O Folafolaga e 5 o le Tatalo
E alala le tusitala i Iuta, ISA.
Na saunia e le Tama Faalelagi le tatalo o se auala e fesootai sao atu ai ia te Ia ina ia tuuina atu le faafetai, ole atu mo faamanuiaga, ma tuputupu ae ai faaleagaga. O nisi taimi pau lava le mea e manaomia o le punou o le ulu, piilima, ma ni nai upu faigofie ma faamaoni. Seki a, a ea? O folafolaga po o faamanuiaga eseese nei e lima e mafai ona tatou maua pe a tatou tatalo.
1 Malosi e Faatoilalo Ai
I le avea ai ma ni tagata soifua, e mafai ona tatou lagona le vaivai i le tele o auala—faaletino, faalelagona, faaleagaga, ma faalemafaufau. E mafai ona tatou tauivi i le taumafai ai e tamoe i se tuuga pe pasi se suega pe tetee atu i se faaosoosoga pe oo lava i le lagonaina o le Agaga. Ae e mafai ona aumai ia i tatou e le tatalo le malosi tatou te manaomia e faatoilalo ai soo se mea e tuuina mai e le olaga ia i tatou.
E pei ona fai mai Nifae, “E le aumai e le Atua ni poloaiga i le fanauga a tagata, sei iloga Na te saunia le ala mo i latou ia mafai ai e latou ona fai le mea ua Ia poloaiina ai i latou” (1 Nifae 3:7). E mafai ona aumai e le Alii ia i tatou le malosi e ausia ai soo se mea lelei o tatou taumafai e fai pe afai o Lona finagalo lea.
Tatalo mo le malosi e faatoilalo ai se faaosoosoga. Tatalo mo le malosi e taulai atu ai ma suesue ma le lelei mo se suega. Tatalo mo le malosi e tamoe ai ae le vaivai. Tatalo mo le malosi, ma o le a Ia faamalosia oe.
Ata na tusia e Clayton Thompson
2 Faamagaloga
E ui e manaia le manatu a le o lea, tatou te le atoatoa. Tatou te sese, ma ua na o se vaega lena o le olaga. Peitai ua saunia e le Alii se auala e faalelei ai: o le mana o le Togiola a Iesu Keriso. Ma o se tasi o auala e maua ai Lona mana o le tatalo.
A tatou ole atu mo le faamagaloga e ala atu i le tatalo, e mafai ona faamagaloina i tatou mai i a tatou agasala e ala i le Togiola a le Faaola. E ui o agasala tetele atu e ono manaomia ai le fesoasoani a se epikopo po o le peresitene o le paranesi, o le tatalo faamaoni ma patino o le a avea pea ma se tasi o laasaga muamua i le faamagaloga—pe o tatou ole atu i le Tama Faalelagi e faamagalo i tatou pe fesoasoani mai ia i tatou e faamagalo atu se isi tagata. O le a Ia fesoasoani mai foi ia i tatou ia iloa le ala e faamagalo ai i tatou lava.
3 Poto ma le Taitaiga
Atonu o le faaaliga a le tagata lava ia o se tasi lea o uluai faamanuiaga folafolaina o le tatalo na e mafaufau i ai, aemaise lava i le i ai lava pea i lou mafaufau o le autu fou o le Mutuale. Sa lei i ai se poto ia Iosefa Samita e uiga i le ekalesia e auai ai, o lea sa ia tootuli ai i ona tulivae i le Togavao Paia, tuu atu lana fesili, ma mauaina se tali—i se auala maoae tele.
Peitai o faaaliga e le mo na o perofeta, ma e le faapea e tatau ona avea ma se aafiaga taua tele. Afai e i ai nisi o i tatou ua leai se poto e uiga i soo se mea, e mafai ma e tatau ona tatou ole atu i le Atua. O le a Ia tali mai, e ui e le tali mai i nisi taimi i le ala tatou te faamoemoe i ai. O le a tali mai le Alii ia tatou fesili ma fesoasoani e taialaina o tatou olaga, ae e tatau ona tatou ole atu muamua!
4 Manao e Fai le Finagalo o le Alii
Atonu e faigata atu ona vaai atu i lenei mea o se faamanuiaga—aua, o le mea moni lava, o nisi taimi tatou te mananao ai i ni mea mo i tatou lea e le finagalo i ai le Alii mo i tatou. Ae ao tatou tatalo ina ia liua moni ma ia i ai le manao e faia le finagalo o le Alii, o le a tatou iloaina se mea ofoofogia: o mea tatou te mananao i ai o le a amata ona foliga atili i mea o loo Ia finagalo i ai.
Ae o lenei liuga o le loto o le a le tupu faafuasei. Na saunoa Elder David A. Bednar o le Korama a Aposetolo e Toasefululua: “Mo le toatele o i tatou, o le liuaina o se faagasologa e faifai pea, ae le o se mea e tupu i se taimi e tasi e mafua mai i se aafiaga mamana pe ofoofogia foi. O lea upu ma lea upu, e faasolosolo malie toetoe lava ina le matauina, o o tatou faamoemoega, o o tatou mafaufauga, o a tatou upu, ma a tatou mea e fai e ogatusa ma le finagalo o le Atua,” Liahona, Nov. 2012, 107–8).
5 Filemu
O se tasi o faamanuiaga ua folafola mai ia i tatou pe a tatou tatalo o le filemu ma le toafimalie e ala i le Agaga Paia. Aua, ua ta’ua o Ia o le Faamafanafana. Ia faamautinoa o le a oo mai le filemu e oo lava i taimi faigata. Manatua le folafolaga a le Alii i le Ioane 14:27: “Ou te tuuina atu ia te outou le manuia, o lou manuia ou te avatu ai ia te outou: ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau.” O le a iu lava ina oo mai le filemu pe a tatou ole atu.
O le tatalo o se auala sao e fesootai atu ai ma lo tatou Tama alofa. Faaaoga ma tuu atu ia te Ia e faamanuia mai ai oe. Ae pe a uma ona maua nei faamanuiaga mai se tatalo faamaoni, ia manatua e faailoa atu lou agaga faafetai i—ua e matea—se tatalo.