Seia Tatou Toe Feiloai
O Le Mataupu mo se Perofeta Soifua
I le 1939, ao lei amatalia le Taua Lona Lua a le Lalolagi, sa valaaulia Uso Brown e se sui o le Maota mo Tagata Uma a Egelani e talanoa e uiga i se finauga faaletulafono mo le faamatalaga a Uso Brown e faapea o Iosefa Samita o se perofeta. I se lauga na tuuina atu i le Iunivesite o Polika Iaga i le aso 4 o Oketopa, 1955, sa faaautuina “O Le Talaaga o se Perofeta,” sa faamatalaina e Peresitene Brown le latou talanoaga (tagai speeches.byu.edu).
Ata na tusia e James Johnson
Sa ou amata … , “Ua e faapea mai o lou talitonuga sa fetalai le Atua i se tagata i lenei vaitaimi e manaia ma faavalevalea?”
“Ia te au, o lea lava.”
“E te talitonu sa fetalai le Atua i se tasi?”
“O lea lava, i le Tusi Paia atoa o loo i ai faamaoniga o lena mea.”
“Sa fetalai o Ia ia Atamu?”
“Ioe.”
“Ia Enoka, Noa, Aperaamo, Mose, Iakopo, Iosefa, ma faaauau e ala atu i perofeta?”
“Ou te talitonu sa fetalai o Ia ia te i latou taitoatasi.”
“E te talitonu o fesootaiga i le va o le Atua ma tagata ua faagataina ina ua faaali mai Iesu i luga o le fogaeleele?”
“Leai, o nei fesootaiga sa taunuu i lona atoatoaga, lona taunuuga i lena taimi.”
“E te talitonu, lau susuga, ina ua maea le toetu o Iesu, na i ai se tasi loia—o ia foi o se tagata fai faleie e igoa ia Saulo o Tasesa—ao malaga atu i le ala agai i Tamaseko, na talanoa ma Iesu o Nasareta, o le sa faasatauroina, toetu, ma afio ae i le lagi?”
“O lea lava.”
“O ai le leo na faalogo i ai Saulo?”
“O le leo o Iesu Keriso, aua sa Ia faailoa mai o Ia lava.”
“O lea la, ua ou tuuina atu ia te oe i le faamaoni atoatoa o se tulaga aloaia i le taimi o le Tusi Paia, sa talanoa le Atua i tagata.”
“Ou te manatu ou te talia lena tulaga, ae peitai sa faagataina i le taimi faatoa maea le seneturi muamua o le vaitaimi o le Faakerisiano.”
“Aisea ua e manatu ai ua taofia?”
“Ou te le iloa.”
“E te manatu e lei toe fetalai mai lava le Atua talu mai lena taimi?”
“Ou te mautinoa e lei toe fetalai mai lava.”
“E tatau ona i ai se mafuaaga. E mafai ona e tuuina mai se mafuaaga?”
“Ou te le iloa.”
“E mafai ona ou fautuaina atu nisi mafuaaga? Masalo ua le toe fetalai mai le Atua i tagata ona ua Ia le mafaia. Ua leiloa Lona mana.”
Sa ia fai mai, “O lona uiga o lena mea o le taufaifai.”
“Ia, o lona uiga la, afai e te le talia lena mea, masalo ua Ia le fetalai mai i tagata ona ua Ia le toe alofa ia i tatou. Ua ia le toe fiafia i tulaga e uiga i tagata.”
“Leai,” sa ia fai mai ai, “O le Atua e alofa i tagata uma, ma o Ia e le faailoga tagata.”
“Ia, afai la o lena, a mafai ona Ia fetalai ma afai e alofa o Ia ia i tatou, o lona uiga la na o le pau le tali talafeagai, e pei ona ou iloa, tatou te le manaomia o Ia. Ua vave tele lo tatou tomai i mea tau saienisi, ua lava lo tatou aoaoina, ua tatou le toe manaomia ai le Atua.”
Ona ia fai mai lea—ma o lona leo ua tete ao ia manatu i le taua o loo lupe—“Alii Brown, e lei i ai lava se taimi i le talaaga o le lalolagi sa manaomia ai le leo o le Atua e pei ona manaomia ai nei. Masalo e mafai ona e tauina mai ia te au pe aisea ua Ia le toe fetalai mai ai.”
O lau tali sa faapea atu: “O loo fetalai mai o Ia, sa Ia fetalai mai; ae e manaomia e tagata le faatuatua e faalogo ai ia te Ia.”