Autu o le Mutuale 2017
Ole Atu
Stephen W. Owen
Peresitene Aoao o Alii Talavou
Bonnie L. Oscarson
Peresitene Aoao o Tamaitai Talavou
“A e afai ua leai se poto i so outou, ina ole atu ia i le Atua, o le foai tele mai i tagata uma ma le le toe tautaua; ona foaiina mai ai lea ia te ia.
“A ia ole atu ma le faatuatua, aua lava nei masalosalo. Aua o le masalosalo e tusa ia ma le peau o le sami ua sousou i le matagi ma felafolafoaiina.”
Aisea na filifilia ai lenei autu, ma o le a le uiga ia te oe? Ua faasoa mai e Brother Stephen W. Owen, Peresitene Aoao o Alii Talavou, ma Sister Bonnie L. Oscarson, Peresitene Aoao o Tamaitai Talavou o la manatu.
Aisea ua filifilia ai le mau lenei?
Sister Oscarson: Ua silafia e le Alii le savali e te manaomia, ma e matagofie le auala e taliina ai e le autu nisi o faafitauli e aliae i le aluga o le tausaga ma le ala e fetaui ai ma mea o loo tutupu i o outou olaga.
Ina ua matou talanoaina le Iakopo 1:5–6 o se filifiliga mo le autu o lenei tausaga, sa faatumulia le potu i le Agaga. Ma sa matou ioeina uma o le a avea o se mau lelei mo o tatou talavou aua o loo i ai ni nai fesootaiga. E i ai lona fesootaiga i le talafaasolopito a le Ekalesia—o le mau sa faitau e Iosefa Samita lea na musuia ai o ia e alu i le Vao Paia ma tatalo ai. Ma o le fesootaiga maoae lona lua, o loo i ai le molimau o le misiona paia a Iosefa Samita, o se mea tatou te manaomia i se taimi o loo faaauau ai pea ona fesiligia lona tulaga ma le talafaasolopito a le Ekalesia e le lalolagi. O se savali foi o le auala tatou te maua ai faaaliga faaletagata lava ia i o tatou olaga, lea e manaomia ona iloa e tagata uma
Brother Owen: O loo tele mea o loo tutupu i o outou olaga i le taimi nei, ma o loo ia te outou ni fesili se tele. Faatasi ai ma ala o faasalalauga faaleagafesootai ma masini e saili ai o loo tatou mauaina, o loo i ai le tele o punaoa lea e mafai ona e liliu atu i ai ina ia maua ni tali mo au fesili o le faatuatua. O lenei mau taua o loo faaali mai ai le faagasologa o le faaaliga a Iosefa Samita, o se faataitaiga lea e mafai ona tatou mulimuli i ai.
E mafai faapefea e le autalavou ona faapatino ma faaaoga le Iakopo 1:5–6?
Sister Oscarson: O lenei mau o loo i ai se savali taua. O loo faapea mai, “Ole atu ma le faatuatua, aua lava nei masalosalo” (Iakopo 1:6). O lenei mea e faanoanoa ai. E manaomia ona e ole atu i le faatuatua, ae le o le masalosalo.
Brother Owen: Ma o le ole atu i le faatuatua o lona uiga o le ole atu ma le loto faamaoni. Ina ua maua e Iosefa Samita le tali o le ekalesia e auai, na te lei tau lava ina faapea atu, “Ia, e lelei le iloaina o lena mea, ae …” Sa ia agai i luma i le faatuatua.
Sister Oscarson: Ia manatua o se tatalo amiotonu e le o le ole atu mo mea tatou te mananao ai ae ia saili le mea e finagalo i ai le Atua mo i tatou.
O le a le fautuaga e te tuuina atu i le autalavou e uiga i le faaaogaina o le tatalo i o latou olaga?
Sister Oscarson: Ia faia o se mausa. E le mafai ona e faagaloina. E le mafai ona e manatu mama i ai. O le uso o Iareto ua tuuina mai se faataitaiga o lena mea (tagai Eteru 2:14).
Brother Owen: O le faagaloina o le tatalo i lea taimi i lea taimi o se mea e tasi, ae o le popolega sili o le liliu ese mai le Alii ma le manao ai e tatalo. O le taimi e te lagona ai e le tatau ona e tatalo, o le taimi lena e te manaomia ai ona tatalo. Ma afai o loo e faia au tatalo ma faitauina tusitusiga paia, o le a e ogatusa ma le Agaga. Ma afai e te le o faia, o le a e faamamaoina oe lava.
Sister Oscarson: E mafai ona tatou talanoa sao ma le Atua. Na te le tuuina mai ni tapulaa. O se meaalofa le iloaina e mafai ona tatou faia lena mea ma o loo i ai o Ia iina i taimi uma.
Na faapefea ona e aoao e tatalo i se auala anoa?
Sister Oscarson: E le mafai ona ou mafaufau i se aafiaga se tasi; o se taunuuga o le olaga atoa. O le tatalo ua avea ma se tasi o vaega sili ona anoa o lou aso aua ou te faia se taumafaiga ina ia tumau ai. Ua avea au ma se tagata lelei atu i le faalogo ma le mauaina o tali. Tatou te aoao ma sili atu ona tatou lelei i le tele o lo tatou auai i le faagasologa. Tau lava o le tumau ai i aso uma lava, ia mautinoa ou te le misia lena avanoa e talanoa ai i lou Tama Faalelagi. O le faatele ona tatou tatalo, o le a sili atu ona tatou lelei e faalogo atu i na tali.
Brother Owen: I lou talavou pe a ou matuai manaomia le iloaina o se mea, ou te manatua le Muai Faaaliga ma mafaufau, “Sa faia e Iosefa Samita. Ou te le manaomia se faailoga tele, ae ou te manaomia se tali.” Ma i le faatuatua ou te mulimuli ai i lena mamanu. Ou te manatua le tootuli ai i lalo ma ifo lou ulu ma faia leotele se tatalo. O le faaauau pea ona mulimuli ai i lena mamanu sa faamanuiaina ai lou olaga i le tele o taimi ina ia maua faaaliga faaletagata lava ia.
O le a se mea se tasi e sili ona taua e mafai e le autalavou ona aoao mai lenei mau?
Brother Owen: Na o lou manao lava e toe faamamafa le mamanu o le tatalo sa faavaeina e Iosefa Samita. I le na o le 14 tausaga, sa le mautonu ai o ia, o lea sa ia faitau ai ana tusitusiga paia. O le Muai Faaaliga sa le o se taimi puupuu lea sa tau lava o le tootuli ai o Iosefa i lalo. Sa i ai le tele o galuega a o lei tupu lena mea. Sa toe mafaufau ma toe mafaufau o ia i lana fesili. Ina ua ia maua le Iakopo 1:5–6, sa ia faapea mai, “E leai lava se mau o tusitusiga paia na oo mai i le loto o se tagata ma le mana tele nai lo o lenei mau i lou loto” (Iosefa Samita—Talafaasolopito 1:12). Sa ulu mai ma se mana tele i lona loto, ma sa ia galue ai loa. Sa ia tatalo ma le loto faamaoni ma agai i luma i le faatuatua. Ma o le mea lena matou te faamoemoe o le a mafai ona outou lagonaina i lenei mau i le taimi atoa o le 2017.