Aua Nei Galo ona Tatalo mo Erik
E alala le tusitala i Nevada, ISA.
“Ev’ry soul is free to choose his life and what he’ll be” (Hymns, no. 240).
Na tootutuli le aiga o Kari i talaane o le nofoa umi mo le tatalo faaleaiga. Na piilima ma le faaaloalo tagata uma. Sa fai atu Papa i le uso laitiiti o Kari, o Livi, e fai le tatalo.
“Aua nei galo le faafetai i le Tama Faalelagi mo le tele o a tatou faamanuiaga,” o le toe faamanatu atu lea a Papa ia te ia.
“Ma aua nei galo ona tatalo mo Erik,” o le faaopoopo atu lea a Mama. E faamanatu atu pea e Mama ia i latou ina ia tatalo mo Erik.
O Erik o le tuagane matua a Kari. Ae lei aluese atu o ia mo le iunivesite, sa avea i laua ma Kari ma uo mamae. Ua matua misia lava e ia mea malie uma sa masani ona la faia faatasi.
I ni nai masina ua tea, sa tau mai e Erik ia Mama ma Papa e le toe fia auai i le Ekalesia. Na tetei ma faanoanoa Kari ma lona aiga. Na amata ona latou tatalo mo Erik i po uma. O nisi taimi latou te tatalo ai ina ia ona lagona le Agaga Paia ma manao e toe foi mai i le lotu. E tatalo Papa ina ia manino le mafaufau o Erik e faia ai ni filifiliga lelei. E masani ona tatalo Mama ina ia i ai se tagata na te faatuatuaina e fesoasoani ia te ia e saili le ala sao. I le mavae ai o a latou tatalo uma, sa le mafai lea ona fesoasoani i le lagona ita o Kari. Aisea ua le toe aumai ai e le Tama Faalelagi Erik i le lotu?
Na iu lava, ao amata ona tatala le gutu o Livi e tatalo, sa le mafai ona toe taofiofi Kari. “Aisea ua le tali ai e le Tama Faalelagi a tatou tatalo?” sa ia valaau mai ai. Sa tilotilo tagata uma ia Kari ma le tetei, ae o lona ita tele na le popole ai. Sa leai se tasi na tautala mo se minute.
“Kari,” o le tala lea a Papa, “ina ua e taunuu mai i le fale ananei, na e tuuina faalelei lau atofaafafa?”
“Ea?” O le fesili atu lea a Kari ma le le mautonu. O le a le faiā a lana atofaafafa i ai? Sa ia tilotilo atu i le faitotoa i luma ma iloa atu ai lana ato na togi agai i le puipui nai lo le tautau faalelei i autafa o le ato a Livi. “Leai … faamalie atu.”
“E lei faamanatu atu e Mama ia te oe e tautau i luga?”
“Ioe,” o le tali lea a Kari. Sa ia tilotilo i lalo i ona tulivae.
“E le faamanatu soo atu e Mama ia te oe e tautau i luga lau ato?”
“Ioe,” o le memumemu lea a Kari. Na te lei iloa lava po o le a le faiā o lenei mea ma le talanoaga. Pe le o manatu mamafa ea Papa i lana fesili?
“Ou te iloa a tatou tatalo mo Erik, e tali mai lava le Tama Faalelagi ia tatou tatalo—i taimi uma. O le faafitauli atonu e le o faalogo Erik i le taimi lenei. E filifili lava Erik pe faalogo i le Agaga Paia, e pei foi ona e filifili pe faalogo ia Mama e uiga i lau ato. Ae o le a la sou manatu o le a e le faalogo lava ia Mama pe a ia fai atu ia te oe e tautau i luga lau ato?”
“Leai, ou te matea e leai,” na fai mai ai Kari.
“O le a ia faalogo i se aso!” O le tala lea a Mama ma faaivi mai lona mata ia Kari. Sa ataata Kari.
“Atonu foi o le a faalogo Erik i se aso,” na fai mai ai Kari.
“E mautinoa lava,” na fai atu ai Mama. “O le faalogo i le Agaga Paia o se tomai e tatau ona e atinaeina. Masalo e lei aoaoina lava e Erik lena tomai.” Na amata ona maua e Kari se lagona lelei.
Na punonou uma o latou ulu ao faia e Livi le tatalo. Sa ia tatalo ina ia aoao Erik e faalogo i le Agaga Paia. Ao tatalo Livi, sa lagona e Kari le toafilemu ma le mafanafana. Ua ia iloa o loo faafofogaina e le Tama Faalelagi a latou tatalo. Ao tolaulau atu e Livi nisi o auala o loo faamanuiaina ai lo latou aiga, sa mafaufau Kari i se isi faamanuiaga e faaopoopo atu i le lisi—ua ia malamalama atili e uiga i le tatalo i le taimi nei!
Ina ua uma le tatalo, na iloa e Kari e lei galo i le Tama Faalelagi ia Erik. Ua ia iloa foi Na te le faagaloina lava o ia [Kari].