua atu ni mataupu faavae e 10 lea o le a fesoasoani ia te oe.
1 Faaauau Pea ona Fafagaina Lau Molimau
O aafiaga ua faatumulia e le Agaga lea e tupu i se misiona e faatulagaina ai se faavae o le faatuatua lea e mafai ona faamanuiaina ai oe i lou olaga atoa. O lena faavae o le faatuatua ua na o le faatamala po o le agasala e mafai ona faavaivai ai.
Talu ai nei sa ou faatalanoaina ai se faifeautalai ua toe foi mai ua le o toe toaga ma sa tautino mai ua leai sona faatuatua. Sa ou fesili atu ia te ia pe o ia tatalo ma faitauina le Tusi a Mamona e pei ona sa ia faia ao faifeautalai. Sa ia fai mai na te le o faia ona ua leai sona faatuatua ia Iosefa Samita.
Sa musuia a’u e fai atu le fesili lenei: “O e matamata i ata ponokalafi?” Sa ia tali mai ioe. Sa ou fai atu ia te ia e leitioa ua leiloa ai lana molimau.
Sa ou tau atu i ai o se molimau o le Agaga Paia lea o loo molimau mai i o tatou agaga e uiga i le moni o le talalelei ma le Ekalesia toefuataiina. A tatou le tatalo ma suesue i tusitusiga paia, o le a faavaivaia le faatosinaga a le Agaga i o tatou olaga, ma faavaivai ai lo tatou tetee atu i faaosoosoga. A tatou agasala ma ua le mama, ua tatou le mauaina atoa le mafutaga a le Agaga Paia. A aunoa ma le molimau faifaipea a le Agaga, o le a faigofie ona amata ona tatou faapea ifo e leai sa tatou molimau ma masalo e lei i ai lava.
E tatau ona faaauau pea ona fafagaina la tatou molimau. O lena fafagaina e sau mai le tatalo a le tagata lava ia, suesue i tusitusiga paia i aso uma—aemaise lava le Tusi a Mamona—ma auauna atu i le Ekalesia i lo tatou olaga atoa.
2 Mulimuli i le Fautuaga a Perofeta ma Aposetolo Soifua
O le a ou toe faamanatuina atu ni fautuaga faavaloaga lea e mafai ona fesoasoani ia te oe ina ia maua se faaipoipoga fiafia, se aiga faamaoni, ma se olaga faamanuiaina. Ou te faatatau atu i le “O Le Aiga: O Se Folafolaga i le Lalolagi.” O le a ou faasoaina atu nisi o vaega taua o lena folafolaga, lea na lolomia ma faasalalauina atu e le Au Peresitene Sili ma le Korama a Aposetolo e Toasefululua i le 1995. Tatou te lagolagoina nei Uso o ni perofeta, tagata vaai, ma tali faaaliga. O i latou o fofoga taumomoli mo le Atua i Lana fanau i le lalolagi.
I le aso na toefuataina ai le Ekalesia, sa fetalai atu le Atua e faatatau i Lana perofeta, faapea atu “O lana upu ia outou talia, e pei lava ua mai i lou lava gutu, i le onosai ma le faatuatua atoa.” Ona folafola mai lea e le Alii o faamanuiaga faaletino ma faamanuiaga e faavavau pe a tatou mulimuli i le fautuaga a perofeta: “Aua o le faia o nei mea o le a le manumalo ai faitotoa o seoli ia te outou; ioe, a e tafieseina e le Alii le Atua le malosi o le pogisa mai o outou luma, ma luluina le lagi mo lo outou lelei, atoa ma le mamalu o lona suafa (MF&F 21:5–6).
O se faamanuiaga matagofie lea i nei taimi faigata.
3 Ia Faamauina i le Malumalu Ma Tausi Au Feagaiga
LUGA: ATA NA PUEINA I FAFO O LE MALUMALU O MANILA FILIPAINA
Ua folafola mai e perofeta, tagatavaai, ma talifaaaliga “o le faaipoipoga i le va o se alii ma se tamaitai ua faauuina e le Atua ma o le aiga e totonugalemu i le fuafuaga a le Foafoa mo le taunuuga e faavavau o Ana fanau. Sa latou faaopoopo mai: “O le fuafuaga paia o le fiafia, ua mafai ai ona faaauau fegalegaleaiga faaleaiga i tala atu o le tuugamau. Ua mafai i sauniga paia ma feagaiga ua maua i malumalu paia ona toe foi atu ai tagata taitoatasi i le afioaga o le Atua ma toe faatasia ai aiga e faavavau.”1
O le filifiliga sili ona taua e te faia i le olaga “o le faaipoipo lea i le tagata sao, i le nofoaga sao, e ala i le pule sao”2 ona tausia lea o au feagaiga o le malumalu. E leai se faaeaga e aunoa ma se faamauga faalemalumalu.
Ina ia agavaa mo le faaeaga, e tatau ona ulu atu ia ulugalii i le “feagaiga fou ma faavavau, ma e [tatau ona] faamauina i luga o i laua e le Agaga Paia o folafolaga, e ala mai ia te ia o le ua faauuina”—o le perofeta [soifua]. Afai tatou te tausia a tatou feagaiga o le malumalu, o le a tatou “mautofi i nofoalii, malo, itumalo, ma mana, ma puleaga, o mea maualuluga uma ma loloto … ma mamalu i mea uma, … o le mamalu lea o le atoatoaga ma le faaauauina o fanau e faavavau ma faavavau lava” (MF&F 132:19; tagai foi i le fuaiupu e 7).
O loo aofia i se faamauga o le malumalu se folafolaga o faamanuiaga faavavau i le isi olaga ma e faateleina ai le avanoa o se faaipoipoga fiafia i lenei olaga. I le avea ai ma se atalii po o se afafine faapaiaina a le Atua, ua e osi feaigaiga e sau i le lalolagi i lenei vaitaimi e fausia le malo o le Atua. O lena fausiga o le malo e aofia lau lava faaipoipoga i le malumalu.
4 Faipaaga ma le Atua i le Aumaia o Ana Fanau Agaga i le Lalolagi
Ua tau mai e le folafolaga: “O le uluai poloaiga na tuuina e le Atua ia Atamu ma Eva, e faatatau i lo la agavaa mo le tulaga faamātua, o se tane ma se ava. Matou te ta’utino atu o le poloaiga a le Atua i Lana fanau ia fanafanau ma uluuluola i le lalolagi, ua faamalosia ma faatumauina.”
O aiga i nei vaitaimi ua toalaiti atu nai lo le le augatupulaga ua mavae atu—e oo lava i aiga a le AAG. E mafai lava pea ona tatou sailia ni mafuaaga e fetuunaia ai le tolopoina po o le faaitiitia o le aofai o tamaiti ua tatou maua. Mo se faataitaiga, “E tatau ona tatou faauu muamua” po o le “E tatau ona tatou maua se galuega sili atu ina ia tele atili ai a tatou tupe” po o le “Aisea o le a aveesea ai le manaia o le faaipoipoga i le i ai o ni tamaiti?”
Ua faamanuiaina oe i se molimau o le talalelei toefuataiina a Iesu Keriso. Ua e maua faamanuiaga o le faavavau e ofa atu i lau fanau. Aua e te faamamafaina le manatu faapea e tatau ona e saunia mea uma faaletino. O le meaalofa silisili e te ofaina atu i lau fanau o le mauaina lea o mea uma faaleagaga i le malo o le Atua.
A lua fefautuaai ma le agaga tatalo ma lou toalua e uiga i le mauaina o se fanau, ia manatua o oe o le talavou tautupu. Faamolemole aua le faagaloina le Atua mai au faiga filifiliga. Faasoa atu lena aia tatau e fanau ai ma le toatele o atalii ma afafine agaga ao sauni le Atua e auina atu i lou aiga. Aua o le mea moni lava, o nei fanau o Ana fanau ia ao lei avea ma au fanau.
O le i ai o le faatuatua i le Atua ma Ana afioga faavaloaga, agai i luma e aunoa ma se alofaga po o le le mautonu ma fatu sou lava aiga e faavavau.
5 Aua Nei Aafia i Ponokalafi po o Nisi Amioga Le Mama
Ua faaauau pea le folafolaga, “Ua i ai i fanau le aia e fananau mai ai i totonu o noataga o le faaipoipoga a ni matua, ma ia tausi ae e se tama ma se tina o e e faamamaluina tautoga faaleulugalii ma le faamaoni a’ia’i atoa.”
O le faamaoni a’ia’i o lona uiga o le faamaoni faaletino faapea foi ma le faalelagona i lou toalua. O fegalegaleaiga faaponokalafi ma luga o le initoneti o ni faataitaiga ia o le le faamaoni a’ia’i faalelagona. Afai ae gauai atu se tane po o se ava i ponokalafi, ua ia solia se talitonuga paia o le natura sili ona taua. Ua lagona e le toalua o loo nofomama le faalataina. O le a faaleagaina le taitonuga ma le faatuatuaga i le faaipoipoga. O le taunuuga o ponokalafi o le mulilua lea.
Ou te faasoa atu ni lagona mai se tama o le na faamauina i le malumalu ae na maumau lona aiga ona o ponokalafi ma se fegalegaleaiga i luga o le initoneti ma se tamaitai. Ma le faanoanoa sa ia tusi ai: “Ou te lei usitaia upu na tuuina mai ia te a’u i lo’u faamanuiaga faapeteriaka, lea na tau mai ai e leai se mana ia Satani i lo’u olaga sei vagana ai ua ou tuuina atu ia te ia. Sa ou tuuina atu ia te ia, ma sa ia aveina lemu ma le mautinoa ma faaaogaina lena mana e faatamaia ai lo’u olaga ma lo’u toalua ma la’u fanau. Sa ou alofa ia i latou ma lo’u loto atoa ma o loo ou alofa pea ia i latou ma e le mavae lou alofa i ai, ae sa le lava lena alofa e faatoilalo ai le mana sa ou tuuina atu ma le malie i ai ia Satani e faatamaia ai lo’u olaga. Ua saunia [mo i tatou] e aoaoga a le Ekalesia se auala e toe foi atu ai o se aiga ua faamauina mo le olaga nei ma le faavavau atoa i lo tatou Tama Faalelagi, pe ana ou faalogo lava ma usitaia, ae i le iuga lava ou te lei usitai.”
E maeu lea mea matautia.
6 Aoao Atu ma Ola i le Talalelei i Lou Aiga
Ua aoao mai e le folafolaga ia i tatou mea e tatau ona tatou faia ina ia fiafia ai i o tatou aiga. “E maua le fiafia i le olaga faaleaiga pe a faavae i aoaoga a le Alii o Iesu Keriso. O faaipoipoga ma aiga manuia, e faavae ma tumau i mataupu faavae o le faatuatua, tatalo, salamo, faamagaloga, faaaloalo, alofa, agalelei, galuega, ma gaoioiga faafiafia tuufaatasi.”
Ao avea i maua ma lo’u toalua o se ulugalii faaipoipo talavou, sa ma taumafai pea lava pea e faavaeina se mausa mautu o le faitauina faatasi o tusitusiga paia i aso uma o se aiga. Ina ua pe tusa ma le fitu tausaga o le ma ulumatua, na iu lava ina mafai ona avea ma se ma mausa o aso taitasi. O le faitauina o le mea muamua lava i le taeao, sa matou faaauauina ma le faamaoni mai lena taimi e agai atu i luma. Na mautu loa le mausa ma isi tamaiti, sa naunau le fanau laiti ifo ia auai ao amata ona latou tuputupu ae. O le tele o taimi e tatau ona matou faitau ao lei ta le 6 i le taeao ona o le seminare i le vaveao.
Ua i ai i ulugalii ua faaipoipo talavou se tulaga o le amataina o a latou lava uiga masani amiotonu faaleaiga—o le faia o suesuega o tusitusiga paia faaleaiga i aso taitasi, faia o tatalo faaleaiga, ma le saunia o a latou fanau mo misiona ma faaipoipoga faalemalumalu.
7 Famamalu i Matafaioi o le Tama ma le Tina i le Tausiga o Fanau
Ua faasoa mai foi e le folafolaga nisi o fautuaga taua e uiga i le tausiga o fanau: “O le uluai matafaioi a tina o le faafaileleina lea o a latou fanau. O nei matafaioi paia, e ao i tamā ma tina ona fesoasoani le tasi i le isi o se paaga tutusa.”
Atonu o nisi taimi e lagona ai e se tasi o matua le faapea o ia e sili atu le agavaa i le tausiga ma le aoaiina o le fanau. Ua aoao mai pea lava pea perofeta o lenei tisipenisione faapea o tane ma ava ua avea ma se paaga i le faaipoipoga, o faaiuga uma e faatatau i le aiga e tatau ona la faia faatasi ma le lotogatasi.
O paaga tutusa e tatau ona avea ma paaga tutusa. Fefautuaai faatasi ma tatalo faatasi. Ia taialaina e le Agaga ina ia iloa le auala sili ona aoga e tausia faatasi ai la oulua fanau. O o latou taunuuga e faavavau o le a aafia e a oulua faaiuga.
8 Faaaoga Lou Faitalia Tatau e Filifili ai e Mulimuli i le Faaola.
O le faaiuga po o fea o le a e i ai i le 20 tausaga po o le 20 seneturi e fitoitonu lava ia te oe. Ua e saoloto e filifili; ae peitai, o taunuuga e faavavau e sau mai au filifiliga. Ona o le Togiola a le Faaola, “ua togiolaina [le tagata] mai le paʼū [ma] ua latou saoloto ai e faavavau i le iloa o le lelei mai le leaga; e fai mo i latou lava ae lē faamalosia, vagana ai i le faasalaga a le tulafono i le aso tele ma le mulimuli, e tusa ma poloaiga ua tuuina mai e le Atua.
“O le mea lea, ua saoloto tagata … e filifili le saolotoga ma le ola e faavavau, e ala i le Puluvaga sili o tagata uma, pe filifili le faatagataotauaina ma le oti, e tusa ma le faatagataotauaina ma le mana o le tiapolo; ona ua saili o ia ia pagatia tagata uma e pei o ia lava” (2 Nifae 2:26–27; faaopoopo le faamamafa).
E ita Satani ia te oe ona o le tagata o e i ai ma e manao e sui ia te oe. Na te manao e faatiga ia te oe, e pei o ia. O Iesu Keriso e alofa ia te oe. Na Ia totogiina le tau mo au agasala. Na Ia foai mai Lona soifua mo oe. Ua Ia valaauliaina oe e mulimuli atu ia te Ia ma ia salamo, pe a tatau ai. A o e filifili e mulimuli i le Faaola, o le a e maua le “olioli i lenei soifuaga ma le soifuaga e faavavau i le lalolagi a sau.”3
9 Atiinae Ae le Faatuatua e Tumau ai e oo i le Iuga
E oo mai le faatuatua pe a fai ua e liua atu i le Alii. Sa aoao mai le perofeta o Nifae: “O le mea lea, e tatau ai ona outou fetaomi atu i luma ma le tumau ia Keriso, ma se susulu atoatoa o le faamoemoe, ma le alofa i le Atua ma tagata uma. O le mea lea, afai o le a outou fetaomi atu i luma, ma taumamafa fiafia i le afioga a Keriso, ma tumau e oo i le iuga, faauta, ua faapea ona fetalai mai le Tama: o le a outou maua le ola e faavavau” (2 Nifae 31:20).
Sa saunoa talu ai nei Peresitene Thomas S. Monson i le konafesi aoao, “E i ai le faamoemoe i le lumanai, pei foi o o outou faatuatua.”4 E aofia ai i lena mea le faatuatua ia tumau ai ma faatoilalo ia faigata uma, e aofia ai ma solitulafono, faalata, ma faanoanoaga. O lou faatuatua ina ia tumau o le a iloa ai lou taunuuga, e oo lava i lou taunuuga e faavavau.
10 Gauai Atu Lou Loto i le Finagalo o le Atua
Ou te tatalo ua uunaia e le Atua lou agaga ma se manaoga ina ia faia le mea sili ma ia faaauau ai lava ma ia mulimuli i le fautuaga a o tatou perofeta soifua. Ou te faamoemoe ua e lagona se manaoga ina ia faamalosia lau tautinoga ia avea ma tagata ua uma ona muai faauuina e le Atua ia avea ai oe.
“Uso e [ma tuafafine], tatou te lē o atu pea ea i lenei savali sili? O atu i luma ae lē o le solomuli. Lototetele, … o atu pea, o atu pea i le manumalo! … O lea, ia tatou osi atu, o se ekalesia ma se nuu, ma se Au Paia o Aso e Gata Ai, se taulaga i le Alii i le amiotonu” (MF&F 128:22, 24).
O le a lena taulaga e mafai ona e tuuina atu toatasi i le Atua? O le meaalofa lea e tasi Na te le manaomia mai ia te oe. O le ositaulagaina lea o lou loto ina ia gauai atu i Lona finagalo. O le tuuina atu lea o lou faitalia i luga o le fata faitaulaga mo le taulaga a le tagata lava ia.
O se tasi o Lectures on Faith, na saunia e le Usoga anamua i lenei tisipenisione, e faapea: “O se lotu e le manaomia le ositaulagaina o mea uma, e le taitai ona lava le malosi e maua ai le faatuatua e tatau ai mo le ola ma le faaolataga.”5
O lou faitalia o le mea lea e tasi o oe lava e anaina ma e mafai ona e tuuina atu o se taulaga i le Atua. O le ofo fua atu o lou loto mo Lona finagalo, o le a e avea ai faapei o Ia.
Ou te faaiu ma la’u molimau e uiga i le Faaola. I le tulaga o loo e faatino ai le faatuatua ia Iesu Keriso, gauai atu lou loto i le finagalo o le Atua, mulimuli i fautuaga a Ana perofeta, ma usiusitai i musumusuga a le Agaga, o le a e faamaoni, fiafia, ma faamanuiaina.