Totoa i la Tatou Molimau i le Faaola

January 2017

Totoa i la Tatou Molimau i le Faaola

Saunia e Elder Christoffel Golden

O Le Fitugafulu

Mai se lauga, “Being Valiant,” na tuuina atu i le Kolisi Faapisinisi a le AAG i le aso 17 Iuni, 2014. Mo le saunoaga atoa i le gagana Peretania, alu i le ldsbc.edu.

O le a valaauina i tatou taitoatasi e galulue i taimi faigata ae taua. O nei taimi o le a iloa ai po o ai i tatou ma le mea ua avea ai i tatou.

I le avea ai ma se alii talavou i le tele o tausaga ua mavae, sa lisiina a’u i le militeli a Aferifka i Saute. Sa tofia a’u i se vaega o fitafita o ni alii lelei ae e le lelei a latou gagana ma amioga lea e faaalia i nisi taimi e alii o loo auauna atu i le militeli.

O le siomiaina e ia ituaiga o aafiaga, sa ou iloa ai sa le faigofie i taimi uma le ola ai i tulaga faatonuina o le talalelei. Ae mai lava i le amataga o la’u auaunaga i le militeli, sa ou fiafia e tu atu mo o’u talitonuga. Sa ou faamanino atu lava o le a ou le auai lava i ni amioga ou te iloa e le sa’o. Ou te fiafia e tau atu o alii o i la’u vaega—o nisi sa tau le fiafia i le amataga—ae ua iu lava ina faaaloalo i o’u tulaga faatonuina.

I se tasi taimi, i se toalauapiga faaleaoaoga a le militeli, sa tutu ai se vaega o i matou e siomia le afi o le tolauapiga i se po matagofie, pogisa, leai ni ao, a ua faatumulia i fetu. Sa inu ai ni pia a nisi o a’u uo i la’u vaega ao inu la’u vaiinu. Sa manaia le talanoaga, e aunoa ma ni upu le talafeagai.

I le taimi o la matou evaga, sa o mai nisi alii mai le isi iunite i le matou vaega fiafia. Sa liliu mai se tasi o nei alii ia te a’u ma, i le iloaina o le vaiinu sa i lo’u lima, sa ula mai ia te a’u mo le le auai atu i alii ia sa inupia. Ae ou te lei tali atu, sa faateia a’u e se tasi o a’u uo i le ote atu i lea alii.

“E sili pe a e aluese atu loa, alii,” o lana tala lea. “Matou te le mananao e tautala faapena se tasi ia Chris! O le mea moni, ua na o ia lava le tagata i totonu o i tatou o loo ola i se tulaga o se Kerisiano moni.”

Ina ua uma ona fai atu la’u uo, sa aluese atu ma le maasiasi lena alii. I lena taimi, e ui sa ou lagona si tau matamuli i le manatu sa faafuasei ona faaalia, sa ou lagona lemu le faafetai i lo’u filifili e mulimuli i le apoapoaiga a Paulo ina ia “fai oe ma faaaoao i e ua faatuatua” (1 Timoteo 4:12).

O loo e feagai foi ma filifiliga, aemaise lava i lenei taimi o lou olaga, ao ogatusa ma taliaina e lou agaga ia avanoa maoae ia o loo faatalitali mai ia te oe. O le fesili la, o le a le mea e te manao e tusi e uiga ia te oe i le 5, 10, po o le 20 tausaga—pe oo foi i le iuga o lou olaga?

O Le A Le Uiga o le Ia Totoa?

I se tasi o faaaliga sili ona matagofie na tusia i tusitusiga paia, na faamatala ai e le Perofeta o Iosefa Samita le tulaga o i latou o e o le a mautofi i le malo selesitila pe a uma ona toetutu ma faamasinoina. Na faaalia mai foi e lenei lava vaega i le Mataupu Faavae ma Feagaiga (vaega 76) tulaga ma nofoaga a i latou e le agavaa mo le malo selesitila ae o ni sui mo malo teresitila ma le telesitila.

O le talanoa e uiga ia i latou o e o le a mautofi i le malo teresitila, ua aoao mai ai i tatou e le faaaliga o i latou ia “o tagata mamalu o le lalolagi, o e na faatauasoina i le faitogafiti o tagata … [ma] o e e maua [ le mamalu a le Atua], ae le o lona atoatoa” (MF&F 76:75–76). Ona tatou aoaoina lea o lenei mataupu faavae matagofie: “O i latou ia o e sa lei totoa i le molimau ia Iesu; o le mea lea, latou te le maua le pale iluga o le malo o lo tatou Atua” (MF&F 76:79; faaopoopo le faamamafa).

Mafaufau i lena faamatalaga mo sina taimi. Faamata o le a tatou teena le mamalu o le malo selesitila, ma ona faamanuiaga maoae ma faavavau uma, ona tatou te lei totoa i le molimau ia Iesu iinei i le lalolagi i lo tatou tulaga faataitai, puupuu ma faaletino?

O le a le uiga o le ia totoa i le molimau ia Iesu? Na folafola mai e se Aposetolo a le Alii i nei ona po:

“O le lototele ma le le fefe; o le faaaogaina o lou malosi atoa, malosiaga, ma le agavaa i le taua ma le lalolagi; e tau ai le taua lelei o le faatuatua. … O le maatulimanu sili o le lototoa i le faamoemoe o le amiotonu, o le usiusitai i le tulafono atoa o le talalelei atoa.

“Ina ia totoa i le molimau ia Iesu o le ‘o mai ia keriso, ma faaatoatoaina ia te ia’, ma faafiti outou lava ‘mai mea uma e le faaleatua’, ma alolofa i le Atua ma o outou manatu atoa, mafaufau, ma ma le malosi atoa.’ (Moronae 10:32.

“Ia ina ia totoa i le molimau ia Iesu, o le talitonu lea ia Keriso ma lana talalelei i se talitonuga le maluelue. O le iloa lea o le moni ma le paia o le galuega a le Alii i le lalolagi. …

“Ina ia totoa i le molimau ia Iesu o le ‘fetaomi atu [lea] i luma ma le tumau ia Keriso, ma se susulu atoatoa o le faamoemoe, ma le alofa i le Atua ma tagata uma.’ O le ‘tumau e oo i le iuga.’ (2 Nifae 31:20.) O le ola ai i la tatou tapuaiga, ia faatino mea tatou te talai atu, ia tausi poloaiga. O le faaalia lea o le ‘amio atua’ i olaga o tagata; o le tauasiasi atu i e ‘matua oti ma fafine ua oti a latou tane i o latou tiga’ ma le leoleo o i tatou lava ina nei ‘pisia mai o ia i le lalolagi.’ (Iakopo 1:27.)

“Ina ia totoa i le molimau ia Iesu, o le pulea lea o ou tuinanau ma ou manaoga, ma tutu maualuga atu i mea faaletino ma le amioleaga. O le manumalo lea i le lalolagi e pei ona faia e Ia o loo avea ma o tatou faataitaiga ma o Ia Lava ua sili ona totoa o fanau uma a lo tatou Tama. O le mama atoatoa lea, totogi a tatou sefuluai ma taulaga, faamamalu le aso Sapati, tatalo ma se faamoemoe atoa o le loto, ositaulaga mea uma ua tatou maua pe afai e manaomia mai.

“Ina ia totoa i le molimau ia Iesu o le ogatasi lea ma le Alii i mea uma. O le filifili lea e pei ona ia filifili. O le mafaufau i mea na te mafaufauina, talitonu i mea na te talitonuina, tautala i upu o le a ia tautala i ai ma fai mea o le a ia faia i lea lava tulaga e tasi. O le i ai lea o le finagalo o Keriso ma ia tasi i latou ma ia faapei ona tasi o ia ma lona Tama.”¹

E tatau ona ou faaopoopoina i le taimi nei se mea sa aoaoina e lo tatou Faaola, le Alii o Iesu Keriso, i le taimi o Lana galuega faaletino i le lalolagi.

“Aua tou te manatunatu ua ou sau e avatu le filemu i le lalolagi: ou te lei sau e avatu le filemu, a o le pelu.

“Aua ua ou sau e faamasesei le tagata ma lona tama, o le tama teine foi e faamasesei ma lona tina, o le ava foi e faamasesei ma le tina o lana tane.

“E fai foi le tagata ma fili o lona aiga.

“O le e tele lona alofa i lona tama po o lona tina ae itiiti ia te au, e le aoga lea ia te au: o le ua tele lona alofa i lona atalii po o lona afafine ae itiiti ia te au, e le aoga foi lea ia te au.

“O se e le ave lona satauro, ma mulimuli mai ia te au, e le aoga lea mo au.

“O lē maua lona ola, e maumau ai ia te ia: a o lē faamaumau i lona ola ona o au, e maua e ia” (Mataio 10:34–39).

O lo tatou faamoemoega i le olaga nei e le sili atu pe itiiti ifo nai lo le saunia ina ia toe nonofo faatasi i le silafaga a lo tatou Tama Faalelagi alofa o ni suli tutusa ma Iesu Keriso. Ua avanoa mo tagata uma lenei tulaga faamamaluina i aiga e faavavau faatasi ai ma a tatou ava po o tane ma a tatou fanau ma aiga lautele e ui lava o le a maua e nisi nei faamanuiaga pe a mavae le olaga faaletino.

O ia ituaiga faamanuiaga e manaomia ai lo tatou aveina o a tatou satauro ma tumau ma le totoa seia oo i le iuga i le molimau atu ma le auauna atu i lo tatou Alii ma le Faaola.

Saunia e Faatino

O le auala e tatau ia i tatou taitoatasi ona mulimulitai i ai ua faatumulia i avanoa e le mafaitauina faapea ma le anoanoai o luitau faigata. Ua manaomia lo tatou faia o ni faaiuga se tele i aso taitasi—o nisi e laiti ma foliga e le taua, o isi e loloto ma tumau o latou aafiaga.

O se mea moni e faigata le taliaina faapea o le a valaauina i tatou taitoatasi e faatino i taimi e faigata ma ua mamanuina ai i tatou. O nei taimi o le a fuafuaina ai le ituaiga tagata e i ai i tatou ma le tagata ua tatou avea ai. E masani ona oo mai pe afai e le talafeagai ma lē tautaua le ola amiotonu ma le lototoa. O le a e iloaina pe a e tusia lou talaaga faapea o taimi sili ona taua o le a fetaiai ma oe o le taimi lea e te tu ai na o oe.

Sei ou faamatala atu se tala i se tasi na tu na o ia i le lotolotoi o fetauaiga tetele. O se taimi ia Novema 1838, lea na noatia ai i filifili ma faafalepuipui ai le Perofeta o Iosefa Samita ma isi, e aofia ai Elder Pale P. Palate (1807–57) i Richmond, Misuri, ISA.

Sa faamaumauina e Elder Palate mea nei na tutupu i le taimi na faafalepuipui ai i latou:

“I se tasi po umi, sa matou taooto e pei o matou momoe seia oo ina tea le tuneva o le po, ma sa matua tiga o matou taliga ma loto a o matou faalogologo atu mo le tele o itula i tauemuga mataga, o upu masoa, o upu faifai matuia, ma gagana mataga a o matou leoleo, o Colonel Price sa avea ma o latou taitai, ao latou toe faamatalaina i le tasi ma le isi a latou galuega o le ave faamalosi o fanua, fasioti tagata, faomea, ma isi mea faapena, lea sa latou faia i le au ‘Mamona’ ao i ai i Sisifo Mamao [Misuri] ma nofoaga lata ane. Sa latou faia foi ni faamatalaga faamaualuluga e ala i le faamalosia o ava, tama teine ma teine muli, ma le tafaina o faiai o alii, tamaitai ma tamaiti.

“Sa ou faalogo pea seia oo ina ou matua inoino, faateia, ma lē fiafia, ma na matua faatumulia i lagona o le ita ua faamaoniaina lea sa ou le manofo ai i lou fia tu atu i luga e aoai ia leoleo; ae sa leai lava se tala a Iosefa, po o se isi lava, e ui sa ou taoto i ona talaane ma iloa o loo ala o ia. Sa faafuasei ona tu o ia i luga, ma tautala atu i se leo o le faititili, po o le pei o le tagi o se leona, ma faapea atu, i le manino na mafai ona ou manatuaina ai, ia upu nei:

“‘FILEMU, outou o tiapolo o le lua o seoli. I le suafa o Iesu Keriso ou te aoai ai outou, ma faatonu outou ia fifilemu; O le a ou le ola lava i se isi minute e faalogo atu i gagana faapena. Tuu nei lava na ituaiga tala, a leai, e oti outou po o au i le TAIMI NEI LAVA!’

“Sa ia le toe tautala atu. Sa ia tu maualuga i le mamalu matautia. Sa saisaitia i filifili, ae sa aunoa ma se auupega; toafilemu, toalelei ma faaaloalogia e pei o se agelu, sa tilotilo o ia i lalo i leoleo gatete, o a latou auupega sa i lalo pe na pauu i lalo o le fola; na pipii faatasi o latou tulivae, ma o e, na faapupuu i se tulimanu, po o le faapupuu foi i ona vae, ma augani mai mo lana faamagaloga, ma tumau ai i le fifilemu seia oo ina sui mai leoleo.”²

O le lototoa na faaalia e le Perofeta o Iosefa Samita e le faapolopoloina mo perofeta po o tagata matutua o le Ekalesia. O se mea na tupu i le soifuaga o Peresitene Iosefa F.Samita (1838-1918) na faaalia ai lenei mea. I le tautoulu o le 1857, ina ua 19 tausaga o Iosefa F. sa tuua lana misiona i Hawaii, ISA, sa ia auai atu i se malaga a taavale toso i Kalefonia, ISA. Sa o se taimi sili lea ona lamatia mo le Au Paia. Sa agai atu le Autau a Johnston i Iuta, ma sa i ai i le toatele ni lagona le fiafia agai i le Ekalesia.

I se tasi afiafi, sa tietie atu nisi o tagata leaga i totonu o le toalauapiga o taavale toso, ma lafo atu ni upu masoa ma taufaamatau e uiga i mea o le a latou faia i soo se Mamona latou te mauaina. O le toatele o i latou sa i ai i le tolauapiga sa lalafi i totonu o pupuvao, ae sa mafaufau Iosefa F. Samita ia te ia lava: “Pe ou te sola ese ea mai nei tagata? Aisea o le a ou fefe ai ia i latou?

Faatasi ai ma lena manatu, sa ia savali sao atu loa i se tasi o tagata taufaamatau, o loo uu le fana i lona lima, lea na fai mai, “O oe o se ‘Mamona’?”

Sa tali atu Iosefa F.Samita, “Ioe, alii, e o’oo’o i soo se vaipanoa o lo’u tagata, e faamaoni a’ia’i atoatoa.”

O lea, na toso atu ai lona lima e le tagata taufaatamatau ma faapea mai, “Ia o oe ——— ——— o le tagata aupito sili ona lelei ua ou feiloai i ai! Malo, alii talavou, ua ou fiafia e feiloai i se tagata e puipui i ona talitonuga maumaututu.”³

Ua e gauai atu nei i nisi o taimi sili ona taua o lou olaga! Ua e fatuina nei ma o le a fatuina pea, i lea taimi ma lea taimi i lea aso ma lea aso, lou lava talaaga. O le a i ai taimi o le a manaomia ai ona e faatino, ao isi mea e tutupu o le a le manaomia ai ona e faatino. O le a tele naua avanoa, o le a manaomia le faia o ni faaiuga, ma o le a fetaiai ma luitau!

I le fuafuaga o le fiafia a lo tatou Tama Faalelagi, ia manatuaina pea e le o tuua lava na o oe. O le toatele i lenei olaga ma le sili atu i le lalolagi o agaga, e oo lava i lenei aso, o loo aioi atu e uiga ia outou tagi ma le Alii. Ua tele naua le malosi ua tuuina atu ia te outou e ala i sauniga ua outou mauaina ma feagaiga ua outou tausia. O le mea e sili i na mea uma, o loo i ai pea e le aunoa lo outou Tama Faalelagi ma Lona Alo—lo tatou Faaola o Iesu Keriso, lo tatou Fautua—e fesoasoani atu ia te outou i le aluga o le olaga. I se aoaoga loloto ma le faagaeetia i le taimi o le galuega faaletino a le Faaola, sa Ia tuuina mai ai se valaaulia i tagata soifua uma faapea foi ma i tatou taitoatasi.

“Ia outou o mai ia te au, outou uma o e tigaina ma mafatia i avega, o au foi e malolo ai outou.

“Ia outou amoina la’u amo, ma ia outou faaa’oa’o ia te au, aua o au lē agamalu ma le loto maulalo, ona maua lea e outou o le malologa mo outou agaga.

“Aua e avegofie la’u amo, o la’u avega foi e mama ia” (Mataio 11:28–30).

Ou te faaopoopo atu la’u molimau faamaoni i le soifua moni o lo tatou Tama Faalelagi e Faavavau ma Lona Alo, o le Alii o Iesu Keriso. Ou te molimau atu foi o Le Ekalesia a Iesu Keriso o le Au Paia o Aso e Gata Ai o le Ekalesia toefuataina lea a le Alii ma le malo o le Atua i luga o le lalolagi.

Ou te faamoemoe—ma faapea ma i latou o e faasoaina atu lenei molimau—o le a tumau pea ona totoa i lenei mafuaaga maoae.