O Leo o Le Au Paia o Aso e Gata Ai
O Le Tatalo a Se Taitai Sikauti
Ata na tusia e Allen Garns
Sa avea au o se Taitai Sikauti e taitaia alii talavou e toa 20 ma taitai e toalua i se malaga o le gaoioiga i Iuta i saute, ISA.
Ina ua taunuu la matou taavale i le auala e avatu ai matou i le saite e tolauapi ai, sa ou tu ma iloiloina le toafa i luma atu o au. Sa tele taimi sa ou faia ai lenei malaga, ae mo ni mafuaaga, sa le mafai ona ou iloa se mea sa ou iloaina. Sa ou vaai ma le faaeteete i le eria, ma tilotilo mo se mea e masani ai.
Po o le a le tele o auala ou te agai i ai, sa taitai atu uma i ni auala e muta.
Sa faasolo ina pogisa. Sa iu, na ou tu ma fai atu i tagata uma e nonofo i totonu o le taavale. Sa ou tago atu i se moli uila ma fai atu ia i latou o le a ou savali e sueina le auala ma faailo mai ia i latou le taimi ou te maua ai le auala.
O le mea tonu sa ou faia o le tootuli lea i lalo ma augani atu i le Tama Faalelagi e fesoasoani mai ia i matou i lenei tulaga faigata. Sa sasaa atu lou loto ia te Ia, ma faamatala i ai au sauniuniga, o lou alofa mo tama sikauti, o lou faafetai i tama o tama sikauti na o mai ma matou, ma lou faatuatua moni e Na te tali vave mai i lau tatalo. Na uma la’u tatalo, ma sa ou tu i luga. Sa ou faamoemoe e tu i luga, ki lau moli uila i le pogisa, ma vaai atu i le sulu i luga o le auala sao.
Ae sa leai se mea na tupu.
Sa ou tilotilo atu ma le le leoa i le mamao e mafai ona ou oo atu i ai lau sulu.
Ae sa leai lava se auala sao.
Sa le mafai ona ou talitonu i ai. Sa ou iloaina o le taimi lava ou te tu ai i luga, o le a ou vaaia le auala. Sa ou iloaina e le tuua au e le Alii, aemaise i le toatele ai o tagata o loo faalagolago mai ia te au.
Sa tatau nei ona toe foi atu ma talanoa i ni tama le fiafia se toalua ma o la veni o loo tutumu i alii talavou ulavavale, ma tiotio, o loo tau fai mai uma, “O tatou i ai ea iina?”
Sa ou faatoese atu ma faamautinoa atu ia i latou sa 20 taimi sa ou faia ai lenei malaga i lou olaga ma sa ou iloaina o loo i ai lava iina le auala. Sa le mafai ona ou vaai i ai.
Na iu lava, sa matou filifili e tietie atu i le aai ma totogi ni potu se lua i le faletalimalo. O le a matou toe foi atu ma se malosi faafouina i le taeao o le aso Toonai.
Talu ai sa le mafai ona matou fausia ni afi e kuka ai meaai o le afiafi i luga o afi o tolauapiga sa matou aumaia, sa matou o atu i le fale pizza o le lotoifale sa matou vaai ai i le tausiusiuga o le aai.
Sa manaia le pizza ma sa fiafia tama, ae sa ou lagona lava le tausalaina o le totogiina o le fale mautotogi ma pili o le meaai o le afiafi.
A o matou aai, sa ou mafaufau pe aisea sa le tali mai ai e le Tama Faalelagi lau tatalo, ae faafuasei lava ona ou faalogoina se pao leotele.
Sa ou tu i luga, tatala le faitotoa o le fale pizza, ma vaaia ai le maligi o timuga tetele ou te lei vaaia muamua. Sa emo uila i sisifo i matu—sa agai tonu lava i le mea sa ou tatalo ai mo se tali e lei atoa se itula na muamua atu. I lena taimi, sa oo mai ai le Agaga ia te au, ma ou iloa ai sa tali mai e le Alii lau tatalo!
O le taeao na sosoo ai, sa lanu moana le lagi, ma sa matou toe agai atu i auala palapala, sa ou aveina sao atu le taavale i le auala sa ou sailia i le po na muamua atu. Ua ou iloa nei le auala e tali mai ai i nisi taimi ia tatalo i le leai, ae e tali mai lava.