Aoao Atu i le Ala a le Faaola
Fesiligia o a Tatou Fesili mo Talanoaga
O le fesili sili ona taua atonu o le fesili lea e fesiligia ai e faiaoga i latou lava ao lei oo i le vasega.
Ata na tusia e Augusto Zambonato
Mafaufau o loo e nofo faatasi ma ni uo e aai i le aoauli ma talanoa i se ata sa outou matamata faatasi i ai. Ona fai mai lea o se tasi o au uo, “O ai e mafai ona tau mai po o le a le vaega sili ona taua sa i ai i le tifaga?”
O sina nenefu i le fesili, e te mafaufau ai mo se taimi ma fautua atu masalo o le vaega mulimuli o le vaega sili lea ona taua. “Ia, lelei lena manatu,” o le tala lea a lau uo. “Ae e le o le mea lena na ou mafaufau i ai. E i ai se isi? Sei o tatou faalogo atu i se tasi e lei faasoa mai lava.”
E te le talanoa atu i lenei auala i ni uo, ae mo sina mafuaaga e foliga mai e tupu soo i vasega o le Aso Sa. Nai lo le talanoaina masani ma toafimalie o upumoni o le talalelei, i le avea ai o ni faiaoga, o nisi taimi tatou te fai atu ai ni mea lea i nisi o nofoaga e foliga e ese ai ma e oo lava i talanoaga faigata. matou te faamoemoe o le a lagona e tagata o le vasega o loo latou faatasi ma uo, ma maua le toafimalie i le fefaasoaai o o latou manatu e faatatau i mataupu faavae o loo latou aoaoina. O ia ituaiga fefaasoaaiga e mafai ona valaaulia ai le Agaga ma faatamaoaigaina ai le aafiaga mo tagata uma.
E faapefea ona tatou mautinoa o a tatou fesili o le a taitai atu ai i se talanoaga sili atu ona anoa ma toafimalie? O loo i ai nisi o mea e fai ma aua le faia ua iloa e le toatele o faiaoga e aoga: Aua nei fai atu ni fesili i ai ni tali manino. Fai ni fesili e sili atu ma le tali e tasi. Aua nei faia ni fesili e patino tele.
Atonu o le a aoga foi, a o lei amata ona tatou fuafuaina ni fesili e fai atu i le vasega, fesili ifo ia i tatou lava le fesili lea: O le a tonu lava le mafuaaga ua ou tuuina atu ai nei fesili?
Aisea Ua E Fesili Ai?
O le naunautaiga o a tatou fesili e tele se eseesega o i ai. Mo se faataitaiga, o tatou tuuina atu ea ni fesili i nisi taimi ona e i ai se mea tatou te fai atu ai ae nai lo lena o loo tatou mananao i le tagata o le vasega e tau mai? Tatou te le mananao e faia uma le talanoaga, ae o loo i ai se manatu taua tatou te fia faailoa atu, o lea tatou te tuuina atu ai se fesili i nisi taimi tatou te iloa o le a musuia ai se tali tatou te fia faalogo i ai. O lenei uiga e taitai atu ai i fesili lea o loo avea moni lava o ni faamatalaga faanana, e pei o le “E faapefea ona fesoasoani le aloese mai ponokalafi e tausia ai ia mama ou mafaufau?” “E taua le tatalo i aso uma?”
E i ai tulaga e talafegai tonu ai lava le fai atu o ni fesili ua faamoemoe e uunaia ai se tali faapitoa. E mafai ona avea ma se tulaga e faamamafa atu ai se manatu pe fesoasoani foi i le faiaoga e faalautele ai le lesona. Peitai o fesili faapenei e le uunaia ai ni talanoaga anoa.
I le isi itu, afai tatou te tuuina atu ni fesili ona tatou te fia iloa moni lava mea o i ai i totonu o mafaufau ma loto ma olaga o ai tagata o la tatou vasega, ona tatou te popole i mea o i latou mafaufau, loto ma olaga, o le a faaalia la i fesili tatou te tuuina atu.
O fesili e valaauliaina tagata o le vasega i ni talanoaga faamaoni ma uunaia le aoaoina faaleagaga e aofia ai fesili ia pei o le “Ao e faitauina le fuaiupu lenei, o le a le mea e foliga mai e sili ona taua ia te oe?” po o le “O a ni aafiaga ua aoaoina ai oe ina ia faalagolago i folafolaga a le Alii?” po o le toeitiiti lava o soo se fesili e amata ma le “O le a sou manatu … ?”
Mafaufau i faataitaiga nei:
-
Na fesili atu le Agaga ia Nifae, “O le a le mea ua e manao i ai?” (1 Nifae 11:10).
-
Na fesili atu le Faaola i Ona soo, “O le a sa outou upu o ai Au?” (Mataio 16:15).
-
Ma sa Ia fetalai atu ia Mareta, “O Au nei o le toe tu ma le ola: …Talitonu mai ea i lena mea?” (Ioane 11:25, 26).
O nei fesili taitasi ua valaauliaina se tagata e faasoa mai se mea o i lona loto. Ma i tulaga taitasi, o le mea na sosoo ai o se aafiaga faaleagaga mamana.
O Fesili o se Faailoga Lea o le Alofa
Talitonu i ai pe leai, o le tuuina atu o ni fesili ia e uunaia ai talanoaga o se tulaga masani ai i le toetoe lava o tagata uma—e oo lava i tagata latou te le mafaufauina i latou lava o ni faiaoga lelei. Tatou te faia i taimi uma lava e faia ai a tatou talanoaga anoa ma uo po o aiga-pe na o le talanoa e uiga i se ata e sili ona fiafia i ai i le taimi o le malologa. Ae o le taimi lava tatou te tutu ai i luma o ni tamaiti aoga naunautai, e faafuasei lava ona galo uma ia i tatou le mea e masani ona oo mai.
Masalo la o se vaega o le togafiti i le tuuina atu o ni fesili lelei mo talanoaga o le tatou mafaufau lea faapea ia i tatou lava, “E faapefea ona ou fesiligia lenei mea pe ana faapefea matou te le o i ai i le potuaoga—pe ana faapefea na o lo matou saofafai i le fale ma talatalanoa e uiga i le talalelei ma se vaega o ni uo? E faapefea ona ou valaauliaina i latou e faasoa mai ni o latou malamalamaaga ma lagona?” O le aoao atu e le pei o se talanoaga faasamasamanoa ma uo, ae i ai se mea e tasi e tutusa ai: e tatau ona musuia e ni mea moni e fiafia i ai ma le alofa moni.
Aua la e te popole pe afai e lei lava lou tomai i le fatuina o ni fesili ua lelei le faaupuina. E tusa lava pe pau le mea e mafai ona e faia o le alofa lea i tagata o e aoaoina, o le a taitaia oe e le Agaga, ma o le a amata ona e lelei ma faaauau pea i le iloaina o mea e fai atu ai. “E le uma le alofa,” na tautino mai e Paulo (1 Korinito 13:8), ma e moni lena mea e oo lava i se mea e faigofie e pei o se faiaoga o fai atu ni fesili i le vasega.