O Leo o Le Au Paia o Aso e Gata Ai
Faaaloalo i Tamaitai—E Tusa Po o Le A Le Matua
Ata na tusia e Joshua Dennis
Sa valaauina atu e aoao le Perisitua Arona i lau paranesi, ma o se tasi o aso Sa o le autu o le faaaloalo i tamaitai. I le aluga o le lesona sa matou talanoaina o le faaaloalo e ao ona faaalia i tamaitai uma, mai le pepe meamea i le tamaitai matua, e pei ona taua i le tusi lesona a le Perisitua Arona.
O Kaperielu (ua suiga le igoa), o se tasi o alii talavou i le vasega, sa fai mai e faapea ia te ia o se fafine o se tamaitai ua lava le matua e avea ma ona tina ma o soo se tamaitai e laitiiti atu e ao ona faaaloalo ia te ia aua o ia o se alii. E leai se tasi o le vasega sa ioeina faatasi ma ia, lea sa faigata ai ia te ia ona talitonu ai.
Sa faaauau ona matou talanoaina auala e faaali atu ai le faaaloalo i tamaitai, ma sa ou tau atu ia i latou, o se tasi o mea ou te faia o le tuu atu lea o lou nofoa i luga o le veni femalagaai o tagata lautele pe a sau i luga se tamaitai, e tusa pe o le a tu ai mo le 30–40 minute a o lei taunuu atu i lou taunuuga. Sa ou tau atu ia i latou, e ao i alii ona tutu ma tuu atu i tamaitai ia nofoa. Sa lei toafimalie lava Kaperielu i le lesona.
I aso e lua na sosoo ai, sa ou alu ai i se veni ma sa nofo i lalo i le pito i luma. Sa tumu uma nofoa ina ua o mai i luga se tamaloa ma lona afafine laitiiti ma savavali atu i le pito i tua. E lei leva, sa ulufale mai se tamaitai faamatuatua i le veni, ma sa ou tu i luga ma tuuina atu lou nofoa ia te ia.
Sa popo mai e se tamaloa lou tauau, ma faasino atu i le pito i tua o le veni, ma fai mai sa i ai se alii talavou sa manao ia ou taulai atu ia te ia. Sa ou savali i tua e vaai po o ai lenei alii talavou. Sa ataata tagata uma sa latalata ane aua sa faatoa tuuina atu e le alii talavou lana nofoa i le tamaloa ma lona afafine e fa tausaga sa o mai i luga o le veni i se taimi muamua atu. O Kaperielu, le alii talavou i lau vasega perisitua, o le sa lagona le le toafimalie i le autu o le faaaloalo i tamaitai.
Sa ia fai mai ia te au, “Sa ou vaai atu pe mata e te tu i luga mo le fafine sa sau i totonu o le veni. Sa ou lagona le aafia ai ina ua ou vaaia sa e faia, ma sa ou manatua ai la tatou lesona i le aso Sa ma tu ai i luga mo le teineitiiti laitiiti ma lona tama.”
Oka sou fiafia i le vaai atu i a tatou alii talavou o loo ola ai i mea sa aoaoina ai i latou i le Ekalesia. Sa manatu o ia o le faaaloalo sa faapolopoloina mo na o tamaitai matutua atu, ae ina ua maea la matou lesona o le aso Sa, sa ia filifili e faaali atu le faaaloalo i le teineitiiti e fa tausaga le matua.
Sa ou fiafia foi sa ou filifili e ola ai i mea sa ou aoaoina, e fesoasoani ia te ia e faaali atu le faaaloalo mo tamaitai o vaitausaga uma. Sa ou manatu pe o le a faapefea ona lagona pe ana ou le tu i luga mo le tamaitai i totonu o le veni. Sa oo mai se mau i lou mafaufau: “Afai ua outou iloa ia mea, amuia outou pe a outou faia” (Ioane 13:17).